nuol.edu.la



ຄສຄ ຈັດພິທີສະຫຼຸບສົກຮຽນ ປະຈຳສົກສຶກສາ 2016-2017

1504758253 tmp IMG 0066

          ໃນຕອນເຊົ້າວັນທີ 6 ກັນຍາ 2017 ຜ່ານມານີ້, ຄະນະ ວິທະຍາສາດສັງຄົມ ມະຫາວິທະຍາໄລແຫ່ງຊາດ ໄດ້ຈັດພິທີສະຫຼຸບສົກຮຽນ 2016-2017 ທີ່ສະໂມສອນໃຫຍ່ມະຫາວິທະຍາໄລແຫ່ງຊາດ, ໂດຍການເປັນປະທານຂອງທ່ານ ຮສ. ປອ. ອຸດົມ ພອນຄຳເພັງ ຮອງອະທິການບໍດີ ມະຫາວິທະຍາໄລແຫ່ງຊາດ, ມີ ທ່ານ ຮສ. ບຸນມາກ ອິນທິພອນ ຮັກສາການ ຄະນະບໍດີ ຄະນະ ວິທະຍາສາດສັງຄົມ, ມີຮອງຄະນະບໍດີ, ແຂກທີ່ຖືກເຊີນ, ຫົວໜ້າ ແລະຮອງພາກວິຊາ ຫົວໜ້າ ແລະຮອງພະແນກ, ພະນັກງານ-ຄູອາຈານ ແລະນັກສຶກສາຄະນະດັ່ງກ່າວເຂົ້າຮ່ວມ.

          ໃນທີ່ປະຊຸມ, ທ່ານ ຮສ. ປອ. ບຸນທະວີ ສໍສຳພັນ ຮອງຄະນະບໍດີ ຄະນະວິທະຍາສາດສັງຄົມ ໄດ້ຂຶ້ນຜ່ານບົດສະຫຼຸບປະຈຳສົກສຶກສາ 2016-2017 ທີ່ຜ່ານມາວ່າ: ຄະນະ ວິທະຍາສາດສັງຄົມ ປະກອບມີ 2 ລະບົບການຮຽນຄື: ລະບົບ 4 ປີ ມີ 4 ຫຼັກສູດ ແລະລະບົບຕໍ່ເນື່ອງປະລິນຍາຕີມີ 2 ຫຼັກສູດ, ດ້ານການຈັດການຮຽນ-ການສອນ ໄດ້ແບ່ງອອກເປັນ 2 ພາກຄື: ພາກເຊົ້າ ແລະພາກບ່າຍ ເຊິ່ງປີທີ 1 ແມ່ນພະແນກວິຊາການໄດ້ຈັດຕັ້ງການບໍລິຫານການຮຽນ-ການສອນ ແລະໄດ້ມີການກວດກາລາຍຊື່ຊັບຊ້ອນຂຶ້ນຮຽນປີທີ 2, ສວ່ນ ປີທີ 2 ຫາ ປີທີ 4 ແມ່ນພະແນກວິຊາການໄດ້ຈັດຕັ້ງການຮຽນ-ການສອນຕາມຫຼັກສູດ ໝວດວິຊາສະເພາະ ຕະຫຼອດຮອດໂຄງການຈົບຊັ້ນ. ໃນສົກສຶກສາ 2016-2017 ນີ້ ມີນັກສຶກສາສຳເລັດການສຶກສາໃນລະດັບປະລິນຍາຕີ ຈຳນວນ 491 ຄົນ ຍິງ 294 ຄົນ ແລະລະດັບຕໍ່ເນື່ອງປະລິນຍາຕີຈຳນວນ 67 ຄົນ ຍິງ 19 ຄົນ ແລະພິເສດມີນັກສຶກສາທີ່ມີຜົນການຮຽນດີເດັ່ນ ຕະຫຼອດໄລຍະເວລາ 4 ປີ ແລະໄດ້ຮັບປະກາສະນີຍະບັດກຽດນິຍົມ ແລະໄດ້ຮັບໃບຍ້ອງຍໍ ຂັ້ນອະທິການບໍດີ ມະຫາວິທະຍາໄລແຫ່ງຊາດ ຈຳນວນ 3 ຄົນ ຍິງ 2 ຄົນ; ໄດ້ຮັບໃບຍ້ອງຍໍຂັ້ນຄະນະບໍດີ ປະເພດເດັ່ນຮອບດ້ານ ຈຳນວນ 124 ຄົນ ຍິງ 80 ຄົນ, ປະເພດເດັ່ນການຮຽນ ຈຳນວນ 90 ຍິງ 52 ຄົນ, ປະເພດເດັ່ນການເຄື່ອນໄຫວກິດຈະກຳ ຈຳນວນ 133 ຄົນ ຍິງ 85 ຄົນ.

          ໃນຕອນທ້າຍພິທີ, ທ່ານ ຮສ. ປອ. ອຸດົມ ພອນຄຳເພັງ ຮອງອະທິການບໍດີ ມະຫາວິທະຍາໄລແຫ່ງຊາດ ໄດ້ກ່າວໂອ້ລົມຕໍ່ພິທີ, ເຊິ່ງບາງຕອນທ່ານກ່າວວ່າ: ຕະຫຼອດໄລຍະສົກຮຽນທີ່ຜ່ານມາ ຄະນະວິທະຍາສາດສັງຄົມ ໄດ້ສ້າງບຸກຄະລາກອນທີ່ມີຄວາມຮູ້ ຄວາມສາມາດອອກຮັບໃຊ້ສັງຄົມຫຼາຍຮຸ່ນ, ເຊິ່ງໄດ້ສະແດງອອກໃຫ້ເຫັນຜົນງານດັ່ງກ່າວຜ່ານການຂຽນບົດໂຄງການຈົບຊັ້ນ ແລະມີນັກສຶກສາທີ່ສາມາດຍາດໄດ້ ປະກາສະນີຍະບັດກຽດນິຍົມ(ໃບປະກາດແດງ) ຈຳນວນ 3 ຄົນ, ນອກນັ້ນ ຍັງມີນັກສຶກສາທີ່ໄດ້ເຂົ້າຮ່ວມການແຂ່ງຂັນໃນລະດັບອາຊຽນ ທີ່ ສປ ຈີນ ແລະສາມາດຍາດໄດ້ຮາງວັນທີ 1 ອີກດ້ວຍ. ນອກຈາກຜົນງານທີ່ພົ້ນເດັ່ນຂອງນັກສຶກສາແລ້ວ ໃນຖັນແຖວພະນັກງານ, ຄູ-ອາຈານ ຍັງມີການຍົກລະດັບຄວາມຮູ້-ຄວາມສາມາດຂອງຕົນ ຢູ່ພາຍໃນ ແລະຕ່າງປະເທດ, ສຳລັບອະນາຄົດ ຄະນະວິທະຍາສາດສັງຄົມ ກໍຄືມະຫາວິທະຍາໄລແຫ່ງຊາດ ຄວນມີການສ້າງຫຼັກສູດສາກົນ (International Program)ເພື່ອຮອງຮັບການພັດນາຂອງປະເທດ ທີ່ພວມກ້າວເຂົ້າສູ່ ປະຊາຄົມເສດຖະກິດອາຊຽນໃຫ້ທຽບເທົ່າກັບສາກົນ.

ພາບບັນຍາກາດ

You are here: Home ຂ່າວ ຄສຄ ຈັດພິທີສະຫຼຸບສົກຮຽນ ປະຈຳສົກສຶກສາ 2016-2017