nuol.edu.la



ຄສອ ຈັດກອງປະຊຸມຄູສອນພາສາອັງກິດທົ່ວປະເທດຄັ້ງທີ 15

1518062410 tmp IMG 1621

ໃນຕອນເຊົ້າ ວັນທີ 5 ກຸມພາ 2018 ນີ້, ພາກວິຊາພາສາອັງກິດ ຄະນະອັກສອນສາດ ມະຫາວິທະຍາໄລແຫ່ງຊາດ, ໄດ້ຈັດກອງປະຊຸມ ຄູສອນພາສາອັງກິດ ທົ່ວປະເທດຄັ້ງທີ 15 (The 15th Annual LaoTESOL Conference) ທີ່ຫ້ອງປະຊຸມສະໂມສອນໃຫຍ່ ມະຫາວິທະຍາໄລແຫ່ງຊາດ, ໂດຍການເປັນປະທານຂອງທ່ານ ຮສ. ປອ. ນາງ ສົມຈັນ ບຸນພັນມີ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ໂນແລນ ບັກຮາວ (Nolan BarkHouse) ທູດວັດທະນະທໍາ ຂອງສະຫະລັດອາເມລິກາ ປະຈໍາ ສປປ. ລາວ, ມີບັນດາທ່ານຫົວໜ້າ-ຮອງຫົວໜ້າຫ້ອງການ, ແຂກທີ່ຖືກເຊີນ ແລະພະນັກງານ, ຄູ-ອາຈານເຂົ້າຮ່ວມ.

          ໃນໂອກາດນີ້, ທ່ານ ຮສ. ປອ. ນາງ ສົມຈັນ ບຸນພັນມີ ໄດ້ກ່າວເປີດກອງປະຊຸມວ່າ: ກອງປະຊຸມດັ່ງກ່າວ ແມ່ນໄດ້ຮັບການຮ່ວມມື ແລະສະໜັບສະໜູນ ຈາກສະຖານເອກອັກຄະລັດຖະທູດ ສະຫະລັດອາເມລິກາ ປະຈຳ ສປປ. ລາວ, ວິທະຍາໄລ ວຽງຈັນຄໍເລດ ແລະຮ້ານຂາຍປື້ມ ບຸກແອັດດີເຄ (Book@DK) ຮ່ວມກັບ ມະຫາວິທະຍາໄລແຫ່ງຊາດ, ມີຈຸດປະສົງ ເພື່ອສ້າງໂອກາດໃຫ້ແກ່ຄູ-ອາຈານ ທີ່ສອນພາສາອັງກິດ ໄດ້ນຳສະເໜີ ແລະສົນທະນາກ່ຽວກັບຜົນການຄົ້ນຄວ້າ, ປະສົບການ ແລະທິດສະດີໃນການປະຕິບັດວຽກງານຕົວຈິງ ທີ່ກ່ຽວພັນກັບການສິດສອນພາສາອັງກິດໃຫ້ແກ່ນັກຮຽນທີ່ມີພື້ນຖານທາງດ້ານພາສາອັງກິດ, ລະດັບການຮັບຮູ້, ຄວາມສົນໃຈ ແລະຄວາມຫ້າວຫັນທີ່ແຕກຕ່າງກັນ, ຜູ້ທີ່ເຂົ້າຮ່ວມຈະໄດ້ພັດທະນາທັກສະທາງດ້ານພາສາ ໃນການປະກອບອາຊີບ, ຍົກລະຄວາມຮູ້-ຄວາມສາມາດໃນການແກ້ໄຂບັນຫາສະເພາະໜ້າໄດ້ຢ່າງຄ່ອງແຄ່ວ. ສຳລັບກອງປະຊຸມ ຄູສອນພາສາອັງກິດທົ່ວປະເທດປະຈຳປີ 2018 ແມ່ນໄດ້ດຳເນີນມາເປັນຄັ້ງທີ 15 ພາຍໃຕ້ຫົວຂໍ້ “Responding to Challenges of English Language Teaching for EFL Learner” ແລະມີຜູ້ເຂົ້າຮ່ວມທັງໝົດ 250 ທ່ານ.

          ກອງປະຊຸມຄັ້ງນີ້ແມ່ນໄດ້ດຳເນີນໄປເປັນເວລາ 2 ວັນ ເລີ່ມແຕ່ ວັນທີ 5 - 6 ກຸມພາ 2018; ໂດຍເນື້ອໃນຂອງການຈັດກອງປະຊຸມປະກອບມີ ການສໍາມະນາ ກ່ຽວກັບກິດຈະກໍາ ທີ່ນຳໃຊ້ເຂົ້າໃນການຮຽນ-ການສອນ, ການສາທິດບົດຮຽນ(ມີທັງພາກປະຕິບັດຕົວຈິງ ແລະເທັກນິກໃນການຈັດການກັບສິ່ງທ້າທ້າຍຕ່າງໆ) ແລະການສົນທະນາແບບເປັນກຸ່ມ, ນຳສະເໜີຜົນການຄົ້ນຄວ້າທີ່ກ່ຽວຂ້ອງກັບຫົວຂໍ້ຂອງກອງປະຊຸມ. ນອກນັ້ນ, ໃນທ້າຍພິທີ ທ່ານ ຮສ. ປອ. ນາງ ສົມຈັນ ບຸນພັນມີ ກໍໄດ້ມອບໃບກຽດຕິຄຸນເພື່ອເປັນການສະແດງຄວາມຮູ້ບຸນຄຸນໃຫ້ແກ່ຜູ້ສະໜັບສະໜູນກອງປະຊຸມຄັ້ງນີ້ອີກດ້ວຍ.

 

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ຄສອ ຈັດກອງປະຊຸມຄູສອນພາສາອັງກິດທົ່ວປະເທດຄັ້ງທີ 15

ການຮັບສະໝັກ

ທຶນການສຶກສາ