ໃນວັນທີ 29 ພະຈິກ 2024 ຜ່ານມາ, ຄະນະວິທະຍາສາດສັງຄົມ (ຄສຄ) ມະຫາວິທະຍາໄລແຫ່ງຊາດ (ມຊ) ຮ່ວມກັບ ມະຫາວິທະຍາໄລເຊີນເໝີຍ ສປ ຈີນ ໄດ້ຈັດກອງປະຊຸມກອງປະຊຸມສຳມະນາສາກົນກ່ຽວກັບຄຸນນະພາບຂໍ້ລິເລີ່ມໜຶ່ງແລວໜຶ່ງເສັ້ນທາງຂຶ້ນ ທີ່ສະໂມສອນໃຫຍ່ ມະຫາວິທະຍາໄລແຫ່ງຊາດ, ໂດຍການເຂົ້າຮ່ວມຂອງທ່ານ ຮສ. ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມຊ ແລະ ຝ່າຍຈີນ ນຳໂດຍ ທ່ານ ຊິນ ດາລີນ ຮອງອະທິການບໍດີ ມະຫາວິທະຍາໄລເຊຍເໝິຍ ສປ ຈີນ ມີບັນດາແຂກຖືກເຊີນ, ພະນັກງານ, ຄູ-ອາຈານ ຈາກທັງສອງມະຫາວິທະຍາໄລເຂົ້າຮ່ວມ.
ກອງປະຊຸມຄັ້ງນີ້ ຈັດຂຶ້ນ ເພື່ອຊຸກຍູ້ການຮ່ວມມືທາງວິຊາການ, ການຄົ້ນຄວ້າ ທີ່ຫຼາກຫຼາຍ ເພື່ອຊຸກຍູ້ການຮ່ວມມືລະຫວ່າງລາວ-ຈີນ ແລະ ອາຊຽນ ໃຫ້ມີການເຊື່ອມຈອດ ແລະ ຂະຫຍາຍຕົວຢ່າງຮອບດ້ານເປັນຕົ້ນການຮ່ວມມືການຄົ້ນຄວ້າໃນຂົງເຂດທີ່ສອງຝ່າຍມີຄວາມສົນໃຈ, ລວມທັງສູນຄົ້ນຄວ້າຮ່ວມ ທີ່ມີທ່າແຮງ, ການແລກປ່ຽນຊັບພະຍາກອນການສຶກສາ ຂອງສອງຝ່າຍ, ການແລກປ່ຽນນັກສຶກສາ ແລະການບໍລິການວິຊາການ, ການສະໜັບສະໜູນການສໍາມະນາການຮ່ວມມື, ການສໍາມະນາອອນໄລນ໌ ຫຼືການບັນຍາຍ ລວມເຖິງການຮ່ວມກັນຈັດກອງປະຊຸມທາງວິຊາການ
ອື່ນໆທີ່ກ່ຽວຂ້ອງ.
ສຳລັບນະໂຍບາຍຂໍ້ລິເລີ່ມໜຶ່ງແລວໜຶ່ງເສັ້ນທາງຂອງຈີນໄດ້ມີບົດບາດອັນສຳຄັນໃນການເຊື່ອມຕໍ່ພື້ນຖານໂຄງລ່າງ ແລະ ການພັດທະນາດ້ານສັງຄົມ, ການເມືອງ ແລະ ເສດຖະກິດຂອງສະພາບການໂລກ, ລວມທັງປະເທດອາຊີຕາເວັນອອກສ່ຽງໃຕ້. ລາວແມ່ນໜຶ່ງໃນບັນດາປະເທດທີ່ໄດ້ຮັບຄວາມໄດ້ປຽບຈາກນະໂຍບາຍຂໍ້ລິເລີ່ມໜຶ່ງແລວທາງໜຶ່ງເສັ້ນທາງ. ເປັນກາລະໂອກາດພັດທະນາເສດຖະກິດ-ສັງຄົມ, ໃນນັ້ນມີການພັດທະນາພະລັງງານສີຂຽວ ແລະ ສະອາດ, ໄດ້ເປີດກວ້າງໃຫ້ບັນດານັກລົງທຶນທັງພາຍໃນ ແລະ ຕ່າງປະເທດ.
ພ້ອມນັ້ນ, ໃນພິທີຍັງໄດ້ມີການລົງນາມບົດບັນທຶກຄວາມເຂົ້າໃຈການຮ່ວມມືືທາງດ້ານວິຊາການລະຫວ່າງສອງຝ່າຍ ເຊິ່ງຝ່າຍ ມຊ ລົງນາມໂດຍທ່ານ ຮສ. ປອ. ນາງ ສົມຄິດ ບູລິດຳ ຮັກສາຄະນະບໍດີ ຄສຄ ແລະຝ່າຍ ມະຫາວິທະຍາໄລເຊຍເໝິນ ສປ ຈີນ ລົງນາມໂດຍທ່ານ Yanjie Gao ຄະນະບໍດີຄະນະຄົ້ນຄວ້າການສຶກສາອາຊີຕາເວັນອອກສ່ຽງໃຕ້ ມະຫາວິທະຍາໄລເຊີນເໝີຍ ສປ ຈີນ.