nuol.edu.la



ໜ່ວຍພັກຫ້ອງການຄຸ້ມຄອງນັກສຶກສາ ມຊ ຈັດພິທີ ຮັບສະມາຊິກພັກສົມບູນໃໝ່

1502766686 tmp IMG 7874

        ໃນຕອນບ່າຍ ວັນທີ 11 ສິງຫາ 2017 ຜ່ານມານີ້, ໜ່ວຍພັກຫ້ອງການຄຸ້ມຄອງນັກສຶກສາ ມະຫາວິທະຍາໄລແຫ່ງຊາດ, ໄດ້ຈັດພິທີຮັບສະມາຊິກພັກສົມບູນໃໝ່; ພິທີໄດ້ຈັດຂຶ້ນທີ່ຫ້ອງປະຊຸມ ຕຶກສໍານັກງານອະທິການບໍດີ ມະຫາວິທະຍາໄລແຫ່ງຊາດ, ໂດຍການເຂົ້າຮ່ວມເປັນປະທານຂອງ ສະຫາຍ ນາງ ຍອນວິໄລ ໄຊຍະເລີດ ຄະນະພັກຮາກຖານ ສໍານັກງານອະທິການບໍດີ, ມີສະຫາຍ ອຈ. ຄໍາແສນ ສຸດທະວົງ ເລຂາຄະນະໜ່ວຍພັກ, ຫົວໜ້າຫ້ອງການຄຸ້ມຄອງນັກສຶກສາ ມະຫາວິທະຍາໄລແຫ່ງຊາດ, ມີບັນດາສະຫາຍຄະນະພັກ ຫ້ອງການຄຸ້ມຄອງນັກສຶກສາ, ແຂກທີ່ຖືກເຊີນ ແລະບັນດາສະຫາຍສະມາຊິກພັກສົມບູນ ແລະສໍາຮອງຂອງຫ້ອງການດັ່ງກ່າວເຂົ້າຮ່ວມ.

        ການຈັດພິທີຮັບສະມາຊິກພັກ ຂອງໜ່ວຍພັກຫ້ອງການຄຸ້ມຄອງນັກສຶກສາໃນຄັ້ງນີ້ ແມ່ນຮັບສະມາຊິກພັກສໍາຮອງເຂົ້າເປັນສະມາຊິກພັກສົມບູນ ຕາມຂໍ້ຕົກລົງ ຂອງອົງຄະນະພັກ ມະຫາວິທະຍາໄລແຫ່ງຊາດ, ສະບັບເລກທີ 108/ມຊ.ພອ, ລົງວັນທີ 21 ກໍລະກົດ 2017 ຈໍານວນ 2 ສະຫາຍ ຄື: ສະຫາຍ ນາງ ພອນມະນີ ພົມວິໄລ ແລະສະຫາຍ ນາງ ວັນໄມກາ ວ່າງ ທັງສອງສະຫາຍເປັນພະນັກງານ ປະຈໍາຢູ່ໂຮງໝໍ ວິທະຍາເຂດດົງໂດກ; ພາຍຫຼັງທີທັງສອງສະຫາຍໄດ້ເຂົ້າເປັນສະມາຊິກພັກສໍາຮອງຄົບ 1 ປີ.

       ໃນໂອກາດດັ່ງກ່າວ ສະຫາຍ ອຈ. ຄໍາແສນ ສຸດທະວົງ ເລຂາໜ່ວຍພັກ, ຫົວໜ້າຫ້ອງການຄຸ້ມຄອງນັກສຶກສາ ກໍໄດ້ມີຄໍາເຫັນຕໍ່ພິທີ, ເຊິ່ງສະຫາຍກ່າວບາງຕອນວ່າ: ໜ່ວຍພັກຫ້ອງການຄຸ້ມຄອງນັກສຶກສາ ເປັນໜ່ວຍພັກໜຶ່ງທີ່ຂຶ້ນກັບ ຮາກຖານພັກສໍານັກງານອະທິການບໍດີ ມະຫາວິທະຍາໄລແຫ່ງຊາດ, ເຊິ່ງຕະຫຼອດໄລຍະທີ່ຜ່ານມາ ໜ່ວຍພັກຫ້ອງການຄຸ້ມຄອງນັກສຶກສາໄດ້ເອົາໃຈໃສ່ ໃນການຊີ້ນໍາໆພາ ບັນດາພະນັກງານສະມາຊິກພັກ ກໍຄື ພະນັກງານໃນຫ້ອງການ ເຄື່ອນໄຫວວຽກງານຕາມຂອບເຂດສິດ ແລະພະລະບົດບາດຂອງຕົນ ບົນພື້ນຖານການຊີ້ນໍາໆພາຂອງຄະນະພັກຮາກຖານສໍານັກງານອະທິການບໍດີກໍຄື ອົງຄະນະພັກ ມະຫາວິທະຍາໄລແຫ່ງຊາດ ແລະໜຶ່ງໃນວຽກງານທີ່ທາງຫ້ອງການໄດ້ປະຕິບັດຜ່ານມານັ້ນ, ວຽກງານຂະຫຍາຍສະມາຊິກພັກຂອງໜ່ວຍຕົນ ກໍເປັນວຽກງານທີ່ສໍາຄັນ ແລະໄດ້ເອົາໃຈໃສ່ຕະຫຼອດມາ ບົນພື້ນຖານລະບຽບຫຼັກການທີ່ຖືກຕ້ອງ ແລະສອດຄ່ອງຂອງພັກ.

       ຂະນະດຽວກັນ ສະຫາຍ ນາງ ຍອນວິໄລ ໄຊຍະເລີດ ຄະນະພັກຮາກຖານ ສໍານັກງານອະທິການບໍດີ ກໍໄດ້ກ່າວໂອ້ລົມຕໍ່ພິທີ ເຊິ່ງກ່ອນອື່ນສະຫາຍໄດ້ກ່າວຍ້ອງຍໍ-ຊົມເຊີຍຕໍ່ການຊີ້ນໍາໆພາ ຂອງໜ່ວຍພັກຫ້ອງການຄຸ້ມຄອງນັກສຶກສາ ທີ່ໄດ້ເອົາໃຈໃສ່ເຄື່ອນໄຫວວຽກງານຕາມພະລະໜ້າທີ່ຂອງຕົນ ຈົນໄດ້ຮັບຜົນສໍາເລັດໃນຫຼາຍໆວຽກງານ ໂດຍສະເພາະແມ່ນວຽກງານການສຶກສາຮົບຮົມການເມືອງແນວຄິດ, ຊ່ວຍເຫຼືອກໍ່ສ້າງພະນັກງານ ຈົນເຮັດໃຫ້ເຂົາເຈົ້າໄດ້ພັດທະນາຕົນເອງ ແລະມີຄວາມກ້າວໜ້າ ໄດ້ກ້າວເຂົ້າເປັນສະມາຊິກພັກສໍາຮອງ ແລະສົມບູນ; ພ້ອມທັງໄດ້ກ່າວເນັ້ນໃຫ້ ສະມາຊິກພັກສົມບູນໃໝ່ ທັງສອງສະຫາຍຈົ່ງເອົາໃຈໃສ່ ພັດທະນາຕົນເອງໃຫ້ມີຄວາມກ້າວໜ້າຮອບດ້ານ, ເປັນພະນັກງານທີ່ດີ ແລະເປັນສະມາຊິກພັກທີ່ດີຂອງໜ່ວຍພັກຕະຫຼອດໄປ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ໜ່ວຍພັກຫ້ອງການຄຸ້ມຄອງນັກສຶກສາ ມຊ ຈັດພິທີ ຮັບສະມາຊິກພັກສົມບູນໃໝ່

ການຮັບສະໝັກ

ທຶນການສຶກສາ