nuol.edu.la



ສະຫະພັນກໍາມະບານ ມຊ. ຈັດກິດຈະກໍາຍ່າງເພື່ອສຸຂະພາບຊົມເຊີຍວັນສ້າງຕັ້ງສະຫະພັນກໍາມະບານລາວ ຄົບຮອບ 62 ປີ

           ໃນຕອນເຊົ້າ ວັນທີ 3 ກຸມພາ 2018 ນີ້, ສະຫະພັນກໍາມະບານ ມະຫາວິທະຍາໄລແຫ່ງຊາດ ໄດ້ຈັດກິດຈະກໍາຍ່າງເພື່ອສຸຂະພາບ ເນື່ອງໃນໂອກາດຊົມເຊີຍວັນສ້າງຕັ້ງ ສະຫະພັນກໍາມະບານລາວ ຄົບຮອບ 62 ປີ (1/2/1956-1/2/2018)ຂຶ້ນທີ່ສະໜາມກີລາກາງມະຫາວິທະຍາໄລແຫ່ງຊາດ, ໂດຍໃຫ້ກຽດເປັນປະທານຂອງ ທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມຊ, ມີບັນດາທ່ານ ຮອງອະທິການບໍດີ, ປະທານ ສະຫະພັນກໍາມະບານ, ແມ່ຍິງ, ຊາວໜຸ່ມ ມະຫາວິທະຍາໄລແຫ່ງຊາດ, ປະທານກໍາມະບານຮາກຖານທັງ 14 ຮາກຖານ ຕະຫຼອດຮອດສະມາຊິກ ກໍາມະບານ ແລະນັກສຶກສາເຂົ້າຮ່ວມຢ່າງເປັນຂະບວນ.

          ໂອກາດນີ້, ທ່ານ ຮສ. ປອ. ອານຸລົມ ວິໄລພອນ ປະທານສະຫະພັນ ກໍາມະບານ ມະຫາວິທະຍາໄລແຫ່ງຊາດໄດ້ຂຶ້ນກ່າວເປີດງານ ແລະໄດ້ກ່າວຈຸດປະສົງໃນການຈັດກິດຈະກໍາຄັ້ງນີ້ວ່າ: ກິດຈະກໍາຍ່າງເພື່ອສຸຂະພາບຄັ້ງນີ້ ຈັດຂຶ້ນເພື່ອເປັນການສືບຕໍ່ໂຄສະນາ ຂົນຂວາຍ, ເຕົ້າໂຮມກໍາມະກອນ-ຊາວຜູ້ອອກແຮງງານໃຫ້ມີຄວາມຕື່ນຕົວ, ມີນໍ້າໃຈຮັກຊາດ, ມີທັດສະນະ ຊົນຊັ້ນກໍາມະກອນ, ເສີມຂະຫຍາຍປະຊາທິປະໄຕ, ມີລະບຽບແບບແຜນ, ເປັນພົນລະເມືອງທີ່ດີຂອງຊາດ ແລະເປັນໂຕແທນໃຫ້ແກ່ການປົກປ້ອງສິດຜົນປະໂຫຍດອັນຊອບທໍາໃຫ້ແກ່ກໍາມະກອນ. ກິດຈະກໍາດັ່ງກ່າວນີ້ ຍັງເປັນການຮັດແໜ້ນຄວາມສາມັກຄີລະຫວ່າງຄະນະນໍາ, ພະນັກງານ, ຄູ-ອາຈານ ແລະນັກສຶກສາ ມະຫາວິທະຍາໄລແຫ່ງຊາດໃຫ້ນັບມື້ແໜ້ນແຟ້ນຍິ່ງຂຶ້ນ, ພ້ອມທັງເປັນການສົ່ງເສີມໃຫ້ທຸກຄົນຫັນມາອອກກໍາລັງກາຍ ເພື່ອຮັກສາສຸຂະພາບຂອງຕົນໃຫ້ມີຄວາມແຂງແຮງ.

          ການຍ່າງເພື່ອສຸຂະພາບຄັ້ງນີ້, ແມ່ນມີໄລຍະທາງຍາວ 4 ກິໂລແມັດ (ເລີ່ມຍ່າງແຕ່ສະໜາມກີລາກາງ ມະຫາວິທະຍາໄລແຫ່ງຊາດ, ລົງທາງໂຮງຮຽນ ມັດທະຍົມສົມບູນ ສາທິດ, ໂຄ້ງເຂົ້າປະຕູ ດ້ານໜ້າ ແລ້ວຍ່າງຕາມເສັ້ນຜ່ານທາງກາງ ມະຫາວິທະຍາໄລແຫ່ງຊາດ ວິທະຍາເຂດດົງໂດກ, ຜ່ານໜ້າຕະຫຼາດວິທະຍາເຂດ, ໂຄ້ງຂຶ້ນ ສູນກີລາໃນຮົ່ມ ແລ້ວລ້ຽວເຂົ້າປະຕູສະໜາມກີລາກາງ ມະຫາວິທະຍາໄລແຫ່ງຊາດຈຸດເກົ່າ) ແລະໄດ້ມີການເຕັ້ນແອໂຣບິກຮ່ວມກັນດ້ວຍບັນຍາກາດຄຶກຄື້ນຕື່ມອີກ.

ພາບບັນຍາກາດ

You are here: Home ຂ່າວ ສະຫະພັນກໍາມະບານ ມຊ. ຈັດກິດຈະກໍາຍ່າງເພື່ອສຸຂະພາບຊົມເຊີຍວັນສ້າງຕັ້ງສະຫະພັນກໍາມະບານລາວ ຄົບຮອບ 62 ປີ