ເພື່ອເປັນການແລກປຽ່ນວັດທະນະທຳ,ຮຽນຮູ້ເຖິງສະເໜ່ອາຫານພື້ນບ້ານ ແລະ ອາຫານປະຍຸກຂອງສອງຊາດລາວ-ຈີນ, ຈີນ-ລາວສູນຮ່ວມມືແລກປຽ່ນພາສາຈີນ ແລະ ສະຖາບັນຂົງຈື ມະຫາວິທະຍາໄລແຫ່ງຊາດຈຶ່ງໄດ້ຈັດງານເທສະການການແລກປຽ່ນວັດທະນະທຳອາຫານລາວ-ຈີນຂຶ້ນ ພາຍໃຕ້ຫົວຂໍ້ " ອາຫານຄືຊີວິດ ຊີວິດຕ້ອງມີອາຫານ" ໃນຕອນບ່າຍທີ 29 ຕຸລາ 2024 ທີສະໂມສອນສະຖາບັນຂົງຈື, ເປັນກຽດເຂົ້າຮ່ວມໂດຍທ່ານ ຮສ ປອ ເດຊານຸລາດ ແສນດວງເດດ ວ່າການອະທິການບໍດີມະຫາວິທະຍາໄລແຫ່ງຊາດລາວ ແລະ ທ່ານ ຕູ້ສາງຊິ່ງ ຕາງໜ້າສະຖານທູດຈີນປະຈຳລາວ, ມີຜູ້ອຳນວຍການສະຖາບັນຂົງຈືຝ່າຍຈີນ ແລະຮອງອຳນວຍການສະຖາບັນຂົງຈືຝ່າຍລາວ ພ້ອມດ້ວຍຄູອາຈານ, ແຂກທີ່ຖືກເຊີນ ແລະ ນັກສຶກສາເຂົ້າຮ່ວມ
ໃນພິທີທ່ານ ຮສ ປອ ເດຊານຸລາດ ແສນດວງເດດໄດ້ກ່າວວ່າ: ໃນງານເທດສະການອາຫານຄັ້ງນີ້ຈະເຮັດໃຫ້ນັກສຶກສາລາວ-ຈີນ ແລະ ຄູອາຈານພ້ອມດ້ວຍບັນດາແຂກທີ່ເຂົ້າຮ່ວມຈະໄດ້ຮຽນຮູ້ ແລະ ຊີມລົດຊາດອາຫານພື້ນເມືອງຂອງກັນ ແລະ ກັນ ເຊິ່ງເປັນການສົ່ງເສີມການແລກປຽ່ນວັດທະນະທຳອັນດີງາມ ແລະ ປະກອບສ່ວນສຳຄັນໃນການພົວພັນມິດຕະພາບທີ່ເປັນມູນເຊື້ອລະຫວ່າງປະຊາຊົນຂອງສອງຊາດລາວ-ຈີນ ຈີນ-ລາວ.
ພ້ອມນັ້ນ ພາຍໃນງານນອກຈາກຈະໄດ້ເຫັນເຖິງຄວາມຫຼາກຫຼາຍ ແລະ ສີີສັນອາຫານຂອງສອງຊາດລາວ-ຈີນແລ້ວຍັງໄດ້ມີການຫຼີ້ນກິດຈະກຳ ແລະ ແຈກແຖມຂອງທີ່ລະນຶກໃຫ້ກັບຜູ້ທີ່ເຂົ້າຮ່ວມຄັ້ງນີ້ອີກດ້ວຍ.