ໃນວັນທີ 12 ສິງຫາ 2024 ນີ້, ສະຖາບັນຂົງຈື (ສຂຈ) ມະຫາວິທະຍາໄລແຫ່ງຊາດ (ມຊ) ໄດ້ຈັດການສອບເສັງຄັດເລືອກເອົານັກສຶກສາ ສາຂາຄູພາສາຈີນ ທີ່ສະຖາບັນດັ່ງກ່າວ, ໂດຍການເຂົ້າຮ່ວມຂອງທ່ານ ຮສ. ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມຊ ພ້ອມດ້ວຍຄະນະ, ມີທ່ານ ຫຼົວໝິງ ຜູ້ອໍານວຍການສະຖາບັນຂົງຈື ຝ່າຍຈີນ, ມີບັນດາຮອງຜູ້ອຳນວຍການສະຖາບັນຂົງຈື, ພະນັກງານ, ຄູ-ອາຈານ ທີ່ກ່ຽວຂ້ອງເຂົ້າຮ່ວມ.
ສົກສຶກສາ 2024-2025 ນີ້, ສະຖາບັນຂົງຈື ໄດ້ປະກາດຮັບນັກສຶກສາລົງທະບຽນສອບເສັງເລີ່ມແຕ່ວັນທີ 05 ກໍລະກົດ ເຖິງ 08 ສິງຫາ 2024, ເຊິ່ງມີນັກສຶກສາທີ່ມີພື້ນຖານພາສາຈີນມາລົງທະບຽນທັງໝົດ 437 ຄົນ, ຍິງ 196 ຄົນ, ການສອບເສັງມີທັງໝົດ 2 ພາກຄື: ພາກສອບເສັງຂຽນ ແລະ ພາກສໍາພາດ; ພາກສອບເສັງຂຽນ: ແມ່ນໄດ້ຈັດຂຶ້ນໃນຕອນເຊົ້າ ເວລາ 8:30-10:00 ໂມງ ໂດຍສອບເສັງ ວິຊາຄະນິດສາດ + ພາສາລາວ + ພູມສາດ + ປະຫວັດສາດ, ແລະສອບເສັງ 10:30-12:00 ໂມງ ສອບເສັງ ວິຊາພາສາຈີນ+ພາສາອັງກິດ. ເຊິ່ງມີນັກສຶກສາເຂົ້າສອບເສັງພາກຂຽນ ຈໍານວນ 299 ຄົນ, ລົງທະບຽນແລ້ວ ບໍ່ມາສອບເສັງ 138 ຄົນ, ຜູ້ເຂົ້າສອບເສັງກວມເອົາ 68,442% ແລະຕອນບ່າຍ: ສອບເສັງພາກສໍາພາດ ເລີ່ມເວລາ 13:30 ໂມງ ເຖິງ 17:00ໂມງ; ເຊິ່ງມີນັກສຶກສາເຂົ້າສໍາພາດທັງໝົດ 288 ຄົນ, ແລະຂາດສໍາພາດ 144 ຄົນ ຜູ້ເຂົ້າສໍາພາດກວມເອົາຈໍານວນ 65.90% ແລະສົກສຶກສານີ້, ສະຖາບັນຂົງຈື ສາມາດຮັບນັກສຶກສາເຂົ້າຮຽນໄດ້ ປະມານ 105 ຄົນ ແລະຈະໄດ້ມີການປະກາດຜົນການສອບເສັງໃນຕົ້ນເດືອນກັນຍາທີ່ຈະມາເຖິງນີ້.