nuol.edu.la



ພິທີວາງສີລາລຶກໂຄງການກໍ່ສ້າງສະຖາບັນຂົງຈື ມະຫາວິທະຍາໄລແຫ່ງຊາດ ຫຼັງໃໝ່ ທີ່ຄົບວົງຈອນແຫ່ງທໍາອິດ ຢູ່ສປປ ລາວ

   ພິທີວາງສີລາລຶກໂຄງການກໍ່ສ້າງສະຖາບັນຂົງຈື ມະຫາວິທະຍາໄລແຫ່ງຊາດລາວ ທີ່ຮັບການຊ່ວຍເຫຼືອລ້າຈາກລັດຖະບານ ສປ ຈີນ, ໄດ້ຈັດຂຶ້ນໃນຕອນເຊົ້າວັນທີ 30 ກັນຍາ 2017, ທີ່ມະຫາວິທະຍາໄລແຫ່ງຊາດ ຈັດໂດຍສະຖາບັນຂົງຈື ໂດຍເປັນກຽດເຂົ້າຮ່ວມຂອງທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ, ທ່ານ ຫວາງ ເຫວີນທ່ຽງ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ, ທ່ານ ສຈ. ປອ.ສຸກກົງແສງ ໄຊຍະເລີດ ກຳມະການສູນກາງພັກ, ປະທານ ສະຖາບັນຄົ້ນຄວ້າວິທະຍາສາດສັງຄົມ, ອະດີດອະທິການບໍດີ ມະຫາວິທະຍາໄລແຫ່ງຊາດ, ທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີມະຫາວິທະຍາໄລແຫ່ງຊາດ ພ້ອມດ້ວຍພາກສ່ວນທີ່ກ່ຽວຂ້ອງທັງສອງຝ່າຍ ແລະ ແຂກຖືກເຊີນເຂົ້າຮ່ວມ.

   ໃນໂອກາດນີ້, ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກີລາກ່າວວ່າ:   ໂຄງການດັ່ງກ່າວຖ້າສ້າງສໍາເລັດຈະປະກອບສ່ວນສໍາຄັນເຂົ້າໃນການພັດທະນາຊັບພະຍາກອນມະນຸດ ແລະ ການຮຽນ, ການສອນ ຂອງມະຫາວິທະຍາໄລແຫ່ງຊາດລາວ ກໍຄືທົ່ວສັງຄົມລາວ ແລະ ທ່ານຍັງໄດ້ຕີລາຄາສູງຕໍ່ລັດຖະບານຈີນ ໂດຍສະເພາະສະຖານທູດ ສປ ຈີນ ປະຈໍາ ສປປ ລາວ ທີ່ມີຄວາມມຸ້ງໝັ້ນສະເໝີຕົ້ນສະເໝີປາຍ ແລະ ຍັງຈະໄດ້ສືບຕໍ່ຢ່າງແຂງແຮງ ເພື່ອເຮັດໃຫ້ໂຄງການດັ່ງກ່າວສໍາເລັດຕາມແຜນການ ແລະ ສາມາດເປີດນຳໃຊ້ໄດ້ໂດຍໄວ ຕາມຄວາມມຸ້ງມາດປາດຖະໜາຂອງສອງລັດຖະບານລາວ-ຈີນ.

   ຫຼັງຈາກນັ້ນ, ທ່ານ ຫວາງ ເຫວີນທ່ຽນ ເອກອັກຄະລັດຖະທູດຈີນ ປະຈໍາ ສປປ ລາວ ກ່າວວ່າ: ມະຫາວິທະຍາໄລແຫ່ງຊາດລາວເປັນໂຮງຮຽນລະດັບສູງຂອງ ສປປ ລາວ ເຊິ່ງໄດ້ເຕົ້າໂຮມບັນດາຄູ-ອາຈານ ແລະ ນັກສຶກສາທີ່ດີເດັ່ນກ່າວໝູ່ ຫວັງວ່າ, ຜ່ານຄວາມພະຍາຍາມຂອງສອງຝ່າຍຈະສ້າງສະຖາບັນຂົງຈືເປັນໂຄງການແບບຢ່າງໃນການຊຸກຍູ້ ການແລກປ່ຽນວັດທະນະທໍາຈີນ-ລາວ. ໂຄງການດັ່ງກ່າວຖ້າສ້າງສໍາເລັດຈະສາມາດຍົກລະດັບການສິດສອນຂອງສະຖາບັນຂົງຈືຢູ່ມະຫາວິທະຍາໄລແຫ່ງຊາດລາວໃຫ້ດີຂຶ້ນກວ່າເກົ່າ ແລະ ຈະເຮັດໃຫ້ນັກສຶກສາລາວ ໄດ້ຮຽນພາສາ ເຂົ້າໃຈວັດທະນະທໍາຂອງຈີນ ແລະ ຮຽນເຕັກນິກຂອງສປ ຈີນຫຼາຍຂຶ້ນກວ່າເກົ່າ ເພື່ອປະກອບສ່ວນເຂົ້າໃນການພັດທະນາເສດຖະກິດຂອງ ສປປ ລາວ ແລະ ໄດ້ກາຍເປັນຜູ້ຄົ້ນຄວ້າການຮ່ວມມືຍຸດທະສາດຢ່າງຮອບດ້ານຂອງສອງຝ່າຍລາວ-ຈີນ. ລັດຖະບານ ສປ ຈີນ ຈະອີງຕາມຄວາມສາມາດຂອງຕົນເອງເພື່ອຊ່ວຍເຫຼືອໂຄງການຕ່າງໆຂອງ ສປ ລາວ ເພື່ອປະກອບສ່ວນເຂົ້າໃນເສດຖະກິດຂອງລາວຢ່າງຕັ້ງໜ້າ.

   ໂຄງການກໍ່ສ້າງດັ່ງກ່າວໄດ້ເລີ່ມລົງມືກໍ່ສ້າງໃນແຕ່ວັນທີ 1 ເດືອນກັນຍາ 2017 ໂດຍບໍລິສັດວິສະວະກໍາກໍ່ສ້າງ ແຂວງຈຽງຊູ ຈໍາກັດ, ນໍາໃຊ້ເນື້ອທີ່ໃນການກໍ່ສ້າງ 15,600 ຕາແມັດ, ເຊິ່ງປະກອບມີອາຄານຮຽນ 3ຊັ້ນ ເປັນຮູບໂຕອີ(E), ລວມມູນຄ່າການກໍ່ສ້າງທັງໝົດແມ່ນ 76,900,000 ຢວນ (ເຈັດສິບຫົກລ້ານ ເກົ້າແສນ ຢວນ ຖ້ວນ), ປະກອບມີຫ້ອງການ, ຫ້ອງສະໂມສອນ ແລະ ຫໍພັກຄູ-ອາຈານ ແລະ ຈະສ້າງໃຫ້ສໍາເລັດໃນເດືອນ ພຶດສະພາ 2019. ຖ້າໂຄງການດັ່ງກ່າວສໍາເລັດຈະສາມາດຮອງຮັບນັກສຶກສາໄດ້ 5.000 ກວ່າຄົນ.

 

ພາບບັນຍາກາດ

You are here: Home ຂ່າວ ພິທີວາງສີລາລຶກໂຄງການກໍ່ສ້າງສະຖາບັນຂົງຈື ມະຫາວິທະຍາໄລແຫ່ງຊາດ ຫຼັງໃໝ່ ທີ່ຄົບວົງຈອນແຫ່ງທໍາອິດ ຢູ່ສປປ ລາວ