nuol.edu.la

ມະຫາວິທະຍາໄລແຫ່ງຊາດຄົບຮອບ 20 ປີ



ຊາວໜຸ່ມ ນັກສຶກສານາໆຊາດ ຮ່ວມແລກປ່ຽນວັດທະນະທໍາ ແລະສິ່ງແວດລ້ອມ

1483070967 tmp IMG 0720

          ຊາວໜຸ່ມນັກສຶກສາລາວ ແລະນັກສຶກສາຕ່າງປະເທດ ທີ່ກໍາລັງສຶກສາຢູ່ ມະຫາວິທະຍາໄລແຫ່ງຊາດ. ເຂົ້າຮ່ວມແລກປ່ຽນວັດທະນະທໍາ ແລະສິ່ງແວດລ້ອມ ເພື່ອເປັນການເຜີຍແຜ່ວັດທະນະທໍາ-ຮີດຄອງປະເພນີອັນດີງາມຂອງຊາດ, ເປັນການແລກປ່ຽນບົດຮຽນ, ປະສົບການຕ່າງໆກ່ຽວກັບການສຶກສາ ແລະການປົກປັກຮັກສາສິ່ງແວດລ້ອມຮ່ວມກັນ.

           ໃນວັນທີ 28 ທັນວາ 2016 ນີ້, ທີ່ສະໂມສອນໃຫຍ່ ມະຫາວິທະຍາໄລແຫ່ງຊາດ ໄດ້ມີກິດຈະກໍາແລກປ່ຽນວັດທະນະທໍາຊາວໜຸ່ມນັກສຶກສານາໆຊາດ ຄັ້ງທີ 2 ພາຍໃຕ້ຫົວຂໍ້ “ຄວາມເຂົ້າໃຈຫຼາກຫຼາຍທາງດ້ານວັດທະນະທໍາ ເພື່ອປົກປັກຮັກສາສິ່ງແວດລ້ອມໃຫ້ຍືນຍົງ”, ໂດຍການເປັນກຽດເຂົ້າຮ່ວມຂອງສະຫາຍ ປອ. ສໍາລານ ພັນຄະວົງ ຄະນະເລຂາທິການ ສູນກາງຊາວໜຸ່ມ, ຄະນະພັກ, ເລຂາຄະນະບໍລິຫານງານຊາວໜຸ່ມປະຊາຊົນ ປະຕິວັດລາວ ກະຊວງສຶກສາທິການ ແລະກີລາ ແລະສະຫາຍ ຮສ. ໂພສີ ທິບດາວັນ ຄະນະພັກ, ຜູ້ຊີ້ນໍາວຽກງານຊາວໜຸ່ມ ມະຫາວິທະຍາໄລແຫ່ງຊາດ, ມີເລຂາຄະນະພັກຮາກຖານ ຄະນະວິຊາ, ຫົວໜ້າຫ້ອງການ, ບັນດາແຂກຖືກເຊີນ, ມີຕາງໜ້າ 3 ອົງການຈັດຕັ້ງມະຫາຊົນ, ພະນັກງານ, ຄູ-ອາຈານ ແລະ ສະມາຊິກຊາວໜຸ່ມ ມຊ. ເຂົ້າຮ່ວມ.

           ກິດຈະກໍາແລກປ່ຽນ ວັດທະນະທໍາຊາວໜຸ່ມນັກສຶກສານາໆຊາດ, ຈັດຂຶ້ນເປັນຄັ້ງທີ 2 ເພື່ອເປັນການເຜີຍແຜ່ວັດທະນະທໍາ-ຮີດຄອງປະເພນີອັນດີງາມຂອງຊາດ, ຂອງບັນດານັກສຶກສາປະເທດຕ່າງໆທີ່ສຶກສາຢູ່ໃນ ມຊ. ເປັນການແລກປ່ຽນບົດຮຽນ, ປະສົບການຕ່າງໆກ່ຽວກັບການສຶກສາ ແລະການປົກປັກຮັກສາສິ່ງແວດລ້ອມຮ່ວມກັນ, ເຊິ່ງກິດຈະກໍາດັ່ງກ່າວນີ້, ແມ່ນກິດຈະກໍາທີ່ສະແດງເຖິງຜົນງານທີ່ພົ້ນເດັ່ນຂອງຄະນະຊາວໜຸ່ມ ປະຊາຊົນ ປະຕິວັດລາວ ມະຫາວິທະຍາໄລແຫ່ງຊາດ ໂດຍພາຍໃຕ້ການຊີ້ນໍາໆພາຂອງອົງຄະນະພັກ ມຊ. ໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 4 ຂອງອົງຄະນະພັກ ມຊ. ແລະມະຕິກອງປະຊຸມໃຫຍ່ຄັ້ງທີ 8 ຂອງອົງຄະນະພັກ ກະຊວງສຶກສາທິການ ແລະກີລາ ແລະກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ສະໄໝທີ 7 ທັງເປັນການສະເຫຼີມສະຫຼອງ ການເປັນປະທານກອງປະຊຸມສຸດຍອດອາຊຽນຄັ້ງທີ 28-29 ໃນປີ 2016 ທີ່ ສປປ. ລາວ ເປັນເຈົ້າພາບ ທີ່ມີຜົນສໍາເລັດອັນຈົບງາມ ແລະສະເຫຼີມສະຫຼອງການສ້າງຕັ້ງມະຫາວິທະຍາໄລແຫ່ງຊາດ ຄົບຮອບ 20 ປີ.

           ໂອກາດດັ່ງກ່າວ, ສະຫາຍ ຮສ. ໂພສີ ທິບດາວັນ ໄດ້ກ່າວສະແດງຄວາມຍ້ອງຍໍຊົມເຊີຍ ຕໍ່ການຈັດງານແລກປ່ຽນວັດທະນະທໍາ ຂອງຊາວໜຸ່ມນັກສຶກສານາໆຊາດ ຂອງຄະນະຊາວໜຸ່ມ ປະຊາຊົນ ປະຕິວັດລາວ ມະຫາວິທະຍາໄລແຫ່ງຊາດ ທີ່ພ້ອມໃຈກັນຈັດງານນີ້ຂຶ້ນ ແລະກໍເປັນຄັ້ງທີ 2 ແລ້ວ; ໂດຍພາຍໃຕ້ການຊີ້ນໍາໆພາຈາກຄະນະພັກ, ຄະນະນໍາມະຫາວິທະຍາໄລແຫ່ງຊາດ ເຊິ່ງໄດ້ສະແດງໃຫ້ເຫັນຄວາມຮູ້-ຄວາມສາມາດຂອງຊາວໜຸ່ມນັກສຶກສາລາວ ໃນການຈັດງານນີ້ຂຶ້ນ ທັງເປັນການສ້າງຄວາມເຂົ້າໃຈ ແລະຄວາມສາມັກຄີໃນໝູ່ນັກສຶກສາ ທັງພາຍໃນ ແລະ ຕ່າງປະເທດໃຫ້ແໜ້ນແຟ້ນຍິ່ງຂຶ້ນ. ເຊິ່ງກິດຈະກໍາແລກປ່ຽນວັດທະນະທໍາ ຂອງຊາວໜຸ່ມນັກສຶກສານາໆຊາດຄັ້ງນີ້, ໄດ້ມີການແລກປ່ຽນວິຊາການດ້ານສິ່ງແວລ້ອມ, ແລກປ່ຽນວັດທະນະທໍາ ໃນການປຸງແຕ່ງອາຫານ ແລະ ແລກປ່ຽນວັດທະນະທໍາການນຸ່ງຖື ແລະການສະແດງສິລະປະ-ວັນນະຄະດີ ຈາກນັກສຶກສາລາວ, ຫວຽດນາມ, ກໍາປູເຈຍ, ມຽນມາ, ມົງໂກເລຍ, ຣັດເຊຍ, ຟິລິບປິນ, ຈີນ, ເກົາຫຼີ ແລະປະເທດຍີ່ປຸ່ນ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ຊາວໜຸ່ມ ນັກສຶກສານາໆຊາດ ຮ່ວມແລກປ່ຽນວັດທະນະທໍາ ແລະສິ່ງແວດລ້ອມ

ການຮັບສະໝັກ

ທຶນການສຶກສາ