ໃນຕອນເຊົ້າ ວັນທີ 08 ຕຸລາ 2026 ນີ້, ທີ່ ສຳນັກງານໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ ໄດ້ມີພິທີເຊັນສັນຍາ ການຮ່ວມມື ການສົ່ງເສີມການພັດທະນາໂຄງລ່າງພື້ນຖານ ດ້ານ ICT & AI ເຊິ່ງຖືເປັນຂີດໝາຍສໍາຄັນໃນການຍົກລະດັບການສຶກສາລາວ ໃຫ້ທັນສະໄໝ ກ້າວສູ່ຍຸກດິຈິຕອນ ຢ່າງເຕັມຮູບແບບ ລະຫວ່າງ ບໍລິສັດ ລາວ ໂທ
ລະຄົມມະນາຄົມ ມະຫາຊົນ ເເລະ ມະຫາວິທະຍາໄລແຫ່ງຊາດ; ເຊິ່ງຝ່າຍມະຫາວິທະຍາໄລແຫ່ງຊາດ ລົງນາມໂດຍ ທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອຳນວຍການໃຫຍ່ ແລະ ທ່ານ ສຸພົນ ຈັນທະວີໄຊ ຜູ້ອຳນວຍການໃຫຍລາວ ໂທ
ລະຄົມ, ໂດຍມີ ຄະນະຜູ້ບໍລິຫານ ແລະພະນັກງານທີ່ກ່ຽວຂ້ອງທັງສອງຝ່າຍ ເຂົ້າຮ່ວມເປັນສັກຂີພະຍານ.
ຈຸດປະສົງໃນການເຊັນສັນຍາໃນຄັ້ງນີ້ ເພື່ອຮ່ວມກັນພັດທະນາ ແລະ ຂະຫຍາຍເຄືອຂ່າຍສັນຍານໂທລະຄົມ ທັ້ງMBB ແລະ FBB ໃນຂົງເຂດ ມະຫາວິທະຍາໄລເເຫ່ງຊາດ ເພື່ອສົ່ງເສີມການພັດທະນາໂຄງລ່າງພື້ນຖານດ້ານ ICT & AI ເຂົ້າໃນການຮຽນ ການສອນ ແລະ ການຄົ້ນຄວ້າດ້ານວິຊາການໃຫ້ແກ່ບູກຄະລາກອນຂອງ ມະຫາວິທະຍາໄລເເຫ່ງຊາດ. ລາວ ໂທລະຄົມ ໄດ້ສະໜອງສັນຍານອິນເຕີເນັດຄວາມໄວສູງ ແລະ ກໍ່ສ້າງເຄືອຂ່າຍສາຍໄຍແກ້ວນຳແສງ (Fiber Optic Cable) ເຊື່ອມຕໍ່ລະຫວ່າງ ມະຫາວິທະຍາໄລເເຫ່ງຊາດ ວິທະຍາເຂດ ດົງໂດກ ກັບ ວິທະຍາເຂດ ຕ່າງໆ ແລະ ເຄືອຂ່າຍພາຍໃນຂົງເຂດວິທະຍາເຂດ ມະຫາວິທະຍາໄລເເຫ່ງຊາດ ໄດ້ສະຫນອງພື້ນທີ່ດິນ ແລະ ອໍານວຍຄວາມສະດວກໃນການກໍ່ສ້າງໂຄງລ່າງພື້ນຖານໂທລະຄົມເພື່ອນຳໃຊ້ເຂົ້າໃນວຽກງານດັ່ງກ່າວ, ໂຄງການຄວາມຮ່ວມມືນີ້ມີອາຍຸສັນຍາ 15 ປີ ມີແຜນຈະຈັດຕັ້ງປະຕິບັດແບ່ງອອກເປັນ 5 ໄລຍະ ແລະ ເນັ້ນໃສ່ໃຫ້ສຳເລັດສົມບູນພາຍໃນປີ 2030 ແລະ ເປົ້າໝາຍຫຼັກຂອງການເຊັນສັນຍາຄັ້ງນີ້ ປະກອບມີ:
• ຍົກລະດັບການບໍລິການ ຮັບປະກັນໃຫ້ຄູ-ອາຈານ, ນັກສຶກສາ ແລະ ບຸກຄະລາກອນຂອງ ມະຫາວິທະຍາໄລເເຫ່ງຊາດ ສາມາດເຂົ້າເຖິງ ແລະ ນຳໃຊ້ສັນຍານໂທລະສັບ ລວມເຖິງ ອິນເຕີເນັດມືຖື (Mobile Data) ໄດ້ຢ່າງສະດວກສະບາຍ, ວ່ອງໄວ ດ້ວຍບໍລິການທີ່ມີຄຸນນະພາບ.
• ເພີ່ມທະວີຄວາມປອດໄພ ແລະ ການບໍລິຫານຈັດການນໍາໃຊ້ເຄືອຂ່າຍໂທລະຄົມມະນາຄົມ ທີ່ທັນສະໄໝ ເຂົ້າໃນການສະໜັບສະໜູນ ລະບົບການສຶກສາ ແລະການສື່ສານພາຍໃນ ບັນດາຂົງເຂດ ມະຫາວິທະຍາໄລແຫ່ງຊາດ ແລະ ວິທະຍາເຂດຕ່າງໆ ຂອງ ມຊ ໃຫ້ມີຄວາມປອດໄພສູງສຸດ.
• ເພື່ອຮັດແໜ້ນຄວາມຮ່ວມມື ເປັນຂີດໝາຍອັນສຳຄັນ ໃນການຮ່ວມມືໄລຍະຍາວ ລະຫວ່າງ ສອງອົງກອນໃຫຍ່ ທີ່ຮ່ວມກັນຂັບເຄື່ອນເສດຖະກິດ ແລະ ສ້າງປະໂຫຍດອັນແທ້ຈິງໃຫ້ແກ່ສັງຄົມ.
ບໍລິສັດ ລາວ ໂທລະຄົມມະນາຄົມ ມະຫາຊົນ ຍັງສືບຕໍ່ມຸ່ງໝັ້ນສ້າງສິ່ງອໍານວຍຄວາມສະດວກພ້ອມຂັບເຄື່ອນການສຶກສາ ສ ປປ ລາວ ໃຫ້ກ້າວທັນກັບການປ່ຽນແປງຂອງເຕັກໂນໂລຊີ ລະດັບໂລກ, ຄຽງຄູ່ການພັດທະນານໍາເອົາເຕັກໂນໂລຊີ ແລະ ນະວັດຕະກໍາໃໝ່ໆ ເຂົ້າມາຮັບໃຊ້ສັງຄົມເພື່ອເປັນການປະກອບສ່ວນໃນການສ້າງສາ ແລະ ພັດທະນາປະເທດຊາດໃຫ້ມີຄວາມຮຸ່ງເຮືອງສີວິໄລ, ທັນສະໄໝໃນຍຸກດິຈິຕອນ ພ້ອມທັງຢູ່ຄຽງຂ້າງກັບສັງຄົມລາວ ດັ່ງຄໍາຂັວນທີ່ວ່າ ລາວ ໂທລະຄົມ ໂທລະຄົມ ຂອງຄົນລາວເພື່ອສັງຄົມລາວ We are Family.
ມະຫາວິທະຍາໄລແຫ່ງຊາດ (ມຊ) ໄດ້ຈັດງານແຂ່ງຂັນແລ່ນເພື່ອສຸຂະພາບ ເພື່ອສະເຫຼີມສະຫຼອງວັນສ້າງຕັ້ງມະຫາວິທະຍາໄລແຫ່ງຊາດ ຄົບຮອບ 30 ປີ ຂຶ້ນໃນວັນທີ 10 ຕຸລາ 2026 ທີ່ເດີ່ນພະທາດຫຼວງວຽງຈັນ ໂດຍມີ ທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອຳນວຍການໃຫຍ່ ມຊ, ທ່ານ ທອງສຸກ ແກ້ວມະນີ ຮອງຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ, ນັກກິລາ, ຄູ-ອາຈານ ພ້ອມດ້ວຍມວນຊົນຊາວນະຄອນຫຼວງວຽງຈັນ ເຂົ້າຮ່ວມ 3,000 ກວ່າຄົນ ຢ່າງເປັນຂະບວນຟົດຟື້ນ.
ງານແຂ່ງຂັນແລ່ນໃນຄັ້ງນີ້ ຈັດຂຶ້ນເພື່ອສະເຫຼີມສະຫຼອງວັນສ້າງຕັ້ງ ມະຫາວິທະຍາໄລແຫ່ງຊາດ ຄົບຮອບ 30 ປີ ໃຫ້ມີບັນຍາກາດຟົດຟື້ນ, ເພື່ອເຕົ້າໂຮມສ້າງຄວາມສາມັກຄີ ຮ່ວມກັນລະຫວ່າງນັກສຶກສາ/ອະດີດນັກສຶກສາ, ພະນັກງານ, ຄູ-ອາຈານ ມະຫາວິທະຍາໄລແຫ່ງຊາດ. ພ້ອມນັ້ນ, ຍັງເປັນການອອກກໍາລັງກາຍ ເພື່ອສຸຂະພາບແຂງແຮງດີ. ໃນນັ້ນ, ເພື່ອລະດົມທຶນເຂົ້າໃນການປັບປຸງ, ພັດທະນາສ້າງສາ ມະຫາວິທະຍາໄລແຫ່ງຊາດ. ການແຂ່ງຂັນແລ່ນໃນຄັ້ງນີ້ ໄດ້ສ້າງຄວາມມ່ວນຊື່ນ ແລະ ປະທັບໃຈ ໃຫ້ນັກກິລາຜູ້ເຂົ້າຮ່ວມເປັນຢ່າງດີ.
ການແຂ່ງຂັນໃນຄັ້ງນີ້ ປະກອບມີ 2 ໄລຍະທາງແລ່ນຄື: ການແຂ່ງຂັນແລ່ນໄລຍະ 5.30 ກິໂລແມັດ (ຍິງ-ຊາຍ) ແລະ ໄລຍະ 10.30 ກິໂລແມັດ (ຍິງ-ຊາຍ). ຜົນການແຂ່ງຂັນໄລຍະ 5.30ກິໂລແມັດ ປະເພດຍິງລາງວັນຊະນະເລີດ ທີ 1: ນາງ ພູທະລັດ ອິນນຸດ ໄດ້ຮັບເງິນລາງວັນ 2,000,000 ກີບ ພ້ອມຂັນລາງວັນ, ທີ 2: ນາງ ມະລິສາ ມີໄຊ ໄດ້ຮັບເງິນລາງວັນ 1,500,000 ກີບ ພ້ອມຂັນລາງວັນ ແລະ ທີ 3: ນາງ ໂສພາ ໄດ້ຮັບເງິນລາງວັນ 1,000,000 ກີບ ພ້ອມຂັນລາງວັນ; ການແຂ່ງຂັນແລ່ນປະເພດຊາຍ ລາງວັນຊະນະເລີດ ທີ 1: ທ້າວ ໄມແກ້ວ ສິງຫາລາດ; ທີ 2: ທ້າວ ທີລະຍຸດ ແລະ ທີ 3: ທ້າວ ສຸລິວັນ. ສໍາລັບລາງວັນທີ່ໄດ້ຮັບ ທີ 1, ທີ 2, ທີ 3 ແມ່ນໄດ້ຄືກັນກັບລາງວັນ ປະເພດຍິງ.
ຜົນການແຂ່ງຂັນໄລຍະ 10.30 ກິໂລແມັດ ປະເພດຍິງລາງວັນຊະນະເລີດທີ 1: ນາງ ລົດແກ້ວ ອິນທະກຸມານ ໄດ້ຮັບເງິນລາງວັນ 2,500,000 ກີບ ພ້ອມຂັນລາງວັນ, ທີ 2: ນາງ ຂັນຄຳ ນ້ອຍມະນີ ໄດ້ຮັບເງິນລາງວັນ 2,000,000 ກີບ ພ້ອມຂັນລາງວັນ ແລະ ທີ 3: Ms Yokie NODA ໄດ້ຮັບເງິນລາງວັນ 1,500,000 ກີບ ພ້ອມຂັນລາງວັນ; ປະເພດຊາຍ ລາງວັນຊະນະເລີດ ທີ 1: ທ້າວ ລຳພອນ ໄຊຍະທີ;ທີ 2: ທ້າວ ອັດຕະພົນ; ທີ 3: ທ້າວ ໄມມົນ. ສໍາລັບລາງວັນທີ່ໄດ້ຮັບ ທີ 1, ທີ 2, ທີ 3 ແມ່ນໄດ້ຄືກັນກັບລາງວັນປະເພດຍິງ. ໃຫ້ກຽດມອບລາງວັນໃນຄັ້ງນີ້ໂດຍ ທ່ານ ສຈ. ປອ. ພູເພັດ ກ້ຽວພິລາວົງ ແລະ ທ່ານ ທອງສຸກ ແກ້ວມະນີ ຮອງຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ.
ໃນຕອນເຊົ້າ ວັນທີ 3 ຕຸລາ 2026 ນີ້, ຢູ່ທີ່ສະໂມສອນໃຫຍ່ ມະຫາວິທະຍາໄລແຫ່ງຊາດ (ມຊ) ໄດ້ມີພິທີໄຂສົກຮຽນໃໝ່ 2026-2027 ຂອງບັນດາມະຫາວິທະຍາໄລ ແລະ ສະຖາບັນການສຶກສາຊັ້ນສູງ ທົ່ວປະເທດ ຢ່າງເປັນທາງການ. ພິທີດັ່ງກ່າວໄດ້ຈັດຂຶ້ນໃນຮູບແບບເຊິ່ງໜ້າ ແລະ ອອນລາຍ, ໂດຍມີຈຸດເຊື່ອມຕໍ່ອອນລາຍໄປຫາ ມະຫາວິທະຍາ
ໄລສຸພານຸວົງ, ມະຫາວິທະຍາໄລສະຫວັນນະເຂດ, ມະຫາວິທະຍາໄລຈຳປາສັກ, ມະຫາວິທະຍາໄລວິທະຍາສາດ ສຸຂະພາບ, ມະຫາວິທະຍາໄລຊູໂຈ ແລະ ບັນດາສະຖາບັນການສຶກສາຊັ້ນສູງພາກເອກະຊົນ. ໂດຍໃຫ້ກຽດເຂົ້າຮ່ວມ ຂອງ ພະນະ ທ່ານ ສອນໄຊ ສີພັນດອນ, ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສ ປປ ລາວ, ທ່ານ ຮສ.ປອ ທອງສະລິດ ມັງໜໍ່ເມກ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີ ກະຊວງສຶກສາທິການ ແລະ ກີລາ, ທ່ານ ຮສ.ປອ ສິນທະວອນ ດາລາວົງ ຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ ພ້ອມຄະນະ, ມີຫົວໜ້າກົມ, ສະຖາບັນ, ຄະນະນຳແຕ່ລະຂັ້ນ, ຄູ-ອາຈານ ແລະ ຕົວແທນນັກສຶກສາ ເຂົ້າຮ່ວມຢ່າງພ້ອມພຽງ.
ໃນທີ່ປະຊຸມ ທ່ານ ຮສ.ປອ ສິນທະວອນ ດາລາວົງ ຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ ໄດ້ຜ່ານບົດລາຍງານສະພາບການຈັດຕັ້ງປະຕິບັດວຽກງານການສຶກສາຊັ້ນສູງ, ເຊິ່ງໄດ້ຍົກໃຫ້ເຫັນວ່າ ປັດຈຸບັນ ທົ່ວປະເທດມີສະຖາບັນການສຶກສາຊັ້ນສູງທັງໝົດ 22 ແຫ່ງ (ບໍ່ລວມວິທະຍາຄານຂອງພາກສ່ວນກ້ອນກຳລັງ), ໃນນັ້ນປະກອບມີ ມະຫາວິທະຍາໄລ 7 ແຫ່ງ, ສະຖາບັນ 15 ແຫ່ງ, ມີຄູ-ອາຈານ ຫຼາຍກວ່າ 5.000 ຄົນ ແລະ ມີນັກສຶກສາ 40.000 ກວ່າຄົນ. ໃນສົກຮຽນ 2025-2026 ຜ່ານມາ, ບັນດາສະຖາບັນການສຶກສາໄດ້ສືບຕໍ່ຈັດຕັ້ງການຮຽນ-ການສອນໂດຍເນັ້ນຜູ້ຮຽນເປັນໃຈກາງ, ປັບປຸງຫຼັກສູດໃຫ້ສອດຄ່ອງກັບຕະຫຼາດແຮງງານ, ຍົກສູງວຸດທິທາງດ້ານວິຊາການຂອງຄູ-ອາຈານ ແລະ ສົ່ງເສີມການຄົ້ນຄວ້າວິທະຍາສາດ. ສຳລັບທິດທາງການພັດທະນາ ແລະ ຈຸດສຸມໃນຕໍ່ໜ້າ (2026-2030), ສາຍການສຶກສາຊັ້ນສູງໄດ້ຕັ້ງເປົ້າໝາຍສູ້ຊົນດັ່ງນີ້:
- ອັດຕາການເຂົ້າຮຽນ: ສູ້ຊົນເຮັດໃຫ້ອັດຕາການເຂົ້າຮຽນຕໍ່ໃນສາຍການສຶກສາຊັ້ນສູງ ສະເລ່ຍທົ່ວປະເທດບັນລຸ 28% ຂອງນັກຮຽນທີ່ຈົບສາມັນສຶກສາໃນແຕ່ລະປີ ພາຍໃນປີ 2030.
- ການປັບປຸງຫຼັກສູດ: ຮັບປະກັນໃຫ້ຫຼັກສູດການສຶກສາຊັ້ນສູງ 100% ໄດ້ຮັບການປັບປຸງຕາມມາດຕະຖານຫຼັກສູດແຫ່ງຊາດ ພາຍໃນປີ 2030.
- ການປະກັນຄຸນນະພາບ: ສູ້ຊົນໃຫ້ສະຖານການສຶກສາຊັ້ນສູງທົ່ວປະເທດ 80% ໄດ້ຮັບການປັບປຸງຕາມມາດຕະຖານປະກັນຄຸນນະພາບພາຍໃນ ປີ 2030.
- ການຮຽນສາຍ STEM: ຊຸກຍູ້ອັດຕາສ່ວນນັກສຶກສາເຂົ້າຮຽນສາຍ STEM (ທັງພາຍໃນ ແລະ ຕ່າງປະເທດ) ໃຫ້ເພີ່ມຂຶ້ນບັນລຸ 50% ພາຍໃນປີ 2030.
- ການຄົ້ນຄວ້າວິທະຍາສາດ: ຊຸກຍູ້ຈຳນວນບົດຄົ້ນຄວ້າທີ່ໄດ້ຮັບການຕີພິມລົງວາລະສານລະດັບຊາດ ແລະ ສາກົນ ໃຫ້ເພີ່ມຂຶ້ນສະເລ່ຍ 20% ຕໍ່ປີ ແລະ ສູ້ຊົນໃຫ້ແຕ່ລະໜ່ວຍວິຊາມີຜະລິດຕະພັນຈາກການນຳໃຊ້ຜົນການຄົ້ນຄວ້າຢ່າງໜ້ອຍ 1 ຜະລິດຕະພັນຕໍ່ປີ.
- ການເຊື່ອມໂຍງສາກົນ ແລະ ດິຈິຕອນ: ເພີ່ມຈຳນວນຫຼັກສູດການຮຽນ-ການສອນທີ່ເປັນຫຼັກສູດສາກົນ (ນານາຊາດ) ໃຫ້ໄດ້ຢ່າງໜ້ອຍ 20 ຫຼັກສູດ ພາຍໃນປີ 2030, ພ້ອມທັງນຳໃຊ້ດິຈິຕອນເຂົ້າໃນການຄຸ້ມຄອງບໍລິຫານ ແລະ ຫັນສະຖາບັນການສຶກສາຊັ້ນສູງໄປສູ່ການກຸ້ມຕົນເອງເທື່ອລະກ້າວ.
ໃນໂອກາດທີ່ມີຄວາມໝາຍ ຄວາມສຳຄັນນີ້, ທ່ານ ພະນະທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ໃຫ້ກຽດກ່າວໂອ້ລົມ ແລະ ເນັ້ນໃສ່ຄຳຂວັນ ສຳລັບສົກຮຽນ 2026-2027 ບາງຕອນວ່າ: “ປັບປຸງເພື່ອຄຸນນະພາບ, ສ້າງຄົນເພື່ອອະນາຄົດ, ຄົ້ນຄວ້າວິທະຍາສາດເພື່ອການພັດທະນາ ແລະ ສົ່ງຄວາມຮູ້ເພື່ອຮັບໃຊ້ຊາດ ແລະ ພັດທະນາ”. ພ້ອມດຽວກັນນີ້, ທ່ານນາຍົກລັດຖະມົນຕີ ໄດ້ສະເໜີ 6 ທິດທາງຊີ້ນຳທີ່ສຳຄັນ ເພື່ອໃຫ້ຄະນະພັກ, ຄະນະນຳ, ຄູ-ອາຈານ ແລະ ສະຖາບັນການສຶກສາຊັ້ນສູງ ນຳໄປຈັດຕັ້ງປະຕິບັດຄື:
1. ການປັບໂຕໃຫ້ທັນຍຸກທັນສະໄໝ: ຕ້ອງປັບຕົນເອງໃຫ້ທັນຍຸກຂໍ້ມູນຂ່າວສານ ແຕ່ຕ້ອງຮັກສາໄວ້ໃຫ້ໄດ້ 3 ລັກ
ສະນະ ແລະ 5 ຫຼັກມູນຂອງການສຶກສາລາວ, ປະກອບສ່ວນສ້າງຄົນສັງຄົມນິຍົມ ທີ່ມີຄຸນສົມບັດສິນທຳປະຕິວັດ, ມີລະດັບຄວາມຮູ້ສູງ, ມີສະຕິຊາດສູງ ແລະ ມີອຸດົມການທາງດ້ານການເມືອງທີ່ໜັກແໜ້ນ.
2. ຍົກສູງຄຸນນະພາບການສຶກສາ: ເນັ້ນໃສ່ຄຸນນະພາບໂດຍບໍ່ວັດແທກພຽງແຕ່ຈຳນວນນັກສຶກສາ ຫຼືຈຳນວນຫຼັກ
ສູດ, ແຕ່ຕ້ອງວັດແທກວ່າ ນັກສຶກສາຮຽນຮູ້ໄດ້ຫຼາຍປານໃດ, ມີທັກສະ, ມີຄຸນນະທຳ ແລະ ສາມາດນຳຄວາມຮູ້ໄປສ້າງປະໂຫຍດໃຫ້ສັງຄົມ ແລະ ປະເທດຊາດໄດ້ຫຼາຍປານໃດ.
3. ປະຕິຮູບຫຼັກສູດການຮຽນ-ການສອນ: ກວດກາ ແລະ ປັບປຸງຫຼັກສູດໃຫ້ທັນກັບການຂະຫຍາຍຕົວຂອງເຕັກໂນ
ໂລຊີ, ປັນຍາປະດິດ (AI), ໃຫ້ສອດຄ່ອງກັບຄວາມຕ້ອງການຂອງຕະຫຼາດແຮງງານ ແລະ ແຜນພັດທະນາເສດຖະກິດ-ສັງຄົມແຫ່ງຊາດ.
4. ຍົກບົດບາດການຄົ້ນຄວ້າວິທະຍາສາດ ແລະ ນະວັດຕະກຳ: ປ່ຽນຈາກ “ຄົ້ນຄວ້າເພື່ອມີຜົນງານ” ໄປສູ່ “ຄົ້ນຄວ້າ
ເພື່ອສ້າງຜົນກະທົບ”, ສ້າງກົນໄກດຶງດູດຜູ້ຊ່ຽວຊານ ແລະ ນັກວິທະຍາສາດ ເພື່ອຖ່າຍທອດຄວາມຮູ້ດ້ານເຕັກໂນໂລຊີດິຈິຕອນ, ເຕັກໂນໂລຊີຊີວະພາບ ແລະ AI, ເພື່ອຍູ້ແຮງການພັດທະນາປະເທດໃນໄລຍະຂ້າມຜ່ານຈາກປະເທດດ້ອຍພັດທະນາ ເຊິ່ງສະຫາປະຊາຊາດຈະປະກາດຮັບຮອງໃນເດືອນພະຈິກ 2026 ນີ້ (ໄລຍະຂ້າມຜ່ານ 2026-2029).
5. ປັບປຸງພື້ນຖານໂຄງລ່າງ ແລະ ສິ່ງອຳນວຍຄວາມສະດວກ: ລົງທຶນໃສ່ສະຖານທີ່, ເຕັກໂນໂລຊີ, ກຳນົດແຜນສ້າງ
ລະບົບມະຫາວິທະຍາໄລດີຈີຕອນ (Digital University), ພັດທະນາອິນເຕີເນັດຄວາມໄວສູງ, ຫ້ອງຮຽນອັດສະລິຍະ, ຫ້ອງສະໝຸດດິຈິຕອນ, ຫໍພັກ, ສູນກີລາ ແລະ ລະບົບຄວາມປອດໄພ.
6. ເສີມຂະຫຍາຍການຮ່ວມມືສາກົນ: ສືບຕໍ່ເສີມຂະຫຍາຍການພົວພັນຮ່ວມມື ແລະ ຍາດແຍ່ງການສະໜັບສະ
ໜູນຊ່ວຍເຫຼືອຈາກປະເທດເພື່ອນມິດ, ຄູ່ຮ່ວມພັດທະນາ ແລະ ອົງການຈັດຕັ້ງສາກົນ ເຂົ້າໃນການພັດທະນາຮອບດ້ານ.
ເນື່ອງໃນໂອກາດວັນຄູແຫ່ງຊາດ, ທ່ານນາຍົກລັດຖະມົນຕີ ໄດ້ຕາງໜ້າໃຫ້ລັດຖະບານ ສະແດງຄວາມສຳນຶກໃນບຸນຄຸນ, ຄວາມເຄົາລົບ, ຄວາມຊາບຊຶ້ງໃຈ ແລະ ຂອບໃຈອັນສຸດໃຈ ມາຍັງບັນດາຄູ-ອາຈານທຸກທ່ານ ຜູ້ທີ່ໄດ້ອຸທິດສະຕິປັນຍາ, ເຫື່ອແຮງ ແລະ ເວລາ ເພື່ອພາລະກິດສ້າງຄົນ ແລະ ສ້າງຊາດ. ໃນຕອນທ້າຍຂອງພິທີ ທ່ານຍັງໄດ້ກ່າວອວຍພອນໄຊໃຫ້ແກ່ຄະນະນຳ, ຄູ-ອາຈານ, ພະນັກງານ ແລະ ນັກສຶກສາທຸກທ່ານ, ພ້ອມທັງໄດ້ປະກາດເປີດສົກຮຽນ 2026-2027 ຂອງບັນດາມະຫາວິທະຍາໄລ ແລະ ສະຖາບັນການສຶກສາຊັ້ນສູງ ທົ່ວປະເທດ ຢ່າງເປັນທາງການ.
ກອງປະຊຸມສຳມະນາຄົ້ນຄວ້າວິທະຍາສາດສັງຄົມລາວ ຄັ້ງທີ 2 ໄດ້ຈັດຂຶ້ນໃນວັນທີ 5 ຕຸລາ 2026 ທີ່ໂຮງແຮມແລນມາກ ນະຄອນຫຼວງວຽງຈັນ, ໂດຍການເປັນປະທານຂອງທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ, ທ່ານ ສາດສະດາຈານ Shi Xueqin, ຮອງຄະນະບໍດີ ຄະນະວິຊາການສຶກສາອາຊີຕາເວັນອອກສຽງໃຕ້(School for Southeast Asian Studies), ມະຫາວິທະຍາໄລຊຽງເໝີນ (Xiamen University), ທ່ານ ສາດສະດາຈານ ດຣ. MAO Weizhun, ຮອງຄະນະບໍດີ ຄະນະວິຊາການສຶກສາສາກົນ (School of International Studies) ແລະ ຮອງຫົວໜ້າສູນການສຶກສາການພັດທະນາອາຊີ-ປາຊີຟິກ (Centre for Asia-Pacific Development Studies) ມະຫາວິທະຍາໄລນານຈິງ (Nanjing University), ມີບັນດານັກຊ່ຽວຊານ, ນັກຄົ້ນຄວ້າ, ວິທະຍາກອນ ແລະ ຄູ-ອາຈານ ຈາກພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ ແມ່ນເວທີທີ່ສຳຄັນໃນການພົບປະທາງວິຊາການ ໃຫ້ແກ່ບັນດານັກຄົ້ນຄວ້າໄດ້ແລກປ່ຽນຄວາມຮູ້, ປະສົບການເຊິ່ງກັນ ແລະກັນ ແລະໄດ້ຈັດຂຶ້ນພາຍໃຕ້ຫົວຂໍ້: ຂົວເຊື່ອມຕໍ່ທາງບົກອາຊີຕາເວັນອອກສ່ຽງໃຕ້ແຫ່ງໃໝ່: ການເຊື່ອມໂຍງລະຫວ່າງລາວ ແລະ ພາກພື້ນລ້ານຊ້າງ-ແມ່ນໍ້າຂອງ ມີຜູ້ເຂົ້າຮ່ວມຫຼາຍວກ່າ 130 ທ່ານ ຈາກ ສປປ ລາວ, ສປ ຈີນ, ໄທ ແລະ ຫວຽດນາມ. ພາຍໃນງານຜູ້ເຂົ້າຮ່ວມໄດ້ຮັບຟັງການນຳສະເໜີໃນ 4 ຫົວຂໍ້ ທີ່ສຸມໃສ່ການວິເຄາະໂອກາດ ແລະ ສິ່ງທ້າທາຍຂອງເສັ້ນທາງລົດໄຟລາວ-ຈີນ, ທິດທາງນະໂຍບາຍການເຊື່ອມໂຍງ ການສ້າງແບຣນຂອງວິສາຫະກິດຈີນໃນພູມິພາກ Global South ແລະ ການພັດທະນາໂຄງລ່າງພື້ນຖານເພື່ອສັນຕິພາບ ແລະ ການພັດທະນາ. ຫຼັງຈາກນັ້ນທີ່ປະຊຸມໄດ້ມີການອະພິປາຍໃນຫ້ອງຍ່ອຍ (Panel Discussions) ກ່ຽວກັບ 39 ຫົວຂໍ້ ເຊິ່ງແບ່ງອອກເປັນ 6 ຫ້ອງ ໂດຍໄດ້ເຈາະເລິກໃນປະເດັນສຳຄັນຕ່າງໆ ເຊັ່ນ: ບົດບາດຂອງຊາວຈີນໃນຕ່າງແດນ ແລະ ການເຊື່ອມໂຍງໃນພາກພື້ນ, ການຮຽນຮູ້ອະລິຍະທຳຮ່ວມກັນ, ວັດທະນະທຳຊົນເຜົ່າ, ການສ້າງປະຊາຄົມອາຊີປາຊີຟິກທີ່ມີອະນາຄົດຮ່ວມກັນ, ສາຍພົວພັນສາກົນ ແລະ ພູມິພາກ ເຊິ່ງກອງປະຊຸມໃນຄັ້ງນີ້ ແມ່ນຈັດໂດຍ ສູນຄົ້ນຄວ້າ ແລະ ຝຶກອົບຮົມດ້ານປະເມີນຜົນກະທົບຕໍ່ສັງຄົມ ແລະ ການຄຸ້ມຄອງຈັດສັນຍົກຍ້າຍ ຄະນະວິທະຍາສາດສັງຄົມ ມະຫາວິທະຍາໄລແຫ່ງຊາດ ຮ່ວມກັບ ມະຫາວິທະຍາໄລຊຽງເໝີນ (Xiamen University) ມະຫາວິທະຍາໄລນານຈິງ (Nanjing University) ສະຖາບັນວິທະຍາສາດສັງຄົມຢຸນນານ (YASS).
ເນື່ອງໃນວັນຄູແຫ່ງຊາດ 7 ຕຸລາ ທີ່ໝູນວຽນມາຄົບຮອບ 32 ປີ (ວັນທີ 7 ຕຸລາ 1994- 7 ຕຸລາ 2026), ທ່ານ ຮສ.ປອ ສິນທະວອນ ດາລາວົງ ຜູ້ອໍານວຍການໃຫຍ່ ມະຫາວິທະຍາໄລແຫ່ງຊາດ ໄດ້ໃຫ້ສໍາພາດຕໍ່ສື່ມວນຊົນ ໃນ ວັນທີ 5 ຕຸລາ 2026 ທີ່ສໍານັກງານ ຜູ້ອໍານວຍການໃຫຍ່ ມະຫາວິທະຍາໄລແຫ່ງຊາດ; ເຊິ່ງທ່ານໄດ້ຍົກໃຫ້ເຫັນ ສະພາບການເຄື່ອນໄຫວ ພົ້ນເດັ່ນໃນ 1 ປີ ຜ່ານມາ ຢູ່ພາຍໃນ ມະຫາວິທະຍາໄລແຫ່ງຊາດວ່າ: ການສ້າງຂະບວນການຂໍ່ານັບຮັບຕ້ອນວັນສ້າງຕັ້ງມະຫາວິທະຍາໄລແຫ່ງຊາດຄົບຮອບ 30 ປີ ໄດ້ດໍາເນີນຫຼາຍກິດຈະກໍາ ເຊັ່ນ ພິທີປູກຕົ້ນໄມ້ເນື່ອງໃນວັນປູກຕົ້ນໄມ້ແຫ່ງຊາດ, ກອງປະຊູມສໍາມະນາວິທະຍາສາດນາໆຊາດ, ງານວາງສະແດງຕ່າງໆ, ໄດ້ມີການປັບປຸງພື້ນຖານໂຄງລ່າງ ໃນບໍລິເວນວິທະຍາເຂດດົງໂດກ ແລະຄະນະວິຊາອື່ນອ້ອມຂ້າງ ມະຫາວິທະຍາໄລແຫ່ງຊາດ ເປັນຕົ້ນ: ສ້າງສວນ ແລະ ສະຖານທີ່ປະດິດສະຖານຮູບຫຼໍ່ປະທານໄກສອນ ພົມວິຫານ, ສ້າງປະຕູທາງເຂົ້າໃຫຍ່ໃຫ້ເປັນສັນຍະລັກສະເພາະຂອງ ມະຫາວິທະຍາໄລແຫ່ງຊາດ, ປັບປູງຫໍພັກນັກສຶກສາ, ປັບປຸງຫໍປະຊຸມໃຫຍ່ ຢູ່ພາຍໃນ ວິທະຍາເຂດດົງໂດກໃຫ້ເປັນຫໍປະຊູມທັນສະໄໝ, ປັບປຸງຫ້ອງຮຽນ, ປັບປຸງຫ້ອງນໍ້າສາທາລະນະທັງໝົດ 7 ຫຼັງ ແລະປັປປຸງທາງຍ່າງ ພ້ອມຕິດຕັ້ງໄຟເຍືອງທາງໃຫ້ມີແສງສະຫວ່າງທີ່ສວຍງາມ.
ໃນຍຸກຂໍ້ມູນຂ່າວສານ ແລະ ປັນຍາປະດິດກຳລັງປ່ຽນແປງໂລກຢ່າງວ່ອງໄວ ມະຫາວິທະຍາໄລແຫ່ງຊເດ ໄດ້
ເນັ້ນໜັກ ປະການທຳອິດ ແມ່ນ ຈະຍົກລະດັບ ຄວາມຮູ້ພື້ນຖານດ້ານ AI ໃຫ້ແກ່ຄູ-ອາຈານທຸກສາຂາ (ຊຶ່ງເປັນໂຄງການທີ່ກຳລັງປະຕິບັດຢູ່), ໂດຍການສົ່ງເສີມໃຫ້ຄູອາຈານຮູ້ຈັກນຳໃຊ້ AI ແລະ ເຄື່ອງມືດິຈິຕອນເຂົ້າມາຊ່ວຍໃນການສອນ, ການຄົ້ນຄວ້າ, ການອອກແບບບົດສອນ. ແຕ່ພ້ອມກັນນັ້ນ ຕ້ອງສອນນັກສຶກສາໃຫ້ຮູ້ຈັກແຍກແຍະຂໍ້ມູນ, ຄິດວິເຄາະ, ເຄົາລົບລິຂະສິດ, ຮັກສາຄວາມຊື່ສັດທາງວິຊາການ ແລະ ໃຊ້ AI ເປັນ “ເຄື່ອງມື” ບໍ່ແມ່ນໃຫ້ AI ຄິດແທນມະນຸດ ແລະ ເພື່ອເຮັດໃຫ້ມະຫາວິທະຍາໄລແຫ່ງຊາດ ເປັນມະຫາວິທະຍາໄລທີ່ດີ ມະຫາວິທະຍາໄລແຫ່ງຊາດ ໄດ້ມີກົນໄກ ກໍຄື ແບບແຜນໃນການດໍາເນີນງານເພື່ອໃຫ້ກາຍເປັນບ່ອນດຶງດູດນັກສຶກສາ ຢາກມາເຂົ້າສຶກສາ-ຮໍ່າຮຽນ, ທ່ານ ຜູ້ອໍານວຍການໃຫຍ່ ກ່າວວ່າ “ການເຮັດໃຫ້ນັກສຶກສາ ຢາກມາຮຽນ ມະຫາວິທະຍາໄລແຫ່ງຊາດ ບໍ່ສາມາດເຮັດດ້ວຍການໂຄສະນາພຽງຢ່າງດຽວ. ສິ່ງສຳຄັນກວ່ານັ້ນ ຄື ການສ້າງ ຄຸນຄ່າ ແລະ ຄວາມເຊື່ອໝັ້ນ ໃຫ້ເກີດຂຶ້ນຕົວຈິງ. ເມື່ອນັກຮຽນ, ພໍ່ແມ່ ແລະ ສັງຄົມເຫັນວ່າ ຮຽນຢູ່ ມະຫາວິທະຍາໄລແຫ່ງຊາດ ແລ້ວມີຄຸນນະພາບ, ມີທັກສະ, ມີໂອກາດ ແລະ ມີອະນາຄົດ, ຄວາມຢາກມາຮຽນກໍຈະເກີດຂຶ້ນເອງ ”. ໂດຍທ່ານໄດ້ກ່າວເນັ້ນ 4 ດ້ານສຳຄັນ ດັ່ງນີ້:
1. ສ້າງຄຸນນະພາບວິຊາການໃຫ້ເປັນຈຸດແຂງຫຼັກ: ຕ້ອງເຮັດໃຫ້ຫຼັກສູດທັນສະໄໝ, ຕອບສະໜອງຕະຫຼາດແຮງ
ງານ ແລະ ສອດຄ່ອງກັບທິດທາງພັດທະນາປະເທດ. ນັກສຶກສາບໍ່ຄວນຮຽນເພື່ອໃຫ້ໄດ້ພຽງໃບປະກາດ, ແຕ່ຕ້ອງຮຽນ
ແລ້ວ “ເຮັດວຽກເປັນ, ແກ້ບັນຫາເປັນ, ສ້າງສິ່ງໃໝ່ເປັນ” ແລະ ສາມາດແຂ່ງຂັນໄດ້.
2.ສ້າງປະສົບການນັກສຶກສາໃຫ້ດີ: ນັກສຶກສາບໍ່ໄດ້ເລືອກພຽງແຕ່ “ຫຼັກສູດ” ແຕ່ເລືອກ “ຊີວິດໃນມະຫາວິທະ
ຍາໄລ”. ດັ່ງນັ້ນ ມະຫາວິທະຍາໄລແຫ່ງຊາດ ຈະເນັ້ນທັງຫ້ອງຮຽນ, ຫ້ອງທົດລອງ, ຫໍສະໝຸດ, ກິດຈະກຳນັກສຶກສາ, ກິລາ, ສິລະປະ, ສະຫວັດດີການ ແລະສະພາບແວດລ້ອມການຮຽນຮູ້ ໃຫ້ນັກສຶກສາຮູ້ສຶກວ່າ “ມາຮຽນຢູ່ ມະຫາວິທະຍາ
ໄລແຫ່ງຊາດແລ້ວ ມີຄວາມໝາຍ”.
3. ເພີ່ມໂອກາດໃຫ້ນັກສຶກສາ: ນັກສຶກສາຈະຢາກເລືອກມາຮຽນຢູ່ບ່ອນໃດ ຖ້າເຫັນວ່າບ່ອນນັ້ນມີໂອກາດ. ດັ່ງນັ້ນ ມະຫາວິທະຍາໄລແຫ່ງຊາດ ຈະຂະຫຍາຍໂອກາດດ້ານທຶນການສຶກສາ, ການແລກປ່ຽນນັກສຶກສາ, ການຮຽນຮ່ວມກັບຕ່າງປະເທດ, ການຝຶກງານ, ການເຮັດບົດວິຈັຍ, ການສ້າງນະວັດຕະກຳ ແລະ ການເຊື່ອມໂຍງກັບສະຖານປະກອບການ.
4. ສ້າງຊື່ສຽງ ແລະ ຄວາມເຊື່ອໝັ້ນຂອງ ມະຫາວິທະຍາໄລແຫ່ງຊາດ ດ້ວຍຜົນງານຕົວຈິງ; ໃນຍຸກປັດຈຸບັນ ຂ່າວສານແຜ່ໄປໄວຫຼາຍ. ຖ້ານັກສຶກສາຮຽນແລ້ວປະສົບຜົນສຳເລັດ, ມີວຽກເຮັດ, ມີຄວາມສາມາດ ແລະ ກັບໄປສ້າງປະໂຫຍດໃຫ້ສັງຄົມ, ນັກສຶກສາຮຸ່ນຕໍ່ໄປກໍຈະເຫັນເປັນຕົວຢ່າງ. ດັ່ງນັ້ນ “ສິ່ງທີ່ສຳຄັນກວ່າການໂຄສະນາ ຄື ຜົນງານຂອງບັນດາລູກສິດ ມະຫາວິທະຍາໄລແຫ່ງຊາດ”. ສຸດທ້າຍ ມະຫາວິທະຍາໄລແຫ່ງຊາດ ຢາກສ້າງຫຼັກຄິດໜຶ່ງໃຫ້ຊັດເຈນວ່າ: “ບໍ່ແມ່ນ ມະຫາວິທະຍາໄລແຫ່ງຊາດ ຈະຊອກຫານັກສຶກສາມາຮຽນຢູ່ ມະຫາວິທະຍາໄລແຫ່ງຊາດ, ແຕ່ ມະຫາວິທະຍາ
ໄລແຫ່ງຊາດ ຕ້ອງພັດທະນາຕົນເອງ ໃຫ້ດີເຖິງຂັ້ນທີ່ນັກສຶກສາເປັນຝ່າຍເລືອກມາຮຽນ ມະຫາວິທະຍາໄລແຫ່ງຊາດ.”
ເນື່ອງໃນໂອກາດວັນຄູແຫ່ງຊາດ 7 ຕຸລາ ໄດ້ໝູນວຽນມາຄົບຮອບ 32 ປີ ນີ້, ທ່ານຜູ້ອຳນວຍການໃຫຍ່ມະຫາວິທະຍາໄລແຫ່ງຊາດ ໄດ້ສະແດງທັດສະນະຕໍ່ວັນສຳຄັນດັ່ງກ່າວ, ພ້ອມທັງຮຽກຮ້ອງໃຫ້ຄູອາຈານຍຸກໃໝ່ທົ່ວປະເທດ, ໂດຍສະເພາະຄູອາຈານໃນ ມະຫາວິທະຍາໄລແຫ່ງຊາດ ວ່າ: ຂ້າພະເຈົ້າຂໍຖືໂອກາດອັນມີຄວາມໝາຍສໍາຄັນນີ້ ສະແດງຄວາມເຄົາລົບ, ສຳນຶກໃນບຸນຄຸນ ແລະ ຄວາມຂອບໃຈຢ່າງສຸດຊຶ້ງ ຕໍ່ຄູອາຈານທຸກຮຸ່ນ, ທຸກລະດັບ ແລະ ທຸກສາຂາວິຊາ ທີ່ໄດ້ອຸທິດແຮງກາຍ, ແຮງໃຈ, ສະຕິປັນຍາ ແລະ ເວລາ ເພື່ອພາລະກິດອັນສູງສົ່ງຄື ການສ້າງຄົນ ແລະ ສ້າງອະນາຄົດຂອງຊາດ. ສຳລັບຂ້າພະເຈົ້າ, ວັນຄູ ບໍ່ແມ່ນພຽງເປັນວັນສະແດງຄວາມຂອບໃຈຕໍ່ຄູ, ແຕ່ເປັນວັນທີ່ເຮົາທຸກຄົນຫັນກັບມາຖາມຕົນເອງວ່າ: ໃນຖານະຄູ ເຮົາໄດ້ສ້າງຄົນຮຸ່ນໃໝ່ໃຫ້ພ້ອມສຳລັບອະນາຄົດແລ້ວຫຼືຍັງ?; ໂລກໃນທຸກມື້ນີ້ປ່ຽນແປງໄວຫຼາຍ. ຄວາມຮູ້ໃໝ່ເກີດຂຶ້ນທຸກວັນ, ເຕັກໂນໂລຊີ ດິຈິຕອນ ແລະ ປັນຍາປະດິດ (AI) ກຳລັງປ່ຽນວິທີການຮຽນ, ການສອນ, ການເຮັດວຽກ ແລະ ການດຳລົງຊີວິດ. ດັ່ງນັ້ນ ຄູອາຈານຍຸກໃໝ່ຈະບໍ່ສາມາດສອນດ້ວຍຄວາມຮູ້ ແລະ ວິທີການທີ່ເຄີຍປະຕິບັດພຽງຢ່າງດຽວ. ຄູທີ່ດີ ໃນຍຸກໃໝ່ ຕ້ອງເປັນຄູທີ່ຮຽນຮູ້ຕະຫຼອດຊີວິດ. ພ້ອມດຽວກັນທ່ານ ກໍໄດ້ມີຄໍາເຫັນ ໄວ້ 3 ປະການສຳຄັນ ແລະຝາກໜຶ່ງຂໍ້ຄິດໄວ້ໃຫ້ຄູວ່າ:
ຄໍາເຫັນ ປະການທີ 1: ຕ້ອງພັດທະນາ “ຄວາມຮູ້” ຂອງຕົນເອງຢູ່ສະເໝີ.
ຄູ-ອາຈານຕ້ອງຮຽນຮູ້ສິ່ງໃໝ່, ຕິດຕາມຄວາມກ້າວໜ້າທາງວິຊາການ, ອ່ານວິຈັຍ, ສຶກສາມາດຕະຖານສາກົນ ແລະ ບໍ່ຢຸດພັດທະນາຕົນເອງ. ເພາະວ່າ ຖ້າຄູຢຸດຮຽນຮູ້, ຄວາມຮູ້ທີ່ນຳໄປສອນລູກສິດກໍຈະຄ່ອຍໆຫຼ້າສະໄໝ.
ປະການທີ 2: ຕ້ອງປ່ຽນຈາກ “ຄູຜູ້ຖ່າຍທອດຄວາມຮູ້” ໄປສູ່ “ຄູຜູ້ສ້າງການຮຽນຮູ້”.
ໃນອະດີດ ຄູອາດເປັນແຫຼ່ງຄວາມຮູ້ຫຼັກຂອງນັກຮຽນ. ແຕ່ປັດຈຸບັນ ນັກສຶກສາສາມາດເຂົ້າເຖິງຄວາມຮູ້ຈຳນວນມະຫາສານຜ່ານດິຈິຕອນ ແລະ AI. ບົດບາດຂອງຄູຈຶ່ງຕ້ອງກ້າວໄປສູ່ການເປັນຜູ້ຊີ້ນຳ, ຜູ້ສ້າງແຮງບັນດານໃຈ, ຜູ້ຝຶກການຄິດ, ການວິເຄາະ, ການແກ້ບັນຫາ ແລະ ການສ້າງສັນ.
ປະການທີ 3: ຕ້ອງຮັກສາ “ຫົວໃຈຂອງຄວາມເປັນຄູ”.
ເຕັກໂນໂລຊີອາດປ່ຽນແປງ, ຫຼັກສູດອາດປ່ຽນແປງ ແລະ ວິທີການສອນອາດປ່ຽນແປງ, ແຕ່ຄວາມຮັກລູກສິດ, ຄວາມເສຍສະຫຼະ, ຈັນຍາບັນ, ຄວາມຮັບຜິດຊອບ ແລະ ຈິດວິນຍານຂອງຄວາມເປັນຄູ ຈະຕ້ອງບໍ່ປ່ຽນແປງ.
ໜຶ່ງຂໍ້ຄິດ: “ຖ້າຢາກໃຫ້ລູກສິດກ້າວໜ້າ, ຄູຕ້ອງກ້າວໜ້າກ່ອນ; ຖ້າຢາກໃຫ້ລູກສິດຮັກການຮຽນຮູ້, ຄູຕ້ອງເປັນຜູ້ຮັກການຮຽນຮູ້ກ່ອນ ແລະ ຖ້າຢາກສ້າງຄົນຮຸ່ນໃໝ່ໃຫ້ພ້ອມສຳລັບອະນາຄົດ, ຄູກໍຕ້ອງພ້ອມທີ່ຈະປ່ຽນແປງຕົນເອງ.”
ໃນວາລະອັນສຳຄັນນີ້ ຂ້າພະເຈົ້າຂໍສະແດງຄວາມຂອບໃຈ ແລະ ສຳນຶກໃນບຸນຄຸນຢ່າງສູງ ຕໍ່ການນຳພັກ-ລັດ ທີ່ໄດ້ໃຫ້ຄວາມສຳຄັນ, ເອົາໃຈໃສ່ ແລະ ໃຫ້ການຊີ້ນຳຕໍ່ວຽກງານການສຶກສາ ແລະ ຕໍ່ວິຊາຊີບຄູມາໂດຍຕະຫຼອດ.
ຂໍອວຍພອນໃຫ້ການນຳພັກ-ລັດ ຈົ່ງມີສຸຂະພະລານາໄມສົມບູນ, ມີພະລັງໃຈ ແລະ ພະລັງກາຍອັນເຂັ້ມແຂງ, ປະສົບແຕ່ຄວາມສຳເລັດໃນພາລະກິດອັນສູງສົ່ງ ເພື່ອນຳພາປະເທດຊາດໃຫ້ພັດທະນາ ແລະ ຈະເລີນກ້າວໜ້າຍິ່ງໆຂຶ້ນ.
ຂໍອວຍພອນໃຫ້ຄູອາຈານທົ່ວປະເທດ ແລະ ບັນດາຄູອາຈານຂອງ ມະຫາວິທະຍາໄລແຫ່ງຊາດ ທຸກທ່ານ ຈົ່ງມີສຸຂະພາບແຂງແຮງ, ຈິດໃຈເບີກບານ, ມີຄວາມສຸກໃນວິຊາຊີບ, ມີຄວາມກ້າວໜ້າໃນໜ້າທີ່ການງານ, ສືບຕໍ່ເປັນຄູທີ່ດີ, ເປັນຄູທີ່ທັນສະໄໝ ແລະ ເປັນຄູຜູ້ສ້າງຄົນຮຸ່ນໃໝ່ ທີ່ມີຄວາມຮູ້, ຄວາມສາມາດ, ຄຸນສົມບັດ ແລະ ມີຄວາມຮັກຊາດ ເພື່ອຮ່ວມກັນສ້າງສາ ສປປ ລາວ ໃຫ້ຈະເລີນກ້າວໜ້າ.
ເນື່ອງໃນໂອກາດວັນຄູແຫ່ງຊາດ 7 ຕຸລາ ຄົບຮອບ 32 ປີ, ຂໍຈົ່ງເປັນວັນແຫ່ງຄວາມພາກພູມໃຈ, ວັນແຫ່ງການສືບຕໍ່ອຸດົມການ ແລະ ເປັນວັນແຫ່ງການຮ່ວມໃຈກັນ ຍົກລະດັບວິຊາຊີບຄູ ເພື່ອອະນາຄົດຂອງລູກຫຼານ ແລະ ອະນາຄົດຂອງຊາດ.
ຂໍຂອບໃຈ
ໃນຕອນເຊົ້າຂອງວັນທີ 2 ຕຸລາ 2026, ຢູ່ທີ່ສະໂມສອນຄະນະເສດຖະສາດ ແລະ ບໍລິຫານທຸລະກິດ, ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີປິດບັ້ນຝຶກອົບຮົມທິດສະດີການເມືອງຂັ້ນຕົ້ນ ລະບົບ 2 ເດືອນ ຊຸດທີ I ຂຶ້ນຢ່າງເປັນທາງການ. ພິທີດັ່ງກ່າວໄດ້ຈັດຂຶ້ນໂດຍການເປັນປະທານຮ່ວມຂອງ ທ່ານ ທອງສຸກ ແກ້ວມະນີ, ກຳມະການປະຈຳພັກ, ປະທານກວດກາພັກ, ຮອງຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ ແລະ ທ່ານ ຮສ. ປອ. ດາວສະຫວັນ ເຄືອມີໄຊ, ກຳມະການສຳຮອງສູນກາງພັກ, ຮອງເລຂາຄະນະບໍລິຫານງານພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ; ມີບັນດາເລຂາຄະນະພັກຮາກຖານ, ເລຂາໜ່ວຍພັກຮາກຖານ, 3 ອົງການຈັດຕັ້ງມະຫາຊົນ ມຊ, ບັນດາຄະນະຮັບຜິດຊອບຈາກສະຖາບັນການເມືອງ ແລະການປົກຄອງແຫ່ງຊາດ ແລະຈາກ ມຊ. ພ້ອມດ້ວຍ ນັກສຳມະນາກອນເຂົ້າຮ່ວມຢ່າງພ້ອມພຽງ.
ບັ້ນຝຶກອົບຮົມຄັ້ງນີ້ ໄດ້ດຳເນີນມາແຕ່ວັນທີ 3 ສິງຫາ ຫາ ວັນທີ 2 ຕຸລາ 2026 ພາຍໃຕ້ການນຳພາ-ຊີ້ນຳໂດຍກົງຈາກຄະນະປະຈຳພັກ ມຊ. ມີນັກສຳມະນາກອນເຂົ້າຮ່ວມທັງໝົດ 65 ສະຫາຍ (ຍິງ 32 ສະຫາຍ) ທີ່ຄັດເລືອກມາຈາກ 20 ຮາກຖານພັກ ທົ່ວ ມຊ, ເຊິ່ງປະກອບດ້ວຍພະນັກງານຫຼັກແຫຼ່ງທີ່ມີວຸດທິການສຶກສາລະດັບປະລິນຍາຕີ ຮອດ ປະລິນຍາເອກ. ເນື້ອໃນຫຼັກສູດແມ່ນປະຕິບັດຕາມໂຄງການຂອງສະຖາບັນການເມືອງ ແລະ ການປົກຄອງແຫ່ງຊາດ ປະກອບມີ 7 ວິຊາ (ລວມ 44 ບົດ) ເຊັ່ນ: ປັດຊະຍາມາກ-ເລນິນ, ເສດຖະສາດການເມືອງ, ລັດທິສັງຄົມນິຍົມວິທະຍາສາດ, ການເມືອງວິທະຍາ, ແນວຄິດໄກສອນ ພົມວິຫານ, ກຸ່ມການປົກຄອງ-ບໍລິຫານສາດ, ການກໍ່ສ້າງພັກ ແລະປະຫວັດສາດພັກ. ນອກຈາກນີ້, ນັກສຳມະນາກອນຍັງໄດ້ຮັບຟັງການບັນຍາຍແຜນຍຸດທະສາດການພັດທະນາ ມຊ, ເຂົ້າຮ່ວມກິດຈະກຳທັດສະນະສຶກສາຕົວຈິງຢູ່ຫໍພິພິທະພັນກອງທັບ, ສະຖາບັນການເມືອງ ແລະ ການປົກຄອງແຫ່ງຊາດ, ຄະນະກະເສດສາດ ແລະ ຕ່າງແຂວງ (ເມືອງປາກຊັນ ແຂວງບໍລິຄຳໄຊ), ພ້ອມທັງເຄື່ອນໄຫວກິດຈະກຳກິລາ-ວັນນະຄະດີຢ່າງຟົດຟື້ນ.
ຜ່ານການສຶກສາຮ່ຳຮຽນ ແລະປະເມີນຜົນຕົວຈິງ ເຫັນວ່າຜູ້ເຂົ້າຮ່ວມຝຶກອົບຮົມມີຄວາມຮັບຮູ້-ດີຫຼາຍ (ຄະແນນ A) ຈຳນວນ 16 ສະຫາຍ ເທົ່າກັບ 25.40% ແລະລະດັບດີ (ຄະແນນ B+) ຈຳນວນ 49 ສະຫາຍ ເທົ່າກັບ 74.60%. ນີ້ໄດ້ສະແດງໃຫ້ເຫັນເຖິງຄວາມເອົາໃຈໃສ່, ຄຸນທາດການເມືອງ, ຄວາມສາມັກຄີ ແລະຄວາມຮັບຮອງໃນການຍົກລະດັບຄວາມຮູ້ດ້ານທິດສະດີການເມືອງ ເພື່ອເປົ້າໝາຍນຳໄປໝູນໃຊ້ເຂົ້າໃນວຽກງານປະຕິບັດຕົວຈິງໃຫ້ມີຜົນສໍາເລັດ.
ໃນຕອນທ້າຍຂອງພິທີ, ປະທານຮ່ວມໄດ້ສະແດງຄວາມຊົມເຊີຍຕໍ່ຜົນງານ ແລະ ຜົນສໍາເລັດທີ່ທຸກຝ່າຍຮ່ວມກັນສ້າງຂຶ້ນ. ທັງໄດ້ເນັ້ນໜັກໃຫ້ຜູ້ຜ່ານການຝຶກອົບຮົມຈົ່ງນຳເອົາບົດຮຽນ ແລະທິດສະດີທີ່ໄດ້ຮ່ຳຮຽນໄປຜັນຂະຫຍາຍ, ປັບປຸງແບບແຜນວິທີເຮັດວຽກ, ສືບຕໍ່ຝຶກຝົນຫຼໍ່ຫຼອມຄຸນທາດການເມືອງ ແລະ ຄຸນສົມບັດສິນທຳປະຕິວັດ ເພື່ອເປັນກຳລັງແຮງຫຼັກແຫຼ່ງໃນການພັດທະນາມະຫາວິທະຍາໄລແຫ່ງຊາດ ແລະປະເທດຊາດໃຫ້ຈະເລີນກ້າວໜ້າຢ່າງບໍ່ຢຸດຢັ້ງ.
