ໃນວັນທີ 12 ພະຈິກ 2024 ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ (ສລຍ) ມະຫາວິທະຍາໄລແຫ່ງຊາດ (ມຊ) ໄດ້ຈັດງານພົບປະເພື່ອສົ່ງເສີມການໄປສຶກສາຢູ່ປະເທດຍີ່ປຸ່ນ ທີ່ສະຖາບັນດັ່ງກ່າວ, ໂດຍການເຂົ້າຮ່ວມຂອງທ່ານ ປອ. ພອນແກ້ວ ຈັນທະມາລີ ຜູ້ອຳນວຍການ ສລຍ, ມີທ່ານ Yoshiharu YONEYAMA ຫົວໜ້າທີ່ປຶກສາຍີ່ປຸ່ນ ປະຈຳ ສລຍ, ພ້ອມດ້ວຍແຂກຖືກເຊີນ, ພະນັກງານ, ຄູ-ອາຈານ ແລະຕົວແທນນັກຮຽນ, ນັກສຶກສາ ເຂົ້າຮ່ວມ.

          ຈຸດປະສົງຂອງ​ການ​ຈັດງານ​ແມ່ນ​ເພື່ອ​ເປັນ​ການ​ແລກປ່ຽນບົດຮຽນ ລະຫວ່າງ​ບັນດາມະຫາວິທະຍາ​ໄລ​ຍີ່ປຸ່ນ ​ແລະ ມະຫາວິທະຍາ​ໄລ​ແຫ່ງ​ຊາດ ພ້ອມ​ດຽວກັນ, ກໍ​ເພື່ອ​​ແຈ້ງ​ຂໍ້​ມູນ​ຂ່າວສານໃຫ້​ແກ່​ພະນັກ​ງານ, ອາຈານ ​ແລະ ນັກ​ສຶກສາລາ​ວ ທີ່​ຕ້ອງການ​ໄປ​ຮຽນຕໍ່ ປະລິນຍາ​ຕີ, ປະລິນຍາ​ໂທ ​ແລະປະລິນຍາ​ເອກ ຢູ່ທີ່ປະ​ເທດ​ຍີ່ປຸ່ນ ​ໃຫ້​ໄດ້ຮັບ​ຮູ້​ຂໍ້​ມູນ​ ​ແລະ ​ເງື່ອນ​ໄຂ​ຕ່າງໆຂອງ​​ມະ​ຫາ​ວິທະຍາ​ໄລຕ່າງໆ​ໃນ​ປະ​ເທດ​ຍີ່ປຸ່ນ ທີ່​ສາມາດ​ຮັບ​ເອົາ​ນັກສຶກສາລາວ​ເຂົ້າຮຽນ​ໄດ້ ນອກຈາກນີ້, ຍັງໄດ້ແນະນຳທຶນການສຶກສາຈາກລັດຖະບານຍີ່ປຸ່ນ ແລະ ທຶນການສຶກສາຂອງມະຫາວິທະຍາໄລຍີ່ປຸ່ນເພື່ອໃຫ້ ຄູ-ອາຈານ ແລະນັກສຶກສາ ກຽມຄວາມພ້ອມໃນການສະໝັກເອົາທຶນ. ໃນປີນີ້ໄດ້ຈັດຜ່ານ 2 ຮູບແບບຄື: ແບບເຊິ່ງໜ້າ ແລະ ອອນລາຍ ເພື່ອໃຫ້ທຸກທ່ານໄດ້ເຂົ້າເຖິງຂໍ້ມູນຂ່າວສານ ແລະ ສາມາດສອບຖາມໄດ້ໃນໄລຍະການດຳເນີນງານ; ງານຄັ້ງ​ນີ້​ ມີບັນດາ​ມະຫາວິທະຍາ​ໄລ​ຍີ່ປຸ່ນ ຈຳນວນ 9 ມະຫາວິທະຍາໄລເຂົ້າຮ່ວມ ແລະ ອົງກອນການສຶກສາຍີ່ປຸ່ນ. ງານພົບປະເພື່ອສົ່ງເສີມການໄປສຶກສາຢູ່ປະເທດຍີ່ປຸ່ນ ໄດ້ຈັດໃນຄັ້ງທຳອິດໃນປີ 2008 ແລະໄດ້ຈັດເປັນເປັນປະຈໍາທຸກປີ ຈົນເຖິງປັດຈຸບັນ, ໂດຍພາຍໃຕ້ການຮ່ວມມື ຂອງສະຖາບັນພັດທະນາຊັບພະຍາກອນມະນຸດລາວ-ຍີ່ປຸ່ນ ມຊ, ສະຖານທູດຍີ່ປຸ່ນປະຈຳລາວ ແລະ ອົງການໄຈກາປະຈໍາລາວປະຈໍາລາວ. ເຊິ່ງງານດັ່ງກ່າວໄດ້ດຳເນີນເປັນເວລາ 1 ວັນເຕັມ.

ພາບບັນຍາກາດ

ກອງປະຊຸມວິທະຍາສາດລະດັບສາກົນ ຄັ້ງທີ 2 ປີ 2024 ໄດ້ຈັດຂຶ້ນໃນວັນທີ 6 ພະຈິກ ນີ້, ທີ່ມະຫາວິທະຍາໄລແຫ່ງຊາດ (ມຊ) ໂດຍການເປັນປະທານຂອງ ທ່ານ ປອ. ສຸຣິອຸດົງ ສູນດາລາ ຮອງລັດຖະມົນຕີ ກະຊວງສຶກສາທິການ ແລະ ກິລາ (ສສກ), ມີທ່ານ ຮສ. ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມຊ, ມີບັນດານັກຄົ້ນຄວ້າ ຈາກມະຫາວິທະຍາໄລແຫ່ງຊາດລາວ-ໄທ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມໃນຄັ້ງນີ້, ນັກຄົ້ນຄວ້າ ແລະ ນັກວິໄຈຂອງ ມຊ ໄດ້ນໍາສະເໜີຜົນງານ 10 ບົດ, ຈາກປະເທດໄທ 50 ບົດ ລວມບົດນໍາສະເໜີ 60 ບົດ. ໃນນີ້, ມີຜູ້ບັນຍາຍ 3 ທ່ານຈາກປະເທດໄທ ຄື: ມະຫາວິທະຍາໄລມະຫິດົນ, ມະຫາວິທະຍາໄລມະຫາຈຸລາລົງກອນ, ສະຖາບັນ Science Technology and Innovation Policy Institute (STIPI) ແລະ ຈາກມະຫາວິທະຍາໄລແຫ່ງຊາດດລາວ 1 ທ່ານ.  ກອງປະຊຸມຈັດຂຶ້ນເພື່ອເຜີຍແຜ່ຜົນງານທາງວິຊາການ, ຜົນການຄົ້ນຄວ້າວິທະຍາສາດ ແລະ ເປີດໂອກາດໃຫ້ແກ່ນັກສຶກສາທັງລະດັບປະລິນຍາໂທ ແລະ ປະລິນຍາເອກ ໄດ້ນໍາສະເໜີຜົນການຄົ້ນຄວ້າຂອງຕົນ ເປີດເວທີການແລກປ່ຽນທາງວິຊາການລະຫວ່າງປະເທດ, ພາກພື້ນ ແລະ ສາກົນ,ກອງປະຊຸມຄັ້ງນີ້ ແມ່ນຈັດຂຶ້ນເປັນຄັ້ງທີ 2, ຄັ້ງທີ 1 ໄດ້ຈັດແບບອອນລາຍໃນປີ 2023 ແລະການຈັດກອງປະຊຸມດັ່ງກ່າວປີນີ້ ເຫັນວ່າມີບັນຍາກາດຫຼາຍ ເນື່ອງຈາກມີຫຼາຍມະຫາວິທະຍາໄລຈາກປະເທດເພື່ອນບ້ານ ກໍຄື ຣາຊະອານາຈັກໄທເຂົ້າຮ່ວມ, ເຊິ່ງກອງປະຊຸມຄັ້ງນີ້ແມ່ນເຕັມໄປດ້ວຍຄວາມໝາຍ-ຄວາມສໍາຄັນທາງວິທະຍາສາດ ທີ່ເປີດໂອກາດໃຫ້ຫຼາຍພາກສ່ວນທັງພາຍໃນ ແລະ ຕ່າງປະເທດໄດ້ມີການເຜີຍແຜ່ຜົນງານຂອງຕົນເອງໃຫ້ສັງຄົມໄດ້ຮັບຮູ້ ແລະ ນໍາໄປໃຊ້ໃຫ້ເກີດປະໂຫຍດສູງສຸດ.

ໂອກາດນີ້, ທ່ານ ສຸຣິອຸດົງ ສູນດາລາ ໄດ້ໃຫ້ກຽດໂອ້ລົມຕໍ່ທີ່ປະຊຸມ, ເຊິ່ງທ່ານໄດ້ເນັ້ນໜັກ 4 ບັນຫາສໍາຄັນວ່າ: 1. ວຽກງານວິທະຍາສາດແມ່ນມີຄວາມສໍາຄັນ ແລະ ຕິດພັນກັບທຸກຂະແໜງການ. ສະນັ້ນ, ຈົ່ງຮ່ວມກັນຄົ້ນຄວ້າປະດິດຄິດສ້າງສິ່ງໃໝ່ ແລະ ຕ້ອງມີຈັນຍາບັນ-ຈັນຍາທຳ ຕໍ່ອາຊີບນັກຄົ້ນຄວ້າຢ່າງເຂັ້ມງວດ; 2. ໃຫ້ບັນດານັກຄົ້ນຄວ້າຈົ່ງຮັບຮູ້ວ່າພວກທ່ານແມ່ນຜູ້ຄິດຄົ້ນນະວັດຕະກໍາມາໃຫ້ປະເທດຊາດ. ສະນັ້ນ, ຈົ່ງສຸມໃສ່ຄົ້ນຄວ້າວິທະຍາສາດໃຫ້ມີສິ່ງໃໝ່ໆພົ້ນເດັ່ນຫຼາຍຂຶ້ນ ແລະ ໃຫ້ເປັນທີ່ປະຈັກຕາທັງເປັນທີ່ຍອມຮັບທັງພາຍໃນ ແລະ ສາກົນ; 3. ໃຫ້ບັນດາຄະນະນໍາທຸກຂັ້ນໃນສະຖາບັນການສຶກສາ, ມຊ ກໍຄືກະຊວງ ສສກ ເອົາໃຈໃສ່ຊຸກຍູ້ ແລະ ລະດົມແນວຄິດສ້າງນັກຮຽນ, ນັກສຶກສາເພື່ອໃຫ້ກາຍເປັນນັກວິທະຍາສາດ ທີ່ມີແນວຄິດຮັກຊາດ ຮັກການຄົ້ນຄວ້າ ແລະ ກາຍເປັນນັກວິທະຍາສາດໜຸ່ມນ້ອຍທີ່ຫ້າວຫັນ, ມີນໍ້າໃຈເສຍສະຫຼະ, ມີຄວາມສາມັກຄີ, ມິດຕະພາບ ແລະ ມີຫົວຄິດ ປະດິດສ້າງອັນທັນສະໄໝ ແລະ 4. ໃຫ້ພະຍາຍາມນໍາໃຊ້ວິທະຍາສາດເຂົ້າຮັບໃຊ້ວຽກງານຕົວຈິງໃນການດໍາລົງຊີວິດຂອງປະຊາຊົນ ກໍຄືການພັດທະນາເສດຖະກິດ-ສັງຄົມຢ່າງເປັນຮູບປະທຳ.

ພາບບັນຍາກາດ

ໂຮງຮຽນມັດທະຍົມສຶກສາຕອນປາຍ (ມສ) ວຽງຈັນ ຊະນະເລີດໃນງານແຂ່ງຂັນຖາມ - ຕອບວິທະຍາສາດລະດັບມັດ ທະຍົມສຶກສາຕອນປາຍ ເພື່ອສະເຫຼີມສະຫຼອງວັນວິທະຍາສາດແຫ່ງຊາດ ຄົບຮອບ 37 ປີ ແລະ ວັນສ້າງຕັ້ງມະຫາວິທະຍາໄລແຫ່ງຊາດ (ມຊ) ຄົບຮອບ 28 ປີ (ວັນທີ 5 ພະຈິກ 1996 – 5 ພະຈິກ 2024) ໄດ້ຈັດຂຶ້ນໃນວັນທີ 6 ພະຈິກນີ້ ທີ່ ມຊ ໂດຍການເປັນກຽດເຂົ້າຮ່ວມ ຂອງ ທ່ານ ສຸກສະຫວາດ ສີຫາປັນຍາ ຫົວໜ້າກົມຄຸ້ມຄອງວິທະຍາສາດ ກະຊວງສຶກສາທິການ ແລະ ກິລາ (ສສກ), ທ່ານ ຮສ. ປອ. ສິນທະວອນ ດາລາວົງ ຮອງອະທິການບໍດີ ມຊ, ທ່ານ ປອ. ສິດທິໄຊ ໄຊຍະວົງ ຫົວໜ້າຫ້ອງການຄົ້ນຄວ້າວິທະຍາສາດ ແລະ ບໍລິຫານວິຊາການ ມຊ, ມີຄະນະກຳມະການ, ນັກແຂ່ງຂັນ, ຄູ-ອາຈານ, ນັກຮຽນຈາກ 9 ໂຮງຮຽນໃນນະຄອນຫຼວງວຽງຈັນ (ນວ) ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ການແຂ່ງຂັນໃນຄັ້ງນີ້, ມີໂຮງຮຽນມັດທະຍົມສຶກສາຕອນປາຍທັງໝົດ 9 ແຫ່ງໃນ ນວ ແຫ່ງລະ 3 ຄົນ/ທີມ ຊຶ່ງໄດ້ແບ່ງອອກເປັນ 3 ຮອບຄື: ຮອບທີ 1: ຜູ້ເຂົ້າຮ່ວມແຂ່ງຂັນທັງໝົດ 9 ທີມ (3 ຄົນ/ທີມ) ຊຶ່ງແມ່ນຕົວແທນຈາກ 9 ໂຮງຮຽນສົ່ງເຂົ້າແຂ່ງຂັນຂຶ້ນນັ່ງປະຈໍາທີ່; ທຸກໆທີມຈະໄດ້ຕອບຄໍາຖາມທັງໝົດ 12 ຂໍ້ ເພື່ອຄັດເລືອກເອົາ 6 ທີມ ເຂົ້າແຂ່ງຂັນໃນຮອບທີ 2 ຕໍ່ໄປ; ຕາງໜ້າແຕ່ລະທີມຈົກຄໍາຖາມໃນແຕ່ລະຂໍ້ ແລ້ວພິທີກອນອ່ານຄໍາຖາມ ແລະ ຄໍາຕອບໃຫ້ຜູ້ເຂົ້າແຂ່ງຂັນໄດ້ຮັບຟັງ, ຫຼັງຈາກພິທີກອນອ່ານຄຳຖາມ ແລະ ຄຳຕອບສິ້ນສຸດລົງ ຜູ້ເຂົ້າແຂ່ງຂັນມີເວລາປຶກສາຫາລືກັນໃນທີມຂອງຕົນ ໂດຍໃຊ້ເວລາ 10 ວິນາທີ; ຜູ້ເຂົ້າແຂ່ງຂັນຍົກປ້າຍຄໍາຕອບທັນທີຫຼັງຈາກທີ່ໄດ້ຍິນສຽງສັນຍານເຕືອນຈາກເວລາທີ່ກໍານົດໄວ້ (ຖ້າຍົກປ້າຍຄຳຕອບຊ້າ ຖືວ່າສະຫຼະສິດໃນຄໍາຕອບຂໍ້ດັ່ງກ່າວ); ຜູ້ເຂົ້າແຂ່ງຂັນຍົກປ້າຍຄໍາຕອບຄ້າງໄວ້ຈົນກວ່າພິທີກອນຈະບອກໃຫ້ເອົາລົງ; ສືບຕໍ່ແຂ່ງຂັນຈົນຄົບຄໍາຖາມທັງໝົດ 12 ຂໍ້. ຫຼັງຈາກນັ້ນ, ຄະນະກໍາມະການຈະຮວບຮວມຄະແນນທັງໝົດ ແລ້ວປະກາດທີມທີ່ໄດ້ເຂົ້າຮອບທີ 2; ກໍລະນີຫຼາຍທີມມີຄະແນນເທົ່າກັນ, ຄະນະກໍາມະການໄດ້ສືບຕໍ່ຖາມຄໍາຖາມຕໍ່ໄປຈົນກວ່າໄດ້ທີມທີ່ເຂົ້າຮອບທີ 2 (ໃນຮອບນີ້ແຕ່ລະທີມມີເວລາໃນການຕອບຄຳຖາມພຽງແຕ່ 5 ວິນາທີ ເທົ່ານັ້ນ); ຮອບທີ 2: ທີມທີ່ເຂົ້າຮອບທັງໝົດ 6 ທີມປະຈຳທີ່ໃຜລາວ; ສືບຕໍ່ແຂ່ງຂັນໃນຮອບທີ 2 ຊຶ່ງຜູ້ເຂົ້າແຂ່ງຂັນຈະໄດ້ຕອບຄຳຖາມທັງໝົດ 10 ຂໍ້; ວິທີການຕ່າງໆແມ່ນໄດ້ປະຕິບັດຄືກັບຮອບທີ 1 ໃນຮອບນີ້ແມ່ນໄດ້ຄັດເອົາຈຳນວນ 4 ທີມ ເພື່ອເຂົ້າສູ່ຮອບຊິງຊະນະເລີດ (ຮອບທີ 3); ຮອບທີ 3; ທີມທີ່ເຂົ້າຮອບທັງໝົດ 4 ທີມປະຈໍາທີ່ໃຜລາວ; ສືບຕໍ່ແຂ່ງຂັນໃນຮອບທີ 3 ຊຶ່ງຜູ້ເຂົ້າແຂ່ງຂັນຈະໄດ້ຕອບຄຳຖາມທັງໝົດ 10 ຂໍ້; ວິທີການຕ່າງໆແມ່ນໄດ້ປະຕິບັດຄືກັບຮອບທີ 1.

ຜ່ານການແຂ່ງຂັນທັງ 3 ຮອບ, ອັນດັບທີ 1 ໄດ້ແກ່ໂຮງຮຽນ ມສ ວຽງຈັນ ໄດ້ຮັບລາງວັນທຶນການສຶກສາມູນຄ່າ 2 ລ້ານກີບ ພ້ອມໃບຢັ້ງຢືນ; ອັນດັບທີ 2 ໂຮງຮຽນ ມສ ມິດຕະພາບວຽງຈັນ-ໂຮ່ຈິມິນ ໄດ້ຮັບລາງວັນທຶນການສຶກສາມູນຄ່າ 1,5 ລ້ານກີບ ພ້ອມໃບຢັ້ງຢືນ; ອັນດັບທີ 3 ໂຮງຮຽນ ມສ ພອນສະຫວັນຊົນເຜົ່າ ໄດ້ຮັບລາງວັນທຶນການສຶກສາມູນຄ່າ 1 ລ້ານກີບ ພ້ອມໃບຢັ້ງຢືນ; ອັນດັບທີ 4 ໂຮງຮຽນ ມສ ເພຍວັດ ໄດ້ຮັບລາງວັນທຶນການສຶກສາມູນຄ່າ 4 ແສນກີບ ພ້ອມໃບຢັ້ງຢືນ. ໃນນັ້ນ, ຍັງມີລາງວັນຊົມເຊີຍໄດ້ຮັບທຶນການສຶກສາລາງວັນລະ 5 ແສນກີບ. ເປັນກຽດມອບລາງວັນໃນຄັ້ງນີ້ໂດຍມີຫົວໜ້າກົມຄຸ້ມຄອງວິທະຍາສາດ ກະຊວງ ສສກ, ຮອງອະທິການບໍດີ ມຊ, ຫົວໜ້າຫ້ອງການຄົ້ນຄວ້າວິທະຍາສາດ ແລະ ບໍລິຫານວິຊາການ ມຊ ຕາມລໍາດັບ.

ພາບບັນຍາກາດ

ເພື່ອເປັນຂີດໝາຍສໍາຄັນທາງປະຫວັດສາດ ແລະເປັນການເຜີຍແຜ່ໃຫ້ທົ່ວສັງຄົມໄດ້ຮັບຊາບ ແລະຈາລຶກນັ້ນ, ໃນລະຫວ່າງ ວັນທີ 04 ຫາ ວັນທີ 06 ພະຈິກ 2024 ທີ່ຜ່ານມານີ້, ມະຫາວິທະຍາໄລແຫ່ງຊາດ(ມຊ) ໄດ້ຈັດງານວາງສະແດງຜະລິດຕະພັນ ແລະຈໍາໜ່າຍສິນຄ້າ ປີ 2024 ເພື່ອການສະເຫຼີມສະຫຼອງວັນວິທະຍາສາດແຫ່ງຊາດ 12 ຕຸລາ ຄົບຮອບ 37 ປີ(12ຕຸລາ 1987-12ຕຸລາ 2024) ແລະສະເຫຼີມ-ສະຫຼອງ ວັນສ້າງຕັ້ງ ມຊ ຄົບຮອບ 28 ປີ(05ພະຈິກ 1996-05 ພະຈິກ 2024) ຂຶ້ນຢ່າງເປັນທາງການ, ເຊິ່ງພິທີສະເຫຼີມສະຫຼອງ ວັນວິທະຍາສາດແຫ່ງຊາດ ໄດ້ມີພິທີເປີດໃນເຊົ້າວັນທີ 05 ພະຈິກ 2024, ທີ່ສະໂມສອນຄະນະເສດຖະສາດ ແລະບໍລິຫານທຸລະກິດ ມຊ ໂດຍການເປັນປະທານຂ່າວເປີດ ຂອງທ່ານ ສຸລິອຸດົງ ສູນດາລາ ຮອງລັດຖະມົນຕີ ກະຊວງສຶກສາທິການ ແລະກີລາ ແລະງານສະເຫຼີມສະຫຼອງ ວັນສ້າງຕັ້ງ ມຊ ແລະວາງສະແດງຜະລິດຕະພັນ ແລະຈໍາໜ່າຍສິນຄ້າ ປີ 2024 ໄດ້ມີພິທີເປີດຂຶ້ນ ທີ່ສະໂມສອນໃຫຍ່ ມຊ ໃນເຊົ້າວັນດຽວກັນ. ໂດຍການໃຫ້ກຽດເປັນປະທານຕັດແຖບຜ້າຂອງທ່ານ ຮສ.ປອ. ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະກີລາ, ມີທ່ານ ແກ້ວວີສຸກ ໂສລະພົມ ຮອງລັດຖະມົນຕີ ກະຊວງເຕັກໂນໂລຊີ ແລະການສື່ສານ, ທ່ານ ປອ. ຈັນສະແຫວງ ບຸນຍົງ ຮອງລັດຖະມົນຕີ ກະຊວງພະລັງງານ ແລະບໍ່ແຮ່, ທ່ານ ຮສ.ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມຊ, ມີບັນດາທ່ານ ຮອງອະທິການບໍດີ, ແຂກຖືກເຊີນ, ມີຄະນະບໍດີ, ຮອງຄະນະບໍດີ, ຜູ້ອໍານວຍການສະຖາບັນ, ຫົວໜ້າຫ້ອງການ, ພະນັກງານ, ຄູ-ອາຈານ ແລະນັກສຶກສາເຂົ້າຮ່ວມ.

      ໃນໂອກາດສໍາຄັນນີ້, ທ່ານ ຮສ.ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມຊ. ໄດ້ຂຶ້ນຂ່າວຕໍ່ພິທີ, ເຊິ່ງທ່ານກ່າວບາງຕອນວ່າ:  ພາລະກິດຕົ້ນຕໍ ຂອງ ມຊ ມີ 04 ດ້ານຄື: ສ້າງ ​ແລະ ພັດທະນາ​ຊັບພະຍາກອນ​ມະນຸດ​ໃຫ້​ກາຍ​ເປັນນັກ​ບໍລິຫານ, ນັກວິຊາ​ການ, ນັກຄົ້ນຄວ້າວິທະຍາສາດ ທີ່​ມີ​ຄຸນ​ນະ​ພາບທາງ​ດ້ານ​ຄວາມ​ຮູ້, ​ຄວາມສາມາດມີຄຸນ​ສົມບັດ​, ມີ​ວິ​ໄນ, ມີ​ຫົວຄິດ​ປະດິດ​ສ້າງ ແລະ ມີຄວາມ​ສີວິ​ໄລ​ທາງ​ດ້ານຈິດ​ໃຈ​; ດໍາເນີນ ແລະ ສົ່ງ​ເສີມການ​ຄົ້ນ​ຄ້ວາ​ວິທະຍາສາດ​​ໃຫ້​ມີ​ມາດຕະຖານ ​ເພື່ອ​ຕອບ​ສະໜອງ​ນະ​ໂຍບາຍ​ການ​ພັດທະນາ​ເສດຖະກິດ​-ສັງຄົມ ​ຂອງ​ຊາດ​ ແລະ ເຜີຍ​ແຜ່​ຜົນສຳ​ເລັດຂອງການ​ຄົ້ນ​ຄວ້າວິທະຍາສາດ; ບໍລິການທາງດ້ານ​​ວິຊາ​ການທີ່​ມີ​ປະສິດ​ທິ​ພາບ ເພື່ອ​ຕອບ​ສະໜອງ​ໃຫ້ແກ່​ສັງຄົມ; ປົກ​ປັກ​ຮັກສາ ແລະ ​ເສີມ​ຂະຫຍາຍ​ມູນເຊື້ອວັດທະນະທຳ ຮີດຄອງ​ປະ​ເພນີ, ​ອັນ​ດີງາມ​ຂອງ​ຊາດ, ພ້ອມ​ທັງ ເລືອກ​ເຟັ້ນ, ຮັບ​ເອົາ​ວັດທະນະ​ທຳທີ່​ກ້າວໜ້າ ແລະ ​ຍອດ​ຍິ່ງ​ຂອງ​ສາກົນ​ເຂົ້າໃນການພັດທະນາ. ເຊິ່ງ 02 ໃນ 04 ພາລະບົດບາດຫຼັກ ຂອງ ມຊ ຄື: ດໍາເນີນ ແລະສົ່ງເສີມການຄົ້ນຄວ້າວິທະຍາສາດ ໃຫ້ມີມາດຕະຖານເພື່ອຕອບສະໜອງນະໂຍບາຍຂອງການພັດທະນາ ເສດຖະກິດ-ສັງຄົມຂອງຊາດ ແລະເຜີຍແຜ່ການຄົ້ນຄວ້າວິທະຍາສາດ ແລະບໍລິການວິຊາການ ທີ່ມີປະສິດທິພາບ ເພື່ອຕອບສະໜອງໃຫ້ແກ່ສັງຄົມ. ເຊິ່ງສອງພາລະກິດນີ້, ວຽກງານການຄົ້ນຄວ້າວິທະຍາສາດ ແລະບໍລິການວິຊາການ ເປັນໜຶ່ງໃນເສົາຄໍ້າ, ເປັນໜຶ່ງຂໍ້ຂອງກະດູກສັນຫຼັງ ແລະເປັນໜຶ່ງຫ້ອງຂອງໝາກຫົວໃຈ ຂອງ ມຊ ເພື່ອສ້າງ ແລະພັດທະນາຊັບພະຍາກອນມະນຸດໃຫ້ກາຍເປັນນັກບໍລິຫານ, ນັກວິຊາການ, ນັກຄົ້ນຄວ້າວິທະຍາສາດ ທີ່ມີຄຸນນະພາບທາງດ້ານຄວາມຮູ້, ຄວາມສາມາດ, ມີຄຸນສົມບັດ, ມີວິໄນ, ມີຫົວຄິດປະດິດສ້າງ ແລະມີຄວາມສີວິໄລທາງດ້ານຈິດໃຈ ໃຫ້ ມຊ ເປັນທີຍອມຮັບຂອງສັງຄົມ ແລະສາກົນ. ທ່ານກ່າວຕື່ມວ່າ ວິໄສທັດຂອງ ມຊ ແມ່ນ: ສ້າງໃຫ້ ມະຫາວິທະຍາ​ໄລ​ແຫ່ງ​ຊາດ ກາຍເປັນ​ສູນ​ກາງ​ການ​ສຶກສາ ແລະ ການຄົ້ນຄວ້າວິທະຍາສາດ ທີ່ມີຄຸນະພາບ ໄດ້ມາດຕະຖານລະດັັບພາກພື້ນ ແລະ ສາກົນ.

           ມະຫາວິທະຍາໄລແຫ່ງຊາດ ໄດ້ຮັບການສ້າງຕັ້ງໃນປີ 1996 ໂດຍການຮວມ 3 ມະຫາວິທະຍາໄລ ແລະ 7 ສະຖາບັນການສຶກສາຊັ້ນສູງທີ່ຂຶ້ນກັບຫຼາຍກະຊວງມາເປັນແຫ່ງດຽວ ເອີ້ນ ມະຫາວິທະຍາໄລແຫ່ງຊາດ.  ຊຶ່ງມາເຖິງປັດຈຸບັນມີອາຍຸໄດ້ 28 ປີ. ມຊ ປະກອບ ມີ 13 ຄະ ນະວິຊາ, 2 ສະຖາບັນ, 11 ຫ້ອງການ; ນອກນີ້ຍັງມີບັນດາສູນ, ຫໍສະໝຸດກາງ ແລະ ໂຮງໝໍວິທະຍາເຂດ. ມີ ​ຫຼັກສູດການຮຽນ-ການສອນ ທັງ​ໝົດ 267 ຫຼັກສູດ; ໃນນັ້ນມີ ປະລິນຍາ​​ເອກ 11 ຫຼັກສູ​ດ, ປະລິນຍາໂທ 70 ຫຼັກສູດ, ປະລິນຍາຕີ 119 ຫຼັກສູດ, ຫຼັກສູດຕໍ່ເນື່ອງປະລິນຍາຕີ 44 ຫຼັກສູດ ແລະ ຫຼັກສູດອະນຸປະລິນຍາ 4 ຫຼັກສູດ. (ໃນນັ້ນ ມີຫຼັກສູດນາໆຊາດປະລິນຍາໂທ 1 ຫຼັກສູດ ແລະ ຫຼັກສູດນາໆຊາດ ປະລິນຍາຕີ 2 ຫຼັກສູດ), ມີພະນັກງານ ຄູ-ອາຈານທັງໝົດ 1,546 ທ່ານ, ຍິງ 691 ທ່ານ, ພະນັກງານ​ບໍລິຫານ: 268 ທ່ານ, ຍິງ 167 ທ່ານ ແລະອາຈານ​ສອນ 1,278 ທ່ານ, ຍິງ 524 ທ່ານ. ດ້ານ ວຸດທິການສຶກສາ ປະລິນຍາ​ເອກ: ມີ: 205 ທ່ານ, ຍິງ 47 ທ່ານ, ປະລິນຍາ​ໂທ:    962 ທ່ານ, ຍິງ 452 ທ່ານ, ເໜືອປະລິນຍາຕີ:  02 ທ່ານ,   ຍິງ 0 ທ່ານ, ປະລິນຍາຕີ: 399 ທ່ານ, ຍິງ 246 ທ່ານ ແລະອະນຸປະລິນຍາ 40 ທ່ານ, ຍິງ 30 ທ່ານ. ດ້ານວິທະຍາ​ນາມມະຍົດ ມີ ສາດສະດາຈານ 05 ທ່ານ,  ຍິງ 01 ທ່ານ, ຮອງສາດສະດາຈານ  79 ທ່ານ, ຍິງ 14 ທ່ານ, ອາຈານ 341 ທ່ານ, ຍິງ 133 ທ່ານ​ ແລະຜູ້​ຊ່ວຍ​ອາຈານ      322 ທ່ານ, ຍິງ 167 ທ່ານ.

          ເພື່ອເຮັດໃຫ້ວິໄສທັດ ແລະ ພາລະກິດ ດັ່ງກ່າວປະກົດຜົນເປັນຈິງ  ມຊ ຍັງໄດ້ວາງຍຸດທະສາດ ຈະແຈ້ງ ກ່ຽວກັບວຽກງານການຄົ້ນຄວ້າວິທະຍາສາດ ແລະ ການບໍລິການວິຊາການ ເພື່ອໃຫ້ແທດເໝາະກັບ ຈຸດພິເສດ ຂອງ ບ້ານເຮົາ ແລະ ໝູນໃຊ້ແນວທາງນະໂຍບາຍຂອງພັກ-ລັດຖະບານ ແລະ ທ່າອ່ຽງຂອງສາກົນ ເພື່ອເປັນແນວທາງໃນດຳເນີນການຄົ້ນຄວ້າວິທະຍາສາດ ດັ່ງນີ້: 1. ລົງທຶນຢ່າງມີຈຸດສຸມໃສ່ການຄົ້ນຄວ້າ, ບໍລິຫານ, ຕິດຕາມ, ກວດກາ ແລະ ປະເມີນຢ່າງເປັນລະບົບ, ເພື່ອຮັບປະກັນວ່າ ມຊ ສາມາດຕອບສະໜອງ ແລະ ຮັກສາມາດຕະຖານ ແລະ ຄຸນນະພາບການສຶກສາ, ການຄົ້ນຄວ້າວິທະຍາສາດ ແລະ ການບໍລິການວິຊາການທີ່ ສາມາດແຂ່ງຂັນໄດ້ກັບລະດັບສາກົນ; 2.ຈະຈັດຕັ້ງສະພາວິທະຍາສາດຂະແໜງການ, ຈັດຕັ້ງເປັນກຸ່ມຄົ້ນຄວ້າ ສູນຄົ້ນຄວ້າ, ສະມາຄົມ, ຕາມລາຍວິຊາ ແລະ ຫົວຂໍ້ຕ່າງໆ ເພື່ອດໍາເນີນການຄົ້ນຄວ້າວິທະຍາສາດຢ່າງມີຈຸດສຸມ (Focus) ແລະ ມີລັກສະນະແຂ່ງຂັນ; 3. ຝຶກອົບຮົມທິດສະດີ ແລະ ຕິດພັນການໃຫ້ທຶນໃນການຈັດຕັ້ງການຄົ້ນຄວ້າຕົວຈິງ, ເພື່ອສ້າງນັກຄົ້ນຄວ້າທີ່ມີຄວາມຮູ້ອັນເລິກເຊິ່ງ ສາມາດເປັນທີ່ປຶກສາ ແລະ ໃຫ້ການບໍລິການວິຊາການ, ເພື່ອເຜີຍແຜ່ ແລະນຳໃຊ້ຜົນການຄົ້ນຄວ້າເຂົ້າໄປແກ້ໄຂບັນຫາຂອງຊຸມຊົນ ແລະສັງຄົມໄດ້; 4.ຮ່ວມມືກັບວິທະຍາໄລ, ມະຫາວິທະຍາໄລຕ່າງປະເທດ, ບໍລິສັດ ຫຼື ອຸດສາຫະກຳຕ່າງປະເທດ, ເພື່ອຄົ້ນຄວ້າວິທະຍາ

ສາດ ແລະ ສ້າງໃຫ້ ມຊ ກາຍເປັນມະຫາວິທະຍາໄລ ທີ່ຮັບຮູ້ ແລະ ຍອມຮັບຈາກສາກົນ ແລະ ທົ່ວໂລກ;
 ແລະ  5. ສະໜອງການບໍລິການວິຊາການໃຫ້ແກ່ພາກລັດຖະບານ, ເອກະຊົນ ແລະ ອົງການຈັດຕັ້ງສາກົນ ອື່ນໆ(University-Industries Linkage), ເພື່ອຮັກສາສະເຖຍລະພາບດ້ານການເງິນ ແລະ ການກຸ້ມຕົນເອງທາງດ້ານການເງິນເທື່ອລະກ້າວ. ຍ້ອນແນວນັ້ນ,ໃນຊຸມປີຜ່ານມາ ມຊ ຈຶ່ງສາມາດຍາດໄດ້ ຜົນງານອັນໂດດເດັ່ນ ແລະ ປະສົບຜົນສຳເລັດໃນຫຼາຍດ້ານ, ໂດຍສະເພາະແມ່ນຜົນສຳເລັດໃນວຽກງານການຄົ້ນຄວ້າວິທະຍາສາດ, ຮັບວາລະສານລົງໃນລະບົບອອນລາຍ ວາລະສານ ມຊ ຈໍານວນຫຼາຍກວ່າ 500 ສະບັບ, ອະນຸມັດທຶນຄົ້ນຄວ້າປະຈໍາປີ ຈໍານວນຫຼາຍກວ່າ 70 ຫົວບົດ, ຮັບທຶນຈາກໂຄງການ SSHEP ປະມານ 20 ກວ່າຫົວບົດ, ຮັບທຶນຈາກກອງທຶນວິທະຍາສາດ ແລະ ເຕັກໂນໂລຊີ 20 ກວ່າຫົວບົດ. ນອກຈາກນັ້ນ, ນັກຄົ້ນຄວ້າ ນັກວິຊາການຍັງໄດ້ເຂົ້າຮ່ວມກອງປະຊຸມລະດັບຊາດ ລະດັບສາກົນ ບໍ່ຕໍ່າກວ່າ 200 ຄັ້ງ.

     ທ່ານ ປອ. ສຸລິອຸດົງ ສູນດາລາ ໄດ້ກ່າວຕໍ່ພິທີສໍາຄັນນີ້ວ່າ:  ວິທະຍາສາດແມ່ນມີຄວາມສຳຄັນຫຼາຍຕໍ່ການດຳລົງຊີວິດ, ​ການຜະລິດ, ການພັດທະນາ ແລະ ການຄົງຕົວ-ຂະຫຍາຍຕົວ ຂອງສັງຄົມມະນຸດ. ປະຫວັດສາດໄດ້ຢັ້ງຢືນໃຫ້ພວກເຮົາເຫັນວ່າ ການຂະຫຍາຍຕົວຂອງສັງຄົມມະນຸດ ແມ່ນຕິດພັນກັບການຄົ້ນພົບ ແລະ ການຂະຫຍາຍຕົວ ຂອງວິທະຍາສາດ ແລະ ເຕັກໂນໂລຊີ ຊຶ່ງມັນເປັນໝາກຜົນໂດຍລວມ ຈາກການອອກແຮງງານຂອງມະນຸດ; ມີຫລາຍຄົນອາດຈະໃຫ້ຄຳນິຍາມ ກ່ຽວກັບວິທະຍາສາດ ທີ່ມີທັງຄືກັນ ແລະ ແຕກຕ່າງກັນ ແຕ່ສັງລວມແລ້ວ ວິທະຍາສາດ ມັນແມ່ນ “ເຫດ ແລະ ຜົນ, ຄວາມຈິງ ແລະ ພາວະວິໄສ” ວິທະຍາສາດມັນແມ່ນເລື່ອງກົດເກນ, ມັນແມ່ນເລື່ອງຂອງລະບົບ ແລະ ຕັກກະ; ສະນັ້ນ, ການນຳໃຊ້ວິທະຍາສາດ ມັນຈຶ່ງເປັນເລື່ອງການປະຕິບັດຕາມກົດເກນ ຢ່າງເປັນລະບົບ ແລະ ໄປຕາມຕັກກະຂອງມັນ ຊຶ່ງທຸກຄົນສາມາດນໍາໃຊ້ວິທະຍາສາດ ເຂົ້າໃນການດຳລົງຊີວິດ, ແກ້ໄຂບັນຫາທາງທຳມະຊາດ ແລະ ສັງຄົມ ແລະ ນຳໃຊ້ເຂົ້າໃນການຜະລິດ ແລະ ການພັດທະນາໃຫ້ເກີດຜົນປະໂຫຍດສູງສຸດໄດ້.  ຂະນະດຽວກັນ ທ່ານຍັງຮຽກຮ້ອງໃຫ້ ມຊ  ຄື: 1. ຂໍໃຫ້ພວກເຮົາທຸກຄົນ ຈົ່ງໄດ້ຄົ້ນຄິດ ແລະ ກະທຳຕາມຫຼັກວິທະຍາສາດ, ນຳໃຊ້ກົດເກນທາງວິທະຍາ ສາດ ເຂົ້າໃນການແກ້ໄຂບັນຫາ, ການຜະລິດ, ການດຳລົງຊີວິດ ແລະ ໃນການພັດທະນາ ຢູ່ໃນທຸກການ ເຄື່ອນໄຫວຂອງຕົນ, ບໍ່ຝືນກົດເກນທາງທຳມະຊາດ ແລະ ກົດເກນທາງສັງຄົມ; 2.ຂໍໃຫ້ພວກເຮົາໄດ້ພ້ອມກັນສ້າງຄວາມເຂັ້ມແຂງໃຫ້ ວິທະຍາສາດ ແລະ ເຕັກໂນໂລຊີ ຂອງປະເທດພວກເຮົາດ້ວຍການ; (1) ເສີມຂະຫຍາຍຄວາມຮູ້-ພູມປັນຍາ ດ້ານວິທະຍາສາດ ແລະ ເຕັກໂນໂລຊີຂອງບັນພະບູລຸດລາວບັນດາເຜົ່າ ໃຫ້ໄດ້ຮັບການຮັກສາ, ຟື້ນຟູ, ພັດທະນາຕໍ່ຍອດ ແລະ ສາມາດນຳໃຊ້ເຂົ້າໃນການແກ້ໄຂ ບັນຫາການດໍາລົງຊີວິດ ແລະ ຄວາມຮຽກຮ້ອງຕ້ອງການໃນການພັດທະນາໃນປັດຈຸບັນ ແລະ ອະນາ ຄົດໄດ້;  (2) ພ້ອມກັນສ້າງນັກວິທະຍາສາດ ແລະ ບຸກຄົນເຮັດວຽກງານວິທະຍາສາດ ໃຫ້ຫລາຍຂຶ້ຶນ ດ້ວຍການສົ່ງເສີມໃຫ້ລູກຫຼານພວກເຮົາຮັກມັກໃນການຮຽນ, ຮັກມັກໃນການຄົ້ນຄວ້າ, ສ້າງສັງຄົມພວກເຮົາເປັນສັງຄົມແຫ່ງການຮຽນຮູ້ ແລະ ຄົ້ນຄວ້າ; (3) ຂໍໃຫ້ນັກຄົ້ນຄວ້າ, ນັກຮຽນຮູ້ປັນຍາຊົນ ໂດຍສະເພາະນັກຄົ້ນຄວ້າທົ່ວປະເທດ ຂອງພວກເຮົາ ຈົ່ງໄດ້ເສີມຂະຫຍາຍຄວາມເປັນເຈົ້າການ ແລະ ນຳໜ້າພາທາງ ໃນການຄົ້ນຄວ້າວິທະຍາສາດ ແລະ ເຕັກໂນໂລຊີ ແລະ ການສ້າງນະວັດຕະກຳ; ຖ່າຍທອດຄວາມຮູ້ ແລະ ສ້າງຄົນຮຸ້ນໜຸ່ມ ໃຫ້ກາຍເປັນນັກວິທະຍາສາດ ແລະ ຜູ້ເຮັດວຽກງານວິທະຍາສາດ ໃຫ້ນັບມື້ນັບຫຼາຍຂຶ້ນ; (4) ປັບປຸງສະຖານການຄົ້ນຄວ້າທີ່ມີໃຫ້ເຂັ້ມແຂງຂຶ້ນ; ສ້າງຕັ້ງສະຖານການຄົ້ນຄວ້າໃໝ່ ທີ່ເຫັນວ່າຕອບສະໜອງຄວາມຮຽກຮ້ອງຕ້ອງການໃນສະເພາະໜ້າ ແລະ ຍາວນານໄດ້; (5) ນໍາໃຊ້ທຶນຮອນເຂົ້າໃນວຽກງານວິທະຍາສາດ ແລະ ເຕັກໂນໂລຊີ ຢ່າງສົມເຫດສົມຜົນ ແລະ ພ້ອມດຽວກັນນັ້ນ ກໍສ້າງນະໂຍບາຍ ແລະ ນິຕິກຳ ເພື່ອສົ່ງເສີມການສ້າງ ແລະ ນຳໃຊ້ບຸກຄະລາກອນທາງວິທະຍາສາດ ແລະ ເຕັກໂນໂລຊີ ກໍຄືການສ້າງສະພາບແວດລ້ອມ ທີ່ເອື້ອອຳນວຍໃຫ້ແກ່ການພັດທະນາບັນດາວຽກງານ ດັ່ງກ່າວ; 3. ຮຽກຮ້ອງໃຫ້ບັນດານັກວິທະຍາສາດ, ນັກຄົ້ນຄວ້າ, ນັກຮຽນຮູ້ ແລະ ປັນຍາຊົນທຸກຖ້ວນ ໜ້າຈົ່ງໄດ້ມີຄວາມຮັບຜິດຊອບຫຼາຍຂຶ້ນ, ຫ້າວຫັນຫຼາຍຂຶ້ນ ແລະ ເສຍສະຫຼະຫຼາຍຂຶ້ນໃນການປະກອບສ່ວນ ເຮັດການຄົ້ນຄວ້າເພື່ອແກ້ໄຂບັນຫາ ແລະ ນະວັດຕະກຳໃໝ່ ໃຫ້ແກ່ປະເທດຊາດ ໂດຍສະເພາະແມ່ນການປະຕິບັດແນວທາງວ່າດ້ວຍ ການສ້າງເສດຖະກິດ ເອກະລາດ ເປັນເຈົ້າຕົນເອງ; ການຜະລິດເພື່ອທົດແທນການນຳເຂົ້າ; ການແກ້ໄຂບັນຫາທາງດ້ານເສດຖະກິດ-ການເງິນ ແລະ ບັນຫາທາງສັງຄົມ ເປັນຕົ້ນ; 4. ຮຽກຮ້ອງໃຫ້ທົ່ວສັງຄົມ ຈົ່ງໄດ້ນຳເອົາ “ນໍ້າໃຈວັນວິທະຍາສາດແຫ່ງຊາດ” ຕິດພັນກັບທຸກກິດຈະກໍາຂອງຕົນ ເພື່ອເຮັດໃຫ້ສັງຄົມພວກເຮົາ ເປັນສັງຄົມແຫ່ງການຮຽນຮູ້ ແລະ ຄົ້ນຄວ້າ; ເປັນສັງຄົມທີ່ມີວິທະຍາສາດ, ເຕັກໂນໂລຊີ ແລະ ນະວັດຕະກຳ ຂະຫຍາຍຕົວ ໃນອະນາຄົດ.

      ງານວາງສະແດງຜະລິດຕະພັນ ແລະຈໍາໜ່າຍສິນຄ້າ ແລະສະເຫຼີມ-ສະຫຼອງວັນສ້າງຕັ້ງ ມຊ ຄົບຮອບ 28 ປີ ທີ່ຈັດຂຶ້ນໃນຄັ້ງນີ້, ມີຫຼາຍພາກສ່ວນເຂົ້າຮ່ວມໃນການວາງສະແດງ ແລະຈໍາໜ່າຍສິນຄ້າ ເຊິ່ງປະກອບມີ: ພາກສ່ວນລັດ 09 ບູດ, ມຊ 15 ບູດ, ບໍລິສັດເອກະຊົນ 49 ບູດ ແລະຮ້ານຄ້າຕ່າງໆ 15 ບູດ, ລວມທັງໝົດ 115 ບູດ.

ພາບບັນຍາກາດ