nuol.edu.la



ລັດວິສາຫະກິດໂຮງພິມແຫ່ງລັດ ມອບປຶ້ມເລື່ອງ ເຈົ້າຟ້າງຸ່ມ ໃຫ້ແກ່ ມຊ

1502243745 tmp IMG 7734 1

         

       ໃນຕອນບ່າຍວັນທີ 3 ສິງຫາ 2017 ນີ້, ລັດວິສາຫະກິດ ໂຮງພິມແຫ່ງລັດ ໄດ້ນໍາເອົາປຶ້ມເລື່ອງເຈົ້າຟ້າງຸ່ມ ໄປມອບໃຫ້ ມະຫາວິທະຍາໄລແຫ່ງຊາດ, ພິທີມອບ-ຮັບໄດ້ຈັດຂຶ້ນທີ່ຫ້ອງປະຊຸມ ຕຶກສໍານັກງານອະທິການບໍດີ; ໂດຍການກ່າວມອບຂອງທ່ານ ໄມອອນ ທໍາມະວົງ ຜູ້ອໍານວຍການ ລັດວິສາຫະກິດໂຮງພິມແຫ່ງລັດ ແລະກ່າວຮັບໂດຍທ່ານ ສຈ.ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ,    ໃນພິທີ ມີທ່ານ ຮສ.ປອ. ບົວດໍາ ແສງຄໍາຄຸດລາວົງ ຫົວໜ້າຫ້ອງການສັງລວມ ມະຫາວິທະຍາໄລແຫ່ງຊາດ, ທ່ານ ຄໍາຫ໌້າ ສຸລີພົງ ຫົວໜ້າຫ້ອງການ ລັດວິສາຫະກິດໂຮງພິມແຫ່ງລັດ, ມີບັນດາທ່ານ ຮອງຫົວໜ້າຫ້ອງການ ແລະພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ.

        ໃນໂອກາດມອບ ປຶ້ມເລື່ອງເຈົ້າຟ້າງຸ່ມ ໃຫ້ແກ່ມະຫາວິທະຍາໄລແຫ່ງຊາດຄັ້ງນີ້, ທ່ານ ໄມອອນ ທໍາມະວົງ ຜູ້ອໍານວຍການ ລັດວິສາຫະກິດໂຮງພິມແຫ່ງລັດ ໄດ້ກ່າວບາງຕອນວ່າ: ມະຫາວິທະຍາໄລແຫ່ງຊາດເປັນສະຖາບັນການສຶກສາທີ່ສໍາຄັນ ໃນການກໍ່ສ້າງຊັບພະຍາກອນມະນຸດ ໃນຫຼາຍສາຂາວິຊາ ອອກໄປຮັບໃຊ້ປະເທດຊາດ ແລະເປັນສະຖາບັນທີ່ມີນັກວິທະຍາສາດ, ນັກຄົ້ນຄວ້າ, ພະນັກງານ, ຄູ-ອາຈານທີ່ມີຄຸນນະພາບ ແລະມີນັກສຶກສາຈໍານວນຫຼວງຫຼາຍ ຈຶ່ງມີຄວາມຄວາມປະສົງມອບປຶ້ມເລື່ອງເຈົ້າຟ້າງຸ່ມ ເພື່ອເປັນແຫຼ່ງຂໍ້ມູນອີກສ່ວນໜຶ່ງ ແກ່ນັກຄົ້ນຄວ້າ ກໍຄືນັກສຶກສາ ຜູ້ທີ່ສົນໃຈຄົ້ນຄວ້າ ແລະຮຽນຮູ້ກ່ຽວກັບປະຫວັດສາດຂອງລາວເຮົາ.

       ຂະນະດຽວກັນ ທ່ານ ສຈ.ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ ໃນນາມຄະນະນໍາ, ພະນັກງານ, ຄູ-ອາຈານ ແລະນັກສຶກສາ ມະຫາວິທະຍາໄລແຫ່ງຊາດ ກ່າວສະແດງຄວາມຂອບໃຈຕໍ່ຄະນະນໍາ ກໍຄືພະນັກງານທຸກຄົນ ໃນລັດວິສາຫະກິດໂຮງພິມແຫ່ງລັດ, ທີ່ໄດ້ເຫັນຄວາມສໍາຄັນຂອງ ມະຫາວິທະຍາໄລແຫ່ງຊາດ ໃນຖານະເປັນບ່ອນສ້າງ ນັກຄົ້ນຄວ້າ, ກໍ່ສ້າງບຸກຄະລາກອນໃນສາຂາວິຊາຕ່າງໆອອກຮັບໃຊ້ສັງຄົມ ແລະປະເທດຊາດ; ເຊິ່ງຖືໄດ້ວ່າເປັນການປະກອບສ່ວນທີ່ສໍາຄັນອີກດ້ານໜຶ່ງ ແກ່ວຽກງານການຄົ້ນຄວ້າຢູ່ໃນ ມະຫາວິທະຍາແຫ່ງຊາດ ໃນປັດຈຸບັນ ກໍຄືອະນະຄົດ, ທັງເປັນບ່ອນອີງໃນວຽກງານການຄົ້ນຄວ້າ, ໄດ້ຮຽນຮູ້ ແລະເຂົ້າໃຈເລິກ ກ່ຽວກັບປະຫວັດສາດຂອງລາວອີກ.

       ສໍາລັບ ປຶ້ມເລື່ອງເຈົ້າຟ້າງຸ່ມ ທີ່ລັດວິສາຫະກິດໂຮງພິມແຫ່ງລັດ ນໍາມາມອບໃຫ້ ມະຫາວິທະຍາໄລແຫ່ງຊາດຄັ້ງນີ້ ມີຈໍານວນ 1.000 ຫົວ, ລວມ ມູນຄ່າທັງໝົດ 12,000,000 ກີບ.

 

ພາບບັນຍາກາດ

You are here: Home ຂ່າວ ລັດວິສາຫະກິດໂຮງພິມແຫ່ງລັດ ມອບປຶ້ມເລື່ອງ ເຈົ້າຟ້າງຸ່ມ ໃຫ້ແກ່ ມຊ