nuol.edu.la



ຄະນະບໍລິຫານງານກຳມະບານຮາກຖານ ຄສປ ຈັດກອງປະຊຸມໃຫຍ່ຄັ້ງທີ II

1515486262 tmp IMG 0837

            ໃນຕອນບ່າຍ ວັນທີ 5 ມັງກອນ 2018 ທີ່ຜ່ານມານີ້, ຄະນະບໍລິຫານງານກຳມະບານ ຮາກຖານ ຄະນະສະຖາປັດຕະຍະກຳສາດ (ຄສປ) ມະຫາວິທະຍາໄລແຫ່ງຊາດ ໄດ້ຈັດກອງປະຊຸມໃຫຍ່ ຄັ້ງທີ II ຂຶ້ນທີ່ຫ້ອງປະຊຸມຄະນະຂອງຕົນ, ໂດຍການເປັນປະທານຂອງ ສະຫາຍ ຮສ. ປອ. ອານຸລົມ ວິໄລພອນ ປະທານສະຫະພັນກຳມະບານ ມະຫາວິທະຍາໄລແຫ່ງຊາດ, ສະຫາຍ ຮສ. ດາສັກ ອຸເທນທະປັນຍາ ເລຂາຄະນະພັກຮາກຖານ, ຄະນະບໍດີ ຄະນະສະຖາປັດຕະຍະກໍາສາດ, ມີເລຂາຊາວໜຸ່ມ, ປະທານສະຫະພັນແມ່ຍິງ, ປະທານກຳມະບານ ຮາກຖານ ຄະນະສະຖາປັດຕະຍະກໍາສາດ, ແຂກທີ່ຖືກເຊີນ ແລະສະມາຊິກກຳມະບານຄະນະດັ່ງກ່າວເຂົ້າຮ່ວມ.

ໃນທີ່ປະຊຸມ ສະຫາຍ ຮສ. ບຸນຖະໄຫວ ແກ້ວປັນຍາ ປະທານກຳມະບານຮາກຖານ ຄະນະສະຖາປັດຕະຍະກໍາສາດ ໄດ້ຂຶ້ນຜ່ານບົດສະຫຼຸບວຽກງານ ການເຄື່ອນໄຫວ ຂອງກໍາມະບານຮາກຖານຕົນໃນໄລຍະທີ່ຜ່ານມາ ແລະຜ່ານທິດທາງແຜນການເຄື່ອນໄຫວໃນຕໍ່ໜ້າ; ເຊິ່ງສະຫາຍໄດ້ໃຫ້ຮູ້ວ່າ: ຮາກຖານກໍາມະບານ ຄະນະສະຖາປັດຕະຍະກໍາສາດ ປະກອບມີ 2 ໜ່ວຍ ແລະ 5 ຈຸ (ພະນັກງານ-ຄູອາຈານ 4 ຈຸ, ນັກສຶກສາ 1 ຈຸ) ມີສະມາຊິກທັງໝົດ 79 ສະຫາຍ ຍິງ 27 ສະຫາຍ, ໃນນັ້ນມີພະນັກງານຄູອາຈານຈຳນວນ 57 ສະຫາຍ, ຍິງ 20 ສະຫາຍ, ອາສາສະໝັກ 7 ສະຫາຍ ແລະນັກສຶກສາ 15 ສະຫາຍ, ຍິງ 5 ສະຫາຍ; ດ້ານແນວຄິດການເມືອງແມ່ນໄດ້ສືບຕໍ່ຈັດຕັ້ງປະຕິບັດຄຳຂວັນ 5 ເປັນເຈົ້າຂອງອົງການຈັດຕັ້ງສະຫະພັນກຳມະບານໃຫ້ປະກົດຜົນເປັນຈິງ, ມີການອົບຮົມແນວຄິດການເມືອງໃຫ້ແກ່ສະມາຊິກທຸກສະຫາຍໃຫ້ມີຄວາມອຸ່ນອຽນ-ທຸ່ນທ່ຽງ, ປະຕິບັດໜ້າທີ່ວຽກງານຂອງຕົນດ້ວຍຄວາມຮັບຜິດຊອບສູງ ແລະໄດ້ຮັບຜົນສຳເລັດພ້ອມທັງເປັນແບບຢ່າງທີ່ດີໃຫ້ແກ່ມະຫາຊົນ. ນອກນັ້ນ ຍັງໄດ້ເຂົ້າຮ່ວມການເຄື່ອນໄຫວ, ການເຮັດກິດຈະກຳຕ່າງໆ ກັບອົງການຈັດຕັ້ງພາຄີ ຊາວໜຸ່ມ ແລະແມ່ຍິງ, ດ້ານວຽກງານສະຫວັດດີການສັງຄົມ ໄດ້ມີການຊຸກຍູ້ ແລະມອບເງິນອຸດໜູນໃຫ້ແກ່ສະມາຊິກກຳມະບານ ທີ່ເຈັບເປັນ, ເກີດລູກ, ສ້າງຄອບຄົວໃໝ່ ແລະນອນໂຮງໝໍ ຈຳນວນ 6 ຄັ້ງ ລວມເງິນອຸດໜູນທີ່ມອບຈຳນວນ 1,000,000 ກີບ. ດ້ານແຜນການທິດທາງໃນຕໍ່ໜ້າແມ່ນຈະສືບຕໍ່ປັບປຸງແບບແຜນວິທີເຮັດວຽກໃນແຕ່ລະຂັ້ນ ພ້ອມທັງປະຕິບັດຕາມພາລະບົດບາດ ແລະລະບຽບຂອງກຳມະບານຢ່າງຄັ່ງຄັດ.

 ຈາກນັ້ນ, ໃນທີ່ປະຊຸມຍັງໄດ້ປ່ອນບັດ-ຄັດເລືອກເອົາຄະນະບໍລິຫານງານ ກຳມະບານຊຸດໃໝ່ ຂອງຄະນະສະຖາປັດຕະຍະກໍາສາດ ຈໍານວນເປົ້າໝາຍ 7 ສະຫາຍ, ເລືອກເອົາ 5 ສະຫາຍ; ຜົນຂອງການປ່ອນບັດ-ຄັດເລືອກໃນທີ່ປະຊຸມເຫັນດີໄດ້ແຕ່ງຕັ້ງ ສະຫາຍ ບຸນປັນ ສຸທະລາວົງ ເປັນປະທານຄະນະບໍລິຫານງານສະຫະພັນກໍາມະບານຮາກຖານ ຄະນະສະຖາປັດຕະຍະກໍາສາດ, ສະຫາຍ ແສງຕາວັນ ດວງສີທົນ ເປັນຮອງປະທານ, ສະຫາຍ ສົມພອນ ວົງພູທອງ ເປັນປະທານກວດກາ, ສະຫາຍ ຄອນມະໄລ ໄຊຍະສອນ ເປັນຄະນະ ແລະສະຫາຍ ນາງ ຂັນນະພາພອນ ພະຄຸນທອງ ເປັນຄະນະ.

ໃນຕອນທ້າຍພິທີ ສະຫາຍ ຮສ. ປອ. ອານຸລົມ ວິໄລພອນ ໄດ້ກ່າວໂອ້ລົມ ແລະໃຫ້ທິດຊີ້ນຳແກ່ ຄະນະບໍລິຫານງານສະຫະພັນກໍາມະບານຊຸດໃໝ່ວ່າ: ພວກສະຫາຍຈົ່ງສືບ ປະຕິບັດ ພາລະກິດຂອງ ສະຫະພັນກຳມະບານທີ່ໄດ້ວາງໄວ້ ໃຫ້ເກີດດອກອອກຜົນ, ມີຄວາມສາມັກຄີກັບໜູ່ຄະນະ, ປະຕິບັດໜ້າທີ່ວຽກງານຢ່າງມີລະບຽບແບບແຜນ, ສືບຕໍ່ວຽກງານຜັນຂະຫຍາຍສະມາຊິກໃຫ້ເພີ່ມຂຶ້ນໂດຍເລັ່ງໃສ່ນັກສຶຶກສາ ປີທີ 4 ເປັນຫຼັກ ແລະເອົາໃຈໃສ່ຊຸກຍູ້ໃຫ້ກຳລັງໃຈແກ່ບັນດາ ສະມາຊິກກຳມະບານ ໂດຍການມອບເງິນຊຸກຍູ້-ອຸດໜູນໃນກໍລະນີທີ່ເຈັບເປັນ, ເກີດລູກ ແລະສ້າງຄອບຄົວໃໝ່ ເປັນຕົ້ນ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ຄະນະບໍລິຫານງານກຳມະບານຮາກຖານ ຄສປ ຈັດກອງປະຊຸມໃຫຍ່ຄັ້ງທີ II

ການຮັບສະໝັກ

ທຶນການສຶກສາ