nuol.edu.la



ມຊ ເຂົ້າຮ່ວມກິດຈະກຳສານສຳພັນມິດຕະພາບລາວ-ໄທຄັ້ງທີ 14

1511426700 tmp IMG-20171122-WA0002

 ໃນລະຫວ່າງ ວັນທີ 17 ພະຈິກ ຫາ ວັນທີ 20 ພະຈິກ 2017 ທີ່ຜ່ານມາ ທ່ານ ຮສ. ປອ. ນາງ ສົມຈັນ ບຸນພັນມີ ຮອງອະທິການບໍດີ ມະຫາວິທະຍາໄລແຫ່ງຊາດ ພ້ອມດ້ວຍ ຄະນະອາຈານ ແລະນັກສຶກສາ ຈາກສະໂມສອນນັກສຶກສາອາສາສະໝັກ ມະຫາວິທະຍາໄລແຫ່ງຊາດ ຈຳນວນ 15 ຄົນ ເຂົ້າຮ່ວມສະແດງສິລະປະ ໃນໂຄງການສານສຳພັນມິດຕະພາບລາວ-ໄທ ຄັ້ງທີ 14 ທີ່ ມະຫາວິທະຍາໄລລາດຊະພັດຊຽງໃໝ່ ຣາຊາອານາຈັກໄທ, ໃນການເຂົ້າຮ່ວມກິດຈະກຳຄັ້ງນີ້ ມີທັງໝົດ 13 ມະຫາວິທະຍາໄລ, ໃນນີ້ມະຫາວິທະຍາໄລຈາກ ສປປ ລາວ 4 ມະຫາວິທະຍາໄລ(ມະຫາວິທະຍາໄລແຫ່ງຊາດ, ມະຫາວິທະຍາໄລວິທະຍາສາດສຸຂະພາບ, ມະຫາວິທະຍາຈໍາປາສັກ ແລະມະຫາວິທະຍາໄລສຸພານຸວົງ) ແລະ 9 ມະຫາວິທະຍາໄລ ຈາກ ຣາຊາອານາຈັກໄທ (ມະຫາວິທະຍາໄລມະຫາສາລະຄາມ, ມະຫາວິທະຍາໄລອຸບົນລາດຊະທານີ, ມະຫາວິທະຍາໄລນະເລສວນ, ມະຫາວິທະຍາໄລແມ່ຟ້າຫຼວງ, ມະຫາວິທະຍາໄລພະເຍົາ, ມະຫາວິທະຍາໄລຊຽງໃໝ່, ມະຫາວິທະຍາໄລແມ່ໂຈ້, ມະຫາວິທະຍາໄລລາດຊະພັດຊຽງ
ໃໝ່, ມະຫາວິທະຍາໄລພະຍັບ).

 ສຳລັບໂຄງການສານສຳພັນມິດຕະພາບລາວ-ໄທ ຄັ້ງທີ 14 ນີ້ ແມ່ນການເປັນເຈົ້າພາບຂອງ ມະຫາວິທະຍາໄລລາດຊະພັດຊຽງໃໝ່ ຣາຊາອານາຈັກໄທ, ໃນເບື້ອງຕົ້ນແມ່ນເກີດຈາກການຮ່ວມມືຂອງມະຫາວິທະຍາໄລຂອນແກ່ນ (ປະເທດໄທ) ແລະມະຫາວິທະຍາໄລແຫ່ງຊາດລາວ ເຊິ່ງມີຈຸດປະສົງເພື່ອໃຫ້ນັກສຶກສາໄດ້ມີໂອກາດສະແດງອອກ ແລະເຜີຍແຜ່ສິລະປະວັດທະນະທຳຂອງທັງ ສອງຊາດ ສອງປະເທດ ໃນຮູບແບບການສະແດງສິລະປະວັດທະນະທຳທ້ອງຖິ່ນຂອງຕົນ, ເພື່ອສ້າງຄວາມສຳພັນອັນດີງາມລະຫວ່າງສາຍພົວພັນການຮ່ວມມືອັນດີງາມທີ່ມີມາແຕ່ຍາວນານ ພ້ອມທັງມີການແລກປ່ຽນທາງດ້ານວິຊາການ ປະກອບມີການສຳມະນາແລກປ່ຽນຄວາມຄິດເຫັນ ທາງດ້ານຫຼັກສູດການຮຽນ-ການສອນ ແລະດ້ານການສ້າງກິດຈະກຳໃຫ້ນັກສຶກສາ. ສຳລັບບົດຟ້ອນສິລະປະທີ່ມະຫາວິທະຍາໄລແຫ່ງຊາດໄດ້ນຳໄປສະແດງໃນຄັ້ງນີ້ມີຊື່ວ່າ ບົດຟ້ອນ “ມ່ວນຊື່ນບຸນອອກພັນສາ” ທີ່ມີເນື້ອໃນສ່ອງແສງເຖິງວັດທະນະທຳຮີດຄອງປະເພນີຂອງຊາວພຸດ ເວົ້າສະເພາະກໍຄືຊາວລາວ ເມື່ອເຖິງມື້ຂຶ້ນ 15 ຄໍ່າເດືອນ 11 ທີ່ຊາວລາວທັງຫຼາຍຕ່າງກໍພາກັນຫ້າງຫາກະກຽມວັດຖຸສິ່ງຂອງຕ່າງໆເພື່ອໄປເຮັດບຸນ-ເຮັດທານ ໃຫ້ແກ່ພໍ່ແມ່ ຍາດຕິພີ່ນ້ອງທີ່ໄດ້ລ່ວງລັບໄປແລ້ວ ຕາມວັດວາອາຮາມ, ພ້ອມທັງມີການແຂ່ງຂັນຊວ່ງເຮືອ ແລະຄົບງັນຕາມຮີດຄອງປະເພນີ, ພໍຕົກຄໍ່າກໍມີປະເພນີການໄຫຼເຮືອໄຟເພື່ອເປັນການຂໍຂະມາລາໂທດ ແລະບູຊາເຈົ້າແມ່ນໍ້າຄົງຄາ ອີກດ້ວຍ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ມຊ ເຂົ້າຮ່ວມກິດຈະກຳສານສຳພັນມິດຕະພາບລາວ-ໄທຄັ້ງທີ 14

ການຮັບສະໝັກ

ທຶນການສຶກສາ