ຄສປ ກຽມສົ່ງນັກສຶກສາເຂົ້າຮ່ວມແຂ່ງຂັນງານອອກແບບສະຖາປັດຕະຍະກໍາລະດັບອາຊີ
ມະຫາວິທະຍາໄລແຫ່ງຊາດ (ມຊ) ກຽມສົ່ງນັກສຶກສາເຂົ້າຮ່ວມແຂ່ງຂັນອອກແບບສະຖາປັດຕະຍະກໍາລະດັບອາຊີ “The 5th Asian contest of the Architectural Rookie’s Award”ທີ່ປະເທດ ມົງໂກລີ ລະຫວ່າງວັນທີ 29 ກັນຍາ ຫາ 2 ຕຸລາ ເຊິ່ງມີ 17 ປະເທດເຂົ້າຮ່ວມ.
ຕາມການເປີດເຜີຍຂອງທ່ານ ຮສ. ບຸນຖະໄຫວ ແກ້ວປັນຍາ ຮອງຄະນະບໍດີຄະນະສະຖາປັດຕະຍະກໍາສາດໃຫ້ຮູ້ວ່າ: ພວກເຮົາໄດ້ດໍາເນີນການແຂ່ງຂັນອອກແບບສະຖາປັດຕະຍະກໍາໃນວັນທີ 5 ກໍລະກົດ ຫາ 16 ສິງຫາ ຢູ່ຄະນະສະຖາປັດຕະຍະກໍາສາດ ມະຫາວິທະຍາໄລແຫ່ງຊາດ ເຊິ່ງມີນັກສຶກສາເຂົ້າຮ່ວມຈໍານວນ 46 ຄົນ, ຜ່ານການແຂ່ງຂັນຄັດເລືອກໄດ້ຜູ້ຊະນະເລີດ ຄື ນາງ ພິລາວັນ ວາຍຸພັກ ນັກສຶກສາ ປີ 3 ພາກວິຊາສະຖາປັດຕະຍະກໍາ ໃນຫົວຂໍ້ການອອກແບບສູນພັດທະນາເຄື່ອງຈັກສານແບບຈໍາລອງ ແລະ ຈະເປັນຕົວແທນຂອງມະຫາວິທະຍາໄລແຫ່ງຊາດ ກໍຄືເປັນຕົວແທນໃຫ້ແກ່ ສປປ ລາວ ເຂົ້າຮ່ວມການແຂ່ງຂັນອອກແບບສະຖາປັດຕະຍະກໍາໃນລະດັບອາຊີ ທີ່ຈະຈັດຂຶ້ນໃນທ້າຍເດືອນກັນຍານີ້.
ສ່ວນ ນາງ ພິລາວັນ ວາຍຸພັກ ກໍ່ໄດ້ສະແດງຄວາມຮູ້ສຶກພາກພູມໃຈ ທີ່ຕົນເອງໄດ້ຮັບເປັນຜູ້ຄັດເລືອກ ແລະຮູ້ສຶກເປັນກຽດທີ່ຈະໄດ້ເປັນຕົວແທນໃຫ້ແກ່ ມຊ. ກໍຄື ສປປ ລາວ ໄປເຂົ້າຮ່ວມການແຂ່ງຂັນໃນລະດັບອາຊີ ພ້ອມນັ້ນກໍໄດ້ໃຫ້ຄຳປະຕິຍານວ່າຈະພະຍາຍາມເຝິກຝົນຫຼໍ່ຫຼອມຕົນເອງໃນການຊອກຮູ້ຮ່ຳຮຽນ ແລະເຝີກຝົນສີມືກ່ຽວກັບການອອກແບບສະຖາປັດຕະຍະກຳ ເພື່ອກຽມພ້ອມເຂົ້າຮ່ວມການແຂ່ງຂັນໃຫ້ໄດ້ຮັບຜົນສຳເລັດ.