ໃນວັນທີ 13 ກຸມພາ 2025 ມະຫາວິທະຍາໄລແຫ່ງຊາດ ໄດ້ຈັດພິທີເປີດຫ້ອງການໃຫ້ຄຳປຶກສາດ້ານອາຊີບຂຶ້ນຢ່າງເປັນທາງການທີ່ພາກວິຊາການທ່ອງທ່ຽວ ແລະ ການໂຮງແຮມ, ຄະນະວິທະຍາສາດສັງຄົມ (ຄສຄ) ມະຫາວິທະຍາໄລແຫ່ງຊາດ (ມຊ), ໂດຍການເປັນປະທານໂດຍ ທ່ານ ຮສ. ປອ. ເດຊານຸລາດ ແສນດວງເດດ, ວ່າການແທນ ອະທິການບໍດີ ມະຫາວິທະຍາໄລແຫ່ງຊາດ ແລະ ທ່ານ ນາງ ເຊຊີນ ເລີຄົວ, ອຸປະທູດ, ສໍານັກງານຜູ້ຕາງໜ້າຈາກສະຫະພາບເອີຣົບ ປະຈຳ ສປປ ລາວ. ນອກຈາກນີ້ຍັງມີບັນດາຄູອາຈານ, ນັກສຶກສາ, ຜູ້ຕ່າງໜ້າຈາກພາກລັດ, ສະພາອຸດສະຫາກໍາ ແລະ ການຄ້າແຫ່ງຊາດ, ສະມາຄົມທຸລະກິດການທ່ອງທ່ຽວນະຄອນຫຼວງວຽງຈັນ ແລະ ທ່ອງທ່ຽວລາວ, ອົງການຈັດຕັ້ງສາກົນ, ແລະ ບັນດາບໍລິສັດ ແລະ ໂຮງແຮມ ເຂົ້າຮ່ວມເປັນຈຳນວນຫຼາຍກວ່າ 60 ຄົນ.

ຫ້ອງການໃຫ້ຄຳປຶກສາດ້ານອາຊີບໄດ້ຮັບການສ້າງຕັ້ງຂຶ້ນເປັນໜຶ່ງໃນແຜນງານຂອງໂຄງການຫຼັກສູດນະວັດຕະກຳເພື່ອການຮຽນຮູ້ຕະຫຼອດຊີວິດສຳລັບແຮງງານ ໃນອຸດສາຫະກຳການທ່ອງທ່ຽວແບບຍືນຍົງ ຫຼື ເອີ້ນວ່າໂຄວການ INNO4Tourism Project, ເຊິ່ງໄດ້ຮັບທຶນສະໜັບສະໜູນຈາກ ສະຫະພາບເອີຣົບເປັນຈຳນວນງົບປະມານທັງໝົດ 748,054 ເອີໂຣ ສໍາລັບການຈັດຕັ້ງປະຕິບັດໂຄງການດັ່ງກ່າວ ຢູ່ 9 ສະຖາບັນການສຶກສາຊັ້ນສູງ ແລະ ອົງການໃນ 4 ປະເທດໃນສະຫະພາບເອີຣົບ ແລະ ອາຊີເຊັ່ນ: ມະຫາວິທະຍາໄລປາແລໂມ ແລະ ອົງການເຈີຊີ, ປະເທດອີຕາລີ; ມະຫາວິທະຍາໄລມາເຊໂດເນຍ ແລະ ອົງການສີມເພຼັກຊີສ, ປະເທດເກຼັກ; ມະຫາວິທະຍາໄລແຫ່ງຊາດລາວ ແລະ ມະຫາວິທະຍາໄລສະຫວັນນະເຂດ, ສປປ ລາວ; ແລະ ມະຫາວິທະຍາໄລສົງຂລານະຄະລິນ, ມະຫາວິທະຍາໄລຊຽງໃໝ່ ແລະ ສະມາຄົມທຸລະກິດທ່ອງທ່ຽວແຂວງພູເກັດ, ຣາຊາອະນາຈັກໄທ.

ຫ້ອງການໃຫ້ຄຳປຶກສາດ້ານອາຊີບເປັນສະຖານທີ່ຕົ້ນແບບເພື່ອໃຫ້ຄໍາແນະນໍາດ້ານອາຊີບແບບຄົບວົງຈອນ, ອໍານວຍຄວາມສະດວກໃນການຊອກວຽກ ແລະ ສະໝັກວຽກ, ແລະ ເປັນສູນກາງສໍາລັບການຝຶກງານ ແລະ ສູນຂໍ້ມູນຂ່າວສານສຳການສະໝັກວຽກ ແລະ ໂອກາດອື່ນໆ. ການບໍລິການດັ່ງກ່າວຈະຊຸກຍູ້ການຮ່ວມມືລະຫວ່າງມະຫາວິທະຍາໄລ ແລະ ພາກທຸລະກິດ, ການເຊື່ອມຕໍ່ລະຫວ່າງນັກນັກສຶກສາ ແລະ ຜູ້ປະກອບການ, ນຳໃຊ້ເວທີດິຈິຕອນເພື່ອສ້າງຕະຫຼາດແຮງງານທີ່ມີການເຄື່ອນໄຫວ. ນອກ​ຈາກນີ້, ​ຍັງ​ຈະ​ປະກອບ​ອາ​ຊີບ​ເປັນ​ທີ່​ປຶກສາ ​ແລະ ​ໃຫ້​ຄຳ​ປຶກສາ, ​ເພີ່ມ​ທະວີ​ສາຍ​ພົວພັນ​ກັບ​ສະມາຄົມ​ອາຊີບ ​ແລະ ​ຍົກລະດັບຄວາມ​ພ້ອມ​ຂອງ​ນັກ​ສຶກສາ​ໃຫ້​ແກ່​ໂອກາດ​ການ​ເຮັດ​ວຽກ.

ພ້ອມນັ້ນ, ຜູ້ເຂົ້າຮ່ວມໄດ້ຮັບຟັງການນຳສະເໜີກ່ຽວກັບຫ້ອງການໃຫ້ຄຳປຶກສາດ້ານອາຊີບ ແລະ ໂຄງການນະວັດຕະກຳຫຼັກສູດການຮຽນຮູ້ຕະຫຼອດຊີວິດສຳລັບແຮງງານອຸດສາຫະກຳການທ່ອງທ່ຽວແບບຍືນຍົງ ແລະໄດ້ສົນທະນາແລກປ່ຽນ, ທ່ຽວຊົມສິ່ງອຳນວຍຄວາມສະດວກພາຍໃນຫ້ອງການດັ່ງກ່າວອີກດ້ວຍ.

ພາບບັນຍາກາດ

ໃນລະຫວ່າງວັນທີ 6-7 ກຸມພາ 2025 ຜ່ານມາ, ຄະນະອັກສອນສາດ (ຄອສ) ມະຫາວິທະຍາໄລແຫ່ງຊາດ (ມຊ) ໄດ້ຈັດກອງປະຊຸມສາກົນກ່ຽວກັບການສອນພາສາອັງກິດທົ່ວປະເທດ ຄັ້ງທີ 19 ປະຈຳປີ 2025 (LaoTESOL Conference 2025) ຂຶ້ນທີ່ເມືອງວັງວຽງ ແຂວງວຽງຈັນ ເຊິ່ງມີຜູ້ເຂົ້າຮ່ວມທັງໝົດ 177 ທ່ານ, ໃນນີ້ ເປັນອາຈານສອນພາສາອັງກິດທັງໝົດ 47 ທ່ານ, ໂດຍການເຂົ້າຮ່ວມຂອງທ່ານ ຮສ. ປອ. ອຸ່ນຫຼ້າ ສີວັນເພັງ ຮອງອະທິການບໍດີ ມຊ, ທ່ານ ນາງ Michelle OUTLAW ເອອັກຄະລັດຖະທູດ ສະຫະລັດອາເມລິກາ ປະຈຳລາວ, ມີບັນດາພະນັກງານ,​ຄູ-ອາຈານ ທີ່ກ່ຽວຂ້ອງເຂົ້າຮ່ວມ.

          ກອງປະຊຸມສາກົນກ່ຽວກັບການສອນພາສາອັງກິດທົ່ວປະເທດ ແມ່ນຈັດຂຶ້ນເປັນປະຈຳ ທຸກໆປີ ເຊິ່ງຄັ້ງນີ້ກໍເປັນຄັ້ງທີ 19, ມີຈຸດປະສົງເພື່ອສ້າງໂອກາດໃຫ້ຜູ້ເຂົ້າຮ່ວມ ຫຼື ຄູ-ອາຈານ ແລະນັກວິຊາການ, ຜູ້ຊ່ຽວຊານ ດ້ານພາສາອັງກິດໃນຂອບເຂດທົ່ວປະເທດ ໄດ້ພົບປະແລກປ່ຽນປະສົບການ ດ້ານການສິດສອນ, ການຄົ້ນຄວ້າກ່ຽວກັບ ພາສາອັງກິດເຊິ່ງກັນ ແລະກັນ. ໂດຍຜ່ານການນຳສະເໜີບົດຄວາມ ພາຍໃຕ້ຫົວຂໍ້ “Innovative Approaches to ELT: Teaching Methods and Assessments” ເຊິ່ງມີຜູ້ນຳສະເໜີທັງໝົດ 48 ບົດ.

          ໃນໂອກາດນີ້ ທ່ານ ຮສ. ປອ. ອຸ່ນຫຼ້າ ສີວັນເພັງ ໄດ້ຂຶ້ນມີຄຳເຫັນຕໍ່ພິທີ, ທ່ານກ່າວບາງຕອນວ່າ: ກອງປະຊຸມ ສາກົນກ່ຽວກັບການສອນພາສາອັງກິດທົ່ວປະເທດເປັນກອງປະຊຸມທີ່ໃຫຍ່ທີ່ສຸດສໍາລັບຄູສອນພາສາອັງກິດຈາກລາວ ແລະ ທົ່ວອາຊີ, ໂດຍມີຈຸດປະສົງເພື່ອເຕົ້າໂຮມຊ່ຽວຊານ, ຄູ-ອາຈານ ແລະ ນັກວິຊາການດ້ານການສອນພາສາອັງກິດ, ເພາະວ່າພາສາອັງກິດ ແມ່ນພາສາສາກົນທີ່ເປັນຂົວເຊື່ອມຕໍ່ວັດທະນະທໍາ, ການສົ່ງເສີມການຮ່ວມມື ແລະເປີດປະຕູສູ່ໂອກາດ. ກອງປະຊຸມຍັງສະໜອງໃຫ້ ຄູ-ອາຈານພາສາອັງກິດມີໂອກາດທີ່ດີທີ່ສຸດສໍາລັບການພົວພັນກັບຜູ້ບັນຍາຍ, ແລກປ່ຽນບົດຮຽນທີ່ດີທີ່ສຸດ ແລະແນວຄວາມຄິດຂອງປະສົບການ ການຮຽນ-ການສອນ, ເຮັດວຽກຮ່ວມກັນ, ສ້າງຄວາມເຂັ້ມແຂງເຄືອຂ່າຍການສິດສອນພາສາອັງກິດ; ໂດຍສະເພາະ ການພັດທະນາແນວຄິດທີ່ດີໃນການຮຽນ-ການສອນພາສາອັງກິດ ເພື່ອແນໃສ່ເປີດກວ້າງການສຶກສາພາສາອັງກິດ ພາຍໃນປະເທດຂອງ ສປປ ລາວ ກໍຄືການເປັນຄູ່ຮ່ວມມືໃນພາກພື້ນ ແລະ ສາກົນ.

ເພື່ອເປັນການຂະຫຍາຍ ແລະສືບຕໍ່ການຮ່ວມມືທາງດ້ານວິຊາການລະຫວ່າງສອງມະຫາວິທະຍາໄລ ກໍຄື ມະຫາວິທະຍາໄລແຫ່ງຊາດ ແລະມະຫາວິທະຍາໄລມະຫາສາລະຄາມ ປະເທດໄທ, ໃນວັນທີ 7 ກຸມພາ 2025 ຜ່ານມາ ໄດ້ມີພິທີລົງນາມການຮ່ວມມືລະຫວ່າງສອງມະຫາວິທະຍາໄລດັ່ງກ່າວ, ໂດຍຈັດຂຶ້ນທີ່ຫ້ອງປະຊຸມຄະນະວິທະຍາສາດສິ່ງແວດລ້ອມ (ຄສວ) ມຊ, ໂດຍຊ້ອງໜ້າທ່ານ ຮສ. ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມຊ ແລະ ທ່ານ ຮສ. ດຣ. ປຣະຢຸກ ສິວິໄລ ຮັກສາການແທນອະທິການບໍດີ ມະຫາວິທະຍາໄລ ມະຫາສາລະຄາມ (ປະເທດໄທ), ຮ່ວມລົງນາມໃນຄັ້ງນີ້ມີທ່ານຄະນະບໍດີ ແລະ ຮອງຄະນະບໍດີ (ຝ່າຍລະ 1 ທ່ານ) ຈາກ 3 ຄະນະວິຊາຂອງ ມຊ ຄື: ຄະນະວິທະຍາສາດສິ່ງແວດລ້ອມ, ຄະນະສະຖາປັດຄະນະກຳສາດ ແລະ ຄະນະວິສະວະກຳສາດ, ຝ່າຍມະຫາວິທະຍາໄລ ມະຫາສາລະຄາມ ປະເທດໄທ ມີ 3 ຄະນະວິຊາຄື: ຄະນະວິທະຍາສາດສິ່ງແວດລ້ອມ, ຄະນະຊັບພະຍາກອນສາດ ແລະຄະນະສະຖາປັດຕະຍະກຳສາດ, ຜັງເມືອງ ແລະເນລິມິດ ມີບັນດາແຂກຖືກເຊີນ, ພະນັກງານ, ຄູ-ອາຈານ ເຂົ້າຮ່ວມ.

          ຈຸດປະສົງຂອງການຮ່ວມມືທັງສອງຝ່າຍ ແມ່ນເພື່ອຜັນຂະຫຍາຍຂອບເຂດການຮ່ວມມື ໂດຍສະເພາະແມ່ນຈະໄດ້ເປີດໂອກາດໃຫ້ພະນັກງານ, ຄູ-ອາຈານ ແລະນັກສຶກສາໄດ້ແລກປ່ຽນຄວາມຮູ້ທາງດ້ານວິຊາການ, ການຄົ້ນຄວ້າວິໄຈ ໃນຫົວຂໍ້ຕ່າງໆທີ່ກ່ຽວຂ້ອງຕ່າງໆ.

ພາບບັນຍາກາດ