ໃນຕອນບ່າຍວັນທີ 15 ພຶດສະພາ 2024ນີ້, ໂຮງຮຽນພອນສະຫວັນ ແລະຊົນເຜົ່າ ກຽມມະຫາວິທະຍາໄລ (ຮພຊ) ມະຫາວິທະຍາໄລແຫ່ງຊາດ(ມຊ) ໄດ້ຈັດພິທີສະຫຼຸບຜົນການສອບເສັງນັກຮຽນເກັ່ງປະຈໍາສົກສຶກສາ 2023-2024 ຂຶ້ນທີ່ສະໂມສອນ ຮພຊ ໂດຍການເປັນປະທານຮ່ວມ ຂອງທ່ານ ຮສ. ປອ. ຄໍາພຸດ ພົມມະສອນ ຜູ້ອໍານວຍການ ຮພຊ, ທ່ານ ນາງ ລີປາເອຍ ບົວປາວ ຮອງຫົວໜ້າພະແນກສຶກສາ ແລະກີລານະຄອນຫຼວງວຽງຈັນ, ທ່ານ ຄໍາບູ ບຸນເຮືອງ ຮອງຫົວໜ້າພະແນກສຶກສາ ແລະກີລາເມືອງໄຊທານີ, ມີບັນດາທ່ານແຂກທີ່ຖືກເຊີນ, ບັນດາພະນັກງານ, ຄູ-ອາຈານ, ພໍ່ແມ່ນັກຮຽນ ພ້ອມດ້ວຍນ້ອງນັກຮຽນເຂົ້າຮ່ວມຢ່າງພ້ອມພຽງ.
ໃນພິທີ ຮສ. ປອ. ຄໍາພຸດ ພົມມະສອນ ໄດ້ຜ່ານບົດສະຫຼຸບໂຄງການສອນບໍາລຸງນັກຮຽນເກັ່ງ ສົກສຶກສາ 2023-2024 ເຊິ່ງທ່ານລາຍງານໃຫ້ຮູ້ວ່າ ໂຄງການສອບເສັງນັກຮຽນເກັ່ງ ຮພຊ ເປັນໂຄງການຕົ້ນຕໍຂອງໂຮງຮຽນ ເພື່ອບໍາລຸງນັກຮຽນເກັ່ງຂັ້ນ ມ4 ແລະ ມ7 ຂອງໂຮງຮຽນຜູ້ທີ່ມີພອນສະຫວັນສະເພາະດ້ານ ເຂົ້າຮ່ວມການສອບເສັງນັກຮຽນເກັ່ງຂັ້ນ ໂຮງຮຽນ, ຂັ້ນເມືອງໄຊທານີ, ຂັ້ນນະຄອນຫຼວງ ແລະລະດັບຊາດ ໃນ 4 ວິຊາຫຼັກຄື: ຄະນິດສາດ, ພາສາລາວ-ວັນນະຄະດີ, ຟີຊິກສາດ ແລະເຄມີສາດ ລວມທັງຊັ້ນ ມ 4 ແລະ ມ 7 ທັງໝົດ 8 ວິຊາ.
ການສອບເສັງລະດັບຂັ້ນເມືອງ ໄຊທານີ ໃນວັນທີ 9 ກຸມພາ 2024 ຮພຊ ໄດ້ສົ່ງນັກຮຽນເຂົ້າສອບເສັງຈໍໍານວນ 39 ນ້ອງ, ຍິງ 24 ນ້ອງ. ຜົນການສອບເສັງ ມີຈໍານວນ 36 ນ້ອງໄດ້ຮັບລາງວັນຄື: ອັນດັບທີ 1 ຈໍານວນ 6 ນ້ອງ ຍິງ 4 ນ້ອງ, ອັນດັບທີ 2 ຈໍານວນ 8 ນ້ອງ, ຍິງ 5 ນ້ອງ, ອັນດັບທີ 3 ຈໍານວນ 7 ນ້ອງ ຍິງ 5 ນ້ອງ ແລະໄດ້ຮັບລາງວັນຊົມເຊີຍ 15 ນ້ອງ, ຍິງ 9 ນ້ອງ.
ການສອບເສັງຂັ້ນນະຄອນຫຼວງວຽງຈັນ ໃນວັນທີ 1 ມີນາ 2024 ຮພຊ ສົ່ງນັກຮຽນເຂົ້າຮ່ວມ 36 ນ້ອງ, ຍິງ 23 ນ້ອງ. ຜົນການສອບເສັງ ມີຈໍານວນ 14 ນ້ອງ ສາມາດຍາດໄດ້ລາງວັນຄື: ອັນດັບທີ 1 ຈໍານວນ 3 ນ້ອງ, ຍິງ 1 ນ້ອງ. ອັນດັບ 2 ຈໍານວນ 2 ນ້ອງ, ຍິງ 1 ນ້ອງ. ອັນດັບທີ 3 ຈໍານວນ 1 ນ້ອງ ແລະໄດ້ຮັບລາງວັນຊົມເຊີຍ 8 ນ້ອງ, ຍິງ 8 ນ້ອງ.
ການສອບເສັງລະດັບຊາດ ໃນວັນທີ 2 ເມສາ 2024 ຮພຊ ໄດ້ສົ່ງນັກຮຽນເຂົ້າຮ່ວມການສອບເສັງລະດັບຊາດຈໍານວນ 3 ນ້ອງ, ຍິງ 1 ນ້ອງ. ຜົນການສອບເສັງສາມາດຍາດໄດ້ 2 ຫຼຽນຄໍາ ແລະ 1 ຫຼຽນເງິນຄື: ນາງ ທິດາວັນໄຊຍະສຸກ ສອບເສັງວິຊາ ເຄມີສາດ ຂັ້ນ ມ4 ໄດ້ທີ 1 ຂັ້ນເມືອງ, ທີ1 ຂັ້ນນະຄອນຫຼວງ ແລະໄດ້ທີ 1 ຂັ້ນປະເທດ ໄດ້ຮັບຫຼຽນຄໍາ, ທ້າວ ອານຸພາບ ລາດຊະວົງ ສອບເສັງວິຊາ ເຄມີສາດ ມ7 ໄດ້ທີ 1 ຂັ້ນເມືອງ, ໄດ້ທີ 1 ຂັ້ນນະຄອນຫຼວງ ແລະໄດ້ທີ 1 ຂັ້ນປະເທດ ໄດ້ຮັບຫຼຽນຄໍາ ແລະທ້າວທະວີຊັບ ຈັນທະສັກ ສອບເສັງວິຊາພາສາລາວ-ວັນນະຄະດີ ມ7 ໄດ້ທີ 2 ຂັ້ນເມືອງ, ໄດ້ທີ 1 ຂັ້ນນະຄອນຫຼວງ ແລະໄດ້ທີ 2 ຂັ້ນປະເທດ ໄດ້ຮັບຫຼຽນເງິນ.
ໃນພິທີໄດ້ມີການມອບ-ຮັບໃບຍ້ອງຍໍຂັ້ນ ຮພຊ ໃຫ້ຄູສອນບໍາລຸງນັກຮຽນເກັງຂັ້ນເມືອງ ແລະແຂວງ ຈໍານວນ 11 ທ່ານ, ຍິງ 2 ທ່ານ ແລະນ້ອງນັກຮຽນເກັ່ງຂັ້ນເມືອງ ແລະແຂວງ ຈໍານວນ 36 ນ້ອງ ຍິງ 23 ນ້ອງ, ມອບໃບຍ້ອງຍໍຂັ້ນ ມຊ ໃຫ້ຄູສອນບໍາລຸງນັກເກັ່ງລະດັບຊາດ ຈໍານວນ 6 ທ່ານ ຍິງ 4 ທ່ານ ແລະນັກຮຽນເກັງລະດັບຊາດ ຈໍານວນ 3 ນ້ອງ ຍິງ 1 ນ້ອງ.