ໃນວັນທີ 29 ຕຸລາ 2024 ຜ່ານມາ, ຄະນະວິທະຍາສາດສິ່ງແວດລ້ອມ(ຄສວ) ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີສະຫຼູບຊຸດຮຽນ 2020-2024, ສະຫຼຸບສົກສຶກສາ 2023-2024 ແລະເປີດສົກຮຽນໃໝ່ 2024-2025 ທີ່ຫ້ອງປະຊຸມ ຂອງ ຄສວ, ໂດຍການເປັນປະທານຂອງທ່ນ ຮສ.ປອ ເດຊານຸລາດ ແສນດວງເດດ ວ່າການແທນອະທິການບໍດີ ມຊ, ມີທ່ານ ຄະນະບໍດີ, ຮອງຄະນະບໍດີ, ຫົວໜ້າ-ຮອງຫົວໜ້າພາກວິຊາ, ແຂກຖືກເຊີນ, ພະ
ນັກງານ, ຄູ-ອາຈານ, ນັກສຶກສາ ແລະຜູ້ປົກຄອງເຂົ້າຮ່ວມ.
ໃນພິທີ ທ່ານ ຮສ.ປອ ໄກສອນ ເພັງໂສພາ ຄະນະບໍດີ ຄສວ ໄດ້ຂຶ້ນຜ່ານບົດສະຫຼູບຊຸດຮຽນ 2020-2024, ສະຫຼຸບສົກສຶກສາ 2023-2024 ແລະເປີດສົກຮຽນໃໝ່ 2024-2025 ເຊິ່ງທ່ານໄດ້ໃຫ້ຮູ້ວ່າ: ໃນສົກສຶກສາ 2023-2024 ຜ່ານມາ ຄສວ ມີ ອາຈານ ແລະພະນັກງານທັງໝົດ 68 ທ່ານ, ຍິງ 31 ທ່ານ, ປັດຈຸບັນ ມີພະນັກງານທັງໝົດ 66 ທ່ານ, ຍິງ 30 ທ່ານ; ຄູປະຈໍາການ 55 ທ່ານ, ຍິງ 26 ທ່ານ, ພະນັກງານບໍລິຫານ 04 ທ່ານ, ຍິງ 01 ທ່ານ, ກໍາລັງສຶກສາຕໍ່ຢູ່ຕ່າງປະເທດ 04 ທ່ານ, ຍິງ 02 ທ່ານ, ສຶກສາຕໍ່ຢູ່ພາຍໃນປະເທດ 03 ທ່ານ, ຍິງ 01 ທ່ານ; ມີຮອງສາດສະດາຈານ 01 ທ່ານ, ອາຈານ 12 ທ່ານ, ຍິງ 04 ທ່ານ, ຜູ້ຊ່ວຍອາຈານ 20 ທ່ານ, ຍິງ 10 ທ່ານ; ດ້ານວຸດທິການສຶກສາ ປະລິນຍາເອກ 12 ທ່ານ, ຍິງ 04 ທ່ານ. ມີນັກສຶກສາທັງໝົດ 541 ຄົນ, ຍິງ 292 ຄົນ, ໃນນັ້ນ ປະລິນຍາຕີ 469 ຄົນ, ຍິງ 268 ຄົນ, ມີນັກສຶກສາຕ່າງປະເທດ 07 ຄົນ, ຍິງ 02 ຄົນ, ນັກສຶກສາ ປະລິນຍາໂທ 74 ຄົນ, ຍິງ 24 ຄົນ.
ຜົນສໍາເລັດໃນການເຄື່ອນໄຫວວຽກງານ: ດ້ານການເມືອງແນວຄິດ ໄດ້ຊີ້ນໍາໆພາ, ສຶກສາອົບຮົມແນວຄິດ ພະນັກງານ, ຄູ-ອາຈານ ແລະນັກສຶກສາ ໃນຄະນະວທະຍາສາດສິ່ງແວດລ້ອມ ດ້ວຍຫຼາຍຮູບການເຊັ່ນ: ຈັດປະຖົມນິເທດນັກສຶກສາ, ເຜີຍແຜ່ນິຕິກໍາ-ລະບຽບການຕ່າງໆ ຂອງ ມຊ, ປະຊຸມສ່ອງແສງ, ປະຊຸມເຜີຍແຜ່ເອກະສານຕ່າງໆ ເພື່ອໃຫ້ພະນັກງານ, ຄຸ-ອາຈານ ແລະນັກສຶກສາມີຄວາມອຸ່ນອຽນ-ທຸ່ນທ່ຽງ, ມີຄວາມສາມັກຄີ ແລະຫ້າວຫັນຕໍ່ໜ້າທີ່ຄວາມຮັບຜິດຊອບຂອງຕົນ; ນອກນີ້ ກໍຍັງໄດ້ຍົກໃຫ້ເຫັນຜົນງານດ້ານອື່ນໆອີກເຊັ່ນ ດ້ານການຈັດຕັ້ງ ແລະນະໂຍບາຍ, ດ້ານວິຊາການ, ວຽກງານຫ້ອງສະໝຸດ, ການຄົ້ນຄວ້າວິທະຍາສາດ ແລະບໍລິການວິຊາການ, ການສຶກສາຫຼັງປະລິນຍາຕີ, ການຄຸ້ມຄອງນັກສຶກສາ, ການເງິນ ແລະການຄຸ້ມຄອງຊັບສິນ, ການພົວພັນ-ຮ່ວມມື ແລະການປະຕິບັດໂຄງການ , ການພັດທະນາ ຄະນະວິຊາ ແລະວຽກງານສາມອົງການຈັດຕັ້ງ ມະຫາຊົນເປັນຕົ້ນ.
ໃນສົກສຶກສາ 2023-2024 ນີ້, ຄສວ ມີຜູ້ສໍາເລັດການສຶກສາທັງໝົດ 184 ຄົນ, ຍິງ 107 ຄົນ ແລະບໍ່ສໍາເລັດການສຶກສາ ທັງໝົດ 11 ຄົນ, ຍິງ 05 ຄົນ.