nuol.edu.la



ອະດີດນັກສຶກສາ ເຄຫະຮຸ່ນທີ 5 ລະດົມທຶນກໍ່ສ້າງປ້າຍຊື່ ຄສປ

1505370660 tmp IMG 8130

ໃນຕອນບ່າຍ ວັນທີ 12 ກັນຍາ 2017 ນີ້, ອະດີດນັກສຶກສາ ເຄຫະສະຖານ ຮຸ່ນທີ 5 ໄດ້ຈັດພິທີ ວາງສີລາລືກການກໍ່ສ້າງປ້າຍ ຄະນະສະຖາປັດຕະຍະກຳສາດ ມະຫາວິທະຍາໄລແຫ່ງຊາດ, ໂດຍການເຂົ້າຮ່ວມຂອງທ່ານ ຮສ. ມະໂນລົດ ພິນິດ, ທ່ານ ຮສ. ບຸນຖະໄຫວ ແກ້ວປັນຍາ ຮອງຄະນະບໍດີ ຄະນະສະຖາປັດຕະຍະກຳສາດ, ມີບັນດາພະນັກງານ,ຄູ-ອາຈານ ແລະອະດີດນັກສຶກສາເຂົ້າຮ່ວມຢ່າງພ້ອມພຽງ.

ໃນໂອກາດນີ້, ທ່ານ ຮສ. ມະໂນລົດ ພິນິດ ໄດ້ກ່າວຕໍ່ພິທີວ່າ: ເປັນເວລາເກືອບ 30 ປີ ທີ່ອ້າຍ-ນ້ອງ ອະດີດນັກສຶກສາເຄຫະ ຮຸ່ນທີ 5 ໄດ້ສຳເລັດການສຶກສາ ຈາກສະຖາບັນການສຶກສາ ໂຮງຮຽນເຄຫະສະຖານວຽງຈັນ; ໂຮງຮຽນເຄຫະສະຖານວຽງຈັນ ເມື່ອກ່ອນຕັ້ງຢູ່ ບ້ານ ດົງປ່າລານ, ຫຼັງຈາກນັ້ນ ໄດ້ປ່ຽນຊື່ມາເປັນ ພາກວິຊາກໍ່ສ້າງຂົວທາງ ຂຶ້ນກັບ ຄະນະ ວິສະວະກຳສາດ ແລະແຍກຕົວອອກມາເປັນ ຄະນະສະຖາປັດຕະຍະກຳສາດ ມະຫາວິທະຍາໄລແຫ່ງຊາດ ໃນປັດຈຸບັນ, ມີນັກສຶກສາຫຼາຍໆຄົນທີ່ປະສົບຜົນສຳເລັດໃນໜ້າທີ່ການງານ ແລະໄດ້ນຳໃຊ້ຄວາມຮູ້, ຄວາມສາມາດ ທີ່ຕົນເອງໄດ້ສຶກສາຮໍ່າຮຽນມາ ປະກອບສ່ວນເຂົ້າໃນການສ້າງສາ ພັດທະນາປະເທດຊາດ ໃຫ້ມີຄວາມສີວິໄລ ແລະໃນນາມທີ່ຂ້າພະເຈົ້າ ເຄີຍເປັນອາຈານທີ່ສິດສອນບັນດາອະດີດນັກສຶກສາ ກໍຂໍສະແດງຄວາມຂອບໃຈຢ່າງສູງ ກັບການລະດົມທຶນກໍ່ສ້າງປ້າຍຊື່ ຄະນະ ສະຖາປັດຕະຍະກຳສາດໃນຄັ້ງນີ້.

ໂອກາດດຽວກັນ, ທ່ານ ຊະນະນິກອນ ອິນທະລາດ ອະດີດນັກສຶກສາເຄຫະສະຖານ ຮຸ່ນທີ 5 ກໍໄດ້ໃຫ້ສໍາພາດວ່າ: ໃນການຈັດພິທີວາງສີລາລືກໃນມື້ນີ້ ແມ່ນມີຄວາມພາກພູມໃຈຢ່າງຍິ່ງທີ່ໄດ້ຫວນຄືນມາສູ່ສະຖາບັນທີ່ຕົນເອງເຄີຍສຶກສາຮໍ່າຮຽນມາ ແລະໄດ້ສຳເລັດການສຶກສາໄປຖືວ່າເປັນເວລາດົນນານພໍສົມຄວນ; ເພື່ອເປັນການສະແດງຄວາມຮູ້ບຸນຄຸນແກ່ບັນດາທ່ານອາຈານທຸກຄົນທີ່ໄດ້ສິດສອນ, ພວກເຮົາຈຶ່ງໄດ້ມີແນວຄວາມຄິດລິເລີ່ມໂຮມຕົວກັນ ແລະລະດົມທຶນຮອນຈຳນວນໜຶ່ງເພື່ອມາ ກໍ່ສ້າງປ້າຍຊື່ ຄະນະສະຖາປັດຕະຍະກຳສາດ. ສຳລັບການກໍ່ສ້າງປ້າຍຊື່ ຂອງຄະນະສະຖາປັດ ແມ່ນຈະໃຊ້ງົບປະມານ 20,000,000 ກີບ, ປ້າຍມີຂະໜາດລວງກວ້າງ 1,20 ແມັດ, ລວງຍາວ 5 ແມັດ, ພື້ນຫຼັງປູນດ້ວຍຫີນອ່ອນ; ຄາດວ່າຈະໃຊ້ໄລຍະເວລາກໍ່ສ້າງປະມານ 25 ວັນຈິ່ງຈະສໍາເລັດ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ອະດີດນັກສຶກສາ ເຄຫະຮຸ່ນທີ 5 ລະດົມທຶນກໍ່ສ້າງປ້າຍຊື່ ຄສປ

ການຮັບສະໝັກ

ທຶນການສຶກສາ