nuol.edu.la



ພິທີເປີດນຳໃຊ້ ອາຄານສູນການນຮຽນຮູ້ ຄະນະສະຖາປັດຕະຍະກຳສາດ ມຊ

1512975004 tmp IMG 2336

          ໃນຕອນບ່າຍ ວັນທີ 7 ທັນວາ 2017 ທີ່ຜ່ານມາ, ຄະນະສະຖາປັດຕະຍະກຳສາດ ມະຫາວິທະຍາໄລແຫ່ງຊາດ ໄດ້ຈັດພິທີເປີດນຳໃຊ້ອາຄານສູນການຮຽນຮູ້, ໂດຍການຕັດແຖບຜ້າເປີດງານ ຂອງທ່ານ ຮສ. ປອ. ພຸດ ສິມມາລາວົງ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ຮສ. ດາສັກ ອຸເທນທະປັນຍາ ຄະນະບໍດີ ຄະນະສະຖາປັດຕະຍະກຳສາດ, ທ່ານ ຄິມຈິນກູ ຕົວແທນຈາກ ສະມາຄົມໂຣຕາຣີສາກົນ ປະຈຳໜ່ວຍ 3630 ເຂດ 12 ປະເທດເກົາຫຼີໃຕ້, ທ່ານ ຢອມກິຕັກ ຕາງໜ້າຈາກ ສູນວັດທະນະທຳເກົາຫຼີ-ລາວ, ມີຜູ້ຕາງໜ້າຈາກສູນສຶກສາວັດທະນະທຳ ເກົາຫຼີ-ລາວ, ທ່ານຫົວໜ້າພາກວິຊາ, ພະນັກງານ-ຄູອາຈານ ແລະນັກສຶກສາຄະນະດັ່ງກ່າວເຂົ້າຮ່ວມ.

          ໃນໂອກາດດັ່ງກ່າວ, ທ່ານ ຮສ. ດາສັກ ອຸເທນທະປັນຍາ ເປັນກຽດຂຶ້ນກ່າວເປີດນຳໃຊ້ອາຄານສູນການຮຽນຮູ້ ຄະນະສະຖາປັດຕະຍະກຳສາດວ່າ: ຄະນະສະຖາປັດຕະຍະກຳສາດ ແມ່ນ 1 ໃນ 13 ຄະນະວິຊາ ຂອງມະຫາວິທະຍາໄລແຫ່ງຊາດ ສ້າງຕັ້ງຂຶ້ນໃນປີ 2004 ໂດຍແຍກຈາກ ຄະນະວິສະວະກຳສາດໃນເມື່ອກ່ອນ, ມີທັັງໝົດ 4 ພາກວິຊາຄື: ພາກວິຊາ ສະຖາປັດຕະຍະກຳສາດ, ພາກວິຊາສະພາບແວດລ້ອມຜັງເມືອງ, ພາກວິຊາເທັກໂນໂລຊີອາຄານ ແລະພາກວິຊາ ອອກແບບຜະລິດຕະພັນ-ຕົບແຕ່ງ, ມີພະນັກງານ, ຄູ-ອາຈານທົງໝົດ 60 ຄົນ, ມີນັກສຶກສາ ເກືອບ 1,000 ຄົນ ລວມທັງປະລິນຍາຕີ ແລະປະລິນຍາໂທ; ຍ້ອນເປັນຄະນະທີ່ຫາກໍ່ສ້າງຕັ້ງ ແລະພວມເລັ່ງໃສ່ການພັດທະນາການສຶກສາ ທີ່ຍັງມີບາງຢ່າງ ຍັງບໍ່ສາມາດຕອບສະໜອງໃສ່ຄວາມຮຽກຮ້ອງຕ້ອງການຂອງນັກສຶກສາ ເປັນຕົ້ນແມ່ນຫ້ອງອ່ານ ແລະຫ້ອງຮຽນຮູ້ ເພື່ອເປັນບ່ອນສຶກສາຄົ້ນຄວ້າຂອງນັກສຶກສາ, ອີງໃສ່ຄວາມຕ້ອງການດັ່ງກ່າວທາງສະມາຄົມ ໂຣຕາຣີສາກົນ ຈຶ່ງໄດ້ໃຫ້ການຊ່ວຍເຫຼືອໃນການສ້າງອາຄານສູນການຮຽນຮູ້ຫຼັງດັ່ງກ່າວຂຶ້ນ, ເຊິ່ງປະກອບມີ ຫ້ອງອ່ານ 1 ຫ້ອງ, ຫ້ອງຄອມພິວເຕີ 1 ຫ້ອງ ລວມມູນຄ່າໃນການກໍ່ສ້າງທັງໝົດ 40,000 ໂດລາສະຫະລັດ, ເລີ່ມຕົ້ນກໍ່ສ້າງມາແຕ່ເດືອນ ຕຸລາ ຫາເດືອນ ທັນວາ 2017 ຈຶ່ງສຳເລັດ. ນອກຈາກການຊ່ວຍເຫຼືອດ້ານທຶນຮອນ ໃນການສ້າງອາຄານສູນການຮຽນຮູ້ແລ້ວ ທາງສູນວັດທະນະທຳ ລາວ-ເກົາຫຼີ ຍັງໄດ້ນຳເອົາປື້ມອ່ານ ຈຳນວນ 650 ຫົວມອບໃຫ້ແກ່ຄະນະ ສະຖາປັດຕະຍະກຳສາດ.

          ໃນທ້າຍພິທີ ທ່ານ ຮສ.ປອ. ພຸດ ສິມມາລາວົງ ກໍເປັນກຽດຂຶ້ນມອບໃບກຽດຕິຄຸນ ແລະຂອງທີ່ລະນຶກ ເພື່ອສະແດງຄວາມຮູ້ບຸນຄຸນໃນການໃຫ້ການຊ່ວຍເຫຼືອຄັ້ງນີ້ ແກ່ ທ່ານ ຄິມຈິນກູ ອີກດ້ວຍ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ພິທີເປີດນຳໃຊ້ ອາຄານສູນການນຮຽນຮູ້ ຄະນະສະຖາປັດຕະຍະກຳສາດ ມຊ

ການຮັບສະໝັກ

ທຶນການສຶກສາ