nuol.edu.la

ມະຫາວິທະຍາໄລແຫ່ງຊາດຄົບຮອບ 20 ປີ



ພິທີສະຫຼຸບຜົນສຳເລັດການເຂົ້າຮ່ວມ ແຂ່ງຂັນບານເຕະລາວ ພີຣເມຍລີກລະດູການ 2016 ຂອງສະໂມສອນ NUOL FC.

1484030972 tmp IMG 0823

ໃນຕອນເຊົ້າ ວັນທີ 9 ມັງກອນ 2016, ສະໂມສອນ ມຊ. ເອຟຊີ (NUOL FC) ໄດ້ຈັດພິທີສະຫຼຸບ ແລະມອບໃບຍ້ອງຍໍຜົນສຳເລັດການເຂົ້າຮ່ວມແຂ່ງຂັນບານເຕະລາວພີຣເມຍລີກລະດູການ 2016 ທີ່ຫ້ອງປະຊຸມ ສຳນັກງານອະທິການບໍດີ ມຊ. ພາຍໃຕ້ການເປັນປະທານ ຂອງ ທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມຊ. ທັງເປັນປະທານສະໂມສອນ ມຊ. ເອຟຊີ ພ້ອມດ້ວຍທ່ານຮອງປະທານ, ຜູ້ຈັດການທີມ, ທີມງານ, ຄູເຝິກ ແລະນັກກີລາເຂົ້າຮ່ວມຢ່າງພ້ອມພຽງ.

ໃນໂອກາດນີ້ ທ່ານ ບົວພັນ ທຳມະວົງ ຮອງປະທານສະໂມສອນ ມຊ. ເອຟຊີ ໄດ້ຂຶ້ນຜ່ານບົດສະຫຼຸບຕະຫຼອດລະດູການ 2016 ວ່າ: ໃນການເຂົ້າຮ່ວມແຂ່ງຂັນກີລາບານເຕະລາວພີຣເມຍລີກ ປະຈຳປີ 2016 ຜ່ານມານັ້ນ, ທາງສະໂມສອນບານເຕະ ມະຫາວິທະຍາໄລແຫ່ງຊາດພວກເຮົາໄດ້ປະກອບມີຄະນະຝ່າຍເທັກນິກ ແລະ ຄູເຝິກຄື: ທ່ານ ໃຈລາສີ ຍໍພັນໄຊ ຫົວໜ້າເຕັກນິກຂອງສະໂມສອນ, ທ່ານ ສຸລິໄຊ ອິນທະເສນ ຫົວໜ້າຄູເຝິກ, ທ່ານ ເສນີ ແສງສຸວັນ ແລະ ທ່ານ ດາວ ໂຄດໄຊຍາ ເປັນຜູ້ຊ່ວຍຄູເຝິກ, ໂດຍມີຜູ້ຈັດການທີມ, ຫົວໜ້າການຕະຫຼາດ, ຜູ້ບໍລິຫານ ແລະປະຊາສໍາພັນຄື ທ່ານ ສຸບັນດິດ ທໍາມະວົງ ແລະ ທ່ານ ແວວຄຳ ພົມມາທອງ. ປະຈຸບັນນັກກີລາທີ່ສັງກັດໃນສະໂມສອນ ມຊ. ເອຟຊີ ມີທັງໝົດ 25 ຄົນ ແລະໄດ້ທຳການເຝິກຊ້ອມທີ່ສະໜາມກີລາກາງ ມຊ. (ຊ້ອມປົກກະຕິ ແຕ່ວັນຈັນ ຫາ ວັນສຸກ ເວລາ 16:30 – 18:30). ສະຫຼຸບຜົນການແຂ່ງຂັນຕະຫຼອດລະດູການ 2016 ທີມບານເຕະ ມຊ. ເອຟຊີ ຈົບທີ່ອັນດັບທີ 5 ຂອງຕາລາງການແຂ່ງຂັນ ຈາກທັງໝົດ 14 ທີມ ໂດຍການແຂ່ງຂັນແບບພົບກັນໝົດ, ລົງແຂ່ງຂັນທັງໝົດ 26 ນັດມີຄະແນນສະເລ່ຍ 44 ຄະແນນ, ໃນນັ້ນ ມຊ. ເອຟຊີ ຊະນະ 14 ນັດ, ສະເໜີ 2 ນັດ ແລະເສຍ 10 ນັດ. ຈາກຜົນການແຂ່ງຂັນດັ່ງກ່າວແມ່ນຖືວ່າເປັນທີ່ໜ້າເພີ່ງພໍໃຈພໍສົມຄວນ ແລະສາມາດບັນລຸຕາມເປົ້າໝາຍທີ່ຕັ້ງໄວ້ຄືການຕິດ 1 ໃນ 5 ອັນດັບທຳອິດຂອງຕາຕາລາງ. ໃນການແຂ່ງຂັນໃນລະດູການທີ່ຈະມາເຖີ່ງນີ້ ໃນເບື້ອງຕົ້ນພວກເຮົາໄດ້ວາງເປົ້າໝາຍໄວ້ 3 ຢ່າງຄື:

  1. ຈະຮັກສາສະໂມສອນນີ້ໄປໂດຍມີຄວາມຄາດຫວັງໃຫ້ໄດ້ອັນດັບທີ່ດີໃນຕາຕາລາງການແຂ່ງຂັນ ແລະສ້າງນັກກີລາບານເຕະຂອງມະຫາວິທະຍາໄລແຫ່ງຊາດໃຫ້ມີຄວາມພ້ອມທຸກດ້ານໃນການແຂ່ງຂັນງານມະຫາວິທະຍາໄລອາຊຽນ.
  2. ຄາດໝາຍໄດ້ຜົນງານທີ່ດີເລີດ.
  3. ສ້າງແຜນການ, ລະບຽບການໃນການສ້າງທີມ Academic (ເລີ່ມແຕ່ອາຍຸ 10-12 ປີ).

ໃນຕອນທ້າຍ ທ່ານ ສຈ. ປອ. ສົມສີ ຍໍພັນໄຊ ປະທານສະໂມສອນ ມຊ. ເອຟຊີ ກໍ່ໄດ້ມອບໃບຍ້ອງຍໍຜົນງານໃຫ້ແກ່ຜູ້ຈັດການທີມ, ຄູເຝິກ, ນັກກີລາ, ຜູ້ສະໜັບສະໜູນ ແລະທີມງານຂອງສະໂມສອນ ທັງໝົດ 54 ທ່ານ.

ພາບບັນຍາກາດ

ທ່ານກຳລັງຢູ່ທີ່: Home ຂ່າວ ພິທີສະຫຼຸບຜົນສຳເລັດການເຂົ້າຮ່ວມ ແຂ່ງຂັນບານເຕະລາວ ພີຣເມຍລີກລະດູການ 2016 ຂອງສະໂມສອນ NUOL FC.

ການຮັບສະໝັກ

ທຶນການສຶກສາ