nuol.edu.la



ຄະນະຊາວໜຸ່ມປະຊາຊົນປະຕິວັດລາວ ມຊ ເປີດ ກອງປະຊຸມສ່ອງແສງໄຕມາດທີ IV ປະຈໍາປີ 2017

1514359148 tmp IMG 0488

           ໃນຕອນບ່າຍ ວັນທີ 22 ທັນວາ 2017 ນີ້, ຄະນະຊາວໜຸ່ມປະຊາຊົນປະຕິວັດລາວ ມະຫາວິທະຍາໄລແຫ່ງຊາດ ໄດ້ຈັດກອງປະຊຸມສ່ອງແສງໄຕມາດທີ IV ປະຈໍາປີ 2017 ທີ່ ຄະນະວິສະວະກໍາສາດ ໂດຍການເປັນປະທານຂອງ ສະຫາຍ ຮສ. ໂພສີ ທິບດາວັນ ຄະນະພັກມະຫາວິທະຍາໄລແຫ່ງຊາດ ຜູ້ຊີ້ນຳວຽກງານຊາວໜຸ່ມ, ສະຫາຍ ພຽງສະໜິດ ຈັນທະວີໄຊ ເລຂາຄະນະບໍລິຫານງານຊາວໜຸ່ມ ມະຫາວິທະຍາໄລແຫ່ງຊາດ, ມີບັນດາ ເລຂາ-ຮອງເລຂາ ຄະນະບໍລິຫານຊາວໜຸ່ມ ຈາກ 14 ຮາກຖານ ເຂົ້າຮ່ວມຈຳນວນ 35 ສະຫາຍ.

       ໃນໂອກາດນີ້, ສະຫາຍ ປອ. ສຸລິພັນ ກັນນິຖາ ຄະນະພັກຮາກຖານ ຄະນະວິສະວະກໍາສາດ ຜູ້ຊີ້ນໍາວຽກງານຊາວໜຸ່ມ ໄດ້ລາຍງານຜົນການເຄື່ອນໄຫວທີ່ພົ້ນເດັ່ນ ໃນໄຕມາດທີ IV ປະຈໍາປີ 2017 ຂອງ ຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ ມະຫາວິທະຍາແຫ່ງຊາດວ່າ: ໃນວັນທີ 1 ພະຈິກ 2017 ຜ່ານມານີ້ ຄະນະຊາວໜຸ່ມ ປະຊາຊົນ ປະຕິວັດລາວ ມະຫາວິທະຍາໄລແຫ່ງຊາດ ໄດ້ສໍາເລັດການສະຫຼຸບຖອດຖອນບົດຮຽນ ແລະມອບໃບຍ້ອງຍໍໃຫ້ແກ່ ສະມາຊິກຊາວໜຸ່ມ ອາສາສະໝັກທີ່ເຂົ້າຮ່ວມກິດຈະກໍາ ອ້າຍ-ເອື້ອຍສອນພາສາອັງກິດໃຫ້ນ້ອງ ທີ່ແຂວງ ບໍລິຄໍາໄຊ ມີຈໍານວນທັງໝົດ 18 ສະຫາຍ, ຍິງ14 ສະຫາຍ, ໄດ້ຈັດງານແລກປ່ຽນວັດທະນາທໍາຊາວໜຸ່ມນັກສຶກສານາໆຊາດ ຂອງນັກສຶກສາ ໃນມະຫາວິທະຍາໄລແຫ່ງຊາດ 3 ຄັ້ງ, ຈັດຕັ້ງອອກແຮງງານລວມສ້າງຂະບວນການສະເຫຼີມ-ສະຫຼອງວັນຊາດທີ 2 ທັນວາ, ເຂົ້າຮ່ວມງານພົບປະມິດຕະພາບຊາວໜຸ່ມ 4 ພາກສ່ວນຄັ້ງທີ່ III ທີ່ແຂວງສາລະວັນ, ສະມາຊິກຊາວໜຸ່ມມະຫາວິທະຍາໄລແຫ່ງຊາດ ໄດ້ປະກອບສ່ວນບໍລິຈາກເລືອດຊ່ວຍເຫຼືອສັງຄົມ ຈໍານວນ 142 ສະຫາຍ, ໄດ້ຈັດພິທີ ປາຖະກະຖາ ເນື່ອງໃນໂອກາດ 100 ປີ ວັນປະຕິວັດເດືອນຕຸລາ ລັດເຊຍ ມີສະມາຊິກຊາວໜຸ່ມເຂົ້າຮ່ວມ 255 ສະຫາຍ. ພ້ອມທັງໄດ້ສະເໜີແຜນການເຄື່ອນໄຫວ ໄຕມາດທີ I ປະຈໍາປີ 2018 ວ່າ: ໄດ້ກະກຽມຈັດຕັ້ງເຜີຍແຜ່ລະບຽບ ແລະສຶກສາອົບຮົມແນວຄິດໃຫ້ສະມາຊິກຊາວໜຸ່ມໃຫ້ໄດ້ຢ່າງໜ້ອຍ 4 ຮາກຖານ, ສືບຕໍ່ເອົາໃຈໃສ່ໃນການປະກອບສ່ວນເຂົ້າໃນຂະບວນການຮຽນ-ການສອນຕາມຄໍາຂວັນ ສອນດີ-ຮຽນເກັ່ງ ທີ່ກະຊວງສຶກສາ ແລະກີລາວາງອອກ ໂດຍເນັ້ນໃສ່ 5 ຫຼັກມູນການສຶກສາ ແລະກຽມຈັດກອງປະຊຸມສະຫຼຸບຜົນງານການເຄື່ອນໄຫວປະຈໍາປີ 2017 ຂອງຄະນະຊາວໜຸ່ມປະຊາຊົນປະຕິວັດລາວ ມະຫາວິທະຍາໄລແຫ່ງຊາດ.

             ໂອກາດດຽວກັນ, ສະຫາຍ ຮສ. ໂພສີ ທິບດາວັນ ຄະນະພັກ ມະຫາວິທະຍາໄລແຫ່ງຊາດ ໄດ້ກ່າວໂອ້ລົມຕໍ່ທີ່ປະຊຸມ, ເຊິ່ງສະຫາຍໄດ້ກ່າວບາງຕອນວ່າ: ວຽກງານຊາວໜຸ່ມເປັນວຽກງານທີ່ສໍາຄັນຢ່າງຫຼວງຫຼາຍຕໍ່ການພັດທະນາປະເທດຊາດ, ສະນັ້ນ ຄະນະຊາວໜຸ່ມ ປະຊາຊົນປະຕິວັດລາວ ມະຫາວິທະຍາໄລແຫ່ງຊາດ ຕ້ອງມີຄວາມເຂັ້ມແຂງ, ຫ້າວຫັນໃນການເຄື່ອນໄຫວຕໍ່ໜ້າທີ່ ກໍຄື ຕໍ່ທີ່ສັງກັດຂອງຕົນເອງ. ຄະນະຊາວໜຸ່ມປະຊາຊົນ ປະຕິວັດລາວ ມະຫາວິທະຍາໄລແຫ່ງຊາດ ຕ້ອງບຸກບືນໄປຕາມ 4 ບຸກທະລຸຄື: ບຸກດ້ານແນວຄິດ, ບຸກດ້ານເຝິກຝົນຫຼໍ່ຫຼອມຮໍ່າຮຽນ,  ບຸກດ້ານວຽກງານການຈັດຕັ້ງ,  ບຸກດ້ານວິຊາຊີບ-ດ້ານວຽກເຮັດງານທໍາ ແລະ 3 ຂໍ້ແຂ່ງ

ຂັນ: ສອນດີ-ສອນເກັ່ງ, ຕ້ານປະກົດການຫຍໍ້ທໍ້ ແລະສ້າງສິ່ງແວດລ້ອມທີ່ດີໃນໂຮງຮຽນ, ສູນ, ສະຖາບັນ, ການສຶກສາ ແລະກີລາ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ຄະນະຊາວໜຸ່ມປະຊາຊົນປະຕິວັດລາວ ມຊ ເປີດ ກອງປະຊຸມສ່ອງແສງໄຕມາດທີ IV ປະຈໍາປີ 2017

ການຮັບສະໝັກ

ທຶນການສຶກສາ