nuol.edu.la



ໂຄງການ YICMG ຄັ້ງທີ 3 ປິດລົງດ້ວຍຜົນສໍາເລັດຢ່າງຈົບງາມ

ຜ່ານການດໍາເນີນໂຄງການມາຕັ້ງແຕ່ ວັນທີ 27 ມັງກອນ 2018 ຈົນເຖິງວັນທີ 30 ມັງກອນ 2018, ໂຄງການແຂ່ງຂັນນະວັດຕະກໍາຊາວໝຸ່ມ ກ່ຽວກັບການພັດທະນາ ແລະການປົກຄອງແຫ່ງພາກພື້ນແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 3 (Youth Innovation Competition on Lantsang-Mekong Region’s Governance and Development ຫຼື YICMG 2018) ກໍໄດ້ປິດລົງຢ່າງເປັນທາງການ ທີ່ສະໂມສອນ ຄະນະເສດຖະສາດ ແລະບໍລິຫານທຸລະກິດ ມະຫາວິທະຍາໄລແຫ່ງຊາດ, ໂດຍການກ່າວປິດຂອງທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ, ມີຜູ້ຕາງໜ້າຈາກ 9 ມະຫາວິທະຍາໄລ ຂອງ 6 ປະເທດລຸ່ມແມ່ນໍ້າຂອງ, ພະນັກງານ-ຄູອາຈານ, ນັກສຶກສາທີ່ກ່ຽວຂ້ອງເຂົ້າຮ່ວມ.

     ໃນພິທີ ທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ ໄດ້ກ່າວວ່າ: “ຂ້າພະເຈົ້າຮູ້ສຶກເປັນກຽດ ແລະພູມໃຈຢ່າງຍິ່ງທີ່ໄດ້ຮັບກຽດເປັນເຈົ້າພາບ ໃນການຈັດງານແຂ່ງຂັນນະວັດຕະກຳຊາວໜຸ່ມ ກ່ຽວກັບການພັດທະນາ ແລະການປົກຄອງແຫ່ງພາກພື້ນແມ່ນໍ້າຂອງ-ແມ່ນໍ້າລ້ານຊ້າງ (YICMG)ຄັ້ງທີ 3 ທີ່ໄດ້ຈັດຂຶ້ນ ທີ່ມະຫາວິທະຍາໄລແຫ່ງຊາດ. ໂຄງການ YICMG ເປັນໂຄງການ ທີ່ມີຄວາມໝາຍ-ຄວາມສໍາຄັນ ຕໍ່ນັກສຶກສາຢ່າງຍິ່ງ; ເປົ້າໝາຍຫຼັກຂອງໂຄງການແມ່ນແນໃສ່ ເພື່ອເປັນການເສີມສ້າງສາຍພົວພັນທາງດ້ານວຽກງານການສຶກສາ, ວັດທະນະທຳ-ສັງຄົມ ແລະວຽກງານວິຊາການດ້ານອື່ນໆ ຂອງ 6 ປະເທດລຸ່ມແມ່ນໍ້າຂອງ ໃຫ້ແໜ້ນແຟ້ນກວ່າເກົ່າ, ເຊິ່ງໄດ້ສ້າງຄວາມສົນໃຈໃຫ້ກັບຫຼາຍໆພາກສ່ວນ ແລະໃນແຕ່ລະປີຈະມີຜູ້ຄົນເຂົ້າຮ່ວມເພີ່ມຂຶ້ນເລື້ອຍໆ. ໃນການແຂ່ງຂັນຄັ້ງນີ້ ປະກອບດ້ວຍ ທີມທີ່ມີແຜນທຸລະກິດທີ່ເປັນຮູບປະທໍາ ທີ່ໄດ້ນໍາສະເໜີເປັນຄັ້ງທໍາອິດ. ດັ່ງນັ້ນ, ຂ້າພະເຈົ້າໝັ້ນໃຈວ່າ ບັນດາໄວໜຸ່ມ ທີ່ເຂົ້າຮ່ວມການແຂ່ງຂັນທຸກໆຄົນແມ່ນກໍາລັງຮຽນຮູ້ໄປນໍາກັນ ເພື່ອສ້າງນະວັດຕະກໍາໃໝ່, ແຕ່ເຖິງຢ່າງໃດກໍດີ ມັນຈະໃຊ້ເວລາໃນການປະຕິບັດຕົວຈິງດົນພໍສົມຄວນ ຫາກວ່າຜູ້ປະກອບການ, ຜູ້ມີຄວາມຮູ້, ອໍານາດການປົກຄອງ ແລະລັດຖະບານເມີນເສີຍຕໍ່ແນວຄິດຂອງພວກເຂົາ. ດັ່ງນັ້ນໂຄງການ YICMG ແມ່ນກໍາລັງເຮັດສິ່ງທີ່ຖືກຕ້ອງ ແລະພວກເຮົາຕ້ອງເຮັດນໍາກັນໃນເວລາດຽວກັນ ແລະໄປພ້ອມໆກັນເພື່ອໃຫ້ພວກເຮົາໄປໄດ້ໄກກວ່າເກົ່າຕື່ມອີກ. ພ້ອມກັນນັ້ນ, ທ່ານ ກໍໄດ້ສະແດງຄວາມຍິນດີ ຕໍ່ຜູ້ໄດ້ຮັບຮາງວັນ ແລະຜູ້ເຂົ້າຮ່ວມທຸກໆຄົນ ພ້ອມທັງຂອບໃຈພາກສ່ວນທີ່ກ່ຽວຂ້ອງ ທີ່ເຮັດໃຫ້ການແຂ່ງຂັນນີ້ ມີຜົນສໍາເລັດຢ່າງຈົບງາມ”.

          ຜ່ານການນໍາສະເໜີບົດ ໂຄງການຂອງແຕ່ລະທີມໃນຮອບທໍາອິດ ແລະຮອບສຸດທ້າຍ, ຄະນະກໍາມະການສາມາດຄັດເລືອກເອົາ 9 ທີມທີ່ໄດ້ຮັບຮາງວັນ ຈາກ 20 ທີມທີ່ເຂົ້າຮ່ວມການແຂ່ງຂັນຄື: ສໍາລັບຮາງວັນ "The Most Innovative Team Award" ໄດ້ແກ່ທີມ: The Langtsang-Mekong International Youth League ຈາກມະຫາວິທະຍາໄລການເງິນ ແລະເສດຖະກິດກວາງຊີ ສປ ຈີນ ແລະທີມ Sangthong Eco House ຈາກມະຫາວິທະຍາໄລແຫ່ງຊາດລາວ; ຮາງວັນ "The Most Valuable Issue Award"ໄດ້ແກ່ທີມ: Implementation of an Eco-Friendly Hotel ຈາກມະຫາວິທະຍາໄລຢ່າງກຸ່ງ ປະເທດ ມຽນມາ ແລະທີມ DragonballProject ຈາກມະຫາວິທະຍາໄລ ວິທະຍາສາດສັງຄົມ ແລະມະນຸດສາດ ຮາໂນ້ຍ ສສ ຫວຽດນາມ; ຮາງວັນ "The Best Project for Incubation Team Award" ໄດ້ແກ່ທີມ: KompongPhluk Hydroponic Farm ຈາກມະຫາວິທະຍາໄລພະນົມເປນ ຣາຊະອານາຈັກກໍາປູເຈຍ ແລະທີມ Ecosystem Educational Tour ຈາກມະຫາວິທະຍາໄລຣາຊະພັດ ສົງຂານາຄະລິນ ຣາຊະອານາຈັກໄທ  ແລະຮາງວັນ "The Best Multinational Team Award" ມີ 3 ໂຄງການຄື: ທີມ Eco-tourism with Application ທີມປະສົມຈາກ ມະຫາວິທະຍາໄລພະນົມເປນ ຣາຊະອານາຈັກກໍາປູເຈຍ, ມະຫາວິທະຍາໄລແຫ່ງຊາດລາວ ແລະສະຖາບັນການສຶກສາທາງການທູດ ສສ ຫວຽດນາມ; ທີມ Intelligent Ecological Protection Detector ມະຫາວິທະຍາໄລ ວິທະຍາສາດສັງຄົມ ແລະມະນຸດສາດ ຮາໂນ້ຍ ສສ ຫວຽດນາມ, ມະຫາວິທະຍາໄລແຫ່ງຊາດລາວ ແລະມະຫາວິທະຍາໄລລັງສິດ ຣາຊະອານາຈັກໄທ ແລະທີມ Ecosystem Educational Tour ມະຫາວິທະຍາໄລ ວິທະຍາສາດສັງຄົມ ແລະມະນຸດສາດ ຮາໂນ້ຍ ສສ ຫວຽດນາມ, ມະຫາວິທະຍາໄລຢ່າງກຸ່ງ ແລະມະຫາວິທະຍາໄລ ຣາຊະພັດ ສົງຂານາຄະລິນ.

ພາບບັນຍາກາດ

You are here: Home ຂ່າວ ໂຄງການ YICMG ຄັ້ງທີ 3 ປິດລົງດ້ວຍຜົນສໍາເລັດຢ່າງຈົບງາມ