ທູດ ສປ. ຈີນ ມອບທຶນການສຶກສາໃຫ້ແກ່ນັກສຶກສາ ມ.ຊ
ເພື່ອເປັນການຊຸກຍູ້ ນັກສຶກສາຜູ້ຮຽນດີ-ຮຽນເກັ່ງຂອງ ມຊ ໃນວັນທີ 8 ມັງກອນ 2015 ນີ້, ໄດ້ມີພິທີມອບທຶນການສຶກສາ ສປ. ຈີນ ໃຫ້ແກ່ນັກສຶກສາ ມຊ, ພິທີດັ່ງກ່າວໄດ້ຈັດຂຶ້ນ ທີ່ຫ້ອງປະຊຸມຕຶກສຳນັກງານອະທິການບໍດີ ມຊ, ໂດຍການໃຫ້ກຽດມອບຂອງ ທ່ານ ກົ່ວຫົວປິງ ເອກອັກຄະລັດຖະທູດ ສປ ຈີນ ປະຈຳ ສປປ ລາວ, ຮັບໂດຍທ່ານ ສຈ. ດຣ ສຸກກົງແສງ ໄຊຍະເລີດ ອະທິການບໍດີ ມຊ, ໃນພິທີ ມີບັນດາຄະນະກຳມະການມູນນິທິການສຶກສາ ມຊ, ພ້ອມດ້ວຍພະນັກງານທີ່ກ່ຽວຂ້ອງທັງສອງຝ່າຍ ແລະນັກສຶກສາທີ່ໄດ້ຮັບທຶນດັ່ງກ່າວເຂົ້າຮ່ວມ.
ທຶນທີ່ ທູດ ສປ ຈີນ ມອບໃຫ້ນັກສຶກສາ ມຊ ຄັ້ງນີ້ເປັນຄັ້ງທຳອິດ ຈຳນວນ ເງິນ 256.000.000 ກີບ ຕໍ່ນັກສຶກສາ 32 ຄົນ, ໂດຍພາກສ່ວນກ່ຽວຂ້ອງຂອງ ມຊ ຈະໄດ້ສືບຕໍ່ນຳໄປເບີກຈ່າຍໃຫ້ແກ່ນັກສຶກສາຜູ້ລະ 8 ລ້ານກີບ ເພື່ອນຳໃຊ້ເຂົ້າໃນການສຶກສາຮ່ຳຮຽນຕະຫລອດໄລຍະ 4 ປີ. ນັກສຶກສາທີ່ໄດ້ຮັບທຶນດັ່ງກ່າວໃນຄັ້ງນີ້ທັງໝົດ 32 ຄົນ. ເຊິ່ງນັກສຶກສາຜູ້ທີ່ມີເງື່ອນໄຂໄດ້ຮັບທຶນນີ້, ແມ່ນນັກສຶກສາຜູ້ຮຽນດີ - ຮຽນເກັ່ງ, ຄຸນສົມບັດດີ ແລະຄອບຄົວມີຖານະຍາກຈົນ ໂດຍຜ່ານການຄັດເລືອກມາຈາກຄະນະວິຊາຕ່າງໆອ້ອມຂ້າງ ມຊ; ໃນໂອກາດກ່າວຮັບທຶນດັ່ງກ່າວທ່ານ ສຈ. ດຣ ສຸກກົງແສງ ໄຊຍະເລີດ ອະທິການບໍດີ ມຊ ໄດ້ກ່າວສະແດງຄວາມຂອບໃຈ ຕໍ່ລັດຖະບານ ແລະ ປະຊາຊົນຈີນ ທີ່ໄດ້ມີຄວາມເປັນຫ່ວງ-ເປັນໄຍຕໍ່ນັກສຶກສາ ມຊ, ເວົ້າສະເພາະແມ່ນຜູ້ທີ່ຖານະຍາກຈົນ ເຊິ່ງການຊ່ວຍເຫຼືອທາງດ້ານທຶນຮອນ ຂອງທູດ ສປ ຈີນ ເປັນການຊ່ວຍແບ່ງເບົາພາລະຂອງພໍ່ແມ່ ຜູ້ປົກຄອງ ທັງເປັນການກະຕຸກ-ຊຸກຍູ້ ໃຫ້ນັກສຶກສາມີຄວາມສະດວກໃນການດຳລົງຊີວິດ ແລະ ມີກຳລັງໃຈຕໍ່ການສຶກສາຮໍ່າຮຽນກ້າວໄປສູ່ຜົນສຳເລັດໃນອະນາຄົດ.