nuol.edu.la



ພິທີ ມອບ-ຮັບທຶນການສຶກສາ ເອກອັກຄະລັດຖະທູດ ຈີນ ປະຈໍາສົກສຶກສາ 2017-2018

1513848711 tmp IMG 0270

           ໃນຕອນບ່າຍ ວັນທີ 19 ທັນວາ 2017 ນີ້, ມະຫາວິທະຍາໄລແຫ່ງຊາດ ໄດ້ຈັດພິທີ ມອບ-ຮັບທຶນການສຶກສາ ເອກອັກຄະລັດຖະທູດ ສປ.ຈີນ ປະຈໍາສົກສຶກສາ 2017-2018, ພິທີໄດ້ຈັດຂຶ້ນ ທີ່ສະໂມສອນໃຫຍ່ ມະຫາວິທະຍາໄລແຫ່ງຊາດ, ໂດຍການເຂົ້າຮ່ວມຂອງທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ, ທ່ານ Wang Wentien(ຫວັງ ເຫວິນ ຈຽນ)ເອກອັກຄະລັດຖະທູດ ສປ.ຈີນ ປະຈໍາ ສປປ ລາວ, ມີທ່ານຮອງອະທິການບໍດີ, ມີຫົວໜ້າຫ້ອງການ, ບັນດາຄະນະກໍາມະການກອງທຶນການສຶກສາ ມະຫາວິທະຍາແຫ່ງຊາດ, ພະນັກງານ, ຄູ-ອາຈານ ແລະນັກສຶກສາທີ່ໄດ້ຮັບທຶນເຂົ້າຮ່ວມ.

ໃນໂອກາດດັ່ງກ່າວ, ທ່ານ Wang Wentien(ຫວັງ ເຫວິນ ຈຽນ) ໄດ້ກ່າວຕໍ່ພິທີວ່າ: ການສຶກສາ ແມ່ນສ່ວນປະກອບສໍາຄັນຂອງການຮ່ວມມືລາວ-ຈີນ, ສາມາດສ້າງໄມຕີຈິດ-ມິດຕະພາບທີ່ດີຕໍ່ກັນ, ພວກເຮົາຍິນດີ ສືບຕໍ່ສະໜັບສະໜູນການພັດທະນາ ຂອງມະຫາວິທະຍາໄລແຫ່ງຊາດ ກໍຄືການພັດທະນາການສຶກສາຂອງ ສປປ ລາວ, ຍິນດີໃຫ້ການຊ່ວຍເຫຼືອຕໍ່ນັກສຶກສາທີ່ຮຽນດີ-ຮຽນເກັ່ງ, ມີຄຸນສົມບັດດີເດັ່ນ ໂດຍສະເພາະ ແມ່ນຊ່ວຍເຫຼືອນັກສຶກສາຜູ້ທີ່ທຸກຍາກ, ສະຖານທູດ ສປ.ຈີນ ພ້ອມທີ່ຈະສ້າງໂອກາດໃຫ້ແກ່ນັກສຶກສາລາວ ກໍຄື ນັກສຶກສາມະຫາວິທະຍາໄລແຫ່ງຊາດ ໄດ້ສຶກສາສໍາເລັດ ແລະບັນລຸຕາມຄວາມຝັນຂອງພວກເຂົາ.

ໂອກາດດຽວກັນ, ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດໄດ້ກ່າວ ສະແດງຄວາມຂອບໃຈ ແລະຮູ້ບຸນຄຸນ ຕໍ່ລັດຖະບານ ກໍຄື ສະຖານເອກອັກຄະລັດຖະທູດ ສປ.ຈີນ ປະຈໍາລາວ ທີ່ໄດ້ໃຫ້ທຶນການສຶກສາ ແກ່ນັກສຶກສາ ມະຫາວິທະຍາໄລແຫ່ງຊາດ, ທ່ານກ່າວບາງຕອນວ່າ: ການໄດ້ຮັບທຶນການສຶກຈາກທ່ານເອກອັກຄະລັດຖະທູດຄັ້ງນີ້ ໄດ້ເປັນກໍາລັງຊຸກຍູ້ໃຫ້ນັກສຶກສາ ໄດ້ມີທຶນເພື່ອສືບຕໍ່ສຶກສາຮໍ່າຮຽນ ແລະນໍາເອົາເງິນທຶນດັ່ງກ່າວໄປໝູນໃຊ້ໃຫ້ເກີດປະໂຫຍດສູງສຸດ ໃນໄລຍະການສຶກສາຮໍ່າຮຽນ. ສໍາລັບທຶນທີ່ໄດ້ຮັບໃນສົກຮຽນນີ້ ເປັນຊຸດທີ 4, ເຊິ່ງທຶນທີ່ທ່ານ ທູດ ສປ.ຈີນ ມອບໃນຄັ້ງນີ້ ມີຈໍານວນ 50,000 ໂດຣາສະຫະລັດ,ມີນັກສຶກສາມີເງື່ອນໄຂ ໄດ້ຮັບທຶນທັງໝົດ 50 ຄົນ, ຍິງ 25 ຄົນ. ປັດຈຸບັນມີ ນັກສຶກສາທີ່ໄດ້ຮັບທຶນ ທູດ ສປ. ຈີນ ທັງໝົດ 182 ຄົນຄື: ປີທີ1 ມີ 50 ຄົນ, ປີທີ2 ມີ 50 ຄົນ, ປີທີ3 ມີ 50 ຄົນ ແລະປີທີ 4 ມີ 32 ຄົນ. ໂດຍການກ່າວມອບຂອງທ່ານ Wang Wentien(ຫວັງ ເຫວິນ ຈຽນ)ເອກອັກຄະລັດຖະທູດ ສປ. ຈີນ ແລະຮັບໂດຍທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ.

ພາບບັນຍາກາດ

You are here: Home ຂ່າວ ພິທີ ມອບ-ຮັບທຶນການສຶກສາ ເອກອັກຄະລັດຖະທູດ ຈີນ ປະຈໍາສົກສຶກສາ 2017-2018