ງານວາງສະແດງການສຶກສາມາເລເຊຍ ທີ່ ມະຫາວິທະຍາໄລແຫ່ງຊາດ

ໃນຕອນເຊົ້າວັນທີ 11 ມີນາ 2015 ນີ້ ມະຫາວິທະຍາໄລແຫ່ງຊາດ ຮ່ວມກັບ ກະຊວງສຶກສາທິການມາເລເຊຍ ໄດ້ຈັດງານວາງສະແດງການສຶກສາຂອງມະຫາວິທະຍາໄລ ປະເທດ ມາເລເຊຍທີ່ ສະໂມສອນໃຫຍ່ ຂອງມະຫາວິທະຍາໄລແຫ່ງຊາດ ໂດຍໃຫ້ກຽດເຂົ້າຮ່ວມເປັນປະທານຂອງທ່ານ ຮສ. ດຣ. ພຸດ ສິມມາລາວົງ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ດາໂຕະ ຕັນ ໄຕ ເຮັງ ​ເອກອັກຄະລັດຖະທູດ ມາເລເຊຍ ປະຈຳ ສປປ. ລາວ, ທ່ານ ມາດາມ ນໍມາລາ ຫົວໜ້າຫ້ອງການສຶກສາມາເລເຊຍ ພ້ອມດ້ວຍບັນດາຜູ້ຕາງໜ້າຈາກ 15 ມະຫາວິທະຍາໄລຕ່າງໆ ຂອງມາເລເຊຍ, ມີພະນັກງານ, ຄູ-ອາຈານ ແລະນັກສຶກສາເຂົ້າຮ່ວມເປັນຈຳນວນຫລວງຫລາຍ.

ຈຸດປະສົງໃນການຈັດງານສະແດງການສຶກສາໃນຄັ້ງນີ້ ແມ່ນເພື່ອສົ່ງເສີມ, ເຜີຍແຜ່ການສຶກສາ  ແລະອະທິບາຍຊ່ອງທາງການສະໝັກທຶນໃຫ້ແກ່ນັກສຶກສາລາວທີ່ມີຄວາມ ສົນໃຈຢາກໄປຍົກລະດັບການສຶກສາທີ່ປະເທດ ມາເລເຊຍ. ນອກຈາກນັ້ນທາງບັນດາຜູ້ຕາງໜ້າຈາກມະຫາວິທະຍາໄລຕ່າງໆ ຂອງມາເລເຊຍຍັງໄດ້ໃຫ້ຄຳປຶກສາແກ່ນ້ອງນັກຮຽນທີ່ ໃກ້ຈະສຳເລັດການສຶກສາຕໍ່ກັບການສະໝັກວຽກ ແລະ ໃຫ້ການທົດສອບວັດລະດັບພາສາອັງກິດໃຫ້ແກ່ນັກສຶກສາອີກດ້ວຍ.

ພາບ​ບັນຍາກາດ