ໃນວັນທີ 13 ມິຖຸນາ 2024 ຜ່ານມາ, ທ່ານ ຮສ.ປອ. ໄກສອນ ເພັງໂສພາ ຄະນະບໍດີ ຄະນະວິທະຍາສາດສິ່ງແວດລ້ອມ (ຄສວ) ມະຫາວິທະຍາໄລແຫ່ງຊາດ(ມຊ) ພ້ອມດ້ວຍຄະນະ ໄດ້ເຂົ້າພົບປະ ທ່ານ ທະນົງໄຊ ຄຸດໄພທູນ ກຳມະການພັກນະຄອນຫຼວງວຽງຈັນ, ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫລວງວຽງຈັນ ພ້ອມດ້ວຍຄະນະ ທີ່ຫ້ອງການຄຸ້ມຄອງເຂດເສດຖະກິດພິເສດນະຄອນຫລວງວຽງຈັນ (ທີ່ເຂດເສດຖະກິດບຶງທາດຫລວງ ເມືອງໄຊເສດຖາ ນະຄອນຫລວງວຽງຈັນ)
ຈຸດປະສົງແມ່ນປຶກສາຫາລື ຄວາມເປັນໄປໄດ້ໃນການຮ່ວມມື ພັດທະນາຮ່ວມກັນໃນຫຼາຍດ້ານເຊັ່ນ: ດ້ານເຕັກນິກ-ວິຊາການ ກ່ຽວກັບການຈັດການສິ່່ງແວດລ້ອມ ໃນເຂດເສດຖະກິດພິເສດ ຂອງນະຄອນຫລວງວຽງຈັນ (ການບຳບັດນ້ຳເສຍ, ມົນລະພິດທາງອາກາດ, ມົນລະພິດທາງສຽງ, ການຈັດການສິ່ງເສດເຫຼືອຈາກໂຮງງານ ແລະອື່ນໆ ທີ່ຕິດພັນກັບວຽກງານສິ່ງແວດລ້ອມ); ດ້ານການສ້າງຄວາມເຂັ້ມແຂງໃຫ້ແກ່ຂະແໜງສິ່ງແວດລ້ອມ ຂອງຄະນະຄຸ້ມຄອງເສດຖະກິດພິເສດ ນະຄອນຫຼວງວຽງຈັນ ໂດຍການຈັດຝຶກອົບຮົມໄລຍະສັ້ນ, ໄລຍະຍາວ ການສົ່ງພະນັກງານມາຍົກລະດັບ ແລະ ການສົ່ງຊ່ຽວຊານ ຄສວ ເພື່ອໃຫ້ຄຳເເນະນຳໃນການແກ້ໄຂບັນຫາສິ່ງແວດລ້ອມ; ທັງເປັນການສ້າງໂອກາດໃຫ້ ນັກສຶກສາ ຄະນະວິທະຍາສາດສິ່ງແວດລ້ອມ ໄດ້ມີວຽກເຮັດງານທໍາ, ມີລາຍຮັບໃນໄລຍະການຮຽນ, ສ້າງທັກສະ ແລະປະສົບການ ໃຫ້ແກ່ນັກສຶກສາ ໄດ້ມີວຽກເຮັດງານທຳພາຍຫຼັງຈົບ; ດ້ານການຮ່ວມໃນການດຶງດູດ ເອົາພະນັກງານ ພາຍໃນໂຮງງານ ທີ່ມີລະດັບການສຶກສາຈົບ ມ7 ຂຶ້ນໄປ ມາຍົກລະດັບດ້ານວິຊາສະເພາະ ຢູ່ ຄະນະວິທະຍາສາດສິ່ງແວດລ້ອມ.
ພ້ອມນັ້ນ ທັງສອງຟ່າຍ ເຫັນດີໃຫ້ມີການເຊັນ MOU, MOA ຮ່ວມກັນ ເພື່ອເປັນຈຸດລິເລີ່ມໃນການຮ່ວມມືໃຫ້ປະກົດຜົນເປັນຈິງແນໃສ່ເຮັດໃຫ້ການຮ່ວມມືມີບາດກ້າວໄປສູ່ການພັດທະນາປະເທດ ຕາມທິດຍືນຍົງ ແລະ ສີຂຽວ ທີ່ພັກລັດໄດ້ວາງໄວ້.