nuol.edu.la



ມຊ ເປັນເຈົ້າພາບເປີດກອງປະຊຸມສະໄໝສາມັນກຸ່ມນັກສຶກສາກົດໝາຍອາຊີ

11111114564765IMG 1550

               ໃນຕອນເຊົ້າ ວັນທີ 29 ມັງກອນ 2018 ນີ້, ມະຫາວິທະຍາໄລແຫ່ງຊາດ ໄດ້ຮັບກຽດເປັນເຈົ້າພາບເປີດກອງປະຊຸມສະໄໝສາມັນຂອງກຸ່ມນັກສຶກສາກົດໝາຍອາຊີ(ALSA), ຂຶ້ນທີ່ ສະໂມສອນ ຄະນະເສດຖະສາດ ແລະບໍລິຫານທຸລະກິດ ມະຫາວິທະຍາໄລແຫ່ງຊາດ, ໂດຍການເປັນປະທານຂອງທ່ານ ຮສ. ປອ ພຸດ ສິມມາລາວົງ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ Richard Philipart ຜູ້ຕາງໜ້າຈາກສະຖາບັນທາງດ້ານກົດໝາຍ ແລະວິຊາການ, ມີທ່ານຄະນະບໍດີ ຄະນະນິຕິສາດ ແລະລັດຖະສາດ, ບັນດາຫົວໜ້າກົມ, ຜູ້ຕາງໜ້າຈາກກະຊວງ ແລະສະຖາບັນທີ່ກ່ຽວຂ້ອງ, ມີພະນັກງານ, ຄູ-ອາຈານ ແລະນັກສຶກສາທັງພາຍໃນ ແລະນັກສຶກສາຕ່າງປະເທດທີ່ເປັນສະມາຊິກເຂົ້າຮ່ວມ.

             ກອງປະຊຸມ ສະໄໝສາມັນກຸ່ມນັກສຶກສາກົດໝາຍລາວ-ອາຊີ(ALSAConference)ເປັນກອງປະຊຸມສາມັນລະດັບສາກົນ, ກອງປະຊຸມຄັ້ງນີ້ເປີດຂຶ້ນໂດຍມີຈຸດປະສົງ ເພື່ອເປັນການລວມຕົວຂອງບັນດາສະມາຊິກກຸ່ມນັກສຶກສາກົດໝາຍອາຊີ, ເນັ້ນໃສ່ພັດທະນາສະມາຊິກ ແລະຊຸກຍູ້ໂຄງສ້າງພັດທະນາຂອງກຸ່ມໃຫ້ມີຄວາມເຂັ້ມແຂງ ພ້ອມທັງເປັນການເປີດໂອກາດໃຫ້ສະມາຊິກນັກສຶກສາ ສາມາດພັດທະນາຄວາມຮູ້-ຄວາມສາມາດຂອງຕົນເອງ ແລະສ້າງເຄື່ອຂ່າຍໃຫ້ກວ້າງຂວາງອອກ, ໃນກອງປະຊຸມຍັງໄດ້ ຮັບຟັງການສໍາມະນາພິເສດພາຍໃຕ້ຫົວຂໍ້: ບັນຫາສິ່ງເສບຕິດໃນພາກພື້ນອາຊີຕາເວັນອອກສ່ຽງໃຕ້ ໂດຍການບັນຍາຍຂອງທ່ານ ປອ. ພຸດສະຫວາດ ສຸນດາລາ ຄະນະກໍາມະການກວດກາ ແລະຄວບຄຸມຢາເສບຕິດແຫ່ງຊາດເຊິ່ງໄດ້ບັນຍາຍເຖິງໄພອັນຕະລາຍທີ່ເກີດຈາກຢາເສບຕິດ ແລະວິທີສະກັດກັ້ນການແຜ່ຂະຫຍາຍຄ້າຂາຍຢາເສບຕິດໃນພາກພື້ນອາຊີ.

            ນອກນັ້ນ ນັກສຶກສາ ຍັງໄດ້ມີການສ້າງອົງການສະຫະປະຊາຊາດຈໍາລອງ(MNU)ເຊິ່ງມີນັກສຶກສາແຕ່ລະປະເທດເຂົ້າຮ່ວມເປັນສະມາຊິກ; ກອງປະຊຸມຄັ້ງນີ້ ຈະໄດ້ດໍາເນີນເປັນເວລາ 4 ວັນ (ແຕ່ວັນທີ 29 ມັງກອນ -1ກຸມພາ 2018). ສະມາຄົມນັກສຶກສາກົດໝາຍອາຊີ(ALSA) ປະກອບດ້ວຍສະມາຊິກ 15 ປະເທດ ແລະ 3 ປະເທດສັງເກດການ ຄື: ບຣູໄນ, ຈີນ, ຮົງກົງ, ອິນໂດເນເຊຍ, ຍີ່ປຸ່ນ, ເກົາຫຼີໃຕ້, ລາວ, ມາເກົ໊າ, ມາເລເຊຍ, ຟີລິບປິນ, ສິງກະໂປ, ສີລັງກາ, ໄຕ້ຫວັນ, ໄທ ແລະຫວຽດນາມ; ສ່ວນ 3 ປະເທດສັງເກດການມີ: ມຽນມາ, ອິນເດຍ ແລະບັງກະລາເທດ.

           ໃນໂອກາດນີ້, ທ່ານ ຮສ. ປອ ພຸດ ສິມມາລາວົງ ຮອງອະທິການບໍດີ ມະຫາວິທະຍາໄລແຫ່ງຊາດ ໄດ້ມີຄໍາເຫັນຕໍ່ກອງປະຊຸມວ່າ: ກອງປະຊຸມສະໄໝສາມັນຂອງກຸ່ມນັກສຶກສາກົດໝາຍອາຊີ(ALSA)ໄດ້ກາຍເປັນສູນການຮຽນຮູ້ຂອງນັກສຶກສາດ້ານກົດໝາຍໃນພາກພື້ນ, ທັງເປັນເວທີໃນການແລກປ່ຽນວັດທະນະທໍາ ເພື່ອສ້າງຄວາມເຂົ້າໃຈເຊິ່ງກັນ ແລະກັນ, ທັງເປັນຂະບວນການຫຼໍ່ຫຼອມປັນຍາຊົນຮຸ່ນໃໝ່ ໃຫ້ມີຄວາມສາມາດຢ່າງຮອບດ້ານໂດຍຜ່ານກິດຈະກໍາທາງດ້ານວິຊາການທີ່ມຸ່ງເນັ້ນໃຫ້ຄົນຍຸກໃໝ່ໄດ້ຮຽນຮູ້ ແລະພັດທະນາຄວາມສາມາດໃນຫຼາຍໆດ້ານ, ບໍ່ວ່າຈະເປັນການຈໍາລອງກອງປະຊຸມໃຫຍ່ສະຫະປະຊາຊາດ, ການຈັດສໍາມະນາແລກປ່ຽນ ແລະອີກຫຼາຍໆກິດຈະກໍາໂດຍທັງໝົດແມ່ນເພື່ອແນໃສ່ສ້າງທັກສະດ້ານການສື່ສານ, ການສະແດງຄວາມຮູ້-ຄວາມສາມາດ, ທັງເປັນເວທີຂອງການພົບປະ-ແລກປ່ຽນປະສົບການ ແລະຍັງເປັນທ່າແຮງອັນສໍາຄັນໃນການຮັດແໜ້ນສາຍພົວພັນຮ່ວມມືເຊິ່ງກັນ ແລະກັນໃນອະນາຄົດ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ມຊ ເປັນເຈົ້າພາບເປີດກອງປະຊຸມສະໄໝສາມັນກຸ່ມນັກສຶກສາກົດໝາຍອາຊີ

ການຮັບສະໝັກ

ທຶນການສຶກສາ