nuol.edu.la



ທ່ານຮອງອະທິການບໍດີ ມຊ ຕ້ອນຮັບການມາຢ້ຽມຢາມ ຂອງຄະນະນຳມະຫາວິທະຍາໄລ ທ່າຍຫງວຽນ ສສ. ຫວຽດນາມ

1503471625 tmp IMG 8940

          ໃນຕອນເຊົ້າ ວັນທີ 22 ສິງຫາ 2017 ນີ້, ທ່ານ ຮສ. ປອ. ນາງ ສົມຈັນ ບຸນພັນມີ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ຮສ. ປອ. ອາທິດອຸໄທ ຈະຕຸພອນໄຊ ຄະນະບໍດີ ຄະນະສຶກສາສາດ, ມີຫົວໜ້າຫ້ອງການ, ຫົວໜ້າພາກວິຊາພາສາ ຫວຽດນາມ ຄະນະອັກສອນສາດ ແລະພະນັກງານ-ຄູອາຈານທີ່ກ່ຽວຂ້ອງ ໄດ້ຕ້ອນຮັບການຢ້ຽມຢາມຂອງທ່ານ ສຈ. ປອ. ຟາມ ຮົງກວາງ ອະທິການບໍດີ ມະຫາວິທະຍາໄລ ທ່າຍຫງວຽນ ສສ ຫວຽດນາມ ພ້ອມດ້ວຍຄະນະ ທີ່ຫ້ອງຮັບແຂກຕຶກສໍານັກງານອະທິການບໍດີ ມະຫາວິທະຍາໄລແຫ່ງຊາດ.

          ໂອກາດນີ້, ທ່ານ ຮສ. ປອ. ນາງ ສົມຈັນ ບຸນພັນມີ ຮອງອະທິການບໍດີ ມະຫາວິທະຍາໄລແຫ່ງຊາດ, ກໍເປັນກຽດກ່າວຕອນຮັບ ພ້ອມທັງລາຍງານສະພາບລວມໂດຍຫຍໍ້ຂອງມະຫາວິທະຍາໄລແຫ່ງຊາດ ແລະການຮ່ວມມືລະຫວ່າງ ມະຫາວິທະຍາໄລແຫ່ງຊາດ ແລະ ມະຫາວິທະຍາໄລ ທ່າຍຫງວຽນ ວ່າ: ມະຫາວິທະຍາໄລແຫ່ງຊາດ ມີການຮ່ວມມືກັບ ມະຫາວິທະຍາໄລທ່າຍຫງວຽນ ໃນການແລກປ່ຽນນັກສຶກສາ ແລະນັກວິຊາການ, ເຊິ່ງໃນປັດຈຸບັນມີນັກສຶກສາ ທີ່ກຳລັງສຶກສາ ຢູ່ມະຫາວິທະຍາໄລທ່າຍຫງວຽນ ທັງໝົດ 242 ຄົນ. ນອກນັ້ນ ເພື່ອເຮັດໃຫ້ການຮ່ວມມືລະຫວ່າງສອງມະຫາວິທະຍາໄລ ແໜ້ນແຟ້ນຍິ່ງຂຶ້ນໃນອະນາຄົດພວກເຮົາຍັງຈະໄດ້ສືບຕໍ່ການຮ່ວມມືໃນຫຼາຍໆດ້ານຕໍ່ໄປ.

          ຂະນະດຽວກັນ, ທ່ານ ສຈ. ປອ. ຟາມ ຮົງກວາງ ກໍໄດ້ສະເໜີໂດຍຫຍໍ້ກ່ຽວກັບ ມະຫາວິທະຍາໄລ ທ່າຍຫງວຽນ ວ່າ: ມະຫາວິທະຍາໄລ ທ່າຍຫງວຽນ ເປັນມະຫາວິທະຍາໄລສ້າງຄູ ແຫ່ງໜຶ່ງຂອງ ສສ ຫວຽດນາມ, ສ້າງຕັ້ງຂຶ້ນເປັນໄລຍະເວລາ 51 ປີ, ປັດຈຸບັນມີນັກສຶກສາ ທັງໝົດ 8,000 ຄົນ, ມີນັກສຶກສາຕ່າງປະເທດ 300 ຄົນ; ເຊິ່ງສ່ວນໃຫຍ່ແມ່ນນັກສຶກສາ ມາຈາກ ສປປ ລາວ, ມີການດຳເນີນການຮຽນ-ການສອນໃນ 3 ລະດັບຄື: ປະລິນຍາເອກ, ປະລິນຍາໂທ ແລະປະລິນຍາຕີ. ບົນພື້ນຖານການຮ່ວມມື ຂອງສອງມະຫາວິທະຍາໄລ ກໍຄືສອງປະເທດ ລາວ-ຫວຽດນາມ ແມ່ນມີການຮ່ວມມືທາງດ້ານເສດຖະກິດ-ການຄ້າ, ການພັດທະນາທາງດ້ານໂຄງລ່າງພື້ນຖານ ແລະດ້ານການສຶກສາ ເຫັນວ່າມີສາຍພົວພັນໃນການຮ່ວມມືຢ່າງເລິກເຊິ່ງ. ໃນຕອນທ້າຍ ທ່ານ ສຈ. ປອ. ຟາມ ຮົງກວາງ ກໍໄດ້ກ່າວສະແດງຄວາມຂອບໃຈໃນການຕອນຮັບ ຂອງມະຫາວິທະຍາໄລແຫ່ງຊາດ ແລະແລກປ່ຽນຂອງທີ່ລະນຶກເຊິ່ງກັນ ແລະກັນ ອີກດ້ວຍ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ທ່ານຮອງອະທິການບໍດີ ມຊ ຕ້ອນຮັບການມາຢ້ຽມຢາມ ຂອງຄະນະນຳມະຫາວິທະຍາໄລ ທ່າຍຫງວຽນ ສສ. ຫວຽດນາມ

ການຮັບສະໝັກ

ທຶນການສຶກສາ