ໃນວັນທີ 28 ກໍລະກົດ 2026 ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ (ສລຍ) ໄດ້ຈັດກອງປະຊຸມຄະນະກຳມະການປະສານງານຮ່ວມ (JCC) ຄັ້ງທີ 4 ດ້ວຍການສະໜັບສະໜູນຈາກອົງການໄຈກາ (JICA) ແລະ ມູນນິທິຍີ່ປຸ່ນ (JF) ເພື່ອທົບທວນຄືນຜົນງານ, ແກ້ໄຂສິ່ງທ້າທາຍ ແລະ ວາງແຜນທິດທາງໃນອະນາຄົດຂອງໂຄງການພັດທະນາຂີດຄວາມສາມາດຂອງບຸກຄະລາກອນດ້ານທຸລະກິດ ແລະ ການສ້າງເຄືອຂ່າຍຜ່ານ ສະຖາບັນພັດທະນາຊັບພະຍາກອນມະນຸດລາວ-ຍີ່ປຸ່ນ ລະຫວ່າງຜູ້ທີ່ມີສ່ວນຮ່ວມ ແລະ ຄູ່ຮ່ວມງານທັງໝົດ ທີ່ສະຖາບັນດັ່ງກ່າວ, ໂດຍການເປັນປະທານຂອງທ່ານ ຮສ. ປອ. ສິນທະວອນ ດາລາວົງ ຜູ້ອໍານວຍການໃຫຍ່ ມະຫາວິທະຍາໄລແຫ່ງຊາດ
ທ່ານ ນາງ ໂຄບາຢາຊິ ມິຢາໂກะ (KOBAYASHI Miyako) ຫົວໜ້າຜູ້ຕາງໜ້າ ອົງການ ໄຈກາ ປະຈຳລາວ (JICA Laos Office) ມີຜູ້ຕາງໜ້າຈາກມະຫາວິທະຍາໄລແຫ່ງຊາດ, ບັນດາກະຊວງ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນທີ່ປະຊຸມ, ຜູ້ເຂົ້າຮ່ວມໄດ້ຮັບຟັງການລາຍງານບັນດາໂຄງການເປົ້າໝາຍຂອງອົງການ JICA ປະກອບມີ: ໂຄງການ ທີ V ໄລຍະທີ 2 (ນັບແຕ່ເດືອນ ກັນຍາ 2022 ຫາ ເດືອນສິງຫາ 2025) ທີ່ໄດ້ຈັດຕັ້ງປະຕິບັດຈົນສຳເລັດ
ຜົນງານທີ່ພົ້ນເດັ່ນປະກອບມີ: ການຈັດຝຶກອົບຮົມທຸລະກິດ, ການແລກປ່ຽນທາງດ້ານວິຊາການ ແລະ ວັດທະນະທຳ ໄດ້ຕອບສະໜອງຕາມຄວາມຮຽກຮ້ອງຕ້ອງການຂອງສັງຄົມ, ພ້ອມທັງຂະຫຍາຍເຄືອຂ່າຍລະຫວ່າງບໍລິສັດລາວດ້ວຍກັນ ແລະ ບໍລິສັດຈາກຕ່າງປະເທດ ໂດຍສະເພາະແມ່ນປະເທດຍີ່ປຸ່ນ. ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ ໄດ້ເພີ່ມທະວີການເປັນຄູ່ຮ່ວມງານທີ່ເຂັ້ມແຂງ ນັບຕັ້ງແຕ່ໄດ້ຮັບການສ້າງຕັ້ງຂຶ້ນໃນປີ 2001 ດ້ວຍທຶນຊ່ວຍເຫຼືອລ້າຈາກລັດຖະບານຍີ່ປຸ່ນ ຜ່ານອົງການ JICA ເພື່ອເລັ່ງລັດການເຕີບໂຕທາງເສດຖະກິດຂອງ ສປປ ລາວ.
ໃນກອງປະຊຸມ, ທ່ານ ປອ. ພອນແກ້ວ ຈັນທະມາລີ ຜູ້ອຳນວຍການ LJI ໄດ້ນຳສະເໜີແຜນການ ແລະ ກອບການສະໜັບສະໜູນສຳລັບໂຄງການໃໝ່ (ໂຄງການ V ໄລຍະທີ 3: ນັບແຕ່ເດືອນ ກັນຍາ 2026 ຫາ ເດືອນ ທັນວາ 2029) ໂດຍມີແຜນການຈັດຕັ້ງປະຕິບັດຄື ໄລຍະເດືອນ ກັນຍາ 2026 ຫາ ເດືອນ ສິງຫາ 2027: ສຸມໃສ່ສ້າງເຄືອຂ່າຍທຸລະກິດ ແລະ ອົງການຈັດຕັ້ງທີ່ກ່ຽວຂ້ອງ ເພື່ອເສີມຂະຫຍາຍບົດບາດເປັນເວທີສຳລັບການພັດທະນາເສດຖະກິດ-ສັງຄົມແບບມີສ່ວນຮ່ວມ; ຈັດຕັ້ງຫຼັກສູດ Keiei-juku ເພື່ອຈັດງານສຳມະນາ ແລະ ຝຶກອົບຮົມການບໍລິຫານທຸລະກິດແບບຍີ່ປຸ່ນໃຫ້ແກ່ພະນັກງານຄຸ້ມຄອງບໍລິຫານຂອງບໍລິສັດໃນ ສປປ ລາວ; ດຳເນີນໂຄງການແຂ່ງຂັນພັດທະນາແຜນທຸລະກິດ LJI SUSU ທີ່ເນັ້ນໃສ່ການສະໜັບສະໜູນຸທຸລະກິດເລີ່ມຕົ້ນ (Startup); ສ້າງເວທີສຳມະນາ ແລະ ກິດຈະກຳສ້າງເຄືອຂ່າຍຮ່ວມກັບບໍລິສັດຈາກປະເທດຍີ່ປຸ່ນ ແລະ ບັນດາປະເທດອາຊຽນ; ຍົກລະດັບການສຶກສາພາສາຍີ່ປຸ່ນ ແລະ ການແລກປ່ຽນວັດທະນະທຳ ດ້ວຍການສະໜັບສະໜູນຈາກ ມູນນິທິຍີ່ປຸ່ນ (JF).
ໃນໂອກາດດັ່ງກ່າວ ຜູ້ເຂົ້າຮ່ວມໄດ້ມີການປະກອບຄໍາຄິດຄໍາເຫັນຢ່າງກົງໄປກົງມາ ໃນຕອນທ້າຍກອງປະຊຸມ, ຄະນະປະທານ ໄດ້ມີທັດສະນະແລກປ່ຽນ ແລະ ໃຫ້ທິດຊີ້ນຳເພີ່ມເຕີມ ເພື່ອໃຫ້ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ ສືບຕໍ່ປັບປຸງແກ້ໄຂ ແລະ ຍົກລະດັບການດຳເນີນງານຕ່າງໆ ໃຫ້ມີປະສິດທິພາບຍິ່ງຂຶ້ນໃນຕໍ່ໜ້າ.
ໃນວັນທີ 27 ກໍລະກົດ 2026, ມະຫາວິທະຍາໄລແຫ່ງຊາດ (ມຊ) ໄດ້ມີພິທີປະກາດພະນັກງານລັດຖະກອນອອກພັກການ-ຮັບອຸດໜູນບຳນານ ທີ່ຫ້ອງປະຊຸມສະຖາບັນຂົງຈື ມະຫາວິທະຍາໄລແຫ່ງຊາດ, ໂດຍການເຂົ້າຮ່ວມເປັນປະທານຂອງທ່ານ ຮສ. ປອ. ສິນທະວອນ ດາລາວົງ ຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ, ມີບັນດາທ່ານຫົວໜ້າຫ້ອງການ, ຫົວໜ້າຄະນະວິຊາ, ພະນັກງານ, ຄູ-ອາຈານ ທົ່ວມະຫາວິທະຍາໄລແຫ່ງຊາດ ເຂົ້າຮ່ວມ.
ໃນພິທີ, ທ່ານ ປອ. ຊາຍຄຳ ວັນນະໄຊ ຫົວໜ້າຫ້ອງການຈັດຕັ້ງ-ຄຸ້ມຄອງພະນັກງານ ແລະ ກວດກາ ກໍໄດ້ຂຶ້ນຜ່ານຂໍ້ຕົກລົງຂອງທ່ານລັດຖະມົນຕີກະຊວງສຶກສາທິການ ແລະ ກິລາ ວ່າດ້ວຍການອະນຸມັດໃຫ້ພະນັກງານລັດຖະກອນອອກພັກການ-ຮັບອຸດໜູນບຳນານ ໃນງວດທີ 3 ປີ 2026 ຈຳນວນ 36 ທ່ານ ແລະ ຜ່ານຂໍ້ຕົກລົງການຍ້ອງຍໍຂອງທ່ານລັດຖະມົນຕີກະຊວງສຶກສາທິການ ແລະ ກິລາ ໃນການປະກອບສ່ວນເຫື່ອແຮງ, ສະຕິປັນຍາ, ຄວາມຮູ້, ຄວາມສາມາດ ເຂົ້າໃນການພັດທະນາວຽກງານການສຶກສາ, ວິທະຍາສາດ, ກີລາ ຕະຫຼອດໄລຍະທີ່ຜ່ານມາ.
ໂອກາດນີ້, ທ່ານ ໂພໄຊ ເທບວິໄລວົງ ອະດີດຮອງຫົວໜ້າຄະນະວິຊາ ຄະນະອັກສອນສາດ ກໍໄດ້ຕາງໜ້າໃຫ້ພະນັກງານທີ່ອອກພັກການ-ຮັບອຸດໜູນບຳນານ ຂຶ້ນກ່າວສະແດງຄວາມຮູ້ສຶກ ເຊິ່ງທ່ານກ່າວບາງຕອນວ່າ: ຕະຫຼອດໄລຍະຜ່ານມາພວກເຮົາໄດ້ສຸມທຸກເຫື່ອແຮງ ສະຕິປັນຍາ ແລະ ທຸ່ມເທ່ແຮງກາຍແຮງໃຈໃນການພັດທະນາ ມະຫາວິທະຍາໄລແຫ່ງຊາດ, ປຽບສະເໜືອນໄດ້ຮ່ວມກັນປູກຕົ້ນໄມ້ ທີ່ມີຊື່ວ່າ “ມະຫາວິທະຍາໄລແຫ່ງຊາດ” ທີ່ໄດ້ພ້ອມກັນເກັບກ່ຽວຫມາກຜົນທາງປັນຍາຢ່າງນັບບໍ່ຖ້ວນ, ຜົນສຳເລັດໃນທີ່ນີ້ ຈະເກີດຂຶ້ນບໍ່ໄດ້ຫາກຂາດການຊີ້ນຳ ນຳພາຈາກຄະນະພັກ ຄະນະນຳມະຫາວິທະຍາໄລແຫ່ງຊາດ ໃນແຕ່ລະຍຸກ ໃນແຕ່ລະສະໄຫມ ທີ່ໄວ້ວາງໃຈ ແລະ ໃຫ້ຄວາມອົບອຸ່ນແກ່ພວກຂ້າພະເຈົ້າໃນຕະຫລອດໄລຍະເວລາທີ່ຜ່ານມາ, ໃນໂອກາດນີ້ ກໍຂໍຂອບໃຈອົງການຈັດຕັ້ງ ເພື່ອນຮ່ວມງານທີ່ຢູ່ຮ່ວມທຸກຮ່ວມສຸກ ແລະ ແບ່ງເບົາພາລະຫນ້າທີ່ຕ່າງໆຮ່ວມກັນ, ພ້ອມທັງຝາກເຖິງພະນັກງານຮຸ່ນສືບທອດ ຈົງເປັນຜູ້ສືບທອດທີ່ດີ ມີຄວາມຊື່ສັດ ມີຈັນຍາບັນ ຮັກອາຊີບ ທຸ່ມເທ່ເພື່ອສ່ວນລວມ ມີຄວາມສາມັກຄີ ແລະ ເປັນແບບຢ່າງທີ່ດີໃຫ້ສັງຄົມ. ການສຶກບໍ່ພຽງແຕ່ເປັນການເຕີມເຕັມຄວາມຮູ້ໃຫ້ກັບນັກສຶກສາເທົ່ານັ້ນ ແຕ່ຍັງເປັນເບົ້າຫຼໍ່ຫຼອມຄົນໃຫ້ກາຍເປັນຜູ້ທີ່ມີຄຸນສົມບັດ, ມີຄວາມຮູ້, ຄວາມສາມາດ ເພື່ອອອກມາຮັບໃຊ້ສັງຄົມ.
ພ້ອມນັ້ນ, ໃນພິທີຍັງຮັບຟັງການໂອ້ລົມຂອງທ່ານ ຮສ. ປອ. ສິນທະວອນ ດາລາວົງ ເຊິ່ງທ່ານໄດ້ສະແດງຄວາມເຄົາລົບ ແລະ ຊາບຊື້ງໃນຄຸນງາມຄວາມດີ ຂອງບັນທ່ານອາຈານທີ່ອອກພັກການ-ຮັບອຸດໜູນບຳນານ ແລະ ກ່າວເນັ້ນ 3 ຄຳທີ່ມີຄວາມໝາຍຄຳຄັນຄື: 1. ຂອບໃຈ: ຕໍ່ກັບທຸກບົດບາດຂອງບັນດາທ່ານໄດ້ຮ່ວມກັນສ້າງຄຸນຄ່າ ຮ່ວມກັນປະກອບກອບສ່ວນແກ່ການພັດທະນາ ມະຫາວິທະຍາໄລແຫ່ງຊາດໃຫ້ເຕີບໃຫຍ່ຂະຫຍາຍຕົວ, ເຊິ່ງໃນປີນີ້ກໍຄົບຮອບ 30 ປີ; 2. ສືບສານ: ມະຫາວິທະຍາໄລແຫ່ງຊາດ ຈະບໍ່ສາມາດກ້າວໄປຂ້າງໜ້າໄດ້ຖ້າບໍ່ຮູ້ຈັກຮັກສາ ແລະ ສືບສານຄຸນງາມຄວາມດີຈາກຄົນຮຸ່ນກ່ອນ (ບັນດາທ່ານອາຈານໃນທີ່ນີ້) ເຊິ່ງບັນດາທ່ານໄດ້ຝາກໄວ້ ບໍ່ພຽງແຕ່ເປັນຕຳແໜ່ງ ຫຼື ຜົນງານທີ່ປະກົດຢູ່ໃນເອກະສານ ແຕ່ຍັງເປັນຈິດວິນຍານຂອງຄວາມເປັນຄູ, ຈັນຍາບັນວິຊາຊີບ, ຄວາມຮັກແພງສາມັກຄີ ແລະ ຄວາມຮັບຜິດຊອບສູງຕໍ່ໜ້າທີ່ ເພື່ອໃຫ້ຄົນຮຸ່ນຫຼັງໄດ້ສືບສານຕໍ່; 3. ສົ່ງຕໍ່: ການບຳນານບໍ່ແມ່ນຈຸດຈົບແຕ່ແມ່ນຈຸດປ່ຽນຜ່ານຈາກຄົນຮຸ່ນໜື່ງໄປສູ່ຄົນຮຸ່ນໜື່ງ, ທີ່ໄດ້ສົ່ງຕໍ່ຄວາມຮູ້, ສົ່ງຕໍ່ອຸດົມການ ແລະ ສົ່ງຕໍ່ຈິດໃຈຮັກອາຊີບ ເຊິ່ງການສົ່ງຕໍ່ບໍ່ແມ່ນພຽງແຕ່ໜ້າທີ່ແຕ່ເປັນການສົ່ງຕໍ່ຄວາມຝັນ, ວິໄສທັດ, ອຸດົມການໃນການສ້າງຄົນ, ສ້າງຄວາມຮູ້ ແລະ ຮັບໃຊ້ສັງຄົມ.
ໃນລະຫວ່າງວັນທີ 21-23 ກໍລະກົດ 2026 ນີ້, ຫ້ອງການສັງລວມ ແລະ ພົວພັນຕ່າງປະເທດ ມະຫາວິທະຍາໄລແຫ່ງຊາດ(ມຊ) ໄດ້ຈັດກອງປະຊຸມຝຶກອົບຮົມ “ວິທີການນຳໃຊ້ລະບົບຖານຂໍ້ມູນ ວຽກງານພົວພັນຕ່າງປະເທດ ເພື່ອຫັນເປັນທັນສະໄໝ” ຂຶ້ນຢ່າງເປັນທາງການ ທີ່ ຫ້ອງປະຊຸມ ຣີສອດ ນາປ່າກວາງ, ເມືອງແກ້ວອຸດົມ, ແຂວງວຽງຈັນ. ໂດຍການເປັນປະທານ ຂອງ ທ່ານ ອຈ. ທອງສຸກ ແກ້ວມະນີ ຮອງຜູ້ອຳນວຍການໃຫຍ່ ມຊ; ໂດຍມີບັນດາຫົວໜ້າຄະນະວິຊາ, ຫົວໜ້າສະຖາບັນ, ຫົວໜ້າຫ້ອງການ, ຫໍສະໝຸດ, ສູນ ພ້ອມດ້ວຍພະນັກງານທີ່ຮັບຜິດຊອບວຽກງານພົວພັນສາກົນ ຂອງແຕ່ລະຄະນະວິຊາເຂົ້າຮ່ວມຢ່າງພ້ອມພຽງ.
ໃນກອງປະຊຸມ, ທ່ານ ບຸນຊ່ວງ ປັນຍາທອງ, ຕາງໜ້າຫ້ອງການສັງລວມ ແລະ ພົວພັນຕ່າງປະເທດ ມຊ ໄດ້ນຳສະເໜີ "ໂຄງການຫັນເປັນທັນສະໄໝ ວຽກງານການພົວພັນຕ່າງປະເທດ", ເຊິ່ງເນັ້ນໃສ່ການພັດທະນາລະບົບ ຂໍອະນຸມັດໃຫ້ພະນັກງານ, ຄູ-ອາຈານ ແລະ ນັກສຶກສາ ມຊ ເພື່ອໄປເຄື່ອນໄຫວວຽກງານທາງລັດຖະການຢູ່ຕ່າງປະເທດ.ເຊິ່ງລະບົບຖານຂໍ້ມູນດັ່ງກ່າວ ແມ່ນໄດ້ຮັບການພັດທະນາຂຶ້ນໂດຍ ສູນເທັກໂນໂລຊີ-ຂໍ້ມູນຂ່າວສານ(IT) ມຊ ເພື່ອທົດແທນການດຳເນີນເອກະສານໃນຮູບແບບເຈ້ຍ (Paper-based). ໃນໂອກາດດັ່ງກ່າວ, ທ່ານ ອຈ. ອາພິສິດ ເທບພະວົງສາ ໄດ້ໃຫ້ນຳສະເໜີ ແລະ ສາທິດວິທີການນຳໃຊ້ໂປຣແກຣມລະບົບຖານຂໍ້ມູນຢ່າງລະອຽດ ເພື່ອໃຫ້ຜູ້ເຂົ້າຮ່ວມຝຶກອົບຮົມສາມາດນຳໄປຈັດຕັ້ງປະຕິບັດຕົວຈິງໃນແຕ່ລະຄະນະວິຊາ ແລະ ພາກສ່ວນຢ່າງມີປະສິດທິພາບ ໃນອະນາຄົດ; ຊຶ່ງປັດຈຸບັນ ມຊ ມີການຮ່ວມມືກັບສາກົນຢ່າງກວ້າງຂວາງ ໂດຍມີພະນັກງານ, ຄູ-ອາຈານ ແລະ ນັກສຶກສາ ເດີນທາງໄປປະຕິບັດວຽກງານ, ເຂົ້າຮ່ວມກອງປະຊຸມ, ສໍາມະນາ, ແລກປ່ຽນກິດຈະກຳ ແລະ ທັດສະນະສຶກສາຢູ່ຕ່າງປະເທດ ຫຼາຍກວ່າ 300 ເທື່ອຄົນຕໍ່ປີ (ສະເລ່ຍ 25 ເທື່ອຄົນຕໍ່ເດືອນ). ເນື່ອງຈາກໃນໄລຍະຜ່ານມາ ການດຳເນີນເອກະສານແມ່ນອີງໃສ່ຮູບແບບເຈ້ຍ (Paper-based) ເປັນຫຼັກ ເຊິ່ງຕ້ອງຜ່ານຫຼາຍຂັ້ນຕອນ, ໃຊ້ເວລາດົນ, ຜູ້ຍື່ນຄຳຮ້ອງຕິດຕາມສະຖານະເອກະສານໄດ້ຍາກ ແລະ ການເກັບກຳສະຖິຕິຍັງມີຄວາມຊັກຊ້າ, ມຊ ຈຶ່ງໄດ້ພັດທະນາລະບົບອອນລາຍ (E-Approval) ຜ່ານ ເວັບແອັບພລິເຄຊັນ (Web Application) ຂຶ້ນມາທົດແທນ.
ລະບົບໃໝ່ທີ່ນຳມາຝຶກອົບຮົມໃນຄັ້ງນີ້ ມີຂັ້ນຕອນການເຮັດວຽກ 4 ຂັ້ນຕອນຫຼັກ ດັ່ງນີ້:
1. ການຍື່ນຄຳຮ້ອງ (Submission): ຜູ້ຍື່ນຄຳຮ້ອງ (ພະນັກງານ ຫຼື ນັກສຶກສາ) ລັອກອິນເຂົ້າລະບົບ, ກອກຂໍ້ມູນສ່ວນຕົວ, ຈຸດປະສົງ, ປະເທດທີ່ຈະໄປ, ໄລຍະເວລາ ພ້ອມອັບໂຫຼດເອກະສານຄັດຕິດ.
2. ການກວດສອບ ແລະ ອະນຸມັດຂັ້ນຄະນະ (Faculty Review): ຫົວໜ້າພາກວິຊາ ຫຼື ຄະນະວິຊາ/ສະຖາບັນ ກວດສອບ ແລະ ກົດອະນຸມັດຜ່ານລະບົບອອນລາຍ.
3. ການກັ່ນຕອງ (International Relations Review): ຫ້ອງການສັງລວມ ແລະ ພົວພັນຕ່າງປະເທດ ກວດສອບຄວາມຖືກຕ້ອງ ແລ້ວນຳສະເໜີຕໍ່ຄະນະນຳ ມຊ.
4. ການອະນຸມັດຂັ້ນສຸດທ້າຍ (Final Approval): ຄະນະນຳ ມຊ ພິຈາລະນາອະນຸມັດ, ຈາກນັ້ນລະບົບຈະອອກເອກະສານ ແລະ ແຈ້ງເຕືອນຜົນກັບຄືນຫາຜູ້ຍື່ນຄຳຮ້ອງທາງອີເມວໂດຍອັດໂຕໂນມັດ.
ການຫັນມາໃຊ້ລະບົບ E-Approval ດັ່ງກ່າວ ຈະຊ່ວຍຫຼຸດຜ່ອນໄລຍະເວລາໃນການດຳເນີນເອກະສານ, ປະຢັດງົບປະມານ, ເພີ່ມຄວາມໂປ່ງໃສ, ສາມາດກວດສອບໄດ້ ແລະ ສ້າງຖານຂໍ້ມູນ (Database) ທີ່ປອດໄພ ແບບ Real-time ເພື່ອກາຍເປັນບ່ອນອີງໃນການວາງແຜນພັດທະນາບຸກຄະລາກອນ ແລະ ຊຸກຍູ້ໃຫ້ ມຊ ກ້າວສູ່ການເປັນມະຫາວິທະຍາໄລດິຈິທັອບ (Digital University) ຢ່າງແທ້ຈິງ. ໃນຕອນທ້າຍຂອງກອງປະຊຸມ, ທ່ານ ອຈ. ທອງສຸກ ແກ້ວມະນີ ຮອງຜູ້ອຳນວຍການໃຫຍ່ ມຊ, ໄດ້ສະແດງຄວາມຊົມເຊີຍຕໍ່ຄະນະຮັບຜິດຊອບ ພ້ອມທັງຜູ້ເຂົ້າຮ່ວມທຸກທ່ານ ທີ່ໄດ້ເອົາໃຈໃສ່ ແລະໃຫ້ຄວາມສຳຄັນໃນການພັດທະນາ ແລະ ຫັນວຽກງານບໍລິຫານເອກະສານ ພົວພັນຕ່າງປະເທດໃຫ້ເປັນທັນສະໄໝ ເພື່ອເພີ່ມປະສິດທິພາບໃນການປະຕິບັດງານຂອງ ຂອງ ມຊ ໃຫ້ມີຄວາມວ່ອງໄວ, ກວດສອບໄດ້ ແລະ ທັນກັບສະພາບການໃນຍຸກດິຈິທັອບ.
ໃນຕອນບ່າຍ ວັນທີ 13 ກໍລະກົດ 2026 ຜ່ານມານີ້, ຄະນະອາຈານ ຈາກມະຫາວິທະຍາໄລ ນາລັນດາ (Nalanda University) ປະເທດອິນເດຍ ນໍາໂດຍ ທ່ານ ຮສ. ດຣ. ກີ ດາວາລາ (Assoc. Prof. Dr. Kishore Dhavala), ຮອງຄະນະບໍດີ ຝ່າຍພົວພັນ ແລະ ການຮ່ວມມືສາກົນ, ຄະນະສິ່ງແວດລ້ອມ ແລະ ນິເວດສຶກສາ ທັງເປັນຫົວໜ້າສູນສຶກສາອາຊີຕາເວັນອອກສ່ຽງໃຕ້. ໄດ້ມາຢ້ຽມຢາມ ແລະ ປຶກສາຫາລືວຽກງານການຮ່ວມມືທາງດ້ານວິຊາການຮ່ວມກັບ ມະຫາວິທະຍາໄລແຫ່ງຊາດ(ມຊ). ການພົບປະດັ່ງກ່າວ ໄດ້ຈັດຂຶ້ນຢູ່ທີ່ຫ້ອງປະຊຸມ 205 ຕຶກສຳນັກງານຜູ້ອໍານວຍການໃຫຍ່ ມຊ ໂດຍມີ ທ່ານ ອໍາເຄັງ ເພັງລາສີ ຮອງຫົວໜ້າຫ້ອງການ ສັງລວມ ແລະພົວພັນຕ່າງປະເທດ ມຊ, ມີຫົວໜ້າຄະນະວິຊາ ແລະ ພະນັກງານທີ່ກ່ຽວຂ້ອງໃຫ້ການຕ້ອນຮັບ.
ຈຸດປະສົງການມາຢ້ຽມຢາມ ມຊ ຂອງຄະນະອາຈານ ມະຫາວິທະຍາໄລ ນາລັນດາ ປະເທດອິນເດຍ ໃນຄັ້ງນີ້, ແມ່ນເພື່ອປຶກສາຫາລື ແລະແລກປ່ຽນຄໍາຄິດເຫັນກຽວກັບການຮ່ວມມືດ້ານວິຊາການເຊິ່ງກັນ ແລະກັນ, ເຊິ່ງເປັນສ່ວນໜຶ່ງຂອງການສົ່ງເສີມການຮ່ວມມືພາຍໃຕ້ເຄືອຂ່າຍມະຫາວິທະຍາໄລອາຊຽນ-ອິນເດຍ (ASEAN-India Network of Universities ຫຼື AINU) ທີ່ ມຊ ເປັນສະມາຊິກ ແລະ ມະຫາວິທະຍາໄລນາລັນດາ ເປັນຜູ້ປະສານງານຫຼັກ; ໃນນັ້ນ
ຫົວຂໍ້ການປຶກສາຫາລືທີ່ສຳຄັນ ແມ່ນການແລກປ່ຽນຄູ-ອາຈານ ແລະ ນັກສຶກສາ ລະຫວ່າງສອງສະຖາບັນ, ການສະໜອງທຶນການສຶກສາ ແລະ ໂອກາດໃນການເຂົ້າສຶກສາຕໍ່ໃນລະດັບປະລິນຍາໂທ ແລະ ປະລິນຍາເອກ ໃຫ້ແກ່ນັກສຶກສາ ແລະ ບຸກຄະລາກອນຂອງ ມຊ. ນອກຈາກນີ້, ຍັງໄດ້ປຶກສາຫາລືກ່ຽວກັບການຈັດຕັ້ງປະຕິບັດໂຄງການແລກປ່ຽນອາຈານສອນໃນໄລຍະຕໍ່ໄປ (AINU-FEP), ການຮ່ວມມືກັບສູນສຶກສາອາຊີຕາເວັນອອກສ່ຽງໃຕ້ ທີ່ຫາກໍສ້າງຕັ້ງຂຶ້ນໃໝ່ ຂອງມະຫາວິທະຍາໄລນາລັນດາ, ການຮ່ວມມື ແລະ ການເຂົ້າຮ່ວມໃນການລິເລີ່ມດ້ານການສຶກສາຊັ້ນສູງ ຂອງກອງປະຊຸມສຸດຍອດອາຊຽນ-ອິນເດຍ ແລະ ເອເຊຍຕາເວັນອອກ (ASEAN-India and East Asia Summit Higher Education Initiatives) ໃນຄັ້ງຕໍ່ໄປ ທີ່ຄາດວ່າຈະຈັດຂຶ້ນຢູ່ປະເທດອິນເດຍ.
ມະຫາວິທະຍາໄລນາລັນດາ ເປັນສະຖາບັນການສຶກສາ ແລະ ວິໄຈຊັ້ນນຳລະດັບສາກົນ ທີ່ມີຄວາມສຳຄັນລະດັບຊາດ ພາຍໃຕ້ການຊີ້ນຳຂອງກະຊວງການຕ່າງປະເທດ ປະເທດອິນເດຍ ໂດຍໄດ້ຮັບການສະໜັບສະໜູນຈາກ 18 ປະເທດ ຜ່ານການລົງນາມໃນບົດບັນທຶກຄວາມເຂົ້າໃຈ. ການຢ້ຽມຢາມ ແລະ ການຮ່ວມມືໃນຄັ້ງນີ້ ຖືເປັນບາດກ້າວສຳຄັນໃນການຍົກລະດັບຄຸນນະພາບການສຶກສາ, ຮັດແໜ້ນສາຍພົວພັນ ທາງການທູດດ້ານການສຶກສາ ແລະ ເປີດໂອກາດໃຫ້ແກ່ນັກສຶກສາ ມຊ ໄດ້ເຂົ້າເຖິງແຫຼ່ງທຶນການສຶກສາ ແລະ ການຄົ້ນຄວ້າໃນລະດັບສາກົນຫຼາຍຂຶ້ນ.
ພິທີປະກາດຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ (ມຊ) ອອກພັກການ-ຮັບອຸດໜູນບໍານານ ແລະ ແຕ່ງຕັ້ງຜູ້ອຳນວຍການໃຫຍ່ ຜູ້ໃໝ່ ໄດ້ຈັດຂຶ້ນເມື່ອວັນທີ 15 ກໍລະກົດ 2026 ທີ່ສະໂມສອນ ຄະນະເສດຖະສາດ ແລະ ບໍລິຫານທຸລະກິດ, ມະຫາວິທະຍາໄລແຫ່ງຊາດ (ມຊ) ໂດຍພາຍໃຕ້ການເປັນປະທານຂອງ ທ່ານ ຮສ.ປອ. ທອງສະລິດ ມັງໜໍ່ເມກ ຮອງນາຍົກລັດຖະມົນຕີ, ລັດຖະມົນຕີ ກະຊວງສຶກສາທິການ ແລະ ກິລາ, ມີຮອງລັດຖະມົນຕີ, ຜູ້ຕາງໜ້າຈາກຄະນະຈັດຕັ້ງສູນກາງພັກ, ຫົວໜ້າຫ້ອງການ, ຫົວໜ້າກົມ, ຜູ້ອຳນວຍການໃຫຍ່ ມຊ, ຫົວໜ້າຄະນະວິຊາ, ຄູ-ອາຈານ ແລະ ພະນັກງານພາຍໃນ ມຊ ເຂົ້າຮ່ວມຢ່າງພ້ອມພຽງ.
ໃນໂອກາດນີ້, ທ່ານ ທົງສັກ ກົມມະເມືອງ ຮອງຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ໄດ້ຜ່ານດຳລັດຂອງນາຍົກລັດຖະມົນຕີ ສະບັບເລກທີ 177/ນຍ, ລົງວັນທີ 05 ມິຖຸນາ 2026 ວ່າດ້ວຍການອະນຸມັດໃຫ້ພະນັກງານການນຳ ອອກພັກການ-ຮັບອຸດໜູນບໍານານ, ນາຍົກລັດຖະມົນຕີ ໄດ້ອະນຸມັດໃຫ້ ທ່ານ ສຈ. ປອ. ເດຊານຸລາດ ແສນດວງເດດ ຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ, ກະຊວງສຶກສາທິການ ແລະ ກິລາ ລວມອາຍຸກະສຽນ 60 ປີ, ລວມອາຍຸການ 37 ປີ ອອກພັກການ-ຮັບອຸດໜູນບໍານານ; ຜ່ານດໍາລັດຂອງທ່ານນາຍົກລັດຖະມົນຕີ ສະບັບເລກທີ 222/ນຍ, ລົງວັນທີ 07 ກໍລະກົດ 2026 ວ່າດ້ວຍການແຕ່ງຕັ້ງຜູ້ອໍານວຍການໃຫຍ່ ມຊ ໂດຍແຕ່ງຕັ້ງ ທ່ານ ຮສ. ປອ. ສິນທະວອນ ດາລາວົງ ເປັນຜູ້ອຳນວຍການໃຫຍ່ ມຊ.
ຈາກນັ້ນ, ທ່ານ ສຈ. ປອ. ເດຊານຸລາດ ແສນດວງເດດ ໄດ້ຂຶ້ນກ່າວສະແດງຄວາມຮູ້ສຶກ, ໂດຍທ່ານໄດ້ຫວນຄືນເສັ້ນທາງການເຮັດວຽກຕະຫຼອດໄລຍະ 41 ປີ (ນັບແຕ່ເປັນນັກສຶກສາ 4 ປີ, ເປັນຄູສອນ 7 ປີ ແລະ ເປັນຄູສອນພ້ອມທັງຜູ້ບໍລິຫານ ມຊ 30 ປີ). ທ່ານໄດ້ຜ່ານຜ່າຄວາມຫຍຸ້ງຍາກຫຼາຍປະການ ແລະ ມີສ່ວນຮ່ວມໃນການພັດທະນາ ມຊ ໃຫ້ເຕີບໃຫຍ່ຂະຫຍາຍຕົວ, ທ່ານຍັງໄດ້ຝາກຄວາມຫວັງ ແລະ ຄວາມເຊື່ອໝັ້ນຕໍ່ຄະນະບໍລິຫານງານຊຸດໃໝ່ ທີ່ຈະມາສືບຕໍ່ນຳພາ ມຊ ໃຫ້ກ້າວຂຶ້ນສູ່ຜົນສຳເລັດໃໝ່ທີ່ຍິ່ງໃຫຍ່ກວ່າເກົ່າ.
ໂອກາດດັ່ງກ່າວ, ທ່ານ ຮສ. ປອ. ທອງສະລິດ ມັງໜໍ່ເມກ ໃຫ້ມີຄຳເຫັນໂອ້ລົມ ແລະ ສະແດງຄວາມຍ້ອງຍໍຊົມເຊີຍ ຕໍ່ ທ່ານ ສຈ.ປອ. ເດຊານຸລາດ ແສນດວງເດດ ທີ່ໄດ້ທຸ່ມເທສະຕິປັນຍາ ແລະ ເຫື່ອແຮງເຂົ້າໃນການພັດທະນາການສຶກສາຊັ້ນສູງຕະຫຼອດໄລຍະການເຮັດວຽກທີ່ຜ່ານມາ. ພ້ອມດຽວກັນນັ້ນ, ທ່ານຮອງນາຍົກລັດຖະມົນຕີ ຍັງໄດ້ເນັ້ນໜັກໃຫ້ ທ່ານຜູ້ອຳນວຍການໃຫຍ່ ມຊ ຄົນໃໝ່ ຈົ່ງສືບຕໍ່ຮັກສາມູນເຊື້ອອັນດີງາມ, ເພີ່ມທະວີຄວາມສາມັກຄີເປັນເອກະພາບພາຍໃນຄະນະນຳ, ເອົາໃຈໃສ່ປັບປຸງຄຸນນະພາບການຮຽນ-ການສອນ, ການຄົ້ນຄວ້າວິທະຍາສາດ ແລະ ຫັນການຄຸ້ມຄອງບໍລິຫານ ມຊ ໃຫ້ກ້າວໄປສູ່ຄວາມທັນສະໄໝ ແລະ ມີຄຸນນະພາບໃນລະດັບສາກົນ ເພື່ອປະກອບສ່ວນເຂົ້າໃນການພັດທະນາຊັບພະຍາກອນມະນຸດຂອງຊາດຢ່າງແທ້ຈິງ.
ພ້ອມນັ້ນ, ທ່ານຍັງໄດ້ມີຄໍາເຫັນຊີ້ນໍາ ຄື: ບັນຫາດ້ານແນວຄິດການເມືອງ ແລະ ລະບຽບການ ຕ້ອງມີການຕັກເຕືອນບຸກຄະລາກອນ ບາງສ່ວນ ທີ່ຍັງຂາດຄວາມເປັນແບບຢ່າງ, ບໍ່ເຄົາລົບລະບຽບກາຕິກາ, ຂາດຄວາມສາມັກຄີ ແລະ ມັກແລ່ນຊັ້ນແລ່ນຕຳແໜ່ງ ແຕ່ບາດເຮັດວຽກຕົວຈິງພັດບໍ່ໄດ້ຕາມຄາດໝາຍ; ການຍົກລະດັບມາດຕະຖານການສຶກສາ ເນັ້ນໃສ່ການເພີ່ມວຸດທິການສຶກສາ (ປອ, ຮສ, ສຈ) ຂອງຄູ-ອາຈານ ໃຫ້ໄດ້ມາດຕະຖານສາກົນ ເພື່ອໃຫ້ເປັນທີ່ຍອມຮັບ ແລະ ເຊື່ອມໂຍງກັບພາກພື້ນ ໂດຍສະເພາະຢູ່ ມຊ ແລະ ມະຫາວິທະຍາໄລສ່ວນພາກ (ຈຳປາສັກ, ສະຫວັນນະເຂດ, ຫຼວງພະບາງ); ການໂຄສະນາ ແລະ ດຶງດູດນັກສຶກສາຊົມເຊີຍການເຮັດວຽກດ້ານການໂຄສະນາຜ່ານສື່ຕ່າງໆ, ພ້ອມທັງເນັ້ນການຖອດຖອນບົດຮຽນຈາກກົນໄກເກົ່າ ແລະ ສ້າງສິ່ງອຳນວຍຄວາມສະດວກໃຫ້ແກ່ຜູ້ຮຽນ-ຜູ້ສອນ; ການປັບປຸງການບໍລິຫານຮ່ວມກັນ ປຸກລະດົມໃຫ້ທຸກຄະນະວິຊາຫັນ "ວິກິດໃຫ້ເປັນໂອກາດ" ໂດຍການປັບປຸງທັງວຽກງານພັກ ແລະ ການບໍລິຫານຈັດການໃຫ້ຖືກຕ້ອງຕາມກົດລະບຽບ ເພື່ອລຶບລ້າງຄຳນິນທາ ແລະ ກອບກູ້ຊື່ສຽງ, ກຽດສັກສີຂອງຂົງເຂດການສຶກສາຄືນມາ ເພື່ອໃຫ້ພັກ, ລັດ ແລະ ປະຊາຊົນເກີດຄວາມເຊື່ອໝັ້ນ.
ໃນຕອນບ່າຍ ວັນທີ 14 ກໍລະກົດ 2026, ທີ່ຜ່ານມາ ທີ່ຫ້ອງຮັບແຂກ VIP ຕຶກສຳນັກງານ ຜູ້ອໍານວຍການໃຫຍ່ ມະຫາວິທະຍາໄລແຫ່ງຊາດ (ມຊ), ທ່ານ ສຈ.ປອ. ພູເພັດ ກ່ຽວພິລາວົງ, ຮອງຜູ້ອໍານວຍການໃຫຍ່ ມຊ ພ້ອມດ້ວຍ ພະນັກງານທີ່ກ່ຽວຂ້ອງ ໄດ້ຕ້ອນຮັບການມາຢ້ຽມຢາມ ຂອງຄະນະຜູ້ແທນ ມະຫາວິທະຍາໄລ Southwest Forestry University ຈາກສາທາລະນະລັດ ປະຊາຊົນຈີນ.
ການພົບປະກັນຄັ້ງນີ້, ທັງສອງຝ່າຍໄດ້ ປຶກສາຫາລື ແລະ ແລກປ່ຽນຄວາມຄິດເຫັນ ແລະ ກໍານົດທິດທາງການຮ່ວມມືໃນຫຼາຍປະເດັນສໍາຄັນ ໂດຍສະເພາະແມ່ນການຮ່ວມມືດ້ານວຽກງານວິຊາການ; ເຊິ່ງປະກອບດ້ວຍ ການເຮັດບົດໂຄງການວິໄຈຮ່ວມກັນ, ການພັດທະນາຫຼັກສູດການສຶກສາໃນລະດັບປະລິນຍາເອກ ແລະ ການສົ່ງເສີມການແລກປ່ຽນນັກສຶກສາລະຫວ່າງສອງສະຖາບັນ. ນອກຈາກນີ້, ທັງສອງຝ່າຍຍັງໄດ້ເນັ້ນໜັກໃສ່ການຮ່ວມມືໃນຂະແໜງການສິ່ງແວດລ້ອມ ເຊິ່ງເປັນປັດໄຈທີ່ມີຄວາມສຳຄັນ ແລະ ເປັນຈຸດສຸມໃນການພັດທະນາແບບຍືນຍົງ ໂດຍອາໄສຄວາມຊ່ຽວຊານ ແລະ ບົດຮຽນຈາກ ມະຫາວິທະຍາໄລ Southwest Forestry University ເພື່ອສ້າງບຸກຄະລາກອນທີ່ມີຄຸນນະພາບ ແລະ ຮອງຮັບການພັດທະນາໃນອະນາຄົດ; ເຊິ່ງການຮ່ວມມືດັ່ງກ່າວ ຫາກປະກົດຜົນເປັນຈິງ ຖືເປັນຂີດ
ໝາຍອັນດີໃນການຮັດແໜ້ນຄວາມສາຍພົວພັນທາງດ້ານວິຊາການ ແລະ ການຮ່ວມມື ສາກົນ ຂອງ ມະຫາວິທະຍາໄລແຫ່ງຊາດ ລາວ ໃຫ້ໄດ້ຮັບການພັດທະນາ ແລະ ກ້າວໜ້າຢ່າງບໍ່ຢຸດຢັ້ງ.
