nuol.edu.la



ພິທີປະດັບຫຼຽນກາມິດຕະພາບໃຫ້ແກ່ ອະດີດຊ່ຽວຊານປະຈຳ ສູນຄົ້ນຄວ້າກົດໝາຍລາວ-ຍີ່ປຸ່ນ

1502768319 tmp IMG 8658

         ໃນຕອນບ່າຍວັນທີ 11 ສິງຫາ 2017 ຜ່ານມານີ້, ຄະນະນິຕິສາດ ແລະລັດຖະສາດ ມະຫາວິທະຍາໄລແຫ່ງຊາດ, ໄດ້ຈັດພິທີປະດັບຫຼຽນກາມິດຕະພາບໃຫ້ແກ່ທ່ານ ຮສ.ປອ. ເຊໂຕະ ເຮໂລຢູກິ ອະດີດຊ່ຽວຊານປະຈຳ ສູນຄົ້ນຄວ້າກົດໝາຍລາວ-ຍີ່ປຸ່ນ, ຄະນະນິຕິສາດ ແລະລັດຖະສາດ ມະຫາວິທະຍາໄລແຫ່ງຊາດ, ໂດຍການເຂົ້າຮ່ວມເປັນປະທານຂອງທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ, ທ່ານ ຮສ. ວຽງວິໄລ ທ່ຽງຈັນໄຊ ຄະນະບໍດີ ຄະນະນິຕິສາດ ແລະລັດຖະສາດ, ມີບັນດາທ່ານ ຫົວໜ້າ-ຮອງຫົວໜ້າ ຫ້ອງການ, ຫົວໜ້າ ແລະຮອງພາກວິຊາ, ຫົວໜ້າໂຄງການລຸກຊຳບວກ, ໂຄງການໄຈກ້າ, ຕາງໜ້າສະຖານທູດຢີ່ປຸ່ນປະຈຳ ສປປ ລາວ, ມີບັນດາພະນັກງານ, ຄູ-ອາຈານ ທີ່ກ່ຽວຂ້ອງເຂົ້າຮ່ວມ.

          ໂອກາດນີ້, ທ່ານ ຮສ. ໂພສີ ທິບດາວັນ ຫົວໜ້າຫ້ອງການຈັດຕັ້ງ ແລະຄຸ້ມຄອງພະນັກງານ ມະຫາວິທະຍາໄລແຫ່ງຊາດ, ໄດ້ຂຶ້ນອ່ານ ດຳລັດ ຂອງນາຍົກລັດຖະມົນຕີແຫ່ງ ສປປ ລາວ, ສະບັບເລກທີ 82/ນຍ, ລົງວັນທີ 22 ເດືອນ ກຸມພາ 2017, ວ່າດ້ວຍການ ປະດັບຫຼຽນກາມິດຕະພາບໃຫ້ແກ່ ທ່ານ ຮສ. ປອ. ເຊໂຕະ ເຮໂລຢູກິ ອະດີດຊ່ຽວຊານປະຈຳ ສູນຄົ້ນຄວ້າກົດໝາຍລາວ-ຍີ່ປຸ່ນ, ຄະນະນິຕິສາດ ແລະລັດຖະສາດ ມະຫາວິທະຍາໄລແຫ່ງຊາດ ທີ່ມີຜົນງານການປະກອບສ່ວນ ໃນການສົ່ງເສີມສາຍພົວພັນ ການຮ່ວມມືເພື່ອການພັດທະນາ ສປປ ລາວ, ເຊິ່ງໃຫ້ກຽດປະດັບຫຼຽນກາມິດຕະພາບໃຫ້ແກ່ທ່ານ ຮສ. ປອ. ເຊໂຕະ ເຮໂລຢູກິ ໃນຄັ້ງນີ້,ໂດຍທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ.

          ໃນໂອກາດດຽວກັນ, ທ່ານ ສຈ. ປອ. ສົມສີ ຍໍພັນໄຊ ກໍໄດ້ກ່າວສະແດງຄວາມຂອບໃຈຢ່າງສູງ ສຳລັບການຮ່ວມມືລະຫວ່າງ ມະຫາວິທະຍາໄລແຫ່ງຊາດ ແລະມະຫາວິທະຍາໄລ ນາໂກຢະ (NAGOYA) ປະເທດຢີ່ປຸ່ນ, ທີ່ໄດ້ແລກປ່ຽນຊ່ຽວຊານທີ່ມີຄວາມຮູ້-ຄວາມສາມາດ ເວົ້າລວມ; ເວົ້າສະເພາະ ກໍແມ່ນທ່ານ ຮສ. ປອ. ເຊໂຕະ ເຮໂລຢູກິ ທີ່ປະຈຳຢູ່ສູນຄົ້ນຄວ້າກົດໝາຍລາວ-ຍີ່ປຸ່ນ ຄະນະນິຕິສາດ ແລະລັດຖະສາດ ມະຫາວິທະຍາໄລແຫ່ງຊາດ, ເຊິ່ງໄດ້ມີຜົນງານຫຼາຍຢ່າງທີ່ໂດດເດັ່ນ ຕະຫຼອດໄລຍະເວລາ 3 ປີ (2013-2016) ເຊັ່ນ: ໄດ້ມີການເປີດຫຼັກສູດສອນພາສາຍີ່ປຸ່ນ ສຳລັບນັກສຶກສາ, ຈັດຕັ້ງທີມງານເຮັດການຄົ້ນຄວ້າວິໄຈ, ສ້າງກິດຈະກຳນອກເວລາຮຽນ ໂດຍການສ້າງຫ້ອງພິພາກສາສານ ທີ່ຄ້າຍຄືຂອງປະເທດຍີ່ປຸ່ນ ເພື່ອໃຫ້ນັກສຶກສາໄດ້ຮຽນຮູ້ ແລະຄັດເລືອກນັກສຶກສາໄປທັດສະນະທີ່ປະເທດຍີ່ປຸ່ນ, ເຖິງວ່າພະລະກິດຂອງ ທ່ານ ຮສ. ປອ. ເຊໂຕະ ເຮໂລຢູກິ ທີ່ສູນຄົ້ນຄວ້າກົດໝາຍລາວ-ຍີ່ປຸ່ນຈະສິ້ນສຸດລົງ, ແຕ່ທັງສອງມະຫາວິທະຍາໄລ ກໍຍັງຄົງມີການສືບຕໍ່ການຮ່ວມມືກັນຢ່າງກວ້າງຂວາງໃນອະນາຄົດ ແລະແໜ້ນແຟ້ນຍິ່ງໆຂຶ້ນອີກ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ພິທີປະດັບຫຼຽນກາມິດຕະພາບໃຫ້ແກ່ ອະດີດຊ່ຽວຊານປະຈຳ ສູນຄົ້ນຄວ້າກົດໝາຍລາວ-ຍີ່ປຸ່ນ

ການຮັບສະໝັກ

ທຶນການສຶກສາ