ທ່ານອະທິການບໍດີໃຫ້ສຳພາດຂ່າວເນື່ອງໃນວັນຄູແຫ່ງຊາດຄົບຮອບ 20 ປີ
ການສະເຫລີມສະຫລອງວັນຄູແຫ່ງຊາດ 7 ຕຸລາ ຄົບຮອບ 20 ປີ ( 07/10/1994 - 7/10/2014 ) ປະຈໍາປີ2014, ມະຫາວິທະຍາໄລແຫ່ງຊາດ (ມຊ) ຈະຈັດຂຶ້ນຢ່າງລຽບງ່າຍແຕ່ໃຫ້ໄດ້ເນື້ອໃນຄົບຖ້ວນ ແລະເລິກເຊິ່ງ ເພື່ອແນ່ໃສ່ປັບປຸງຄຸນນະພາບການສຶກສາຂອງລາວ ກໍຄືຂອງມະຫາວິທະຍາໄລແຫ່ງຊາດໃຫ້ດີຂຶ້ນ ຫຍັບເຂົ້າມໍ່ກັບພາກພື້ນ ແລະສາກົນ ເທື່ອລະກ້າວ ກ່ອນເຂົ້າສູ່ເອອີຊີ ໃນປີ 2015. ຂະນະທີ່ທ່ານອະທິການບໍດີ ມຊ ຮຽກຮ້ອງໃຫ້ຄູ-ອາຈານທົ່ວປະເທດພັດທະ ນາຕົນເອງໃຫ້ກາຍເປັນບຸກຄະລາກອນທີ່ດີ ແລະມີຄຸນນະພາບ ຮັບໃຊ້ສັງຄົມສົມກັບເປັນຄູທີ່ດີຂອງປະຊາຊົນ.
ຕາມການຖະແຫຼ່ງຂ່າວຕໍ່ສື່ມ່ວນຊົນ ທ່ານ ສຈ.ດຣ ສຸກກົງແສງ ໄຊຍະເລີດ ອະທິການບໍດີ ມຊ ໃນວັນທີ 29 ກັນຍາ 2014 ຜ່ານມາວ່າ: ໂດຍປະຕິ ບັດຕາມຄຳສັ່ງ ເລກທີ 3744 ລົງວັນທີ 1 ກັນຍາ 2014 ຂອງກະຊວງສຶກສາທິ ການ ແລະກິລາ, ເຊິ່ງກຳນົດໃຫ້ທຸກພາກສ່ວນກໍຄື ຄູ-ອາຈານໃນຂອບເຂດທົ່ວປະເທດ ຕ້ອງໄດ້ມີການກະກຽມຈັດຕັ້ງການສະເຫຼີມສະຫຼອງວັນຄູແຫ່ງຊາດ 7 ຕຸລາ ຄົບຮອບ 20 ປີ. ສະນັ້ນ, ມຊ ກໍ່ໄດ້ມີການກະກຽມສະເຫຼີມສະຫຼອງວັນ ດັ່ງກ່າວ ເຊິ່ງເປັນວັນຂອງຕົນເອງ, ໃນນີ້ ມຊ ໄດ້ມີການກະກຽມສະເຫຼີມ ສະຫຼອງໃຫ້ມີຄວາມພ້ອມແບບຮອບດ້ານເປັນຕົ້ນແມ່ນ ໄດ້ມີການແຕ່ງຕັ້ງຄະນະຮັບຜິດຊອບຈັດງານ ພ້ອມນັ້ນ ຍັງໄດ້ມີການເຄື່ອນໄຫວກິດຈະກຳອື່ນໆ ໂດຍສະເພາະແມ່ນການສິດສອນ, ການຄົ້ນຄ້ວາວິທະຍາສາດ, ການຈັດສຳມະນາກ່ຽວກັບຄຸນນະພາບການຮຽນ-ການສອນ, ຄຸນນະພາບດ້ານຕາຕະລາງການສິດສອນ ເພື່ອຈະໄດ້ແຂ່ງຂັນກັນໃນມື້ຈັດງານ. ນອກຈາກນີ້ ຍັງໄດ້ມີການເຄື່ອນໄຫວຈັດກິດຈະກຳແຂ່ງຂັນກິລາ, ສິ ລະປະ-ວັນນະຄະດີ ແລະວັດທະນະທຳອື່ນໆ.
ພ້ອມນັ້ນ, ມຊ ຍັງໄດ້ໃຫ້ແຕ່ລະພາກສ່ວນກວດກາຄືນກ່ຽວກັບຄຸນນະ ພາບການຮຽນ-ການສອນໃນ 1 ປີຜ່ານມາ, ຄຸນນະພາບການຮຽນການປັບປຸງຫຼັກ ສູດການຮຽນ-ການສອນ ແລະກວດຄືນການປັບປຸງແຕ່ລະຫຼັກສູດໃນຊັ້ນປະລິນຍາຕີ, ປະລິນຍາໂທ ແລະປະລິນຍາເອກ ວ່າເປັນແນວໃດ ໄດ້ຕາມມາດຕະຖານແລ້ວ ຫຼື ບໍ່ ? ນອກຈາກນັ້ນ, ກໍ່ໃຫ້ແຕ່ລະພາກສ່ວນໄດ້ສະຫຼຸບ ແລະຕີລາຄາຄືນກ່ຽວກັບຈຸດດີ, ຈຸດອ່ອນ ແລະຂໍ້ຄົງຄ້າງໃນໄລຍະຜ່ານມາວ່າມີການເຄື່ອນໄຫວຄືແນວໃດ ? ເພື່ອເປັນການປັບປຸງຄຸນນະພາບການຮຽນ-ການສອນ, ຄຸນນະພາບຄູ ແລະຄຸນນະພາບການຄົ້ນຄ້ວາວິທະຍາສາດ ການສຶກສາຂອງ ມຊ ໃຫ້ດີຂຶ້ນເທື່ອລະກ້າວ ສາມາດຫຍັບເຂົ້າໃກ້ກັບອະນຸພາກພື້ນ ແລະສາກົນ ໄດ້ເທື່ອລະກ້າວ ກ່ອນເຂົ້າສູ່ປະຊາຄົມເສດຖະກິດອາຊຽນ ຫລື ເອອີຊີ(AEC) Asian Economic Community ໃນປີ 2015.
ທ່ານອະທິການບໍດີ ມຊ ກ່າວອີກວ່າ: ການສະເຫຼີມສະຫຼອງວັນຄູແຫ່ງ ຊາດປີນີ້ ແມ່ນຈະຈັດແບບລຽບງ່າຍກະທັດຮັດ ແຕ່ໃຫ້ມີເນື້ອໃນຄົບຖ້ວນ ແລະເລິກເຊິ່ງ ຕົ້ນຕໍແມ່ນແນ່ໃສ່ປັບປຸງຄຸນນະພາບການພັດທະນາຂອງນັກສຶກສາລາວກໍຄືຂອງ ມຊ. ສຳລັບກິດຈະກຳດັ່ງກ່າວ ແມ່ນຈະມີຂຶ້ນພາຍໃຕ້ຄຳຂວັນທີ່ວ່າ: “ນັກສຶກສາ ຮຽນດີ-ຮຽນເກັ່ງ ແລະຄູ-ອາຈານສອນດີ-ສອນເກັ່ງ”, ພ້ອມນີ້ ນັກສຶກສາຍັງຈະໄດ້ມີການຈັດສຳມະນາກ່ຽວກັບການຮຽນແນວໃດ, ມີຄຸນສົມບັດແນວໃດ ແລະມີມາລະຍາດຄືແນວໃດ ໃນການເຂົ້າຫ້ອງຮຽນ.
ທ້າຍນີ້ ໃນໂອກາດວັນທີ່ມີຄວາມໝາຍຄວາມສຳຄັນທາງປະຫວັດສາດຂອງຄູ ກໍຄືວັນຄູແຫ່ງຊາດ 7 ຕຸລາ ຂໍສະແດງຄວາມຮູ້ສຶກພາກພູມໃຈຢ່າງຍິ່ງແລະ ອວຍພອນໃຫ້ຄູ-ອາຈານທັງໝົດໃນຂອບເຂດທົ່ວປະເທດຈົ່ງມີສຸຂະພາບເຂັ້ມແຂງ, ມີພະລານາໄມສົມບູນ ແລະມີຜົນສຳເລັດໃນໜ້າທີວຽກງານທຸກປະການ ຕາມທີ່ພັກ ແລະລັດຖະບານມອບໝາຍໃຫ້ສົມກັບເປັນຄູຂອງພັກ-ລັດ ແລະກາຍເປັນຄູທີ່ດີຂອງ ປະຊາຊົນ. ພ້ອມດຽວກັນນີ້, ກໍ່ຢາກຮຽກຮ້ອງໃຫ້ຄູ-ອາຈານທັງໝົດ ໃນທົ່ວປະເທດ. ເວົ້າລວມ, ເວົ້າສະເພາະແມ່ນພາຍໃນ ມຊ ຈົ່ງພ້ອມກັນ ພັດທະນາຕົນເອງໃຫ້ກາຍເປັນບຸກຄະລາກອນທີ່ດີ, ມີຄຸນນະພາບ ແລະກຽມດ້ານຈິດໃຈ ເພື່ອໃຫ້ເປັນຄູທີ່ໄດ້ມາດຕະຖານ ກ່ອນເຂົ້າສູ່ເອອີຊີ. ທ່ານ ສຈ.ດຣ ສຸກກົງແສງ ໄຊຍະເລີດກ່າວ.
ຢ່າງໃດກໍ່ຕາມ, ການສະເຫຼີສະຫຼອງວັນຄູແຫ່ງຊາດປີນີ້ ມຊ ຈະຈັດຂຶ້ນໃນວັນທີ 6 ຕຸລາ 2014 ທີ່ ມຊ, ໂດຍໃຫ້ກຽດເຂົ້າຮ່ວມປະຖະກະຖາ ແລະໂອ້ລົມຕໍ່ພະນັກງານ, ຄູ-ອາຈານ ພາຍໃນ ມຊ ຂອງພະນະທ່ານ ທອງສິງ ທຳມະວົງ ນາຍົກລັດທະມົນຕີແຫ່ງ ສປປ ລາວ.