ໃນຕອນບ່າຍຂອງວັນທີ 30 ພະຈິກ 2022 ຜ່ານມາ, ຄະນະຊັບພະຍາກອນນໍ້າ(ຄຊນ) ມະຫາວິທະຍາໄລແຫ່ງຊາດ(ມຊ) ຮ່ວມກັບ ກົມຊົນລະປະທານ ກະຊວງກະສິກໍາ ແລະ ປ່າໄມ້ ໄດ້ລົງນາມການຮ່ວມມື ດ້ານວິຊາການ, ພິທີໄດ້ຈັດຂຶ້ນທີ່ຫ້ອງປະຊຸມຂອງ ຄຊນ; ຝ່າຍ ຄຊນ ລົງນາມໂດຍ ທ່ານ ປອ. ອຸ່ນຫຼ້າ ສີວັນເພັງ ຄະນະບໍດີ ຄຊນ ແລະ ຝ່າຍກົມຊົນລະປະທານ ກະຊວງກະສິກຳ ແລະ ປ່າໄມ້ ລົງນາມໂດຍ ທ່ານ ບຸນຄຳ ສີດາວົງ ຫົວໜ້າກົມຊົນລະປະທານ ກະຊວງກະສິກຳ ແລະປ່າໄມ້, ໃນພິທີມີທ່ານ ຮສ. ປອ. ບົວດຳ ແສງຄຳຄຸດລາວົງ ຫົວໜ້າຫ້ອງການ ມຊ, ທ່ານຮອງຄະນະບໍດີ, ຮອງຫົວໜ້າກົມ, ຫົວໜ້າພາກວິຊາ, ຫົວໜ້າພະແນກ ພ້ອມດ້ວຍພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ການລົງນາມບົດບັນທຶກຄວາມເຂົ້າໃຈ ຂອງທັງສອງຝ່າຍໃນຄັ້ງນີ້, ແມ່ນເພື່ອແລກປ່ຽນທາງດ້ານວິຊາການເປັນຕົ້ນແມ່ນ: (1) ຈັດສຳມະນາແລກປ່ຽນບົດຮຽນທາງດ້ານຊົນລະປະທານ; (2) ເພື່ອສົ່ງເສີມພັດທະນາວຽກງານວິຊາການ, ເຕັກໂນໂລຊີ ແລະຂໍ້ມູນຂ່າວສານດ້ານຊົນລະປະທານ; (3) ສ້າງຄວາມເຂັ້ມແຂງໃຫ້ບຸກຄະລາກອນທັງສອງຝ່າຍ ເປັນຕົ້ນແມ່ນການແລກປ່ຽນ ແລະຖ່າຍທອດບົດຮຽນ, ປະສົບການໃນຮູບແບບນັກວິທະຍາກອນຮັບເຊີນ, ຄູເຝິກ ແລະ ຈັດສົ່ງນັກສຶກສາຂອງ ຄຊນ ລົງເຝິກງານຢູ່ກົມຊົນລະປະທານ ໃນໄລຍະເວລາການຮ່ວມ 2 ປີ.
ພາຍຫຼັງການລົງນາມ, ໃນພິທີ ຍັງໄດ້ຮັບຟັງການລາຍງານສະພາບລວມໂດຍຫຍໍ້ກ່ຽວກັບ ຄຊນ ຈາກທ່ານ ປອ. ອຸ່ນຫຼ້າ ສີວັນເພັງ ໂດຍທ່ານໃຫ້ຮູ້ວ່າ: ຄຊນ ໄດ້ເລີ່ມຕົ້ນມາຈາກວິທະຍາໄລຊົນລະປະທານ ຕັ້ງຢູ່ບ້ານຕາດທອງ, ໄດ້ຮັບການສ້າງຕັ້ງຂຶ້ນວັນທີ 01 ຕຸລາ 1981 ເຊິ່ງໄດ້ຍົກຍ້າຍມາແຕ່ວິທະຍາໄລກະເສດນາບົງ, ປີ 1988 ໄດ້ປ່ຽນຊື່ເປັນ "ໂຮງຮຽນຊົນລະປະທານຊັ້ນສູງ" ໃນເວລານັ້ນຂຶ້ນກັບກະຊວງກະຊິກຳ ຊົນລະປະທານ ແລະສະຫະກອນກະເສດ. ພາຍຫຼັງ ມຊ ໄດ້ສ້າງຕັ້ງຂຶ້ນ ໄດ້ໃສ່ຊື່ວ່າ "ພາກວິຊາວິສະວະກໍາຊົນລະປະທານ" ຂຶ້ນກັບຄະນະວິສະວະກໍາສາດ ແລະໃນປີ 2008 ໄດ້ປ່ຽນຊື່ມາເປັນ "ພາກວິຊາ ວິສະວະກໍາຊັບພະຍາກອນນ້ຳ" ມາຮອດວັນທີ 15 ສິງຫາ 2014 ໄດ້ຮັບອະນຸຍາດສ້າງຕັ້ງເປັນ ຄຊນ ຂຶ້ນກັບ ມຊ; ຄຊນ ປະກອບມີ 5 ພາກວິຊາຄື: ພາກວິຊາ ຊົນລະປະທານ, ພາກວິຊາ ພັດທະນາ ແລະ ຄຸ້ມຄອງຊັບພະຍາກອນນ້ຳ ແລະພາກວິຊາ ອຸຕຸນິຍົມ ແລະ ອຸທົກກະສາດ; ດຳເນີນການຮຽນ-ການສອນທັງໝົດ 12 ຫຼັກສູດ ໃນນັ້ນ, ມີຫຼັກສູດຕໍ່ເນື່ອງປະລິນຍາຕີ 01 ຫຼັກສູດ, ຫຼັກສູດປະລິນຍາຕີ 5 ຫຼັກສູດ ແລະຫຼັກສູດປະລິນຍາໂທ 3 ຫຼັກສູດ.