nuol.edu.la



ຂະບວນຝຶກອົບຮົມທິດສະດີການເມືອງໄລະສັ້ນ 45 ວັນລົງເຄື່ອນໄຫວຢ້ຽມ ແລະເຮັດກິດຈະກຳທີ່ ເມືອງ ທຸລະຄົມ ແຂວງ ວຽງຈັນ

1512976366 tmp IMG 2393

            ໃນວັນທີ 8 ທັນວາ 2017 ທີ່ຜ່ານມານີ້, ຂະບວນຝຶກອົບຮົມທິດສະດີການເມືອງໄລະສັ້ນ 45 ວັນ ຊຸດທີ 11 ຂອງ ມະຫາວິທະຍາໄລແຫ່ງຊາດ ໄດ້ລົງເຄື່ອນໄຫວຢ້ຽມຢາມ ແລະເຮັດກິດຈະກຳ ທີ່ເມືອງ ທຸລະຄົມ ແຂວງວຽງຈັນ, ນໍາໂດຍ ສະຫາຍ ຮສ. ປອ. ອຸດົມ ພອນຄຳເພັງ ຄະນະບໍລິຫານງານພັກ ປະທານກວດກາພັກ, ຮອງອະທິການບໍດີ ມະຫາວິທະຍາໄລແຫ່ງຊາດ, ສະຫາຍ ຮສ. ໂພສີ ທິບດາວວັນ ຄະນະພັກມະຫາວິທະຍາໄລແຫ່ງຊາດ, ຫົວໜ້າຫ້ອງການຈັດຕັ້ງ ແລະຄຸ້ມຄອງພະນັກງານ, ມີບັນດາພະນັກງານທີ່ກ່ຽວຂ້ອງ ພ້ອມດ້ວຍນັກສຳມະນາກອນ ຈຳນວນ 100 ສະຫາຍເຂົ້າຮ່ວມ.

          ໃນຕອນເຊົ້າຂະບວນຝຶກອົບຮົມໄດ້ລົງພົບປະ ແລະຢ້ຽມຢາມ ການດຳເນີນໂຄງການພັດທະນາບ້ານສາມສ້າງ ຕາມທິດສະດີແຊມາອຶນ ອູນດົງ ທີ່ຫ້ອງວ່າການເມືອງ ທຸລະຄົມ ແຂວງ ວຽງຈັນ ໂດຍການຕ້ອນຮັບ ຂອງທ່ານ ນາງ ວົງເດືອນ ວັດຕະໂສ ຮອງເລຂາພັກເມືອງ ຮອງເຈົ້າເມືອງ ເມືອງທຸລະຄົມ ແລະທ່ານ ຄຳຈັນ ຊາມຸນຕີ ຫົວໜ້າຫ້ອງການແຜນການ ແລະການລົງທຶນ ເມືອງ ທຸລະຄົມ, ໂອກາດນີ້ ທ່ານ ຄຳຈັນ ຊາມຸນຕີ ໄດ້ສະເໜີໃຫ້ເຫັນສະພາບລວມໂດຍຫຍໍ້ ຂອງເມືອງ ທຸລະຄົມ ທີ່ໄດ້ມີການພັດທະນາທາງດ້ານ ເສດຖະກິດ, ຊີວິດການເປັນຢູ່ຂອງປະຊາຊົນ ທີ່ເຮັດການກະສິກຳເປັນອາຊີບຕົ້ນຕໍ. ເມືອງ ທຸລະຄົມ ມີເນື້ອທີ່ການຜະລິດທັງໝົດ 8,367 ເຮັກຕາ, ສາມາດເກັບກ່ຽວຜົນຜະລິດໄດ້ທັງໝົດ 92,194 ໂຕນ/ປີ (ກວມເອົາຜົນຜະລິດເຂົ້າເປັນສ່ວນຫຼາຍ), ດ້ານການສຶກສາທົ່ວເມືອງ ມີໂຮງຮຽນທັງໝົດ 91 ແຫ່ງ ໂຮງຮຽນອະນຸບານລ້ຽງເດັກທັງພາກລັດ ແລະເອກະຊົນທັງໝົດ 25 ແຫ່ງ, ປະຖົມສົມບູນ 50 ແຫ່ງ, ມັດທະຍົມຕອນຕົ້ນ ແລະຕອນປາຍ 11 ແຫ່ງ ແລະມັດທະຍົມສົມບູນ 4 ແຫ່ງ; ດ້ານການພັດທະນາທົ່ວເມືອງ ມີທັງໝົດ 42 ບ້ານ; ປັດຈຸບັນໄດ້ປະກາດເປັນບ້ານພັດທະນາແລ້ວ 34 ບ້ານ, ມີຄອບຄົວພັດທະນາ 10, 925 ຄອບຄົວ, ສາມາດເວົ້າໄດ້ວ່າ ເມືອງທຸລະຄົມ ເປັນອີກເມືອງໜຶ່ງ ທີ່ໄດ້ຮັບການພັດທະນາສົມຄວນ. ພາຍຫຼັງທີ່ໄດ້ຮັບຟັງການລາຍງານສະພາບລວມແລ້ວຂະບວນຝຶກອົບຮົມກໍໄດ້ມີໂອກາດຢ້ຽມຢາມ ບ້ານຫາດໄຊ ບ້ານແບບຢ່າງຂອງໂຄງການພັດທະນາໝູ່ບ້ານ ທີ່ໄດ້ເຮັດສວນຜັກປອດສານຜິດ.

          ໃນຕອນບ່າຍວັນດຽວກັນ ຂະບວນຝຶກອົບຮົມ ໄດ້ເຂົ້າຮ່ວມການແລກປ່ຽນກິດຈະກຳການແຂ່ງຂັນກີລາ ກັບ ວິທະຍາໄລສ້າງຄູບ້ານເກິນ ໂດຍມີ ທ່ານ ນາງ ຈັນທະມາລາ ສຸທຳມະວົງ ຜູ້ອຳນວຍການວິທະະຍາໄລສ້າງຄູບ້ານເກິນ ໃຫ້ການຕ້ອນຮັບ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ຂະບວນຝຶກອົບຮົມທິດສະດີການເມືອງໄລະສັ້ນ 45 ວັນລົງເຄື່ອນໄຫວຢ້ຽມ ແລະເຮັດກິດຈະກຳທີ່ ເມືອງ ທຸລະຄົມ ແຂວງ ວຽງຈັນ

ການຮັບສະໝັກ

ທຶນການສຶກສາ