nuol.edu.la



ຄສປ ຈັດການແຂ່ງຂັນອອກແບບສະຖາປັດຕະຍະກຳ ແລະຜັງເມືອງ ຄັ້ງທີ II

1503475625 tmp IMG 9155

          ໃນວັນທີ 22 ສິງຫາ 2017 ນີ້, ຄະນະສະຖາປັດຕະຍະກຳສາດ ມະຫາວິທະຍາໄລແຫ່ງຊາດໄດ້ຈັດການແຂ່ງຂັນອອກແບບ ສະຖາປັດຕະຍະກຳ ແລະຜັງເມືອງ ຄັ້ງທີ II ພາຍໃຕ້ຫົວຂໍ້: “ເມືອງທີ່ຕົນເອງຢາກຢູ່” ຂຶ້ນທີ່ຫ້ອງປະຊຸມຂອງຄະນະດັ່ງກ່າວ; ໂດຍການເປັນປະທານຂອງທ່ານ ຮສ. ປອ. ອຸດົມ ພອນຄຳເພັງ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ຮສ. ມະໂນລົດ ພິນິດ ຮອງຄະນະບໍດີ ຄະນະສະຖາປັດຕະຍະກຳສາດ, ທ່ານ ຢອນ ກີທັງ ຜູ້ອຳນວຍການສູນການສຶກສາ ແລະວັດທະນະທຳເກົາຫຼີ-ລາວ, ມີບັນດາແຂກທີ່ຖືກເຊີນ, ພະນັກງານ-ຄູອາຈານ ແລະນັກສຶກສາເຂົ້າຮ່ວມ.

          ໃນໂອກາດນີ້, ທ່ານ ຮສ. ມະໂນລົດ ພິນິດ ໄດ້ຂຶ້ນກ່າວເປີດພິທີວ່າ: ການແຂ່ງຂັນອອກແບບສະຖາປັດຕະຍະກຳ ແລະຜັງເມືອງແມ່ນດຳເນີນເປັນ ປີທີ II ຕໍ່ຈາກ ປີ 2016 ທີ່ຜ່ານມາ, ຈຸດປະສົງຂອງການແຂ່ງຂັນ ແມ່ນເປັນການກໍ່ສ້າງແນວຄວາມຄິດໃຫ້ແກ່ນັກສຶກສາ, ເພື່ອໃຫ້ນັກສຶກສາໄດ້ຮຽນຮູ້ກ່ຽວກັບການອອກແບບໃຫ້ເໝາະສົມກັບຄວາມຕ້ອງການຂອງຜູ້ຊົມໃຊ້, ເພື່ອເຂົ້າຮ່ວມການແຂ່ງຂັນໃນລະດັບອາຊຽນ ກໍຄືລະດັບສາກົນ; ສຳລັບການຈັດງານແຂ່ງຂັນໃນປີນີ້, ມີນັກສຶກສາສົ່ງຜົນງານເຂົ້າຮ່ວມການແຂ່ງຂັນທັງໝົດ 96 ຜົນງານ ແລະຜ່ານການຄັດເລືອກຈາກຄະນະກຳມະການ ເພື່ອເຂົ້າສູ່ຮອບຕັດສິນທັງໝົດ 44 ຜົນງານ ແລະເຫັນວ່າການຈັດການແຂ່ງຂັນໃນຄັ້ງນີ້ ປະສົບຜົນສຳເລັດພໍສົມຄວນ ໃນການປຸກລະດົມນັກສຶກສາສົ່ງຜົນງານເຂົ້າຮ່ວມການແຂ່ງຂັນ. ນອກນັ້ນ ການແຂ່ງຂັນໃນປີຕໍ່ໜ້າ ແມ່ນຈະໄດ້ຈັດການແຂ່ງຂັນໃນຫົວຂໍ້ “Smart ສະຖາປັດຕະຍະກຳ” ທີ່ຄຳນຶງເຖິງການໃຊ້ພະລັງຈາກທຳມະຊາດເປັນຫຼັກ, ໃນການຈັດການແຂ່ງຂັນໃນຄັ້ງນີ້ແມ່ນໄດ້ຮັບການສະໜັບສະໜູນຈາກ ສູນການສຶກສາ ວັດທະນະທຳ ລາວ-ເກົາຫຼີ.

          ຜ່ານການຄັດເລືອກ ແລະໃຫ້ຄະແນນຂອງຄະນະກຳມະການ ຜູ້ຊະນະເລີດໄດ້ແກ່ທ້າວ ສຸກສະແຫວງ ດວງວິໄລ ນັກສຶກສາປີທີ 4 ພາກວິຊາ ອອກແບບສະຖາປັດຕະຍະກຳ ໄດ້ເປັນຕົວແທນຈາກຄະນະ ສະຖາປັດຕະຍະກຳສາດ ໄປທັດສະນະສຶກສາ ທີ່ປະເທດເກົາຫຼີ, ອັນດັບທີ 2ໄດ້ແກ່ ທ້າວ ພອນປະເສີດ ຈັນທະວົງ ນັກສຶກສາປິທີ 4 ຈາກພາກວິຊາ ອອກແບບສະຖາປັດຕະຍະກໍາ ໄດ້ຮັບຄອມພິວເຕີີ 1 ເຄື່ອງ ພ້ອມຂອງຮາງວັນ ແລະໃບຢັ້ງຢືນ ແລະອັນດັບທີ 3 ໄດ້ແກ່ ທ້າວ ຜາໄຊ ແສງຈະເລີນ ນັກສຶກສາ ປີທີ 4 ຈາກພາກວິຊາ ອອກແບບສະຖາປັດຕະຍະກຳ ໄດ້ຮັບຂອງຮາງວັນພ້ອມໃບຢັ້ງຢືນ ລວມມູນຄ່າຮາງວັນຈັດການແຂ່ງຂັນໃນຄັ້ງແມ່ນຫຼາຍ 50 ລ້ານກີບ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ຄສປ ຈັດການແຂ່ງຂັນອອກແບບສະຖາປັດຕະຍະກຳ ແລະຜັງເມືອງ ຄັ້ງທີ II

ການຮັບສະໝັກ

ທຶນການສຶກສາ