ງານສະແດງສິລະປະວັດທະນາທຳ ຂອງນັກສຶກສາຈີນ
ໃນຕອນຄ່ຳວັນທີ 9ມິຖຸນາ 2015ຜ່ານມາ, ຄະນະນັກສຶກສາຈີນທີ່ຮຽນຢູ່ມະຫາວິທະຍາໄລແຫ່ງຊາດ, ທີ່ສຳເລັດການສຶກສາ ສົກສຶກສາ 2014-2015 ໄດ້ຈັດງານສະ ແດງສິລະປະວັດທະນະທຳຈີນ ຂຶ້ນທີ່ສະໂມສອນໃຫຍ່ ມຊ.ໂດຍການເຂົ້າຮ່ວມຂອງທ່ານ ສຈ.ດຣ. ສົມສີ ຍໍພັນໄຊ ຮອງອະທິການບໍດີ, ທ່ານ ພຸດ ສິມມາລາວົງ ຮອງອະທິການ ບໍດີ ມຊ, ທ່ານ ຈ້າວເຊິງກາງ (Zhao Chenggang) ຫົວໜ້າພະແນກການເມືອງຂອງສະຖານທູດ ສປ. ຈີນ ປະຈໍາ ສປປ. ລາວ, ມີຜູ້ອຳນວຍການມະຫາວິທະຍາໄລຊູໂຈວ, ມີປະທານບໍລິສັດຊັ່ງຈ່ຽງ, ບໍລິສັດຈັນບາງ, ບັນດາຄະນະບໍດີ, ຮອງຄະນະບໍດີ, ຫົວໜ້າຫ້ອງການ, ຮອງຫົວໜ້າຫ້ອງການ ແລະພາກສ່ວນຕ່າງໆພ້ອມດ້ວຍນັກສຶກສາເຂົ້າຮ່ວມຊົມ ຢ່າງຫຼວງຫຼາຍ.
ໃນງານທ່ານ ສົນທະນີ ຫລວງໄຊຊະນະ ຫົວໜ້າຫ້ອງການຄຸ້ມຄອງນັກສຶກສາ ມຊ ກໍໄດ້ຂຶ້ນສະເໜີຈຸດປະສົງ ແລະກ່າວເປີດງານດັ່ງກ່າວວ່າ: ການຈັດງານດັ່ງກ່າວແມ່ນ ເພື່ອເປີດໂອກາດໃຫ້ນັກສຶກສາໄດ້ສະແດງຄວາມຮູ້ບຸນຄຸນຕໍ່ຄະນະນຳ, ຄູ-ອາຈານແລະພະນັກງານມະຫາວິທະຍາໄລແຫ່ງຊາດ ທີ່ໄດ້ຖ່າຍທອດຄວາມຮູ້ຄວາມສາມາດ ແລະໃຫ້ ຄວາມສະດວກແກ່ການຄົ້ນຄວ້າຮໍ່າຮຽນຂອງນັກສຶກສາຈີນຈົນປະສົບຜົນສຳເລັດແລະຍັງເປັນການແລກປ່ຽນພາສາ, ສິລະປະ-ວັດທະນາທຳ ລະຫວ່າງລາວ-ຈີນ ແລະເສີມສ້າງມິດ ຕະພາບຄວາມສາມັກຄີ ລະຫວ່າງ ນັກສຶກສາລາວ-ຈີນ ແລະ ຊາດອື່ນໆໃຫ້ແໜ້ນແຟ້ນຍີ່ງໆຂຶ້ນ. ທ່ານຍັງໄດ້ກ່າວສະແດງຄວາມຍິນດີຕ້ອນຮັບບັນດາທ່ານແຂກ ແລະນັກສະແດງ ທຸກຄົນ ທີ່ໄດ້ພ້ອມກັນມາຮ່ວມງານໃນມື້ນີ້, ຊຶ່ງ
ມັນໄດ້ສະແດງໃຫ້ເຫັນເຖິງໝາກຜົນແຫ່ງການຜູກພັນ ແລະສາມັກຄີ ຮ່ວມມືຊຶ່ງກັນ ແລະກັນລະຫວ່າງສອງຊາດ ລາວຈີນ-ຈີນລາວ ກໍຄືການແລກປ່ຽນພົວພັນໃນລະດັບ ມະຫາວິທະຍາໄລລາວ ແລະຈີນ. ຈາກນັ້ນການສະແດງກໍໄດ້ເລີ່ມຂຶ້ນ ຊຶ່ງເລີ່ມດ້ວຍການສະແດງດົນຕີຊົນເຜົ່າຈີນ ບົດຟ້ອນຈີນ, ບົດຟ້ອນລາວ ແລະຮ້ອງເພງດ່ຽວ ແລະລາຍການ ຕ່າງໆ ທີ່ອຸດົມສົມບູນໄປດ້ວຍເນື້ອໃນ ແລະຄວາມໝາຍ.
ການສະແດງໄດ້ດຳເນີນໄປ ແລະສຳເລັດລົງດ້ວຍບັນຍາກາດອັນຄຶກຄື້ນມ່ວນຊື່ນ ແລະໜ້າປະທັບໃຈໃຫ້ແກ່ບັນດາແຂກທີ່ມາຮ່ວມຊົມໄດ້ເປັນຢ່າງດີ.