ພິທີເຊັນສັນຍາການຮ່ວມມື ລະຫວ່າງ ຄະນະວິທະຍາສາດສັງຄົມ ມຊ ແລະຖາບັນວິທະຍາສາດ ການເມືອງ ມະຫາວິທະຍາໄລແຫ່ງຊາດ ໂຮຈີມິນ ສສ. ຫວຽດນາມ 
ໃນຕອນເຊົ້າວັນທີ 23 ສິງຫາ 2016 ນີ້, ຄະນະວິທະຍາສາດສັງຄົມ ມະຫາວິທະຍາໄລແຫ່ງຊາດ ແລະສະຖາບັນວິທະຍາສາດ ການເມືອງ ມະຫາວິທະຍາໄລແຫ່ງຊາດ ໂຮຈີມິນ ສສ. ຫວຽດນາມ ໄດ້ຮ່ວມກັນເຊັນສັນຍາການຮ່ວມມື (MOA) ຂຶ້ນທີ່ຫ້ອງປະຊຸມຕຶກສຳນັກງານອະທິການບໍດີ ມຊ, ຝ່າຍ ຄສຄ. ເຊັນໂດຍທ່ານ ຮສ. ປອ. ຄຳມະນີ ສຸລິເດດ ຮອງຄະນະບໍດີ ຄະນະວິທະຍາສາດສັງຄົມ ມຊ, ຝ່າຍ ສະຖາບັນວິທະຍາສາດ ການເມືອງ ສສ. ຫວຽດນາມ ເຊັນໂດຍທ່ານ ປອ. ດິງງັອກເທັກ (Dinh Ngoc Thach, Ph .D) ຫົວໜ້າສະຖາບັນວິທະຍາສາດ ການເມືອງ ມະຫາວິທະຍາໄລແຫ່ງຊາດ ໂຮຈີມິນ ສສ. ຫວຽດນາມ, ເຂົ້າຮ່ວມເປັນສັກຂີພະຍານໂດຍທ່ານ ຮສ. ປອ. ສາຍຂອງ ສາຍນາສິນ ຮອງອະທິການບໍດີ ມຊ, ທ່ານ ປອ. ຫວຽນ ດຶກ ເຫງັຍ (NGUYEN DUC NGHIA, Ph. D) ຮອງອະທິການບໍດີມະຫາວິທະຍາໄລແຫ່ງຊາດ ໂຮຈີມິນ ສສ. ຫວຽດນາມ, ມີບັນດາຫົວໜ້າ ແລະຮອງຫົວໜ້າຫ້ອງການ, ຫົວໜ້າພາກວິຊາ, ຫົວໜ້າພະແນກ ພ້ອມດ້ວຍພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ການເຊັນສັນຍາຄັ້ງນີ້, ແມ່ນເພື່ອເປັນການຮ່ວມມືດ້ານວິຊາການໂດຍສະເພາະແມ່ນຈະຮ່ວມມືກັນສ້າງຫຼັກສູດ, ການສົ່ງເສີມໃຫ້ມີການພົວພັນກັນ, ການແລກປ່ຽນຄູ-ອາຈານ, ພະນັກງານ ແລະນັກສຶກສາ, ການຈັດກິດຈະກໍາການຄົ້ນຄວ້າວິທະຍາສາດຮ່ວມກັນ, ເຂົ້າຮ່ວມກອງປະຊຸມ ແລະສຳມະນາດ້ານວິຊາການ ແລະແລກປ່ຽນປະສົບການເຊິ່ງກັນ ແລະກັນ.
ໂອກາດນີ້ ທັງສອງຝ່າຍຍັງໄດ້ສົນທະນາແລກປ່ຽນຮຽນຮູ້ກ່ຽວກັບສະພາບລວມໂດຍຫຍໍ້ຂອງມະຫາວິທະຍາໄລຂອງກັນ ແລະກັນ ພ້ອມນັ້ນກໍໄດ້ປຶກສາຫາລືເພື່ອສ້າງແຜນລະອຽດກ່ຽວກັບການປະຕິບັດຕາມບົດສັນຍາເປັນຕົ້ນແມ່ນໄດ້ປຶກສາຫາລືກ່ຽວກັບການສ້າງຫຼັກສູດວິຊາການເມືອງ, ການຄົ້ນຄວ້າວິໄຈ ແລະການແລກປ່ຽນຮຽນຮູ້ວັດທະນະທຳເຊິ່ງກັນ ແລະກັນ. ຕ້ອນທ້າຍທັງສອງຝ່າຍຍັງໄດ້ແລກປ່ຽນຂອງທີ່ລະນຶກເຊິ່ງກັນ ແລະກັນອີກດ້ວຍ.