ສະຖາປັດຕະຍະກໍາສາດເລັ່ງສ້າງລຸ້ນສືບທອດໃຫ້ທຽບເທົ່າກັບພາກພື້ນ
ຄະນະສະຖາປັດຕະຍະກໍາສາດແມ່ນຄະນະໜຶ່ງຂຶ້ນກັບມະຫາວິທະຍາໄລແຫ່ງຊາດ ເຊິ່ງໄດ້ຮັບການສ້າງຂຶ້ນແຕ່ປີ 2004 ເປັນຕົ້ນມາປະກອບມີ 4 ພາກວິຊາຄື: ພາກວິຊາສະຖາປັດຕະຍະກໍາສາດ, ພາກວິຊາສະພາບແວດລ້ອມພັງເມືອງ, ພາກວິຊາວິທະຍາການອາຄານ, ພາກວິຊາອອກແບບຜະລິດຕະພັນ ແລະ ຕົບແຕ່ງ.
ທ່ານ ອຈ ນາງ ຈັນສອນ ສຸລິວົງ ຫົວໜ້າພາກວິຊາສະຖາປັດຕະຍະກໍາສາດ ໄດ້ໃຫ້ສໍາພາດວ່າ: ພາຍຫລັງຄະນະສະປັດຕະຍະກໍາສາດຂອງພວກເຮົາໄດ້ຮັບການສ້າງຕັ້ງຂຶ້ນແຕ່ປີ 2004 ຈາກພື້ນຖານສະຖາບັນການສຶກສາທາງດ້ານສະຖາປັດຕະຍະກໍາໃນເບື້ອງຕົ້ນປະກອບມີພຽງແຕ່ 3 ພາກວິຊາເທົ່ານັ້ນ ເຊິ່ງມາຮອດປັດຈຸບັນມີ 4 ພາກວິຊາ ແລະ ມີ 2 ຫລັກສູດຄືຫລັກສູດປະລິນຍາຕີປະກອບມີ 5 ສາຂາວິຊາ ແລະ ຫລັກສູດປະລິນຍາໂທປະກອບມີ 3 ສາຂາວິຊາ ສ່ວນບຸກຄະລາກອນມີ 75 ທ່ານ, ສໍາລັບນັກສຶກສາປະກອບມີ 1022 ຄົນ ສົກຮຽນ 2015-2016 ໃນນັ້ນ, ທາງພາກວິຊາຂອງພວກເຮົາໄດ້ມີການແຂ່ງຂັນການອອກແບບສະຖາປັດຕະຍະກໍາສາດໂດຍເລີ່ມແຕ່ສົກຮຽນ 2013-2014 ເປັນຕົ້ນມາໄດ້ມີການຄັດເລືອກເອົານັກສຶກສາເຂົ້າຮ່ວມການແຂ່ງຂັນອອກແບບໃນລະດັບອາຊີ ເຊິ່ງນັກສຶກສາໄດ້ເຂົ້າຮອບຄັດເລືອກ 1 ໃນ 15 ເຊິ່ງຈັດຂຶ້ນທີ່ ສປ ຈີນ, ສ່ວນສົກຮຽນ 2014-2015 ກໍເຊັ່ນດຽວກັນ ທີ່ຈັດຂຶ້ນຢູ່ ສສ ຫວຽດນາມ. ສິ່ງດັ່ງກ່າວໄດ້ສະແດງເຖິງຄວາມເອົາໃຈໃສ່ຂອງຄະນະນໍາພາກວິຊາກໍຄືຄະນະສະຖາປັດຕະຍະກໍາສາດທີ່ໄດ້ໃກ້ສິດຕິດແທດກັບບັນດານັກຮຽນ-ນັກສຶກສາໃນແຕ່ລະລຸ້ນ ເພື່ອສ້າງບຸກຄະລາກອນໃຫ້ໄດ້ມາດຕະຖານຕາມທິດຊີ້ນໍາຂອງມະຫາວິທະຍາໄລແຫ່ງຊາດກໍຄືທິດຊີ້ນໍາຂອງກະຊວງສຶກສາທິການ ແລະ ກິລາວາງອອກ. ສໍາລັບປີນີ້ເປັນປີທີ 3 ທີ່ພາກສະຖາປັດຕະຍະກໍາສາດໄດ້ສົ່ງນັກສຶກສາເຂົ້າຮ່ວມແຂ່ງຂັນໃນລະດັບອາຊີ ທັງນີ້ເພື່ອໃຫ້ນັກຮຽນ-ນັກສຶກສາໄດ້ອອກໄປແລກປ່ຽນບົດຮຽນກັບບັນດາພາກພື້ນ ແລະ ສາກົນ.
ນາງ ພິລາວັນ ວາຍຸພັກ ນັກສຶກສາພາກສະຖາປັດຕະຍະກໍາສາດ ປີທີ 3 ໄດ້ໃຫ້ສໍາພາດວ່າ: ຍ້ອນຄວາມເອົາໃຈໃສ່ຂອງບັນດາຄູອາຈານບວກກັບຄວາມຕັ້ງໃຈຂອງນ້ອງເອງຈຶ່ງໄດ້ມາຮອດເຖິງຈຸດນີ້ ໃນແຕ່ລະປີທາງພາກວິຊາໄດ້ມີການແຂ່ງຂັນຫລາຍໆກິດຈະກໍາເພື່ອທົດສອບຄວາມຮູ້, ຄວາມສາມາດຂອງບັນດານັກຮຽນ-ນັກສຶກສາ ນອກຈາກຮຽນພາກທິດສະດີແລ້ວ ຍັງເນັ້ນ ຮຽນພາກປະຕິບັດອີກດ້ວຍ ແລະ ປີນີ້ເປັນປີທໍາອິດທີ່ນ້ອງໄດ້ເຂົ້າຮ່ວມຂະບວນການແຂ່ງຂັນທາງພາກວິຊາກໍຄືຄະນະສະຖາປັດຕະຍະກໍາສາດຈັດຂຶ້ນ ເພື່ອຄັດເລືອກເອົານັກຮຽນທີ່ມີຜົນງານດີເດັ່ນເຂົ້າຮ່ວມໃນລະດັບອາຊີ. ການແຂ່ງຂັນໄດ້ດໍາເນີນແຕ່ເດືອນ ກໍລະກົດຫາກາງເດືອນສິງຫາ ປະກົດວ່ານ້ອງໄດ້ເຂົ້າຈັດອັນດັບທີ 1 ເຊິ່ງໄດ້ເປັນຕົວແທນຂອງຄະນະສະຖາປັດຕະຍະກໍາສາດກໍຄືເປັນຕົວແທນຂອງປະເທດລາວທີ່ໄດ້ເຂົ້າຮ່ວມການແຂ່ງຂັນອອກ ແບບສະຖາປັດຕະຍະກໍາລະດັບອາຊີ ເຊິ່ງຈັດຂຶ້ນທີ່ປະເທດມົງໂກລີ ໃນທ້າຍເດືອນກັນຍານີ້. ຄວາມສໍາເລັດດັ່ງກ່າວນີ້ຍ້ອນຄວາມເອົາໃຈໃສ່ຂອງຄູອາຈານທີ່ໃກ້ສິດຕິດແທດກັບນັກຮຽນ-ນັກສຶກສາ ເພື່ອສ້າງບຸກຄະລາກອນໃຫ້ມີຄວາມຮູ້, ຄວາມສາມາດໃຫ້ທຽບເທົ່າກັບບັນດາພາກພື້ນ ແລະ ສາກົນ.
ສໍາລັບການແຂ່ງຂັນອອກແບບສະຖາປັດຕະຍະກໍາລະດັບອາຊີ “The 5th Asian contest of the Architectural Rookie’s Award” ທີ່ປະເທດມົງໂກລີ ໃນວັນທີ 29 ກັນຍາ ຫາ 2 ຕຸລາ ສ່ວນວັນທີ 27 ກັນຍາ ຈະເລີ່ມອອກເດີນທາງເພື່ອເຂົ້າຮ່ວມງານດັ່ງກ່າວ.