nuol.edu.la



ກອງປະຊຸມ ປຶກສາຫາລືຮ່ວມກັນຫາວິທີສະກັດກັ້ນ, ວິທີຈັດຕັ້ງປະຕິບັດ ແລະວິທີການແກ້ໄຂປະກົດການຫຍໍ້ທໍ້ໃນຂອບເຂດມະຫາວິທະຍາໄລແຫ່ງຊາດ

1515060070 tmp IMG 0750

             ໃນຕອນເຊົ້າວັນທີ 4 ມັງກອນ 2018 ນີ້, ມະຫາວິທະຍາໄລແຫ່ງຊາດ ໄດ້ເປີດກອງປະຊຸມ ປຶກສາຫາລືຮ່ວມກັນເພື່ອຊອກຫາວິທີທາງໃນການສະກັດກັ້ນ ແລະວິທີຈັດຕັ້ງປະຕິບັດ ແລະວິທີການແກ້ໄຂບັນຫາປະກົດການຫຍໍ້ທໍ້ໃນຂອບເຂດມະຫາວິທະຍາໄລແຫ່ງຊາດ (ວິທະຍາເຂດດົງໂດກ), ຂຶ້ນທີ່ ຫ້ອງປະຊຸມຫ້ອງການຄຸ້ມຄອງຫໍພັກບ້ານຊີເກມ ມະຫາວິທະຍາໄລແຫ່ງຊາດ, ໂດຍໃຫ້ກຽດເປັນປະທານຂອງ ທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ, ທ່ານ ຮສ.ປອ ຮຸ່ງເພັດ ຈັນທະວົງ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ບຸນວັນ ຈະສົ້ວເກົ້າ ຮອງເຈົ້າເມືອງໆໄຊທານີ, ມີທ່ານ ຫົວໜ້າ ກອງບັນຊາການປ້ອງກັນຄວາມສະຫງົບສຸກ(ປກສ) ເມືອງໄຊທານີ, ທ່ານຄະນະບໍດີ, ຮອງຄະນະບໍດີ, ຫົວໜ້າຫ້ອງການ ແລະຫົວໜ້າປ້ອງກັນຄວາມສະຫງົບສຸກ ກຸ່ມບ້ານດົງໂດກ ແລະກຸ່ມບ້ານໃກ້ຄຽງຂອບເຂດມະຫາວິທະຍາໄລແຫ່ງຊາດເຂົ້າຮ່ວມ.

           ໃນໂອກາດນີ້, ທ່ານ ສູນທະລີ ບົວສີສະຫວັດ ຫົວໜ້າພະແນກປ້ອງກັນ ຫ້ອງການສັງລວມ ມະຫາວິທະຍາໄລແຫ່ງຊາດ ໄດ້ລາຍງານກ່ຽວກັບບັນຫາປະກົດການຍໍ້ທໍ້ທີ່ເກີດຂຶ້ນໃນຂອບເຂດ ມະຫາວິທະຍາໄລແຫ່ງຊາດ (ວິທະຍາເຂດດົງໂດກ)ວ່າ: ປັດຈຸບັນມະຫາວິທະຍາໄລແຫ່ງຊາດ ວິທະຍາດເຂດດົງໂດກ ໄດ້ມີປະກົດການຫຍໍ້ທໍ້ ຫຼາຍບັນຫາເກີດຂຶ້ນເປັນຕົ້ນແມ່ນ ບັນຫາການຂາຍເຄື່ອງຊະຊາຍ, ການຈອດລົດບໍ່ເປັນລະບຽບຂອງນັກສຶກສາ, ບັນຫາເລື່ອງຮ້ານບັນເທີງ, ຮ້ານຄາຣາໂອເກະ, ຮ້ານເກມ, ການຖິ້ມຂີ້ເຫຍື້ອຊະຊາຍ ແລະການຈອດລົດໂດຍສານທີ່ບໍ່ເປັນລະບຽບ...,ເຊິ່ງບັນຫາເຫຼົ່ານີ້ ໄດ້ສ້າງຄວາມແອອັດ, ຄວາມບໍ່ເປັນລະບຽບ, ເຮັດໃຫ້ການສັນຈອນໄປ-ມາລໍາບາກ, ຈົນກາຍເປັນປະກົດການຫຍໍ້ທໍ້, ກໍ່ຄວາມບໍ່ສະຫງົບໃຫ້ແກ່ ມະຫາວິທະຍາໄລແຫ່ງຊາດ, ສະນັ້ນ ພວກເຮົາທຸກພາກສ່ວນຕ້ອງຊ່ວຍກັນສືບຕໍ່ແກ້ໄຂບັນຫາດັ່ງກ່າວນີ້ຢ່າງຮີບດ່ວນ.

           ໂອກາດດຽວກັນ, ທ່ານ ບຸນວັນ ຈະສົ້ວເກົ້າ ຮອງເຈົ້າເມືອງໆໄຊທານີ ກໍ່ໄດ້ໂອ້ລົມຕໍ່ກອງປະຊຸມ, ບາງຕອນທ່ານກ່າວວ່າ: ວຽກງານການເຄື່ອນໄຫວແກ້ໄຂປະກົດການຫຍໍ້ທໍ້ໃນສັງຄົມ ເປັນບັນຫາທີ່ສໍາຄັນ ແລະຄວນແກ້ໄຂຢ່າງຮີບດ່ວນທີ່ສຸດ, ເພື່ອສືບຕໍ່ແກ້ໄຂບັນຫາຄວາມບໍ່ເປັນລະບຽບຮຽບຮ້ອຍໃນສັງຄົມ ກໍຄື ຂອບເຂດອ້ອມຮອບມະຫາວິທະຍາໄລແຫ່ງຊາດ(ວິທະຍາເຂດດົງໂດກ)ນີ້, ທຸກພາກສ່ວນຕ້ອງພ້ອມພຽງຮຽງໜ້າກັນ, ເປັນເອກະພາບກັນໃນການປະຕິບັດຕົວຈິງ ໂດຍຈັດຕັ້ງ ແລະແບ່ງເຂດຮັບຜິດຊອບໃຫ້ແຕ່ລະພາກສ່ວນລະອຽດ ໂດຍມີການສົມທົບກັນລະຫວ່າງ ມະຫາວິທະຍາໄລແຫ່ງຊາດ ກັບຂອບເຂດບ້ານອ້ອມຂ້າງ, ທັງກໍານົດມາຕະການລະບຽບຢ່າງເຄັ່ງຂັດ ແລະເຂັ້ມງວດໃນການຕິດຕາມກວດກາປະຊາຊົນ ແລະນັກສຶກສາທີ່ອາໃສຢູ່ໃນພຶື້ນທີ່ ຂອງມະຫາວິທະຍາໄລແຫ່ງຊາດ.

ພາບບັນຍາກາດ

You are here: Home ຂ່າວ ກອງປະຊຸມ ປຶກສາຫາລືຮ່ວມກັນຫາວິທີສະກັດກັ້ນ, ວິທີຈັດຕັ້ງປະຕິບັດ ແລະວິທີການແກ້ໄຂປະກົດການຫຍໍ້ທໍ້ໃນຂອບເຂດມະຫາວິທະຍາໄລແຫ່ງຊາດ