ໃນຕອນບ່າຍວັນທີ 6 ກໍລະກົດ 2026 ນີ້, ມະຫາວິທະຍາໄລແຫ່ງຊາດ(ມຊ) ໄດ້ຈັດພິທີຖະແຫຼງຂ່າວກ່ຽວກັບການລົງທະບຽນສອບເສັງເຂົ້າຮຽນ ມຊ. ໂດຍ ທ່ານ ສຈ. ປອ. ເດຊານຸລາດ ແສນດວງເດດ ຜູ້ອໍານວຍການໃຫຍ່ ມຊ ໄດ້ໃຫ້ສຳພາດຕໍ່ສືມ່ວນຊົນວ່າ: ປັດຈຸບັນ ມຊ ໄດ້ກະກຽມຄວາມພ້ອມຢ່າງຮອບດ້ານສຳລັບການເປີດຮັບລົງທະບຽນສອບເສັງ ເຂົ້າຮຽນ ມຊ ໃນສົກສຶກສາ 2026-2027 ນີ້. ໂດຍໄດ້ ແຕ່ງຕັ້ງຄະນະຊີ້ນໍາ ແລະ ຄະນະຮັບຜິດຊອບການສອບເສັງ ກໍຄື ບຸກຄະລາກອນໃຫ້ພ້ອມຮັບບໍລິການນັກສອບເສັງຢ່າງເຕັມທີ່; ໄດ້ປັບປຸງລະບົບການລົງທະບຽນແບບ Online ໃຫ້ທັນສະໄໝ, ງ່າຍດາຍຫຼາຍຂຶ້ນ ແລະ ມີປະສິດທິພາບ; ໄດ້ຈັດສະຖານທີ່ໃຫ້ບໍລິການດ້ານຂໍ້ມູນຂ່າວສານ ແລະ ການຊີ້ນຳຕ່າງໆ ເພື່ອອຳນວຍຄວາມສະດວກ ໃຫ້ນັກຮຽນ ແລະ ຜູ້ປົກຄອງ; ເຊິ່ງວັນທີ 6 ກໍລະກົດ 2026 ນີ້ ເປັນມື້ເລີ່ມຕົ້ນ ເປີດລະບົບອອນລາຍໃຫ້ຜູ້ສະໝັກ ເຂົ້າສະໝັກລົງທະບຽນສອບເສັງຜ່ານທາງອອນລາຍ ແລະ ໃນວັນທີ 13 ກໍລະກົດນີ້ ຈະໄດ້ເປີດສູນຮັບລົງທະບຽນໃຫ້ຜູ້ສະໝັກມາເອົາບັດເຂົ້າຫ້ອງສອບເສັງໄດ້ຢູ່ທີ່ສະໂມສອນໃຫຍ່ ມຊ; ໃນວັນທີ 5 ສິງຫາ ຈະໄດ້ປິດລະບົບ ການລົງທະບຽນຜ່ານທາງອອນລາຍ ແລະ ໃນວັນທີ 8 ສິງຫາ ເປັນມື້ຈັດ ຕັ້ງການສອບເສັງ.
ການສອບເສັງໃນສົກຮຽນນີ້ ໄດ້ແບ່ງອອກເປັນ 2 ກຸ່ມຄື: ກຸ່ມ A ແລະ ກຸ່ມ B, ກຸ່ມ A (ກຸ່ມວິທະຍາສາດ ແລະ ເຕັກ ໂນໂລຊີ ຫຼື STEM); ກຸ່ມ B (ກຸ່ມສັງຄົມສາດ ແລະ ມະນຸດສາດ ຫຼື Non-STEM); ກຸ່ມ A ຄະນິດສາດ A + ຟີຊິກສາດ; ພາສາລາວ-ວັນ ນະຄະດີ + ເຄມີສາດ + ຊີວະສາດ + ພາສາອັງກິດ ແລະ ກຸ່ມ B ຄະນິດສາດ B + ພາສາລາວ-ວັນນະຄະດີ; ພູມີສາດ + ປະຫວັດສາດ + ພາສາ ອັງກິດ. ສໍາລັບການເປີດຮັບສະໝັກສອບເສັງ ໃນສົກສຶກສາ 2026-2027 ນີ້, ມຊ ມີຫຼັກສູດທີ່ເປີດໃຫ້ລົງທະບຽນທັງໝົດດັ່ງນີ້: ລະດັບປະລິນຍາຕີມີທັງໝົດ 125 ຫຼັກສູດ; ໃນນັ້ນປະກອບມີຫຼັກສູດນາໆຊາດ 2 ຫຼັກສູດ, ຫຼັກສູດທີ່ເປີດໃຫ້ສະໝັກສອບເສັງມີທັງໝົດ 115 ຫຼັກສູດ, ແບ່ງອອກເປັນ: ສາຍ A (ວິທະຍາສາດ ແລະ ເຕັກໂນ ໂລຊີ): 65 ຫຼັກສູດ ແລະ ສາຍ B (ສັງຄົມສາດ ແລະ ມະນຸດສາດ): 50 ຫຼັກສູດ. ສຳລັບລະດັບອະນຸປະລິນຍາ: ຍັງມີຫຼັກສູດອື່ນໆ ທີ່ເປີດຮັບສະໝັກ ຊຶ່ງສາມາດຕິດຕາມລາຍລະອຽດເພີ່ມເຕີມໄດ້ທີ່ ເຟສບຸກ ແລະ ກະດານຂ່າວ ຂອງ ມຊ. ເຊິ່ງຫຼາຍປີຜ່ານມາ ມຊ ໄດ້ມີການພັດທະນາຫຼັກສູດການຮຽນ-ການສອນຢ່າງຕໍ່ເນື່ອງ ເພື່ອຕອບສະໜອງຕໍ່ຄວາມຕ້ອງການຂອງຕະຫຼາດແຮງງານທັງພາຍໃນ ແລະ ສາກົນ, ຊຶ່ງປັດຈຸບັນມີເຖິງ 260 ກວ່າຫຼັກສູດ ໃນນັ້ນ ເປັນຫຼັກສູດປະລິນຍາຕີ 125 ຫຼັກສູດ ແຕ່ເປີດໃຫ້ສອບເສັງ 115 ຫຼັກສູດ ຊຶ່ງແຕ່ລະສາຂາວິຊາ ກໍລ້ວນແຕ່ມີຄວາມສໍາຄັນ ສາມາດປະກອບອາຊີບໄດ້ ທັງຮູບແບບລັດຖະກອນຂອງລັດ ແລະ ນໍາພາກເອກະຊົນ. ຖ້າຫາກສົນໃຈສາຂາອາຊີບໃດກໍເລືອກຮຽນສາຂາວິຊາກ່ຽວຂ້ອງ ແຕ່ຢາກແນະນໍາວ່າ ບາງເທື່ອເລືອກເສັງໃນສາຂາວິຊາທີ່ສັງຄົມນິຍົມແຂ່ງຂັນກັນເຂົ້າຮຽນ ກໍມີ ຄວາມສ່ຽງເພາະມີການແຂ່ງຂັນສູງ, ປີຜ່ານມາ ບາງວິຊາ ເຊັ່ນ: ພາສາ ຈີນ ສະໝັກເຖິງ 1,000 ກວ່າຄົນ ແຕ່ ມຊ ສາມາດຮັບໄດ້ພຽງແຕ່ 100 ກວ່າຄົນ; ສະນັ້ນຜູ້ສະໝັກຕ້ອງໄດ້ ພິຈາລະນາໃຫ້ຖີ່ຖ້ວນ ບໍ່ຄວນແລ່ນຕາມກະແສສັງຄົມເກີນໄປ ຍິ່ງແຂ່ງຂັນຫຼາຍ ກໍສ່ຽງຫຼາຍເທົ່ານັ້ນ ນັບທັງ ການແຂ່ງຂັນເສັງເຂົ້າ ແລະ ແຂ່ງຂັນປະກອບອາຊີບ.
ທ່ານກ່າວຕື່ມວ່າ ມຊ ຍັງມີສາຂາວິຊາໃໝ່ທີ່ຫາກໍໄດ້ຮັບອະນຸມັດ ແລະ ຈະເປີດໃນສົກສຶກສານີ້: ຄະນະວິຊາ ວິທະຍາສາດທໍາມະຊາດມີ 2 ຫຼັກສູດ ຄື: ຄະນິດສາດ ແລະ ຄອມພິວເຕີສໍາລັບທຸລະກິດ ແລະ ຄະນິດສາດສໍາລັບການເງິນ ແລະ ການປະກັນໄພລະດັບປະລິນຍາຕີ; ຄະນະ ກະເສດສາດ ມີ 2 ຫຼັກສູດ ຄື: ເຕັກໂນໂລຊີການຜະລິດງົວນົມ ແລະ ການຈັດການທີ່ດິນກະສິກໍາແບບຍືນຍົງ ລະດັບປະລິນຍາຕີ ແລະ ຄະນະ ອັກສອນສາດ ມີ 1 ຫຼັກສູດ ຄື: ພາສາຈີນສໍາລັບການທ່ອງທ່ຽວລະດັບປະລິນຍາຕີ ພ້ອມດຽວກັນ, ມຊ ກໍໄດ້ໂຈະບາງຫຼັກສູດທີ່ບໍ່ມີຜູ້ສະໝັກເຂົ້າຮຽນຈຳນວນ 21 ຫຼັກສູດຄື: ຫຼັກສູດປະລິນຍາຕີ 5 ຫຼັກສູດ, ຫຼັກສູດຕໍ່ເນື່ອງປະລິນຍາຕີ 11 ຫຼັກສູດ ແລະ ຫຼັກສູດອະນຸປະລິນ ຍາ 5 ຫຼັກສູດ. ສຳລັບສົກສຶກສາ 2026-2027 ມຊ ມີແຜນຮັບນັກສຶກສາໃໝ່ເຂົ້າຮຽນໃນທຸກໆຫຼັກສູດປະລິນຍາຕີ ແມ່ນ 5,570 ຄົນ. ນອກຈາກນັ້ນຍັງຈະມີການສອບເສັງເອົານັກສຶກສາເຂົ້າຮຽນຫຼັກສູດນາໆຊາດ, ຫຼັກສູດຕໍ່ເນື່ອງ ປ.ຕີ ແລະ ຫຼັກສູດຫຼາຍທາງເລືອກ (ຈັດການ ສອນໃນວັນເສົາ, ວັນອາທິດ ແລະ ພາກຄໍ່າ) ຊຶ່ງໄດ້ຈັດສອບເສັງຕ່າງຫາກ.
ສໍາລັບວັນເວລາຈັດການສອບເສັງແມ່ນ ວັນທີ 8 ສິງຫາ 2026 ນີ້ ແລະ ຈະປະກາດຜົນໃຫ້ໄວຂຶ້ນກວ່າປີຜ່ານມາ, ຄາດວ່າຈະປະກາດໃນວັນທີ 24 ສິງຫາ 2026 ແລະ ຈະເປີດຮັບລົງທະບຽນ ວັນທີ 31 ສິງຫາ 2026 ເປັນຕົ້ນໄປ. ມຊ ເປີດຊ່ອງທາງຫຼາຍດ້ານໃຫ້ຜູ້ທີ່ສົນໃຈ ໄດ້ສອບຖາມຂໍ້ມູນສະເພາະ ກ່ຽວກັບການລົງທະບຽນສອບເສັງ, ຊຶ່ງປະກອບມີ: Facebook: ກໍສາມາດຕິດຕາມ ແລະ ສົ່ງຂໍ້ຄວາມສອບຖາມໄດ້ທີ່ ເຟສບຸກ Fanpage: ຂ່າວສານ ມຊ; ເວັບໄຊ: ສາມາດເຂົ້າເບິ່ງຂໍ້ມູນ ແລະ ດາວໂຫຼດເອກະສານໄດ້ທີ່ www.nuol.edu.la. ສໍາລັບການກະກຽມຈະມາລົງທະບຽນ ສະໝັກສອບເສັງແມ່ນໃຫ້ກະກຽມ ດັ່ງນີ້: 1) ກ່ອນອື່ນໝົດແມ່ນໃຫ້ຄົ້ນຄິດຕັດສິນໃຈເລືອກສາຂາວິຊາທີ່ຈະເຂົ້າສະໝັກສອບເສັງ ເພາະນັ້ນຄືອາຊີບໃນອະນາຄົດຂອງຜູ້ຈະສອບເສັງ. 2) ກະກຽມເອກະສານໃຫ້ ຄົບຖ້ວນ: ກະລຸນາກຽມໃບຢັ້ງຢືນການສຶກສາ ຈົບ ມ7, ຮູບຖ່າຍ ແລະ ເອກະສານອື່ນໆ ທີ່ກ່ຽວຂ້ອງໃຫ້ຖືກຕ້ອງຕາມລາຍການທີ່ປະກາດໄວ້ ເພື່ອການຢັ້ງຢືນ. 3) ກະກຽມເງິນຄ່າທຳນຽມການສອບເສັງ ແລະ ວິທີການຊຳລະຕາມທີ່ກຳນົດໄວ້. 4) ສຶກສາຂໍ້ມູນການສອບເສັງລ່ວງໜ້າ: ຄວນສຶກສາຮູບແບບຂໍ້ສອບເສັງ, ກົດລະບຽບ ແລະ ເວລາສອບເສັງຈາກປະກາດ ຂອງ ມຊ. 5) ກະກຽມສຸຂະພາບ: ລະມັດລະວັງອາຫານການກິນ, ພັກຜ່ອນໃຫ້ພຽງພໍ ແລະ ກຽມ ສະຕິໃຫ້ມີສະມາທິທີ່ດີ ເພື່ອກຽມຕົວສອບເສັງຢ່າງເຕັມທີ່ ແລະ 6) ຕິດຕາມຂ່າວສານຢ່າງສະໝໍ່າສະເໝີ: ຕິດຕາມການປ່ຽນແປງ ແລະ ຂໍ້ມູນໃໝ່ໆ ຜ່ານທາງຊ່ອງທາງ ທາງການຂອງ ມຊ.
ໃນຕອນບ່າຍ ວັນທີ 03 ກໍລະກົດ 2026 ນີ້, ທີ່ຫ້ອງຮັບແຂກຕຶກສຳນັກງານ ຜູ້ອໍານວຍການໃຫຍ່ ມະຫາວິທະຍາໄລແຫ່ງຊາດ (ມຊ), ໄດ້ມີພິທີມອບ-ຮັບທຶນໂອກາດ ແລະ ການສຶກສາ ຈາກອົງການນໍ້າ, ດິນໃນອາຊີ ແລະ ການພົວພັນກັບຄົນອາຊີ (Water, Soil in Asia and Interaction with Asia People) ຈາກປະເທດຍີ່ປຸ່ນ. ໂດຍການເຂົ້າຮ່ວມເປັນປະທານ ຂອງ ທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອຳນວຍການໃຫຍ່ ມຊ, ມີທ່ານຮອງຫົວໜ້າຫ້ອງການ, ຮອງຫົວໜ້າຄະນະວິຊາ, ພະນັກງານ, ຄູ-ອາຈານ ທີ່ກ່ຽວຂ້ອງ ແລະນັກສຶກສາທີ່ໄດ້ຮັບທຶນເຂົ້າຮ່ວມ.
ການມອບທຶນການສຶກສາໃນຄັ້ງນີ້ ແມ່ນໜຶ່ງໃນແຜນການຮ່ວມມື ເພື່ອສະໜັບສະໜູນ ແລະ ສົ່ງເສີມໂອກາດທາງດ້ານການສຶກສາ ແລະ ການຄົ້ນຄວ້າວິທະຍາສາດ ໃຫ້ແກ່ນັກສຶກສາ ມຊ ຜູ້ທີ່ມີຜົນການຮຽນດີ-ຮຽນເກັ່ງ ແລະ ມີຄຸນສົມບັດດີ ແລະມີຄວາມຮັບຜິດຊອບຕໍ່ສັງຄົມ. ເຊິ່ງຕາງໜ້າມອບທຶນການສຶກສາໃນຄັ້ງນີ້ ໂດຍ ທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອຳນວຍການໃຫຍ່ ມຊ, ເຊິ່ງນັກສຶກສາທີ່ໄດ້ຮັບໂອກາດ ແລະ ທຶນການສຶກສາ ມີທັງໝົດ 4 ຄົນ ປະກອບມີ: ທ້າວ ວິລະພົງ ສຸລິຍະເດດ ຈາກຄະນະວິທະຍາສາດທຳມະຊາດ; ທ້າວ ມັງກອນເທວາ ສຸທໍາມະວົງ ຈາກຄະນະວິສະວະກຳສາດ ໄດ້ຮັບໂອກາດເຂົ້າຮ່ວມທັດສະນະສຶກສາ-ແລກປ່ຽນດ້ານວິຊາການ ທີ່ປະເທດຍີ່ປຸ່ນ ໃນໄລຍະເວລາ 1 ອາທິດ ພາຍໃນເດືອນສິງຫາ 2026 ນີ້ ແລະ ທ້າວ ເຈຢີມົວ ໄຊຍາ ຈາກຄະນະວິສະວະກຳສາດ; ທ້າວ ມະນີໂຊກ ພົມສຸວັນ ຈາກຄະນະວິທະຍາສາດທຳມະຊາດ ໄດ້ຮັບທຶນການສຶກສາເປັນຄ່າຮຽນ ແລະ ການກະກຽມຂຽນບົດວິທະຍານິພົນ ຜູ້ລະ 6,000,000 ກີບ/ຄົນ.
ໃນໂອກາດນີ້, ທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອຳນວຍການໃຫຍ່ ມຊ ໄດ້ກ່າວສະແດງຄວາມຍ້ອງຍໍຊົມເຊີຍ ແລະ ຂອບໃຈຢ່າງຈິງໃຈຕໍ່ ອົງການ Water, Soil in Asia and Interaction with Asia People ປະເທດຍີ່ປຸ່ນ ທີ່ໄດ້ເຫັນຄວາມສຳຄັນຂອງການພັດທະນາຊັບພະຍາກອນມະນຸດໃນ ສປປ ລາວ. ພ້ອມດຽວກັນນັ້ນ, ທ່ານຮອງຜູ້ອຳນວຍການໃຫຍ່ ຍັງໄດ້ເນັ້ນໃຫ້ນັກສຶກສາຜູ້ທີ່ໄດ້ຮັບທຶນການສຶກສາທຸກຄົນ ຈົ່ງເອົາໃຈໃສ່ຕັ້ງໜ້າສຶກສາຮ່ຳຮຽນ, ຝຶກຝົນຫຼໍ່ຫຼອມຕົນເອງທາງດ້ານຄຸນສົມບັດ ແລະ ວິຊາສະເພາະເພື່ອໃຫ້ກາຍເປັນບຸກຄະລາກອນທີ່ມີຄຸນນະພາບ ອອກໄປຮັບໃຊ້ສັງຄົມ ແລະ ພັດທະນາປະເທດຊາດໃນອະນາຄົດ; ພ້ອມທັງນຳໃຊ້ທຶນການສຶກສາທີ່ໄດ້ຮັບໃນຄັ້ງນີ້ໃຫ້ເກີດປະໂຫຍດສູງສຸດອີກດ້ວຍ.
ໃນຕອນບ່າຍ ວັນທີ 25 ມິຖຸນາ 2026 ຜ່ານມານີ້, ທ່ານ ປອ. ຮຸນ ຊຽງເຮັງ (Dr. Siengheng Hul) ຜູ້ຊ່ວຍຮອງລັດຖະມົນຕີ ກະຊວງອຸດສາຫະກຳ, ວິທະຍາສາດ, ເຕັກໂນໂລຊີ ແລະ ນະວັດຕະກຳ ທັງເປັນປະທານຄະນະກຳມະການວິທະຍາສາດ, ເຕັກໂນໂລຊີ ແລະ ນະວັດຕະກຳ ອາຊຽນ (COSTI) ແຫ່ງຣາຊະອານາຈັກກຳປູເຈຍ ພ້ອມດ້ວຍຄະນະ ໄດ້ເຂົ້າພົບປະ ຢ້ຽມຢາມ ມະຫາວິທະຍາໄລແຫ່ງຊາດ (ມຊ). ໂດຍ ມີທ່ານ ສຈ.ປອ. ເດຊານຸລາດ ແສນດວງເດດ ຜູ້ອໍານວຍການໃຫຍ່ ມຊ, ທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອຳນວຍການໃຫຍ່ ມຊ ພ້ອມດ້ວຍຄະນະບໍດີ, ຫົວໜ້າຫ້ອງການກ່ຽວຂ້ອງ ໃຫ້ໃຫ້ຕ້ອນຮັບຢ່າງອົບອຸ່ນ ທີ່ຫ້ອງຮັບແຂກສໍານັກງານຜູ້ອໍານວຍການໃຫຍ່ ມຊ.
ການມາຢ້ຽມຢາມ ມຊ ຂອງຄະນະຜູ້ແທນກຳປູເຈຍໃນຄັ້ງນີ້ ແມ່ນກິດຈະກຳແລກປ່ຽນ ນອກວາລະທາງການ. ໃນໂອກາດທີ່ຄະນະຜູ້ແທນດັ່ງກ່າວເດີນທາງມາເຂົ້າຮ່ວມກອງປະຊຸມ ລັດຖະມົນຕີວິທະຍາສາດ, ເຕັກໂນໂລຊີ ແລະ ນະວັດຕະກຳ ອາຊຽນ ຄັ້ງທີ 22 (AMMSTI-22) ເຊິ່ງ ສປປ ລາວ ໄດ້ຮັບກຽດເປັນເຈົ້າພາບ; ເຊິ່ງການພົບປະຄັ້ງນີ້ ທັງສອງຝ່າຍ ໄດ້ປຶກສາຫາລື ແລກປ່ຽນບົດຮຽນ, ປະສົບການ ແລະ ປຶກສາຄວາມເປັນໄປໄດ້ໃນການຮ່ວມມືດ້ານວິຊາການ ແລະ ການຄົ້ນຄວ້າວິທະຍາສາດຮ່ວມກັນໃນຕໍ່ໜ້າ. ໂດຍຄະນະຜູ້ແທນໄດ້ເນັ້ນໃສ່ 2 ຂົງເຂດວຽກງານທີ່ສຳຄັນ ຄື: ດ້ານຫຼັກສູດການສຶກສາ: ເພື່ອສຶກສາ ແລະ ຖອດຖອນບົດຮຽນກ່ຽວກັບຫຼັກສູດວິຊາການ, ໂຄງການພິເສດ ແລະ ຊອກຫາຊ່ອງທາງໃນການແລກປ່ຽນນັກສຶກສາ ພ້ອມທັງຄູ-ອາຈານ ລະຫວ່າງສອງປະເທດ. ດ້ານການຄົ້ນຄວ້າ ແລະ ຫ້ອງທົດລອງ: ເພື່ອທ່ຽວຊົມຫ້ອງທົດລອງ ແລະ ສູນຄົ້ນຄວ້າຕ່າງໆ ຂອງມະຫາວິທະຍາໄລ, ແນໃສ່ກຳນົດຂົງເຂດການຮ່ວມມືທີ່ເປັນຮູບປະທຳ ໃນການວິໄຈ ແລະ ພັດທະນາເຕັກໂນໂລຊີຮ່ວມກັນ ພາຍໃຕ້ຂອບການຮ່ວມມື ອາຊຽນ-ຄອສຕີ (ASEAN-COSTI).
ການຢ້ຽມຢາມໃນຄັ້ງນີ້ ຖືເປັນການປະກອບສ່ວນອັນສຳຄັນເຂົ້າໃນການຮັດແໜ້ນ
ສາຍພົວພັນ ແລະ ການຮ່ວມມືທາງດ້ານວິທະຍາສາດ, ເຕັກໂນໂລຊີ ແລະ ວິຊາການ ລະຫວ່າງ ຣາຊະອານາຈັກກຳປູເຈຍ ແລະ ສປປ ລາວ ໃຫ້ແໜ້ນແຟ້ນຍິ່ງໆຂຶ້ນໃນອະນາຄົດ.
ໃນຕອນເຊົ້າ ວັນທີ 26 ມິຖຸນາ 2026ນີ້, ທີ່ຫ້ອງຮັບແຂກ VIP ຕຶກສຳນັກງານຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ (ມຊ), ທ່ານ ສຈ.ປອ. ພູເພັດ ກ້ຽວພິລາວົງ, ຮອງຜູ້ອຳນວຍການໃຫຍ່ ມຊ ພ້ອມດ້ວຍ ຄະນະບໍດີ, ຫົວໜ້າຫ້ອງການ ແລະພະນັກງານທີ່ກ່ຽວຂ້ອງ ໄດ້ຮັບການເຂົ້າຢ້ຽມຢາມ ຄະນະນໍາຈາກ ມະຫາວິທະຍາໄລເຕັກໂນໂລຊີອາວະກາດກຸ້ຍຫຼິນ (Guilin University of Aerospace Technology - GUAT) ສາທາລະນະລັດ ປະຊາຊົນຈີນ, ນຳໂດຍ ທ່ານ ສຈ. ຈ່າງ ລີພິງ (Prof. Zhang Lieping), ຮອງອະທິການບໍດີ ມະຫາວິທະຍາໄລເຕັກໂນໂລຊີອາວະກາດກຸ້ຍຫຼິນ ພ້ອມຄະນະ.
ການພົບປະກັນໃນຄັ້ງນີ້ ທັງສອງຝ່າຍໄດ້ປຶກສາຫາລື ແລະ ແລກປ່ຽນຄວາມຄິດເຫັນ ດ້ານວິຊາການ ໃນ 2 ຫົວຂໍ້ສຳຄັນ ຄື: (1) ການສຶກສາ ແລະ ຄົ້ນຄວ້າຄວາມເປັນໄປໄດ້ໃນການນຳໃຊ້ຍານພາຫະນະທາງອາກາດທີ່ບໍ່ມີຄົນຂັບ ຫຼື ໂດນ (UAVs) ເຂົ້າໃນວຽກງານການກະສິກຳ ອັດສະລິຍະ (Smart Agriculture) ພ້ອມທັງຊຸກຍູ້ການພັດທະນາວິທະຍາໄລວິສະວະກອນ ອາວະກາດ ຈີນ-ອາຊຽນ (China-ASEAN Aerospace Engineers College). (2) ປຶກສາຫາລືກ່ຽວກັບການຮ່ວມມືສ້າງ ແລະ ພັດທະນາບຸກຄະລາກອນທີ່ມີຄວາມສາມາດ (Joint talent cultivation) ລວມເຖິງການສົ່ງເສີມໂຄງການແລກປ່ຽນນັກສຶກສາລະຫວ່າງກັນ
ການຢ້ຽມຢາມ ແລະ ພົບປະຄະນະນໍາ ມຊ ຄັ້ງນີ້ ຖືເປັນບາດກ້າວອັນສຳຄັນໃນການຂະຫຍາຍສາຍພົວພັນ ແລະ ການຮ່ວມມືທາງດ້ານວິຊາການ, ວິທະຍາສາດ ແລະ ເຕັກໂນໂລຊີອາວະກາດທີ່ທັນສະໄໝ, ເຊິ່ງຈະຊ່ວຍຍົກລະດັບຄຸນນະພາບການສຶກສາ, ການຄົ້ນຄວ້າ ແລະ ການພັດທະນາຊັບພະຍາກອນມະນຸດຂອງທັງສອງສະຖາບັນໃຫ້ມີຄວາມກ້າວໜ້າໃນອະນາຄົດ.
ໃນວັນທີ 23 ມິຖຸນາ 2026 ຜ່ານມາ, ທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດລາວ, ໄດ້ເຂົ້າພົບປະ ແລະຢ້ຽມຢາມ ທ່ານ FUJISAWA Masato ອະທິການບໍດີ ມະຫາວິທະຍາໄລໂກເບ (Kobe) ປະເທດຍີ່ປຸ່ນ ໂດຍມີທ່ານ TAMAKI Hisashi ຮອງອະທິການບໍດີ, ຜູ້ອຳນວຍການຫ້ອງການສົ່ງເສີມການຮ່ວມມືສາກົນ; ທ່ານ ສຈ. UCHIDA Yuichiro ຄະນະບໍດີຂອງວິທະຍາໄລການສຶກສາຮ່ວມມືສາກົນ (GSICS); ທ່ານ ສຈ. OGAWA Keiichi ຮອງຄະນະບໍດີຂອງ GSICS; ທ່ານ TOKUOKA Mami ຜູ້ຊ່ວຍສາດສະດາຈານ ໂຄງການຢູ່ GSICS; ແລະ ທ່ານ ISHII Yudai, ຜູ້ຊ່ວຍສາດສະດາຈານໂຄງການຢູ່ GSICS ເຂົ້າຮ່ວມ.
ໃນໂອກາດນີ້, ທ່ານ ສຈ. ປອ. ພູເພັດ ກ້ຽວພິລາວົງ ກໍໄດ້ລາຍງານໂດຍຫຍໍ້ກ່ຽວກັບສະພາບຂອງ ມະຫາວິທະຍາໄລແຫ່ງຊາດ ແລະ ການກະກຽມສະເຫຼີມສະຫຼອງວັນ ສ້າງຕັ້ງມະຫາວິທະຍາໄລແຫ່ງຊາດ ຄົບຮອບ 30 ປີທີ່ຈະຈັດຂຶ້ນໃນເດືອນພະຈິກ ທີ່ຈະມາເຖິງນີ້. ພ້ອມນັ້ນ, ທ່ານຍັງໄດ້ສະແດງຄວາມຊົມເຊີຍຕໍ່ສາຍພົວພັນຮ່ວມມືທີ່ມີຢ່າງມາດົນນານລະຫວ່າງສອງມະຫາວິທະຍາໄລ. ນອກນັ້ນ, ທ່ານກໍໄດ້ກ່າວຕື່ມອີກວ່າ ອະດີດນັກສຶກສາຂອງມະຫາວິທະຍາໄລໂກເບ ປະເທດຍີ່ປຸ່ນ ໄດ້ມີການປະກອບໃນຫຼາຍວຽກງານຢູ່ ສປປ ລາວ ເຊິ່ງມີຫຼາຍຄົນທີ່ເຮັດວຽກຢູ່ມະຫາວິທະຍາໄລແຫ່ງຊາດລາວ ແລະ ໄດ້ຮັບໜ້າທີ່ໃນອົງການຕ່າງໆທີ່ກ່ຽວຂ້ອງໃນຫຼາຍວຽກງານ.
ຫຼັງຈາກນັ້ນ, ທັງສອງຝ່າຍກໍແລກປ່ຽນຄວາມຄິດເຫັນກ່ຽວກັບການແລກປ່ຽນນັກສຶກສາລະຫວ່າງສອງມະຫາວິທະຍາໄລ, ໂດຍທ່ານ FUJISAWA Masato ກໍໄດ້ສະແດງຄວາມຄາດຫວັງກ່ຽວກັບການຮ່ວມມືຂອງຝ່າຍ ໃຫ້ກວ້າງຂວາງກວ່າເກົ່ານອກເໜືອຈາກ ຄະນະເສດຖະສາດ ແລະ ການບໍລິຫານທຸລະກິດ ໄປໃນຂົງເຂດຕ່າງໆເຊັ່ນ: ວິສະວະກຳ, ວິທະຍາສາດ ແລະ ກະເສດສາດ.
ໃນໂອກາດນີ້, ຜູ້ເຂົ້າຮ່ວມຍັງໄດ້ແລກປ່ຽນຂໍ້ມູນກ່ຽວກັບທຶນການສຶກສາ ແລະ ໂຄງການສະໜັບສະໜູນທີ່ອຳນວຍຄວາມສະດວກ ສຳລັບນັກສຶກສາຈາກລາວທີ່ກຳລັງສຶກສາຢູ່ປະເທດຍີ່ປຸ່ນ. ນອກຈາກທຶນການສຶກສາຂອງລັດຖະບານຍີ່ປຸ່ນ (MEXT) ແລ້ວ, ກໍຍັງມີໂຄງການຕ່າງໆເຊັ່ນ: ໂຄງການທຶນການສຶກສາພັດທະນາຊັບພະຍາກອນມະນຸດ (JDS) ແລະ ໂຄງການຜູ້ນຳໂລກ SDGs ເຊິ່ງໄດ້ປະກອບສ່ວນຢ່າງຫຼວງຫຼາຍຕໍ່ການແລກປ່ຽນຊັບພະຍາກອນມະນຸດລະຫວ່າງສອງປະເທດ ລາວ-ຍີ່ປຸ່ນ, ສຳລັບການຢ້ຽມຢາມຄັ້ງນີ້ຄາດວ່າຈະເສີມສ້າງການຮ່ວມມື ແລະ ການແລກປ່ຽນທາງວິຊາການລະຫວ່າງສອງມະຫາວິທະຍາໄລຕື່ມອີກ.
ຂໍຂອບໃຈພາບ ແລະ ຂໍ້ມູນຈາກ: https://www.kobe-u.ac.jp/en/announcement/20260625-67926/
ໃນສົກສຶກສາທີ່ຜ່ານມາ ການຮຽນ-ການສອນພາສາລາວ ຢູ່ມະຫາວິທະຍາໄລແຫ່ງຊາດ ຖືວ່າໄດ້ຮັບຄວາມສົນໃຈຈາກນັກສຶກສາຕ່າງປະເທດຫຼາຍພໍສົມຄວນ ສຳລັບຄະນະສຶກສາສາດ ແມ່ນໄດ້ເປີດການຮຽນການສອນເປັນຄັ້ງທຳອິດໃນສົກສຶກສາ 2025-2026 ທີ່ພາກວິຊາພາສາລາວ-ວັນນະຄະດີ, ເຊິ່ງມີນັກສຶກສາທັງໝົດ 173 ຄົນ ຍິງ 61 ຄົນ ( ເປັນນັກສຶກສາທີ່ມາຈາກ ສປ ຈີນ 163 ຄົນ ຍິງ 55 ຄົນ, ເກົາຫຼີ 3 ຄົນ, ມົງໂກລີ 4 ຄົນ ຍິງ 3 ຄົນ, ຫວຽດນາມ 2 ຄົນ ຍິງ 1, ຍີ່ປຸ່ນ 1 ຄົນ ຍິງ 1 ຄົນ ແລະ ອົດສະຕຣາລີ 1 ຄົນ) ແລະ ໃນວັນທີ 15 ມິຖຸນາ 2026 ຜ່ານມາ, ພາກວິຊາພາສາລາວ-ວັນນະຄະດີ ກໍໄດ້ຈັດການສອບເສັງຈົບການກຽມພາສາລາວ ໃຫ້ແກ່ນັກສຶກສາຕ່າງປະເທດປະຈໍາສົກສຶກສາ 2025-2026 ໂດຍມີຄະນະນຳ ຄະນະສຶກສາສາດ ນຳໂດຍ ທ່ານ ຄຳເຟືອງ ລໍວັນໄຊ ຫົວໜ້າຄະນະວິຊາ ພ້ອມດ້ວຍຮອງຫົວໜ້າຄະນະວິຊາ, ຄະນະພາກວິຊາ ໄດ້ລົງຕິດຕາມ ແລະ ຮ່ວມສັງເກດການໃນການສອບເສັງຄັ້ງນີ້.
ໃນໂອກາດນີ້, ທ່ານ ອຈ. ປອ. ນາງ ແຫວນທອງ ນັນທະວົງ ຮອງຫົວໜ້າພາກວິຊາຄູພາສາລາວ-ວັນນະຄະດີ ໄດ້ໃຫ້ຮູ້ວ່າ ພາກວິຊາຄູພາສາລາວ-ວັນນະຄະດີ ຄະນະສຶກສາສາດ ໄດ້ດຳເນີນການຮຽນການສອນໃຫ້ກັບນັກສຶກສາຕ່າງປະເທດ ປະກອບມີ 4 ວິຊາຄື: ການຟັງ, ການເວົ້າ, ການອ່ານ ແລະ ການຂຽນ, ສຳລັບການສອບເສັງຄັ້ງນີ້ ກໍອີງຕາມລາຍວິຊາທີ່ສິດສອນຄື: ການຟັງ ແລະ ການຂຽນ ແມ່ນທຸກຄົນເສັງພ້ອມກັນ (ເປັນຮູບແບບການຢາຍເຈ້ຍຄໍາຖາມໃຫ້ແຕ່ລະຄົນຕອບ), ສ່ວນການເວົ້າ ແລະການອ່ານ ແມ່ນເວົ້າ-ອ່ານເຊິ່ງໜ້າ (ຈະມີຄະນະກຳມະການຄວບຄຸມຫ້ອງສອບເສັງເກັບກຳຄະແນນ) ການສອບເສັງດຳເນີນໄປເປັນເວລາ 4 ວັນແຕ່ວັນທີ 15-18 ມິຖຸນາ. ພ້ອມນີ້, ທ່ານຍັງໄດ້ໃຫ້ຮູ້ຕື່ມອີກວ່າ ໃນສົກສຶກສາ 2026 – 2027 ທີ່ຈະມາເຖິງ ຄະນະສຶກສາສາດແມ່ນມີຄວາມພ້ອມໃນການກະກຽມແຜນການຮຽນ-ການສອນສຳລັບນັກສຶກສາຕ່າງປະເທດທີ່ຕ້ອງການຢາກມາຮຽນພາສາລາວ, ສ່ວນແຜນການຮັບນັກສຶກສາຕ່າງປະເທດແມ່ນຄືກັບສົກສຶກສາທີ່ຜ່ານມາ ໂດຍອີງຕາມແຜນການແບ່ງປັນຕົວເລກ ຂອງມະຫາວິທະຍາໄລແຫ່ງຊາດ ແລະ ຜູ້ທີ່ມີຄວາມສົນໃຈຢາກສອບຖາມຂໍ້ມູນເພີ່ມເຕີມແມ່ນສາມາດ ສອບຖາມໄດ້ທີ່ພາກວິຊາຄູພາສາລາວ-ວັນນະຄະດີ ຄະນະສຶກສາສາດ ມະຫາວິທະຍາໄລແຫ່ງຊາດ (ວິທະຍາເຂດດົງໂດກ) ຫຼື ຕິດຕາມຂໍ້ມູນໄດ້ທີ່ Facebook page: ຄູພາສາລາວ-ວັນນະຄະດີ ຄສສ, ມຊ
