ໃນວັນທີ 28 ຕຸລາ 2024 ຜ່ານມາ, ຄະນະວິທະຍາສາດສັງຄົມ (ຄສຄ) ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີສະຫຼູບຊຸດຮຽນ 2020-2024, ສະຫຼຸບສົກສຶກສາ 2023-2024 ແລະເປີດສົກຮຽນໃໝ່ 2024-2025 ທີ່ສະໂມສອນຄະນະເສດຖະສາດ ແລະບໍລິຫານທຸລະກິດ, ໂດຍການເປັນປະທານຂອງທ່ນ ຮສ. ປອ. ເດຊານຸລາດ ແສນດວງເດດ ວ່າການອະທິການບໍດີ ມຊ, ມີທ່ານຮອງຄະນະບໍດີ, ຫົວໜ້າ-ຮອງຫົວໜ້າພາກວິຊາ, ແຂກຖືກເຊີນ, ພະນັກງານ, ຄູ-ອາຈານ, ນັກສຶກສາ ແລະຜູ້ປົກຄອງເຂົ້າຮ່ວມ.
ໃນພິທີ ທ່ານ ຮສ. ປອ. ນາງ ສົມຄິດ ບູລິດຳ ຮັກສາການຄະນະບໍດີ ຄສຄ ກໍໄດ້ຂຶ້ນຜ່ານບົດສະຫຼູບຊຸດຮຽນ 2020-2024, ສະຫຼຸບສົກສຶກສາ 2023-2024 ແລະເປີດສົກຮຽນໃໝ່ 2024-2025 ເຊິ່ງທ່ານໄດ້ໃຫ້ຮູ້ວ່າ: ຄສຄ ປະກອບມີ 5 ພາກວິຊາ ທີ່ເຮັດ ໜ້າທີ່ວິຊາການ ຄື: ພາກວິຊາການເມືອງ ແລະ ບໍລິຫານລັດຖະກິດ, ພາກວິຊາພູມີສາດ ແລະ ສາລະສົນເທດສາດ, ພາກວິຊາປະຫວັດສາດ ແລະ ບູຮານວິທະຍາ, ພາກວິຊາການທ່ອງທ່ຽວ ແລະ ການໂຮງແຮມ ແລະ ພາກວິຊາພາກວິຊາສັງຄົມສົງເຄາະ ແລະ ການພັດທະນາ ແລະ ປະກອບດ້ວຍ 2 ສູນ ຄື ສູນຄົ້ນຄວ້າ ແລະ ຝຶກອົບຮົມດ້ານການປະເມີນຜົນກະທົບຕໍ່ສັງຄົມ ແລະ ການຄຸ້ມຄອງການຈັດສັນຍົກຍ້າຍ (ສູນ RTC) ແລະ ສູນເພດພາວະສຶກສາ; ມີພະນັກງານທັງໝົດ 88 ທ່ານ, ຍິງ 41 ທ່ານ, ທ້າຍສົກສຶກສາຜ່ານມາ ຄສຄ ມີນັກສຶກສາທັງໝົດ 1.294 ຄົນ, ຍິງ 758 ຄົນ ໃນນັ້ນເປັນນັກສຶກສາປະລິນຍາຕີ ມີຈໍານວນທັງໝົດ 1.057 ຄົນ, ຍິງ 662 ຄົນ ໃນນັ້ນມີນັກສຶກສາຕ່າງປະເທດ 11 ຄົນ, ນັກສຶກສາປະລິນຍາໂທ ມີຈຳນວນທັງໝົດ 237 ຄົນ, ຍິງ 96 ຄົນ ແລະ ມີນັກສຶກສາຕ່າງປະເທດ 12 ຄົນ, ຍິງ 3 ຄົນ (ຫວຽດນາມ 9 ຄົນ, ຈີນ 3 ຄົນ), ນັກສຶກສາປະລິນຍາເອກ ມີຈຳນວນທັງໝົດ 11 ຄົນ, ຍິງ 03 ຄົນ. ສຳລັບສົກສຶກສາ2023-2024 ມີຜູ້ສຳເລັດການສຶກສາໃນລະດັບລະລິນຍາຕີມີທັງໝົດ 572 ຄົນ, ຍິງ 317 ຄົນ;
ໃນນີ້ມີນັກສຶກສາ ປະລິນຍາຕີ ໄດ້ຮັບປະກາສະນີຍະບັດກຽດນິຍົມຈໍານວນ 05 ຄົນ, ຍິງ 03 ຄົນ, ນັກສຶກສາປະລິນຍາໂທ 113 ຄົນ, ຍິງ 43 ຄົນ, ໃນໄລຍະຜ່ານມາ ຄສຄ ໄດ້ເອົາໃຈໃສ່ ແລະເຮັດສຳເລັດໃນຫຼາຍວຽກງານເຊັ່ນ: ດ້ານວຽກງານວິຊາການ ນັກສຶກສາສ່ວນຫຼາຍໄດ້ມີຄວາມພະຍາຍາມ ແລະ ຕັ້ງໜ້າເຂົ້າໃນການສຶກສາຄົ້ນຄວ້າຮ່ຳຮຽນ, ຂຶ້ນຫ້ອງຮຽນເປັນປົກກະຕິ ແລະ ປະຕິບັດລະບຽບວິໄນເປັນຢ່າງດີ, ໄດ້ປະຕິບັດພັນທະກ່ຽວກັບການສອນວິຊາລວມ (ວິຊາພື້ນຖານ) ໃຫ້ແກ່ຄະນະວິຊາອື່ນໆພາຍໃນ ມຊ ແລະນອກ ມຊ, ໄດ້ນຳສົ່ງນັກສຶກສາເຂົ້າຮ່ວມຝຶກອົບຮົມໃນຫົວຂໍ້ຕ່າງໆ ທີ່ທາງ ຄສຄ ແລະ ມຊ ຈັດຂຶ້ນໄດ້ 10 ຄັ້ງ ມີນັກສຶກສາເຂົ້າຮ່ວມຈຳນວນ 22 ເທື່ອຄົນ ແລະໄດ້ຈັດປະຖົມນິເທດນັກສຶກສາໃຫ້ແກ່ນັກສຶກສາປີ 1 ມີພະນັກງານ ແລະ ນັກສຶກສາເຂົ້າຈຳນວນ 223 ຄົນ ເປົນຕົ້ນ. ພອ້ມນັ້ນ ໃນພິທີຍັງໄດ້ມີການມອບໃບຍ້ອງຍໍ ຈຳນວນທັງໝົດ 240 ຄົນ, ຍິງ 160 ຄົນ ແບ່ງປະເພດການຍ້ອງຍໍດັ່ງນີ້: ເດັ່ນຮອບດ້ານ: ຈຳນວນ 62 ຄົນ, ຍິງ 40 ຄົນ, ເດັ່ນການຮຽນ: ຈຳນວນ 81 ຄົນ, ຍິງ 57 ຄົນ ແລະເດັ່ນເຄື່ອນໄຫວກິດຈະກໍາ: ຈຳນວນ 97 ຄົນ, ຍິງ 63 ຄົນ.