ວັນທີ 23 ກຸມພາ 2025 ນີ້, ທ່ານ ເສີນກາງ ເລຂາພັກເຂດປົກຄອງຕົນເອງຊົນເຜົ່າຈວ້າງ ກວາງຊີ ສປ ຈີນ ພ້ອມດ້ວຍຄະນະ ແລະທ່ານນາງ ຟ່າງຫົງ ເອກອັກຄະລັດຖະທູດຈີນ ປະຈໍາລາວ ໄດ້ເດີນທາງຢ້ຽມຢາມ ແລະເຮັດວຽກຢູ່ສະຖາບັນຂົງຈື ມະຫາວິທະຍາໄລແຫ່ງຊາດລາວ, ເຊິ່ງໃຫ້ການຕ້ອນຮັບໂດຍທ່ານ ຮສ. ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມະຫາວິທະຍາໄລແຫ່ງຊາດ ພ້ອມດ້ວຍຄະນະ ແລະຄະນະອໍານວຍການສະຖາບັນຂົງຈືຢ່າງອົບອຸ່ນ.
ໃນໂອກາດນີ້, ຄະນະນໍາສອງຝ່າຍລາວ-ຈີນໄດ້ຮ່ວມກັນເປີດປ້າຍຖານເຝິກອົບຮົມພາສາຈີນສາກົນ ແລະຖານຄົ້ນຄວ້າລະດັບປະເທດ-ພາກພື້ນ ລະຫວ່າງມະຫາວິທະຍາໄລແຫ່ງຊາດລາວ ແລະມະຫາວິທະຍາໄລຊົນເຜົ່າກວາງຊີ ສປ ຈີນ. ພ້ອມດຽວກັນທັງສອງຝ່າຍ ຍັງຮ່ວມກັນເປັນສັກຂີພິຍານໃນພິທີເຊັນສັນຍາມອບທຶນການສຶກສາໄລຍະ 3 ປີຂອງສະພາການຄ້າແຂວງກວາງຊີ ມອບໃຫ້ສະຖາບັນຂົງຈື ມະຫາວິທະຍາໄລແຫ່ງຊາດ.
ທ່ານ ຄໍາຮຸ່ງ ຈັນທະວົງ ອໍານວຍການຝ່າຍລາວສະຖາບັນຂົງຈື ໃຫ້ຮູ້ວ່າ: ຖານເຝິກອົບຮົມພາສາຈີນສາກົນ ແລະຖານຄົ້ນຄວ້າລະດັບປະເທດ-ພາກພື້ນ ທັງສອງເປັນເວທີຮ່ວມມື ແລະແລກປ່ຽນດ້ານການສຶກສາລະຫວ່າງປະເທດເຊັ່ນ ການເຝິກອົບຮົມຄູ-ນັກຮຽນ, ການສ້າງວິໄນ, ການພັດທະນາປຶ້ມແບບຮຽນ, ການຮ່ວມກັນຄົ້ນຄວ້າວຽກງານດ້ານວັດທະນະທໍາ ແລະອື່ນໆ ລວມທັງການເຂົ້າເຖິງແຫຼ່ງທຶນຕ່າງໆໂດຍຜ່ານຖານດັ່ງກ່າວ ເພື່ອສົ່ງເສີມການສຶກສາ ສາກົນຂອງຈີນໃຫ້ຍືນຍົງ ແລະມີຄຸນນະພາບສູງ.
ໃນໂອກາດດັ່ງກ່າວ, ທ່ານ ເສີນກາງ ກໍໄດ້ໂອ້ລົມ ແລະກ່າວໃຫ້ກໍາລັງໃຈຕໍ່ຄູ ແລະອາຈານອາສາສະມັກຈີນ ທີ່ໄດ້ສະຫຼະເຫື່ອແຮງ ແລະສະຕິປັນຍາຕົນເອງເຂົ້າໃນວຽກງານການຮຽນ-ການສອນຢ່າງຕັ້ງໜ້າທີ່ສະຖາບັນຂົງຈື ເຊິ່ງເປັນການປະກອບສ່ວນເຂົ້າໃນການສ້າງຄູ່ຮ່ວມຊາຕະກໍາຈີນ-ລາວໃຫ້ນັບມື້ພັດທະນາເຂົ້າສູ່ລວງເລິກ.