nuol.edu.la

ມະຫາວິທະຍາໄລແຫ່ງຊາດຄົບຮອບ 20 ປີ



ທົ່ວສຳນັກງານອະທິການບໍດີ ມະຫາວິທະຍາໄລແຫ່ງຊາດ ຈັດກິດຈະກຳສະເຫຼີມສະຫຼອງວັນແມ່ຍິງສາກົນຄົບຮອບ 107 ປີ

 IMG 1952

       ໃນຕອນບ່າຍ ວັນທີ 7 ມີນາ 2017 ທີ່ຜ່ານມານີ້, ທົ່ວສຳນັກງານອະທິການບໍດີ ມະຫາວິທະຍາໄລແຫ່ງຊາດ ໄດ້ຈັດກິດຈະກຳ ສະເຫຼີມສະຫຼອງວັນແມ່ຍິງສາກົນຄົບຮອບ 107 ປີ (8 ມີນາ 1910 ຫາ 3 ມີນາ 2017) ທີ່ສະໜາມກີລາກາງ ມະຫາວິທະຍາໄລແຫ່ງຊາດ. ໂດຍເປັນກຽດເຂົ້າຮ່ວມຂອງທ່ານ ຮສ. ປອ. ນາງ ສົມຈັນ ບຸນພັນມີ ຮອງອະທິການບໍດີ, ທ່ານ ຮສ. ປອ. ອຸດົມ ພອນຄຳເພັງ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ນາງ ວຽງສຸກ ແພງບຸບຜາ ປະທານສະຫະພັນແມ່ຍິງ ມະຫາວິທະຍາໄລແຫ່ງຊາດ, ມີຫົວໜ້າຫ້ອງການ, ຮອງຫົວໜ້າຫ້ອງການ, ຄະນະບໍລິຫານງານ 3 ອົງການຈັດຕັ້ງມະຫາຊົນ (ຊາວໜຸ່ມ, ກຳມະບານ ແລະແມ່ຍິງ) ຂັ້ນມະຫາວິທະຍາໄລແຫ່ງຊາດ, ຂັ້ນສໍານັກງານອະທິການບໍດີ, ມີບັນດາພະນັກງານຄູ-ອາຈານພາຍໃນສຳນັກງານອະທິການບໍດີ ແລະພາກສ່ວນຕ່າງໆອ້ອມຂ້າງສໍານັກງານອະທິການບໍດີ ເຂົ້າຮ່ວມ.

      ໂອກາດນີ້, ທ່ານ ຮສ. ໂພສີ ທິບດາວັນ ຫົວໜ້າຫ້ອງການກວດກາ, ທັງເປັນຮັກສາການຫົວໜ້າຫ້ອງການຈັດຕັ້ງ ແລະຄຸ້ມຄອງພະນັກງານ ໄດ້ຂຶ້ນກ່າວເປີດພິທີ, ເຊິ່ງທ່ານໄດ້ກ່າວບາງຕອນວ່າ: ຕະຫຼອດໄລຍະເວລາທີ່ຜ່ານມາທຸກໆອົງການຈັດຕັ້ງໄດ້ໃຫ້ຄວາມສໍາຄັນກັບບົດບາດ ແລະສະຖານະພາບແກ່ແມ່ຍິງ ແລະເດັກນ້ອຍ, ໄດ້ມີການດຳເນີນການອອກກົດໝາຍ, ນະໂຍບາຍ, ມາຕະການຕໍ່ຕ້ານຄວາມຮຸນແຮງຕໍ່ແມ່ຍິງ ແລະເດັກນ້ອຍ, ພ້ອມນັ້ນ ຍັງໄດ້ຍົກລະດັບຄຸນນະພາບຊີວິດການເປັນຢູ່ ໃນດ້ານຕ່າງໆເຊັ່ນ ດ້ານສະຫວັດດີການ, ດ້ານສຸຂະພາບ,ດ້ານຄວາມປອດໄພໃນການເຮັດວຽກ ລວມທັງຜູ້ຍິງຕ້ອງໄດ້ຮັບການປະຕິບັດຢ່າງເທົ່າທຽມ ກັບເພດຊາຍ ແລະເນື່ອງໃນໂອກາດວັນແມ່ຍິງສາກົນທີ 8 ມີນາ ທີ່ໜູນວຽນມາບັນຈົບຄົບຮອບ 107 ປີ ນີ້, ທ່ານ ຮສ. ໂພສີ ທິບດາວັນ ໃນນາມຕາງໜ້າຄະນະພັກ, ຄະນະນໍາ ມະຫາວິທະຍາໄລແຫ່ງຊາດ ໄດ້ກ່າວອວຍພອນໃຫ້ແກ່ແມ່ຍິງລາວເວົ້າລວມ, ເວົ້າສະເພາະແມ່ນເອື້ອຍ-ນ້ອງແມ່ຍິງມະຫາວິທະຍາໄລແຫ່ງຊາດ ທຸກຄົນຈົ່ງມີແຕ່ຄວາມສຸກ ແລະປະສົບຜົນສຳເລັດໃນໜ້າທີ່ວຽກງານ ແລະອອກແຮງແຂ່ງຂັນກັນສ້າງຜົນງານ ຕາມຂໍ້ແຂ່ງຂັນແມ່ຍິງ 3 ດີທີ່ວ່າ: ພົນລະເມືອງດີ, ພັດທະນາດີ ແລະສ້າງຄອບຄົວດີ.

ສຳລັບກິດຈະກໍາທີ່ຈັດຂຶ້ນໃນຄັ້ງນີ້ ມີການແຂ່ງຂັນຮ້ອງເພງ, ແຂ່ງຂັນຢຽບປຸມເປົ້າ, ແຂ່ງຂັນດຶງເຊືອກ ແລະແຂ່ງຂັນກີລາເຕະບານ. ເຊິ່ງຜົນການແຂ່ງຂັນມີດັ່ງນີ້: ຮາງວັນຊະນະເລີດ ໄດ້ແກ່:ສະຫາຍນາງ ສົມພັນ ອຸ່ນທ່າ ຈາກພາກສ່ວນໂຮງຮຽນພອນສະຫວັນ ແລະຊົນເຜົ່າ,ຮອງຊະນະເລີດມີ 2 ຮາງວັນໄດ້ແກ່ ສະຫາຍ ນຸວົງ ນໍ່ເຢຍວື ແລະສະຫາຍ ສົມສະໜຸກ ຈາກພາກສ່ວນຫ້ອງການຄຸ້ມຄອງນັກສຶກສາ ແລະຮອງຊະນະເລີດ ອັນດັບທີ 2 ໄດ້ແກ່: ສະຫາຍນາງ ບຸນສະຫຼອງ ຈາກພາກສ່ວນຫໍສະໜຸດກາງ; ແຂ່ງຂັນເຕາະບານລະຫວ່າງທີມຍິງ ແລະທີມຊາຍ, ທີມຊະນະໄດ້ແກ່ ທີມບານເຕະຍິງ; ແຂ່ງຂັນກິລາດຶງເຊືອກ ທີມຊະນະເລີດໄດ້ແກ່ ຫ້ອງການຄຸ້ມຄອງນັກສຶກສາ; ແລະແຂ່ງຂັນກິລາຢຽບປຸມເປົ້າທີມຊະນະໄດ້ແກ່ ສູນເຕັກໂນໂລຊີຂໍ້ມູນຂ່າວສານ. ເຊິ່ງໃຫ້ກຽດມອບຮາງວັນຊະນະເລີດທັງ 4 ລາຍການ ໂດຍ ທ່ານ ຮສ. ປອ. ນາງ ສົມຈັນ ບຸນພັນມີ ຮອງອະທິການບໍດີ ມະຫາວິທະຍາໄລແຫ່ງຊາດ. ໃນການແຂ່ງຂັນກີລາແຕ່ລະລາຍການແມ່ນມີຄວາມຟົດຟື້ນມ່ວນຊື່ນ, ສະໜຸກສະໜານ; ເຫັນໄດ້ຄວາມມີນໍ້າໃຈນັກກີລາ ແລະຄວາມສາມັກຄີຂອງທຸກຄົນທີ່ເຂົ້າຮ່ວມການແຂ່ງຂັນ.

ພາບປະກອບ

 

ທ່ານກຳລັງຢູ່ທີ່: Home ຂ່າວ ທົ່ວສຳນັກງານອະທິການບໍດີ ມະຫາວິທະຍາໄລແຫ່ງຊາດ ຈັດກິດຈະກຳສະເຫຼີມສະຫຼອງວັນແມ່ຍິງສາກົນຄົບຮອບ 107 ປີ

ການຮັບສະໝັກ

ທຶນການສຶກສາ