ສຳເລັດເປັນທີ່ຮຽບຮ້ອຍແລ້ວ ງານແຂ່ງຂັນກີລາ ມະຫາວິທະຍາໄລລາວຄັ້ງທີ 2 ທີ່ໄດ້ດຳເນີນການແຂ່ງຂັນມາແຕ່ວັນທີ 1-14 ພຶດສະພາ 2024 ແລະມີພິທີເປີດ-ປິດ ໃນວັນທີ 5 ພຶດສະພາ ທີ່ຜ່ານມາ, ມາຮອດວັນທີ 13 ພຶດສະພາ ກໍໄດ້ປິດລົງຢ່າງເປັນທາງການໂດຍການເຂົ້າຮ່ວມຂອງທ່ານ ຮສ. ປອ. ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະກີລາ, ທ່ານ ຮສ. ປອ. ອຸດົມ ພອນຄຳເພັງ ປະທານສະຫະພັນກີລາ ມະຫາວິທະຍາໄລລາວ ພ້ອມດ້ວຍຄະນະນຳ ມຊ, ແຂກຖືກເຊີນຈາກພາກສ່ວນຕ່າງໆອ້ອມຂ້າງ, ພະນັກງານ, ຄູ-ອາຈານ, ບັນດາຄູເຝິກ, ນັກກີລາ ແລະກອງເຊຍເຂົ້າຮ່ວມທີ່ສະໜາມກີລາກາງ ມຊ.
ກ່ອນພິທີປິດແມ່ນມີການແຂ່ງຂັນບານເຕະຊາຍຮອບຊີງຊະນະເລີດ ເຊິ່ງເປັນການພົບກັນລະຫວ່າງ ມະຫາວິທະຍາໄລ ສຸພານຸວົງ (ມສ) ແລະວິທະຍາຄານກອງທັບ, ພາຍຫຼັງການແຂ່ງຂັນ 90 ນາທີ ຜົນປະກົດວ່າ ວິທະຍາຄານກອງທັບ ສາມາດເອົາຊະນະ ມສ ໄປໄດ້ດ້ວຍຄະແນນ 2-1 ປະຕູ ຄວ້າຫຼຽນຄຳໄປຄອງ, ສ່ວນຫຼຽນເງິນຕົກເປັນຂອງ ມສ ແລະຫຼຽນທອງແດງເປັນຂອງ ສະຖາບັນລາວ-ອາເມລິກາ.
ສຳລັບຕາຕະລາງອັນດັບຫຼຽນລາງວັນ ໃນການແຂ່ງຂັນມື້ສຸດທ້າຍ (13 ພຶດສະພາ) ມຊ (ເຈົ້າພາບ) ສາມາດຂຶ້ນນຳແຊງໜ້າສະຖາບັນການກີລາ-ກາຍະກຳ ເປັນອັນດັບໜື່ງຂອງຕາຕະລາງຈາກກີລາອີສະປອດ ແລະເທຄວັນໂດເຊິ່ງມີທັງໝົດ 25 ຫຼຽນຄຳ, 21 ຫຼຽນເງິນ ແລະ 36 ຫຼຽນທອງ; ສ່ວນອັນດັບທີ 2 ແມ່ນສະຖາບັນການກີລາ-ກາຍະກຳ ໄດ້ໝົດ 56 ຫຼຽນ, ອັບດັບທີ 3 ແມ່ນວິທະຍາຄານກອງທັບ ໄດ້ທັງໝົດ 45, ອັບດັບທີ 4 ວິທະຍາຄານສັນຕິບານປະຊາຊົນ ໄດ້ທັງໝົດ 27 ຫຼຽນ ແລະອັນດັບທີ 5 ມະຫາວິທະຍາໄລວິທະຍາສາດສຸຂະພາບ ໄດ້ທັງໝົດ 28 ຫຼຽນ.