ໃນຕອນບ່າຍຂອງວັນທີ 26 ສິງຫາ 2026, ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີເປີດ “ສູນການຮຽນຮູ້ຕະຫຼອດຊີວິດ” ຂຶ້ນຢ່າງເປັນທາງການ ທີ່ ຄະນະສຶກສາສາດ. ພິທີດັ່ງກ່າວໄດ້ຮັບກຽດເຂົ້າຮ່ວມໂດຍ ທ່ານ ຮສ. ປອ. ຫຼ້າວັນ ວົງຄໍາສານ ຫົວໜ້າຫ້ອງການ ກະຊວງສຶກສາທິການ ແລະ ກິລາ (ສສກ), ພ້ອມດ້ວຍ ທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອຳນວຍການໃຫຍ່ ມຊ, ທ່ານ Uwe Gartenschlaeger ຜູ້ອໍານວຍການໃຫຍ່ ຫ້ອງການປະຈໍາພາກພື້ນ ເພື່ອການສຶກສາຜູ້ໃຫຍ່ຂອງເຢຍລະມັນ (DVVI), ນອກຈາກນີ້, ຍັງມີບັນດາຫົວໜ້າກົມ-ຮອງຫົວໜ້າກົມ, ຫົວໜ້າຄະນະວິຊາ, ຫົວໜ້າຫ້ອງການ, ຜູ້ອຳນວຍການວິທະຍາໄລຄູທົ່ວປະເທດ ພ້ອມດ້ວຍພະນັກງານ, ຄູ-ອາຈານ ເຂົ້າຮ່ວມຢ່າງພ້ອມພຽງ.
ຈຸດປະສົງຫຼັກຂອງການຈັດພິທີໃນຄັ້ງນີ້ ແມ່ນເພື່ອປະກາດແຕ່ງຕັ້ງຄະນະຜູ້ບໍລິຫານງານ ແລະ ປະກາດເປີດສູນການຮຽນຮູ້ຕະຫຼອດຊີວິດ ຄະນະສຶກສາສາດ ມຊ. ຄວາມເປັນມາຂອງການສ້າງຕັ້ງສູນນີ້ ແມ່ນເກີດຈາກໝາກຜົນຂອງການຮ່ວມມືລະຫວ່າງ ຄະນະສຶກສາສາດ ມຊ ແລະ ອົງການ DVVI ທີ່ໄດ້ຮ່ວມກັນສົ່ງເສີມກິດຈະກຳການຮຽນຮູ້ຕະຫຼອດຊີວິດ ມາຕັ້ງແຕ່ປີ 2016 ເປັນຕົ້ນມາ. ສຳລັບ ອົງການ DVVI ແມ່ນສະມາຄົມເພື່ອການສຶກສາຜູ້ໃຫຍ່ຂອງປະເທດເຢຍລະມັນ ທີ່ມີປະຫວັດການກໍ່ຕັ້ງຍາວນານເຖິງ 103 ປີ ໃນປະເທດເຢຍລະມັນ, ເຊິ່ງເປັນອົງການສາກົນທີ່ມີຊື່ສຽງໃນການສົ່ງເສີມການສຶກສາຜູ້ໃຫຍ່ ແລະ ການຮຽນຮູ້ຕະຫຼອດຊີວິດ ມາຫຼາຍກວ່າ 50 ປີ ໂດຍມີຄູ່ຮ່ວມງານຫຼາຍກວ່າ 200 ພາກສ່ວນ ໃນ 30 ກວ່າປະເທດທົ່ວໂລກ.
ພາຍໃນງານ ຍັງໄດ້ມີການຈັດກິດຈະກຳສົນທະນາວິຊາການ (Panel Discussion) ໃນຫົວຂໍ້: “ການຮຽນຮູ້ຕະຫຼອດຊີວິດເພື່ອອະນາຄົດ: ໂອກາດ, ສິ່ງທ້າທາຍ ແລະ ບົດບາດຂອງມະຫາວິທະຍາໄລ”. ໂດຍມີຜູ້ຊົງຄຸນວຸດທິຈາກຫຼາຍພາກສ່ວນຂຶ້ນຮ່ວມສົນທະນາ ແລກປ່ຽນບົດຮຽນ ເປັນຕົ້ນແມ່ນ: ທ່ານ ປອ. ນາງ ວັນມະນີ ວັນນະສີ, ທ່ານ ປອ. ໄຊ ພອນແກ້ວ, ທ່ານ ປອ. ສາຍສະໝອນ ງາມສີ, ທ່ານ ສຸພາບ ຄຸນວິໄຊ, ທ່ານ ປອ. ລຳພູນ ຫຼວງໄຊ ແລະ ທ່ານ Uwe Gartenschlaeger ໂດຍການດຳເນີນລາຍການຂອງ ທ່ານ Sam Lansdown. ຫຼັງຈາກນັ້ນ, ທ່ານ ປອ. ຊາຍຄໍາ ວັນນະໄຊ, ຫົວໜ້າຫ້ອງການຈັດຕັ້ງ-ພະນັກງານ ແລະ ກວດກາ ມຊ ໄດ້ຂຶ້ນຜ່ານຂໍ້ຕົກລົງຂອງຜູ້ອຳນວຍການໃຫຍ່ ມຊ ວ່າດ້ວຍການອະນຸມັດເປີດສູນການຮຽນຮູ້ຕະຫຼອດຊີວິດ ແລະ ຂໍ້ຕົກລົງແຕ່ງຕັ້ງຮອງຜູ້ອຳນວຍການສູນດັ່ງກ່າວ ພ້ອມທັງມີການມອບ-ຮັບຂໍ້ຕົກລົງຢ່າງເປັນທາງການ, ໃນພິທີໄດ້ແຕ່ງຕັ້ງ ທ່ານ ສຸກສັນ ໄຊຍະວົງ ເປັນຜູ້ຮັບຜິດຊອບວຽກງານຫົວໜ້າສູນການຮຽນຮູ້ຕະຫຼອດຊິວີດ,ທ່ານ ປອ ສຸກສາຄອນ ແສງສຸລິຍາ ເປັນຮອງຫົວໜ້າສູນ ການຮຽນຮູ້ຕະຫຼອດຊິວີດ,ທ່ານ ນາງ ຕຸລາວັນ ສີສະຫັວດ ເປັນຮອງຫົວໜ້າສູນການຮຽນຮູ້ຕະຫຼອດຊິວີດ
ການເປີດສູນໃນຄັ້ງນີ້ ບໍ່ພຽງແຕ່ເປັນການຍົກລະດັບພື້ນຖານໂຄງລ່າງທາງດ້ານການສຶກສາເທົ່ານັ້ນ, ແຕ່ຍັງເປັນການຕອກຢໍ້າອຸດົມການອັນໜັກແໜ້ນທີ່ວ່າ "ຄູແມ່ນຄົນຂອງພັກ ຄູແມ່ນຄົນຂອງປະຊາຊົນ". ປະໂຫຍກດັ່ງກ່າວມີຄວາມໝາຍເລິກເຊິ່ງ ເຊິ່ງສະທ້ອນໃຫ້ເຫັນວ່າ ຄູ-ອາຈານ ແມ່ນກຳລັງແຮງທີ່ສຳຄັນຂອງພັກ ໃນການຈັດຕັ້ງປະຕິບັດແນວທາງນະໂຍບາຍດ້ານການສຶກສາໃຫ້ປາກົດຜົນເປັນຈິງ, ເປັນຜູ້ເຜີຍແຜ່ແນວຄິດ ແລະ ສ້າງຄົນຮຸ່ນໃໝ່ໃຫ້ກາຍເປັນພົນລະເມືອງດີຂອງຊາດ. ໃນຂະນະດຽວກັນ, ຄູຍັງເປັນລູກຫຼານ ແລະ ເປັນຜູ້ຮັບໃຊ້ປະຊາຊົນຢ່າງແທ້ຈິງ ໂດຍການມອບຄວາມຮູ້, ແສງສະຫວ່າງທາງປັນຍາ ແລະ ຫຼໍ່ຫຼອມສິນທຳປະຈຳໃຈໃຫ້ແກ່ລູກຫຼານປະຊາຊົນບັນດາເຜົ່າ. ດັ່ງນັ້ນ, ສູນການຮຽນຮູ້ຕະຫຼອດຊີວິດແຫ່ງນີ້ ຈຶ່ງປຽບເໝືອນແຫຼ່ງພະລັງງານທີ່ຈະຊ່ວຍພັດທະນາຊັບພະຍາກອນຄູ ໃຫ້ມີການພັດທະນາຕົນເອງຢ່າງຕໍ່ເນື່ອງ, ມີຄວາມຮູ້ຄວາມສາມາດທີ່ທັນຍຸກທັນສະໄໝຢູ່ສະເໝີ ເພື່ອສາມາດປະຕິບັດໜ້າທີ່ອັນມີກຽດນີ້ໄດ້ຢ່າງສົມບູນແບບ.
ໃນຕອນທ້າຍຂອງພິທີ ໄດ້ມີການຕັດແຖບຜ້າເປີດສູນຢ່າງເປັນທາງການ ໂດຍໄດ້ຮັບກຽດຕັດແຖບຜ້າຈາກ ທ່ານ ຫົວໜ້າຫ້ອງການ ລັດຖະມົນຕີ ກະຊວງສຶກສາທິການ ແລະ ກິລາ (ສສກ), ຜູ້ອຳນວຍການ ຫ້ອງການປະຈຳພາກພື້ນ DVVI ແລະ ຮອງຜູ້ອຳນວຍການໃຫຍ່ ມຊ. ພາຍຫຼັງສຳເລັດພິທີຕັດແຖບຜ້າ, ບັນດາແຂກທີ່ເຂົ້າຮ່ວມ ຍັງໄດ້ຍ່າງເລາະຊົມການວາງສະແດງຜົນງານ ແລະ ຜົນຜະລິດຈາກກິດຈະກຳສົ່ງເສີມການຮຽນຮູ້ຕະຫຼອດຊີວິດຂອງຄະນະສຶກສາສາດ ຕື່ມອີກ.
