nuol.edu.la



ມຊ ຫວນຄືນວັນມະຫາປະຕິວັດເດືອນ ຕຸລາ ຣັດເຊຍ ຄົບຮອບ 100 ປີ

1511940835 tmp IMG 19855

           ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີປາຖະກະຖາຫວນຄືນ ວັນມະຫາປະຕິວັດເດືອນ ຕຸລາ ຣັດເຊຍ ຄົບຮອບ 100 ປີ (7/11/1917-7/11/2017)ເພື່ອເປັນການໂຄສະນາ-ສຶກສາອົບຮົມການເມືອງ-ແນວຄິດກ່ຽວກັບການກໍາເນີດເກີດຂຶ້ນຂອງລັດທິສັງຄົມນິຍົມ-ລັດຂອງຊົນຊັ້ນກໍາມະກອນທໍາອິດໃນປະຫວັດສາດຂອງມະນຸດ ແລະເຮັດໃຫ້ລັດທິສັງຄົມນິຍົມຈາກທິດສະດີກາຍມາເປັນຈິງໃນຊີວິດໂລກການເມືອງ; ພິທີດັ່ງກ່າວ, ໄດ້ຈັດຂຶ້ນໃນຕອນບ່າຍວັນທີ 24 ພະຈິກ 2017 ຜ່ານມາ, ທີ່ສະໂມສອນໃຫຍ່ ມະຫາວິທະຍາໄລແຫ່ງຊາດ, ໂດຍການໃຫ້ກຽດປາຖະກະຖາຂອງ ທ່ານ ສຈ.ປອ ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ, ມີບັນດາພະນັກງານ, ຄູ-ອາຈານ ແລະນັກສຶກສາຄະນະວິຊາຕ່າງໆ ອ້ອມຂ້າງມະຫາວິທະຍາໄລແຫ່ງຊາດ ຈໍານວນ 300 ກວ່າຄົນເຂົ້າຮ່ວມ.

          ການປາຖະກະຖາໃນຄັ້ງນີ້, ແມ່ນເພື່ອເຮັດໃຫ້ພະນັກງານ, ສະມາຊິກພັກ, ທະຫານຕໍາຫຼວດ ແລະປະຊາຊົນລາວບັນດາເຜົ່າຮັບຮູ້, ເຂົ້າໃຈຄວາມໝາຍປະຫວັດສາດ ແລະລັກສະນະສາກົນຢ່າງເລິກເຊິ່ງ ແລະກວ້າງຂວາງຈາກການປະຕິວັດເດືອນຕຸລາ ຣັດເຊຍ ພ້ອມທັງຍົກໃຫ້ເຫັນຄວາມໝາຍຄວາມສໍາຄັນຂອງການປະຕິວັດເດືອນ ຕຸລາ ຣັດເຊຍ ທີ່ໄດ້ກາຍເປັນບາດລ້ຽວໄຂລະບອບທຶນນິຍົມມາເປັນສັງຄົມນິຍົມ.   ທ່ານ ສຈ. ປອ. ສົມສີ ຍໍພັນໄຊ ໄດ້ກ່າວບາງຕອນກ່ຽວກັບການກໍາເນີດຂອງການປະຕິວັດເດືອນຕຸລາ ຣັດເຊຍ, ເຊິ່ງກ່ອນໜ້ານີ້ 100 ປີ ຄື ວັນທີ 7 ພະຈິກ 1917 ພາຍໃຕ້ການນໍາພາຂອງພັກໂບນເຊວິກ ທີ່ມີ ທ່ານ ເລນິນ ເປັນຜູ້ນໍາໜ້ານັ້ນ, ຊົນຊັ້ນກໍາມະກອນ ແລະຊາວຜູ້ອອກແຮງງານ ຣັດເຊຍ ໄດ້ລຸກຮື້ຂຶ້ນຍຶດອໍານາດ ແລະສ້າງຕັ້ງລັດ ຣັດເຊຍ-ໂຊວຽດ, ເຊິ່ງເປັນລັດຂອງຊົນຊັ້ນກໍາມະກອນ ແລະຊາວຜູ້ອອກແຮງງານ ລັດທໍາອິດຂອງມວນມະນຸດ ໂດຍການປະຕິວັດເດືອນຕຸລາຫາກໍສໍາເລັດ, ພວກນາຍທຶນປະຕິການພາຍໃນປະເທດໄດ້ບຸກໂຈມຕີຮັດເຊຍ (ໂຊວຽດ) ທີ່ໜຸ່ມນ້ອຍ ແຕ່ປີ 1918-1922 ເຊິ່ງຫວັງບີບຄັ້ນອໍານາດໂຊວຽດ ທີ່ ²ນອນຢູ່ໃນອູ່ໃຫ້ຕາຍແຕ່ຫົວທີ², ແຕ່ທ່ານ ເລນິນ ແລະພັກໂບນເຊວິກ ໄດ້ນໍາພາປະຊາຊົນຕໍ່ສູ້ຕ້ານສັດຕູ ແລະໄດ້ຮັບໄຊຊະນະຢ່າງຂາດຕົວ, ສາມາດປົກປັກຮັກສາອໍານາດໂຊວຽດໄວ້ໄດ້.

          ນອກຈາກນັ້ນ, ໃນພິທີຍັງໄດ້ຮັບຟັງຄວາມໝາຍ ແລະຜົນສະທ້ອນຂອງການປະຕິວັດ ເດືອນຕຸລາຣັດເຊຍ ທີ່ມີຄວາມໝາຍອັນຍິ່ງໃຫຍ່ໃນປະຫວັດສາດ ມັນເປັນການໄຂສັງກາດໃໝ່ໃຫ້ແກ່ມວນມະນຸດໃນການຂ້າມຜ່ານສູ່ລະບອບໃໝ່, ລະບອບສັງຄົມນິຍົມ ເຮັດໃຫ້ໂລກທີ່ປົກຄຸມໄປດ້ວຍທຶນນິຍົມທີ່ແຕກອອກປ່ຽງ ກາຍເປັນລະບົບສັງຄົມນິຍົມໃນຂອບເຂດທົ່ວໂລກ. ພ້ອມດຽວກັນ, ຍັງໄດ້ຮັບຮູ້ຜົນສະທ້ອນ ແລະການຊ່ວຍເຫຼືອຂອງສະຫະພາບໂຊວຽດ ຕໍ່ ສປປ. ລາວ ພາຍຫຼັງປະເທດລາວໄດ້ຮັບການປົດປ່ອຍຢ່າງສົມບູນໃນພາລະກິດການປົກປັກຮັກສາ ແລະສ້າງສາພັດທະນາປະເທດຊາດ, ເຊິ່ງສະຫະພາບໂຊວຽດໄດ້ຕັ້ງໜ້າໃຫ້ການສະໜັບສະໜູນຊ່ວຍເຫຼືອຕໍ່ປະເທດເຮົາຢ່າງໃຫຍ່ຫຼວງ ແລະຮອບດ້ານ, ພ້ອມທັງຮັບຟັງຄວາມຮັບຮູ້ທີ່ຖືກຕ້ອງຕໍ່ການປະຕິວັດເດືອນຕຸລາ ຣັດເຊຍໃນເງື່ອນໄຂໃໝ່.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ມຊ ຫວນຄືນວັນມະຫາປະຕິວັດເດືອນ ຕຸລາ ຣັດເຊຍ ຄົບຮອບ 100 ປີ

ການຮັບສະໝັກ

ທຶນການສຶກສາ