nuol.edu.la



ພິທີສະຫຼຸບໂຄງການແລກປ່ຽນນັກສຶກສາ ລາວ-ມາເລເຊຍ

          ເມື່ອວັນທີ 27 ກັນຍາ 2017 ທີ່ຜ່ານມານີ້, ທີ່ສະຖານທູດມາເລເຊຍ ປະຈຳ ສປປ. ລາວ ໄດ້ຈັດພິທີສະຫຼຸບການແລກປ່ຽນນັກສຶກສາອາສາສະໝັກ ລາວ-ມາເລເຊຍ ໃນໂຄງການ YSS-MOES STUDENT VOLUNTEER MISSION ທີ່ໄດ້ລົງເຄື່ອນໄຫວເຮັດກິດຈະກຳທີ່ເມືອງ ສັງທອງ ໃນລະຫວ່າງ ວັນທີ 15-28 ກັນຍາ 2017, ໂດຍການໃຫ້ກຽດເຂົ້າຮ່ວມຂອງທ່ານ MohdAiniAtan ເອກອັັກຄະລັດຖະທູດ ມາເລເຊຍປະຈຳ ສປປ ລາວ, ທ່ານ ຮສ. ປອ. ສົມຈັນ ບຸນພັນມີ ຮອງອະທິການບໍດີ ມະຫາວິທະຍາໄລແຫ່ງຊາດ, ມີບັນດາແຂກທີ່ຖືກເຊີນ, ພະນັກງານ-ຄູອາຈານ ແລະນັກສຶກສາເຂົ້າຮ່ວມ.

          ສຳລັບໂຄງການ YSS-MOES STUDENT VOLUNTEER MISSION ທີ່ ເມືອງສັງທອງ, ເປັນໂຄງການຮ່ວມມືລະຫວ່າງ ມະຫາວິທະຍາໄລແຫ່ງຊາດ ແລະປະເທດມາເລເຊຍ ທີ່ໄດ້ນຳເອົານັກສຶກສາ ມາແລກປ່ຽນ ທາງດ້ານວັດທະນະທຳ ແລະວິຖີການດຳລົງຊີວິດການເປັນຢູ່ຂອງຄົນລາວ, ເຊິ່ງນັກສຶກສາໄດ້ຮຽນຮູ້ໂດຍການລົງເຮັດວຽກຕົວຈິງຮ່ວມກັນຕາມບ້ານຕ່າງໆ, ໃນການດໍາເນີນໂຄງການຄັ້ງນີ້ມີນັກສຶກສາ ເຂົ້າຮ່ວມເປັນອາສາສະໝັກທັງໝົດ ຈຳນວນ 100 ຄົນ(ນັກສຶກສາລາວ 50 ຄົນ) ແລະແຈກຢາຍກັນໃນຈຳນວນ3 ບ້ານຄື: ບ້ານ ທ່ານາສາ, ບ້ານ ປາກຕອນ ແລະບ້ານສຳພັນນາ ມີການຈັດແບ່ງການເຮັດວຽກອອກເປັນ 6 ກຸ່ມຕໍ່ ບ້ານ ເຊິ່ງປະກອບມີ: 1. ກຸ່ມພັດທະນາຊຸມຊົນ ເຮັດໜ້າທີ່ປັບປຸງ-ສ້ອມແປງອາຄານຮຽນ, ຫໍສະໝຸດ, ຂຽນປ້າຍຊື່ໂຮງຮຽນ, 2. ກຸ່ມກະເສດຊີວະພາບ ແລະສິ່ງແວດລ້ອມ ເຮັດໜ້າທີ່ປັບປຸງບ່ອນເກັບມ້ຽນຂີ້ເຫຍື້ອ ຫຼື ສິ່ງເສດເຫຼືອຕ່າງໆ ໂດຍການແຍກເປັນໜວດໜູ່ ແລະປູກຜັກສວນຄົວ, 3. ກຸ່ມຈັດການໄພອັນຕະລາຍ ແລະໄພທຳມະຊາດ ສາມາດສ້າງທາງຂຶ້ນພູໂດຍການຂຸດດິນເປັນຂັ້ນໄດ ແລ້ວນຳເອົາໄມ້ມາລ້ອມດິນໄວ້ ເພື່ອກັນດິນເຈື່ອນ, ປູກຫົວສີໄຄລຽບຂອບພູ ເພື່ອຍືດດິນໄວ້ ແລະບໍ່ໃຫ້ດິນສະໄລ໋ລົງມາເວລາຝົນຕົກ, 4. ກຸ່ມສຸຂະພາບ ໄດ້ລົງເຄື່ອນໄຫວຕາມບ້ານຕ່າງໆເພື່ອເຜີຍແຜ່ຄວາມຮູ້ກ່ຽວກັບການຮັກສາອະນາໄມບ້ານເຮືອນ ບໍ່ໃຫ້ເປັນບ່ອນເພາະພັນຍຸງລາຍ, ການປ້ອງກັນໄຂ້ເລືອດອອກ, ຜົນຮ້າຍຂອງຢາເສບຕິດ, ການຮັກສາອະນາໄມແຂ້ວ ແລະກວດສຸຂະພາບ, 5. ກຸ່ມການສຶກສາ ມີການສອນພາສາອັງກິດ, ສອນສິລະປະ, ສອນຄະນິດສາດ, ປະຫວັດສາດ ແລະພູມສາດ ເປັນຕົ້ນ ແລະກຸ່ມທີ 6. ກຸ່ມ ICT ໄດ້ລວບລວມຂໍ້ມູນບົດຮຽນກ່ຽວກັບເທັກໂນໂລຊີ, ມີການຕິດຕັ້ງ-ສ້ອມແປງຄອມພິວເຕີ. ນອກຈາກ ບັນດາວຽກທີ່ໄດ້ກ່າວມາຂ້າງເທິງນັ້ນແລ້ວສິ່ງທີ່ນັກສຶກສາໄດ້ຮຽນຮູ້ ກໍຄືການເຮັດວຽກເປັນທີມ, ການວາງແຜນການເຮັດວຽກ ແລະມິດຕະພາບ ລະຫວ່າງນັກສຶກສາດ້ວຍກັນ.

          ໃນພິທີ ທ່ານ MohdAiniAtan ໄດ້ເປັນກຽດມອບ ໃບຢັ້ງຢືນໃຫ້ແກ່ນັກສຶກສາ ອາສາສະໝັກທັງ 100 ຄົນ ແລະມອບຂອງທີລະນຶກໃຫ້ແກ່ ທ່ານ ຮສ. ປອ. ສົມຈັນ ບຸນພັນມີ ອີກດ້ວຍ.

 

ພາບບັນຍາກາດ

You are here: Home ຂ່າວ ພິທີສະຫຼຸບໂຄງການແລກປ່ຽນນັກສຶກສາ ລາວ-ມາເລເຊຍ