ຄະນະວິທະຍາສາດການກີລາ-ກາຍະກຳ (ຄວກ) ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີສະຫຼຸບການຮຽນ-ການສອນ ສົກສຶກສາ 2020-2024, ເປີດສົກຮຽນໃໝ່ 2024-2025 ແລະ ມອບ-ຮັບໃບປະກາສະນີຍະບັດໃຫ້ຜູ້ສໍາເລັດການສຶກສາ ປະຈໍາສົກສຶກສາ 2023-2024 ຂຶ້ນໃນວັນທີ 24 ຕຸລາ 2024ນີ້, ທີ່ຫ້ອງປະຊຸມສະໂມສອນ ມຊ ໂດຍການເຂົ້າຮ່ວມ ແລະ ມອບປະກາສະນີຍະບັດ ຂອງທ່ານ ຮສ. ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມຊ, ມີຮອງຄະນະບໍດີ ຄວກ, ແຂກຖືກເຊີນ, ພະນັກງານ, ຄູ-ອາຈານ, ນັກສຶກສາ ແລະຜູ້ປົກຄອງນັກສຶກສາເຂົ້າຮ່ວມ.
ໃນພິທີທ່ານ ນາງ ຈັນທະລາດ ພົມພິພັກ ຮອງຄະນະບໍດີ ຄວກ ໄດ້ຂຶ້ນຜ່ານບົດສະຫຼຸບປະຈຳຊຸດຮຽນ 2020-2024 ແລະແຜນການປະຈຳສົກສຶກສາ 2024-2025 ເຊິ່ງທ່ານໄດ້ກ່າວບາງຕອນວ່າ: ການຈັດຕັ້ງການຮຽນ-ການສອນໃນຊຸດຮຽນ 2020-2024 ປະກອບມີ 7 ສາຂາຄື: ສາຂາພະລະສຶກສາ, ສາຂາຄູເຝິກບານເຕະ, ສາຂາຄູເຝິກບານສົ່ງ, ສາຂາຄູເຝິກແລ່ນ-ລານ, ສາຂາ ບໍລິຫານການສຶກສາ, ສາຂາວິທະຍາສາດການກີລາ ແລະຕໍ່ເນື່ອງປະລິນຍາສາຂາຄູພາລະສຶກສາ ມີນັກສຶກສາທັງໝົດ 112 ຄົນ, ຍິງ 26 ຄົນ; ມີນັກສຶກສາສຳເລັດການສຶກສາສົກສຶກສາ 2023-2024 ທັງໝົດ 40 ຄົນ, ຍິງ 10 ຄົນ. ເຊິ່ງມີນັກສຶກສາ ສາຂາ ຄູພາລະສຶກສາ 19 ຄົນ, ຍິງ 6 ຄົນ; ສາຂາ ຄູເຝິກບານເຕະ 4 ຄົນ; ຄູເຝິກບານສົ່ງ 2 ຄົນ; ຄູເຝິກແລ່ນ-ລານ 1 ຄົນ; ສາຂາບໍລິຫານການກີລາ 5 ຄົນ, ຍິງ 1 ຄົນ; ສາຂາວິທະຍາສາດການກີລາ 4 ຄົນ, ຍິງ 2 ຄົນ. ໃນນີ້ມີນັກສຶກສາທີ່ຮັບປະກາສະນີຍະບັດກຽດນິຍົມ(ໃບປະກາດແດງ) ຈໍານວນ 4 ຄົນ, ນັກສຶກສາໄດ້ຮັບການຍ້ອງຍໍດີເດັ່ນຮອບດ້ານຈຳນວນ 26 ຄົນ, ຍິງ 8 ຄົນ ແລະໄດ້ຮັບການຍ້ອງຍໍດ້ານກິດຈະກຳຈຳນວນ 14 ຄົນ, ຍິງ 2 ຄົນ.
ໃນຊຸດຮຽນ 2020-2024 ນັກສຶກສາ ຄວກ. ມຊ. ໄດ້ລົງເຝິກຫັດວິຊາຊີບຢູ່ 2 ແຂວງຄື: 04 ໂຮງຮຽນ ເມືອງ ທ່າພະບາດ ແຂວງ ບໍລິຄໍາໄຊ ແລະ 08 ພາກສ່ວນ ໃນນະຄອນຫຼວງວຽງຈັນ, ໄດ້ເຂົ້າຮ່ວມເປັນກຳມະການຕັດສິນການແຂ່ງຂັນຕ່າງໆເຊັ່ນ, ບານເຕະ , ບານສົ່ງ, ກະຕໍ້, ແລ່ນລານ ຈຳນວນ 15 ຄັ້ງ 274 ຄົນ, ຍິງ 98 ຄົນ, ເຂົ້າຮ່ວມໂຄງການເຝິກອົບຮົມກຳມະການຕັດສິນກີລາບານເຕະ, ບານບ້ວງ, ດອກປີກໄກ່ ຈຳນວນ 04 ຄັ້ງ, ເຂົ້າຮ່ວມງານແຂ່ງຂັນກີລາຊີເກມຄັ້ງທີ 31 ທີ່ປະເທດໄທ ແລະຄັ້ງທີ 32 ທີ່ປະເທດກຳປູເຈຍ, ງານແຂ່ງຂັນກີລາມະຫາວິທະຍາໄລອາຊຽນຄັ້ງທີ 22 ທີ່ປະເທດອິນໂດເນເຊຍ, ງານແຂ່ງຂັນອາຊຽນເກມທີ່ປະເທດຈີນ; ງານແຂ່ງຂັນກີລາມະຫາວິທະຍາໄລລາວ ຄັ້ງທີ 2 ເປັນຕົ້ນ. ສຳລັບທິດທາງແຜນການໃນຕໍ່ໜ້າ ຄວກ ຈະສືບຕໍ່ຈັດຕັ້ງປະຕິບັດການຮຽນ-ການສອນໃຫ້ໄປຕາມປະຕິທິນການຮຽນ-ການສອນຂອງ ມຊ ກຳນົດໄວ້, ຈັດສົ່ງນັກສຶກສາເຂົ້າຮ່ວມກິດຈະກຳຕ່າງໆທັງພາຍໃນ ແລະຕ່າງປະເທດ.
ໃນຕອນທ້າຍພິທີ ຍັງໄດ້ຮັບຟັງການໂອ້ລົມຂອງ ທ່ານ ຮສ. ປອ. ເດຊານຸລາດ ແສນດວງເດດ ໂດຍທ່ານໄດ້ກ່າວເນັ້ນໃຫ້ນັກສຶກສາ ນຳໃຊ້ຄວາມຮູ້-ຄວາມສາມາດຂອງຕົນເອງທີ່ໄດ້ຮໍ່າຮຽນໄປໜູນໃຊ້ເຂົ້າໃນການປະກອບອາຊີບໃຫ້ມີປະສິດທິພາບ ແລະປະສິດທິຜົນ ພ້ອມທັງຊຸກຍູ້ໃຫ້ຄູ-ອາຈານ ແລະອະດີດນັກສຶກສາ ເປັນກະບອກສຽງເພື່ອໃຫ້ຜູ້ທີ່ມີຄວາມສົນໃຈກ່ຽວກັບກີລາໄດ້ເຂົ້າມາສຶກສາຮໍ່າຮຽນ ໃນ ຄວກ ໃຫ້ຫຼາຍຂຶ້ນ.