nuol.edu.la



ມະຫາວິທະຍາໄລແຫ່ງຊາດ ຈັດພິທີປາຖະກະຖາວັນສ້າງຕັ້ງອາຊຽນຄົບຮອບ 50 ປີ ແລະວັນເຂົ້າຮ່ວມປະຊາຄົມເສດຖະກິດອາຊຽນ

1505283684 tmp IMG 0088

          ຕະຫລອດໄລຍະ 50 ປີທີ່ຜ່ານມາ, ອາຊຽນ ​ໄດ້​ພັດທະນາ​ຕົນ​ເອງ​ໃຫ້ສອດຄ່ອງ​ກັບສະພາບການຂອງ​ພາກ​ພື້​ນ ​ແລະ ສາກົນທີ່ມີການປ່ຽນແປງ​ໃນ​​ແຕ່ລະ​ໄລຍະຊຶ່ງ​ໄດ້​ເຮັດ​ໃຫ້ອາຊຽນເຕີບ​ໃຫຍ່​ຂະຫຍາ​ຍຕົວ​​ເທື່ອ​ລະກ້າວ, ໃນຕອນເຊົ້າວັນ 6   ກັນຍາ 2017 ນີ້, ມະຫາວິທະຍາໄລແຫ່ງຊາດ ໄດ້ຈັດພິທີປາຖະກະຖາວັນສ້າງຕັ້ງອາຊຽນຄົບຮອບ 50 ປີ ແລະວັນເຂົ້າຮ່ວມປະຊາຄົມເສດຖະກິດອາຊຽນ ທີ່ຫ້ອງປະຊຸມສະໂມສອນໃຫຍ່ ມະຫາວິທະຍາໄລແຫ່ງຊາດ ໂດຍການປາຖະກະຖາຂອງທ່ານ ຈາຕຸລົງ ບົວສີສະຫວັດ ກຳມະການພັກ ກົມອາຊຽນ, ຮອງກົມອາຊຽນ ແລະເຂົ້າຮ່ວມຮັບຟັງມີທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ ມີບັນດາທ່ານ ຄະນະບໍດີ, ຮອງຄະນະບໍດີ, ຫົວໜ້າ ແລະຮອງຫົວໜ້າຫ້ອງການ, ພະນັກງານ, ຄູ-ອາຈານ ແລະນັກສຶກສາເຂົ້າຮ່ວມ.

          ໃນໂອກາດປາຖະກະຖາ, ທ່ານ ຈາຕຸລົງ ບົວສີສະຫວັດ ໄດ້ກ່າວບາງຕອນວ່າ: ອາຊຽນ ໄດ້ຂະຫຍາຍສະມາຊິກຂອງຕົນໃຫ້ກວມເອົາ 10 ປະເທດ ໃນອາຊີຕາເວັນອອກສ່ຽງໃຕ້ ແລະ ​ເພີ່ມທະວີ​ການຮ່ວມມືກັນ ທັງລວງເລິກ ແລະລວງກວ້າງ​​ ​ເທື່ອ​ລະ​ກ້າວຈົນ​ກວມ​ເອົາ​ທຸກ​ຂົງ​ເຂດ ນັບແຕ່ດ້ານເສດຖະກິດ, ສັງຄົມ-ວັດທະນະທໍາໄປເຖິງດ້ານການເມືອງ-ຄວາມໝັ້ນຄົງ. ອາຊຽນ ​ໄດ້ຮັດແໜ້ນການ​ພົວພັນກັບ​ພາຍ​ນອກ​ໂດຍ​ຜ່ານ​ບັນດາ​ກົນ​ໄກ​ທີ່​ອາ​ຊຽນ ລິ​ເລີ່​ມຂຶ້ນ ຄື: ອາຊຽນບວກໜຶ່ງ, ອາຊຽນບວກ​ສາມ, ກອງ​ປະຊຸມ​ລັດຖະມົນຕີ​ປ້ອງ​ກັນ​ປະ​ເທດ, ​ເວທີ​ປຶກສາ​ຫາລືພາກ​ພື້ນ​ອາຊຽນ ​ແລະກອງ​ປະຊຸມ​ສຸດ​ຍອດ​ອາຊີ​ຕາ​ເວັນ​ອອກ ​ແລະມີ​ຮູບ​​ແບບ​ການ​ຮ່ວມ​ມືກັບ​ຄູ່ຮ່ວມ​ມື​ພາຍ​ນອກ​ຕາມ​ທ່າ​ແຮງ ​ແລະຄວາມ​ເໝາ​ະສົມກັບສະພາບການຕົວຈິງຂອງແຕ່ລະປະເທດ. ສິ່ງ​ສໍາຄັນ​ທີ່​ສຸດ, ຄວາມ​ເປັນ​ແກນ​ກາງຂອງ​ອາຊຽນເປັນທີ່ຮັບຮູ້​ໃນໂຄງ​ສ້າງ​ພາກ​ພື້ນທີ່​ພວມ​​ຜັນ​ແປຊຶ່ງໂຄງສ້າງດັ່ງກ່າວໄດ້ຮັບການ​ເສີມ​ຂະຫຍາຍຈາກບັນດາ​ກົນ​ໄກທີ່​ອາຊຽນ​ເປັນ​ຜູ້​ລິ​ເລີ່​ມຂຶ້ນ. ສປປ ລາວ ເຮົາ ມີ​ຄວາມພາກ​ພູມ​ໃຈເປັນຢ່າງຍິ່ງ​ທີ່ເປັນ​ສ່ວນໜຶ່ງ​​ຂອງຄອບຄົວ​ອາຊຽນ. ນັບແຕ່ ສປປ ລາວ ໄດ້ເຂົ້າເປັນສະມາຊິກອາຊຽນໃນປີ 1997, ອາຊຽນ​ ໄດ້ກາຍເປັນ​ເສົາ​ຄ້ຳໜຶ່ງທີ່​ສໍາຄັນ​ໃນ​ນະ​ໂຍບາຍ​ການ​ຕ່າງປະ​ເທດ ຂອງ ສປປ ລາວ. ຕະຫຼອດ​​ໄລຍະ 20 ປີ ​ຜ່ານ​ມາ, ສປປ ລາວ ໄດ້ເຄື່ອນໄຫວວຽກງານອາຊຽນຢ່າງຕັ້ງຫນ້າ​ ​ແລະໄດ້​ປະຕິບັດພັນທະ​ຕ່າງໆຂອງ​ຕົນ ອັນໄດ້ນໍາຜົນປະໂຫຍດມາສູ່ປະ​ເທດ​ຊາດ ​ແລະປະຊາຊົນ​ລາວ, ອັນສໍາຄັນ ໃນ​ໄລຍະ​ຜ່ານ​ມາ ສປປ ລາວ ກໍໄດ້ສໍາເລັດການເປັນປະທານອາຊຽນ 2 ຄັ້ງ ຄື: ຄັ້ງທີ 1 ໃນປີ 2004-2005 ແລະຄັ້ງທີ 2 ໃນປີ 2016.

          ປະຊາຄົມເສດຖະກິດອາຊຽນແມ່ນການຮ່ວມກຸ່ມຂອງບັນດາສະມາຊິກອາຊຽນ ທີ່ຈະເປັນຕະຫຼາດແຫ່ງດຽວກັນໃນອະນາຄົດ, ປະຊາຄົມອາຊຽນຖືກສ້າງຕັ້ງຂຶ້ນໃນກອງປະຊຸມຄັ້ງທີ 9 ທີ່ປະເທດອິນໂດເນເຊຍ ໃນເດືອນ ຕຸລາ ປີ 2003, ຕໍ່ມາໃນກອງປະຊຸມສຸດຍອດອາຊຽນ ຄັ້ງທີ 10 ທີ່ນະຄອນຫຼວງວຽງຈັນ ກໍໄດ້ສືບຕໍ່ຮ່າງກົດບັດອາຊຽນຂຶ້ນໃນຖະແຫຼງການວຽງຈັນທີ່ເອີ້ນກັນວ່າ (Vientiane Action Plan ຫຼື VAT) ປະຊາຄົມອາຊຽນປະກອບດ້ວຍ 3 ເສົາຄໍ້າຄື: ປະຊາຄົມການເມືອງ-ຄວາມໝັ້ນຄົງ, ປະຊາຄົມເສດຖະກິດ ແລະປະຊາຄົມວັດທະນະທໍາ-ສັງຄົມ. ຈຸດປະສົງເປົ້າໝາຍຂອງການສ້າງປະຊາຄົມອາຊຽນ ແມ່ນເຮັດໃຫ້ອາຊຽນເປັນປະຊາຊາດທີ່ພ້ອມພຽງຮຽງໜ້າກັນ, ເປີດກວ້າງການຮ່ວມມືກັບພາຍນອກ, ດຳລົງຊີວິດຢູ່ທ່າມກາງສັນຕິພາບ, ສະຖຽນລະພາບ ແລະຄວາມວັດທະນາຖາວອນ, ຜູກພັນເປັນຄູ່ຮ່ວມໃນການພັດທະນາ ໃຫ້ມີຄວາມກ້າວໜ້າ ແລະເປັນປະຊາຄົມທີ່ໂອບເອື້ອອາລີ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ມະຫາວິທະຍາໄລແຫ່ງຊາດ ຈັດພິທີປາຖະກະຖາວັນສ້າງຕັ້ງອາຊຽນຄົບຮອບ 50 ປີ ແລະວັນເຂົ້າຮ່ວມປະຊາຄົມເສດຖະກິດອາຊຽນ

ການຮັບສະໝັກ

ທຶນການສຶກສາ