ພິທີສະຫຼຸບບັ້ນເຝິກອົບຮົມທິດສະດີການເມືອງໄລຍະສັ້ນ
ພາຍຫຼັງທີ່ອົງຄະນະພັກ ມຊ ໄດ້ເປີດບັ້ນເຝິກອົບຮົມທິດສະດີການເມືອງ-ການປົກຄອງ ໄລຍະສັ້ນ 45 ວັນ, ຊຸດທີ 8 ມາແຕ່ວັນທີ 27 ຕຸລາ 2014; ມາໃນຕອນເຊົ້າວັນທີ 31 ທັນວາ 2014 ອົງຄະນະພັກ ມຊ ໄດ້ຈັດພິທີ ປິດບັ້ນເຝິກອົບຮົມຊຸດທີ 8 ນີ້ ຢ່າງເປັນທາງການ, ພິທີດັ່ງກ່າວໄດ້ຈັດຂຶ້ນທີ່ຫ້ອງປະຊຸມສະໂມສອນໃຫຍ່ ມຊ, ໂດຍການເປັນປະທານຂອງທ່ານ ສຈ. ດຣ ສຸກກົງແສງ ໄຊຍະເລີດ ກຳມະການສູນກາງພັກ, ຄະນະພັກປະຈຳກະຊວງສຶກສາທິການ ແລະກິລາ, ອະທິການບໍດີ ມຊ, ມີທ່ານ ຈອມແສງ ສະຫລີພົມ ຫົວໜ້າກົມວິຊາການຂອງສະຖາບັນການເມືອງ-ການປົກຄອງແຫ່ງຊາດ, ມີບັນດາທ່ານຮອງອະທິການບໍດີ, ບັນດາເລຂາຄະນະພັກຮາກຖານຈາກ 11ຄະນະວິຊາ, ຄະນະບໍດີ, ຫົວໜ້າຫ້ອງການ, ຜູ້ອຳນວຍການສະຖາບັນ, ສູນ, ຫໍສະໝຸດກາງ, ໂຮງຮຽນ, ໂຮງໝໍ, ບັນດາຄະນະນຳ ສາມອົງການຈັດຕັ້ງມະຫາຊົນ ພ້ອມດ້ວຍນັກສຳມະນາກອນ ຊຸດທີ 8 ເຂົ້າຮ່ວມ ຢ່າງພ້ອມພຽງ.
ໂອກາດນີ້, ທ່ານ ນາງ ບຸນໂຮມ ວົງພົມ ຫົວໜ້າພະແນກກໍ່ສ້າງພັກ ມຊ ໄດ້ຂຶ້ນຜ່ານບົດສະຫຼຸບບັ້ນເຝິກອົບຮົມເຊິ່ງທ່ານໄດ້ໃຫ້ຮູ້ວ່າ: ສະມາຊິກພັກພະນັກງານ ຄູ-ອາຈານຫລັກແຫ່ລງ ແລະພະນັກງານຜູ້ທີ່ຈົບປະລິນຍາເອກຢູ່ໃນ 11 ຄະນະວິຊາ ແລະ ສຳນັກງານອະທິການບໍດີ ມຊ, ມີຈຳນວນທັງໝົດ 100 ສະຫາຍ, ຍິງ 40 ສະຫາຍ. ເຊິ່ງຜູ້ເຂົ້າຮ່ວມເຝິກອົບຮົມໄດ້ຮັບຟັງການບັນຍາຍແລະ ເຊື່ອມຊຶມເນື້ອໃນເອກະສານທັງໝົດ 6 ວິຊາ ຄື: ວິຊາປັດສະຍາ 8 ບົດ, ວິຊາລັດທິສັງຄົມນິຍົມວິທະຍາສາດ 10 ບົດ, ວິຊາເສດຖະສາດການເມືອງ 8 ບົດ, ວິຊາບໍລິຫານສາດ 8 ບົດ, ພາກວິຊາກໍ່ສ້າງພັກຈຳນວນ 5 ບົດ ແລະ ແຜນພັດທະນາ ມຊ, ຂໍ້ແຂ່ງຂັນຂອງອົງຄະນະພັກກະຊວງສຶກສາທິການ ແລະກິລາ, ກອງປະຊຸມໃຫຍ່ຄັ້ງທີ X ຂອງພັກ. ຕະຫຼອດໄລຍະ ດຳເນີນການເຝິກອົບຮົມ ນັກສຳມະນາກອນທຸກຄົນມີຄວາມຈູບຈ້າວ-ຫ້າວຫັນ, ມີຄວາມພາກພູມໃຈ ແລະປະຕິບັດລະບຽບ, ຕັ້ງໃຈຮັບເອົາຄວາມຮູ້ ຈາກຄະນະອາຈານແຕ່ລະວິຊາດ້ວຍຄວາມເຄົາລົບ ແລະຮັກແພງ; ຜ່ານການເຝິກອົບຮົມຊຸດນີ້, ນັກສຳມະນາກອນທຸກຄົນໄດ້ມີຄວາມຮູ້, ກຳໄດ້ ແລະ ເຊື່ອມຊື່ມ ດ້ານທິດສະດີມາກ -ເລນິນ ຂັ້ນພື້ນຖານເປັນຢ່າງດີ, ກຳໄດ້ແນວທາງການເມືອງຂອງພັກ ແລະກ້າສະແດງຄວາມຄິດເຫັນໃນເວລາຄົ້ນຄ້ວາ ສົນທະນາ. ຄາດວ່າພາຍຫລັງສຳເລັດບັ້ນເຝິກອົບຮົມທິດສະດີການເມືອງ-ການປົກຄອງ ໄລຍະສັ້ນ 45 ວັນໃນຊຸດນີ້ແລ້ວ ບັນດາທ່ານທີ່ເຂົ້າຮ່ວມເຝິກອົບຮົມດັ່ງກ່າວຈະນຳເອົາຄວາມຮູ້ - ຄວາມເຂົ້າໃຈ ທາງດ້ານທິດສະດີເຂົ້າໄປໝຸນໃຊ້ເຂົ້າໃນການປະຕິບັດໜ້າທີ່ວຽກງານຕົວຈິງໄດ້ເປັນຢ່າງດີ.
ໂອກາດນີ້, ທ່ານ ສຈ. ດຣ ສຸກກົງແສງ ໄຊຍະເລີດ ກໍໄດ້ໃຫ້ກຽດມອບໃບຢັ້ງຢືນ ໃຫ້ແກ່ນັກສຳມະນາກອນຈຳນວນ 100 ສະຫາຍ, ທີ່ສຳເລັດການເຝິກອົບຮົມທິດສະດີການເມືອງ-ການປົກຄອງໄລຍະສັ້ນຊຸດທີ 8 ພ້ອມທັງໄດ້ໂອ້ລົມຕໍ່ພິທີ, ເຊິ່ງກ່ອນອື່ນທ່ານ ໄດ້ກ່າວສະແດງຄວາມຊົມເຊີຍ ຕໍ່ຄະນະຮັບຜິດຊອບບັ້ນເຝິກອົບຮົມ ແລະຄວາມເອົາໃຈໃສ່, ຄວາມເສຍສະຫຼະ, ຄວາມອົດທົນຂອງພະນັກງານຫຼັກແຫ່ງ, ພະນັກງານວິຊາການຂອງ ມຊ ກໍຄື ນັກວິທະຍາກອນຈາກສະຖາບັນການເມືອງ-ການປົກຄອງແຫ່ງຊາດ ທີ່ໄດ້ສະຫຼະເວລາ ແລະຮ່ວມດຳເນີນການເຝິກອົບຮົມໃນຕະຫຼອດໄລຍະ 45 ວັນ ຈົນສຳເລັດລົງດ້ວຍໝາກຜົນອັນຈົບງາມ; ພ້ອມກ່າວເນັ້ນໃຫ້ຜູ້ສຳເລັດ ການເຝິກອົບຮົມຊຸດທີ 8 ທຸກຄົນຈົ່ງພ້ອມກັນນຳເອົາຄວາມຮູ້ວິຊາຕ່າງໆ ຈາກການເຝິກອົບຮົມໄປໝູນໃຊ້ເຂົ້າໃນວຽກງານ ທີ່ຕົນຮັບຜິດຊອບ ໃຫ້ເກີດດອກ -ອອກຜົນ ຕາມແນວທາງຂອງພັກ ແລະພ້ອມກັນຕັ້ງໜ້າດຳເນີນວຽກງານດ້ວຍຄວາມຫ້າວຫັນ, ເພີມທະວີຄວາມສາມັກຄີ ເປັນເຈົ້າຕົນເອງເພື່ອພ້ອມກັນກ້າວໜ້າ ແລະເປັນສ່ວນຮ່ວມສຳຄັນໃນການພັດທະນາປະເທດຊາດຕໍ່ໄປ.