ໃນວັນທີ 3 ກັນຍາ 2026 ທີ່ຜ່ານມາ, ທີ່ຫ້ອງຮັບແຂກ VIP ຕຶກສໍານັກງານ ອຳນວຍການໃຫຍ່ ມະຫາວິທະຍາໄລແຫ່ງຊາດ (ມຊ), ທ່ານ ຮສ. ປອ. ອຸ່ນຫຼ້າ ສີວັນເພັງ ຮອງຜູ້ອຳນວຍການໃຫຍ່ ມຊ, ມີຫົວໜ້າຄະນະວິຊາ ອັກສອນສາດ ພ້ອມດ້ວຍພະນັກງານ ທີ່ກ່ຽວຂ້ອງ ໄດ້ໃຫ້ກຽດຕ້ອນຮັບການເຂົ້າຢ້ຽມຢາມ ຂອງ ທ່ານ ອາເລັກຊານເດີ ຣັດກອບ (Alexander Radkov) ຫົວໜ້າສູນວິທະຍາສາດ ແລະ ວັດທະນະທຳລັດເຊຍ ປະຈຳ ສປປ ລາວ ພ້ອມດ້ວຍຄະນະ.
ການພົບປະຄັ້ງນີ້ ມີຈຸດປະສົງເພື່ອທົບທວນ, ຮັດແໜ້ນ ແລະ ຂະຫຍາຍສາຍພົວພັນການຮ່ວມມື ພ້ອມທັງການແລກປ່ຽນທາງດ້ານການສຶກສາ ແລະ ວັດທະນະທຳ ລະຫວ່າງ ສປປ ລາວ ແລະ ສະຫະພັນລັດເຊຍ ໃຫ້ມີຄວາມເລິກເຊິ່ງກວ່າເກົ່າ. ເຊິ່ງສອງຝ່າຍໄດ້ຍົກໃຫ້ເຫັນ ກ່ຽວກັບການສະໜັບສະໜູນດ້ານການສຶກສາຢ່າງຮອບດ້ານ ໂດຍສະຫະພັນລັດເຊຍ ໄດ້ມອບທຶນການສຶກສາໃຫ້ແກ່ ສປປ ລາວ ຫຼາຍກວ່າ 100 ທຶນ ຕໍ່ປີ ເພື່ອສ້າງໂອກາດໃຫ້ນັກສຶກສາລາວໄດ້ໄປສຶກສາຕໍ່ໃນລະດັບທີ່ຊ່ຽວຊານ. ພ້ອມນັ້ນ, ທາງລັດເຊຍຍັງໄດ້ສະໜັບສະໜູນທຶນການສຶກສາສະເພາະທາງດ້ານການກະເສດ ໂດຍຮັບຜິດຊອບຄ່າໃຊ້ຈ່າຍທັງໝົດ ລວມມີ: ປີ້ຍົນໄປ-ກັບ, ຄ່າທີ່ພັກອາໄສ, ຄ່າຄອງຊີບ ແລະ ທຶນການສຶກສາຕະຫຼອດຫຼັກສູດ. ຂະນະດຽວກັນ, ທັງສອງຝ່າຍຍັງໄດ້ປຶກສາຫາລືກ່ຽວກັບໂຄງການກໍ່ສ້າງ "ໂຮງຮຽນມັດທະຍົມຄົບວົງຈອນມິດຕະພາບ ລາວ-ລັດເຊຍ" ເຊິ່ງເປັນໂຮງຮຽນຂອງລັດຖະບານ ໂດຍລັດຖະບານລາວໄດ້ຕອບສະໜອງເນື້ອທີ່ດິນສຳລັບການກໍ່ສ້າງ ແລະ ລັດຖະບານລັດເຊຍເປັນຜູ້ສະໜັບສະໜູນທຶນກໍ່ສ້າງທັງໝົດ. ໂຮງຮຽນດັ່ງກ່າວ ຈະນຳໃຊ້ພາສາລັດເຊຍໃນການຮຽນ-ການສອນທັງໝົດ ໂດຍສະເພາະແມ່ນສາຍວິທະຍາສາດທຳມະຊາດ, ເຊິ່ງຈະມີຄູອາຈານຊ່ຽວຊານຈາກສະຫະພັນລັດເຊຍ ຈຳນວນ 100 ທ່ານ ເດີນທາງມາປະຈຳການສອນ. ເມື່ອນັກຮຽນຮຽນຈົບຕາມຫຼັກສູດ ຈະໄດ້ຮັບໃບຢັ້ງຢືນການສຶກສາ 2 ໃບ ຄື: ໃບຢັ້ງຢືນພາສາລັດເຊຍ ແລະ ພາສາລາວ. ທັງນີ້, ເພື່ອເປັນການສືບຕໍ່ ແລະ ຂະຫຍາຍຜົນຈາກໂຄງການຮຽນພາສາລັດເຊຍ ໃນຊັ້ນປະຖົມສຶກສາ 6 ແຫ່ງໃນລາວ ທີ່ໄດ້ເລີ່ມຕົ້ນຈັດການຮຽນ-ການສອນຕັ້ງແຕ່ຊັ້ນ ປ.1 ມາຕັ້ງແຕ່ປີ 2013.
ໃນໂອກາດດຽວກັນ, ທ່ານ ຫົວໜ້າສູນວິທະຍາສາດ ແລະ ວັດທະນະທຳລັດເຊຍ ໄດ້ສະເໜີຂໍຄວາມຮ່ວມມື ແລະ ຊ່ວຍເຫຼືອຈາກ ມຊ ໂດຍສະເພາະແມ່ນ ສູນວິທະຍາສາດສອນພາສາລັດເຊຍ ປະຈຳ ຄະນະອັກສອນສາດ ມຊ ໃນການເລັ່ງສ້າງ ແລະ ຜະລິດຄູອາຈານສອນພາສາລັດເຊຍຄົນລາວ ເພື່ອໃຫ້ສາມາດປະຕິບັດງານສອນຄຽງບ່າຄຽງໄຫລ່ກັບຄູອາຈານຈາກລັດເຊຍຢ່າງມີປະສິດທິພາບ, ເພາະການສ້າງ ແລະ ພັດທະນາບຸກຄະລາກອນ ຖືເປັນການລົງທຶນທີ່ມີຄຸນຄ່າມະຫາສານໃຫ້ແກ່ການພັດທະນາປະເທດຊາດ. ພ້ອມກັນນັ້ນ, ເພື່ອສ້າງບັນຍາກາດຄວາມສາມັກຄີ, ໃນເດືອນກັນຍານີ້ ຈະມີກອງກາຍະສິນຈາກສະຫະພັນລັດເຊຍ ເດີນທາງມາຈັດການສະແດງຢູ່ ສປປ ລາວ ເພື່ອຮັດແໜ້ນຄວາມສາມັກຄີ ແລະ ແລກປ່ຽນວັດທະນະທຳ ລະຫວ່າງ ຊາວໜຸ່ມລາວ ແລະ ລັດເຊຍ.
ທ່ານ ຮສ. ປອ. ອຸ່ນຫຼ້າ ສີວັນເພັງ ໄດ້ຕາງໜ້າໃຫ້ແກ່ຄະນະນຳ, ຄູອາຈານ ມຊ ສະແດງຄວາມຂອບໃຈຢ່າງຈິງໃຈ ແລະ ເລິກຊຶ້ງເຖິງນ້ຳໃຈອັນດີງາມ ຂອງລັດຖະບານ ແລະ ປະຊາຊົນສະຫະພັນລັດເຊຍ, ກໍຄື ສູນວິທະຍາສາດ ແລະ ວັດທະນະທຳລັດເຊຍ ປະຈຳ ສປປ ລາວ ທີ່ໄດ້ໃຫ້ການຊ່ວຍເຫຼືອ, ສະໜັບສະໜູນ ແລະ ຄຽງບ່າຄຽງໄຫລ່ ກັບ ສປປ ລາວ ໃນດ້ານການສຶກສາ ແລະ ການພັດທະນາຊັບພະຍາກອນມະນຸດຢ່າງສະເໝີຕົ້ນສະເໝີປາຍຕະຫຼອດມາ. ທ່ານໄດ້ເນັ້ນຢ້ຳວ່າ: ມຊ, ໂດຍສະເພາະ ຄະນະອັກສອນສາດ ແມ່ນມີຄວາມກຽມພ້ອມທີ່ຈະໃຫ້ການຮ່ວມມື, ສະໜັບສະໜູນ ແລະ ອຳນວຍຄວາມສະດວກໃນທຸກໆດ້ານ ບໍ່ວ່າຈະເປັນການຍົກລະດັບການຜະລິດຄູສອນພາສາລັດເຊຍ, ການກໍ່ສ້າງໂຮງຮຽນມັດທະຍົມຄົບວົງຈອນມິດຕະພາບ ລາວ-ລັດເຊຍ ຕະຫຼອດຮອດກິດຈະກຳແລກປ່ຽນວັດທະນະທຳຕ່າງໆ ເພື່ອໃຫ້ໂຄງການຮ່ວມມືທັງໝົດ ປະກົດຜົນເປັນຮູບປະທຳ ແລະ ເປັນເນື້ອໃນອັນແທ້ຈິງ, ເຊິ່ງຈະເປັນມໍລະດົກຕົກທອດອັນສຳຄັນໃນການເສີມສ້າງສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງຊາດ ລາວ-ລັດເຊຍ ໃຫ້ຢັ້ນຢືນ ແລະ ແໜ້ນແຟ້ນຍິ່ງໆຂຶ້ນ.
