ສະຖາບັນຂົງຈື (ສຂຈ) ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີສະເຫຼີມສະຫຼອງວັນຂົງຈືໂລກ ຄົບຮອບ 20 ປີ ແລະ ເປີດສົກຮຽນໃໝ່ສົກຮຽນ 2024-2025 ຂຶ້ນໃນວັນທີ 23 ພະຈິກ ນີ້ ທີ່ສະຖາບັນຂົງຈື ໂດຍການເປັນກຽດເຂົ້າຮ່ວມຂອງທ່ານ ຮສ. ປອ. ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ (ສສກ), ມີທ່ານນາງ ຟາງຫົງ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ, ທ່ານ ຮສ. ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມຊ, ມີຜູ້ອໍານວຍການສະຖາບັນຂົງຈືຝ່າຍລາວ, ຝ່າຍຈີນ ພ້ອມດ້ວຍແຂກຖືກເຊີນທີ່ກ່ຽວຂ້ອງເຂົ້າຮ່ວມ.

ພາຍຫຼັງທ່ານ ຫຼົວໝິງ ຜູ້ອຳນວຍການສະຖາບັນຂົງຈືຝ່າຍຈີນໄດ້ຂຶ້ນລາຍງານກ່ຽວກັບວັນຂົງຈືໂລກ ຄົບຮອບ 20 ປີ. ຈາກນັ້ນ, ທ່ານ ຄຳຮຸ່ງ ຈັນທະວົງ ຜູ້ອຳນວຍການສະຖາບັນຂົງຈືຝ່າຍລາວໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານປະຈໍາສົກຮຽນ 2023-2024 ແລະ ແຜນການປີ 2024-2025 ວ່າ: ສະຖາບັນຂົງຈື ໄດ້ສ້າງຕັ້ງຂຶ້ນໃນວັນທີ 23 ມີນາ 2010 ປັດຈຸບັນສະຖາບັນຂົງຈືມີຫ້ອງຮຽນຂົງຈືທີ່ຂຶ້ນກັບ 5 ແຫ່ງຄື: ຫ້ອງຮຽນຂົງຈື ມ.ສ ສາທິດ, ມ.ສ ວຽງຈັນ, ໂຮງຮຽນຊົນເຜົ່າກິນນອນວັງວຽງ, ສະຖາບັນການເມືອງ-ການປົກຄອງແຫ່ງຊາດ ແລະ ວິທະຍຸກະຈາຍສຽງແຫ່ງຊາດລາວ, ສະຖາບັນຂົງຈືມີຜູ້ອໍານວຍການຝ່າຍລາວ 1 ທ່ານ, ຝ່າຍຈີນ 1 ທ່ານ, ຮອງຜູ້ອໍານວຍການ 3 ທ່ານ ປະກອບດ້ວຍສອງພາກສ່ວນຄື: ຝ່າຍລາວ ແລະ ຝ່າຍຈີນ. ຝ່າຍລາວມີພະນັກງານທັງໝົດ 10 ທ່ານ, ຝ່າຍຈີນມີພະນັກງານຄູ-ອາຈານ-ອາສາສະໝັກທັງໝົດ 42 ທ່ານ ຍິງ 38 ທ່ານ, ໃນນີ້ມີຊ່ຽວຊານ 6 ທ່ານ.

ໃນສົກຮຽນ 2023-2024 ສະຖາບັນຂົງຈືໄດ້ສໍາເລັດການຈັດສອບເສັງຄັດເລືອກນັກສຶກສາເຂົ້າຮຽນ ແລະ ລົງທະບຽນຮັບນັກສຶກສາຫຼັກສູດປະລິນຍາຕີສາຂາຄູພາສາຈີນປີ 1 ສົກຮຽນ 2024 ຈໍານວນ 106 ຄົນ, ປັດຈຸບັນສະຖາບັນຂົງຈືມີນັກສຶກສາປີ 1-ປີ 4 ຈໍານວນທັງໝົດ 336 ຄົນ ຍິງ 103 ຄົນ, ໄດ້ສໍາເລັດການຝຶກອົບຮົບພາສາຈີນສະເພາະໃຫ້ຄະນະນໍາຄະນະຈັດຕັ້ງສູນກາງພັກປີນີ້ຖືວ່າເປັນປີທີ 3, ສໍາເລັດການຝຶກອົບຮົມຫຼັກສູດບໍາລຸງພາສາຈີນໃຫ້ແກ່ກອງກໍາລັງປ້ອງກັນຄວາມສະຫງົບກົມໃຫຍ່ສັນຕິບານປີນີ້ເປັນປີທີ 2, ສໍາເລັດການດໍາເນີນຂໍ້ຕົກລົງທຶນນະໂຍບາຍໃຫ້ແກ່​ນັກສຶກ​ສາ​​ທຸກ​ຍາກ, ຮຽນ​ດີ​ຮຽນ​ເກັ່ງທີ່​ສະ​ຖາ​ບັນ​ຂົງ​ຈືຊຸດທີ 27-28 ປະຈໍາສົກປີ 2023-2024 ທັງໝົດ 240 ທຶນຕໍ່ປີ, ສໍາເລັດການປະເມີນການສອນຂອງອາຈານໃນຫຼັກສູດປະລິນຍາຕີສາຂາຄູພາສາຈີນ, ພາກບໍາລຸງພາສາຈີນ, ຫ້ອງຮຽນຂົງຈື ແລະ ຈຸດຮຽນພາສາຈີນຂອງສະຖາບັນຂົງຈືປະຈໍາສົກຮຽນ 2023-2024 ຈໍານວນ 2 ຄັ້ງ. ນອກຈາກນີ້ກໍໍຍັງມີຜົນງານດ້ານອື່ນໆອີກ.

ໃນພິທີໄດ້ມອບນາມມະຍົດພັດທະນາດີເດັ່ນໃຫ້ພະນັກງານຄູ-ອາຈານ, ມອບໃບຍ້ອງຍໍຂັ້ນລັດຖະມົນຕີກະຊວງສຶກສາທິການ ແລະ ກິລາ ແລະ ຂັ້ນອະທິການບໍດີ ມຊ ໃຫ້ຄູ-ອາຈານທີ່ມີຜົນງານດີເດັ່ນໃນໄລຍະ 1 ປີຜ່ານມາ ໂດຍການໃຫ້ກຽດມອບຂອງທ່ານ ຮສ. ປອ. ພຸດ ສິມມາລາວົງ ແລະ ທ່ານ ຮສ. ປອ. ເດຊານຸລາດ ແສນດວງເດດ, ຈາກນັ້ນໄດ້ມີພິທີເຊັນສັນຍາສືບຕໍ່ມອບທຶນການສຶກສາໃຫ້ແກ່​ນັກສຶກ​ສາ​​ທຸກ​ຍາກ, ຮຽນ​ດີ​ຮຽນ​ເກັ່ງຂອງທະນາຄານລາວ-ຈີນໃຫ້ແກ່ ສຂຈ.

ພາບບັນຍາກາດ

ຄະນະເສດຖະສາດ ແລະບໍລິຫານທຸລະກິດ (ຄສບ) ມະຫາວິທະຍາໄລແຫ່ງຊາດ (ມຊ) ໄດ້ເປີດງານຕະຫຼາດນັດນັກສຶກສາ ຄສບ ຄັ້ງທີ 17 ປະຈຳສົກຮຽນ 2024-2025 ຂຶ້ນໃນວັນທີ 18 ພະຈິກນີ້, ທີ່ ມຊ ໂດຍການເຂົ້າຮ່ວມ ເປັນປະທານ ແລະຕັດແຖບຜ້າ ເປີດງານ ຂອງ ທ່ານ ຮສ.ປອ ເດຊານຸລາດ ແສນດວງເດດ ວ່າການແທນອະທິການບໍດີ ມຊ, ມີທ່ານ ບຸນທອນ ສຸຂະວົງ ຮອງຄະນະບໍດີ ຄສບ ຜູ້ຊີ້ນໍາວຽກງານການຈັດງານຕະຫຼາດນັດນັກສຶກສາ ຄສບ ຄັ້ງທີ 17 ປະຈຳສົກຮຽນ 2024-2025, ມີຄູ-ອາຈານ, ນັກສຶກສາ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ການຈັດງານຕະຫຼາດນັດນັກສຶກສາ ຄສບ ຄັ້ງນີ້, ແມ່ນໄດ້ດຳເນີນມາເປັນປີທີ 17 ແລ້ວ, ເຊິ່ງຄວາມເປັນມາຂອງງານດັ່ງ ແມ່ນແນວຄິດລິເລີ່ມຂອງຄະນະອາຈານໃນສາຂາບໍລິຫານທຸລະກິດ ແລະໄດ້ເລີ່ມຈັດຕັ້ງປະຕິບັດມາແຕ່ປີ 2007. ແຕ່ເນື່ອງຈາກເຫັນໄດ້ຄວາມສໍາຄັນຂອງການຈັດຕັ້ງປະຕິບັດທີ່ສອດຄ່ອງກັບ ການໝູນໃຊ້ທິດສະດີເຂົ້າໃນພາກປະຕິບັດຕົວຈິງ; ເຊິ່ງບໍ່ແມ່ນແຕ່ວິຊາການຕະຫຼາດເທົ່ານັ້ນ ຍັງກວມເອົາບັນດາວິຊາຕ່າງໆທີ່ປີ່ນອ້ອມການເຮັດທຸລະກິດ ເຊັ່ນ ການວາງແຜນການຜະລິດ, ການຄາດຄະເນຄວາມຕ້ອງການ ແລະ ການສະໜອງ, ການຄຸ້ມຄອງເຄື່ອງໃນສາງ, ການວາງແຜນການເງິນ,​ ການບັນທຶກບັນຊີປະຈຳວັນ ແລະການສະຫຼຸບລາຍຮັບ-ລາຍຈ່າຍ, ການບໍລິຫານຕົ້ນທຶນ, ການພົວພັນກັບບັນດາຫົວໜ່ວຍທຸລະກິດຕ່າງໆເປັນຕົ້ນ. ດັ່ງນັ້ນ, ງານຕະຫຼາດນັດນັກສຶກສາ ຄສບ ຈຶ່ງໄດ້ຖືກຈັດຂຶ້ນເປັນທຸກປີ ແລະ ໄດ້ໝູນວຽນປ່ຽນແຜນກັນເປັນເຈົ້າພາບຂອງບັນດາ  05 ພາກວິຊາ ໃນ ຄສບ  ແລະ ໃນສົກຮຽນນີ້ ກໍແມ່ນພາກວິຊາການເງິນ ແລະ ການທະນາຄານ ເປັນເຈົ້າການໃນການຈັດຕັ້ງປະຕິບັດ ພ້ອມນັ້ນພາຍໃນງານຄັ້ງນີ້, ບັນດາຮ້ານຄ້າທີ່ເຂົ້າຮ່ວມແມ່ນໄດ້ແຂ່ງຂັນກັນເພື່ອຍາດຊິງລາງວັນການບໍລິຫານດີເດັ່ນ, ນະວັດຕະກຳດີເດັ່ນ, ເປັນມິດກັບສິ່ງແວດລ້ອມ, ແລະ ຮ້ານຍອດນິຍົມ.

ງານຕະຫຼາດນັດໃນຄັ້ງນີ້, ມີທັງໝົດ 24 ຫ້ອງວາງສະແດງ-ຂາຍສິນຄ້າ, ປະກອບມີ ຫຼາກຫຼາຍປະເພດສິນຄ້າ ລວມມີເຄື່ອງບໍລິໂພກ-ອຸປະໂພກ ໂດຍແມ່ນນັກສຶກສາປີທີ 3 ຂອງ ຄສບ ຈາກ 5 ພາກວິຊາ (ທັງລະບົບປົກະຕິ, ລະບົບຕໍ່ເນື່ອງ ແລະ ລະບົບພາສາອັງກິດ), ຄູູ່ຮ່ວມພັດທະນາຂອງ ຄສບ, ວິທະຍາໄລສຸສະກະ, ວິທະຍາໄລສຸກສະຫວັດ, ສະຖາບັນການທະນາຄານ, ມີຮ້ານຄ້າຂອງຄູ-ອາຈານ ແລະ ຄະນະປີ່ນອ້ອມ ເປັນຜູ້ນໍາເອົາສິນຄ້າມາເຂົ້າຮ່ວມວາງສະແດງ-ຂາຍສິນຄ້າໃນຄັ້ງນີ້. ພາຍຫຼັງທີ່ສໍາເລັດງານໃນຄັ້ງນີ້, ຈະໄດ້ມີການທົບທວນຄືນການຈັດຕັ້ງປະຕິບັດຂໍ້ດີ ແລະ ຂໍ້ບົກຜ່ອງ ເພື່ອນໍາໄປສູ່ການແກ້ໄຂ, ເອົາໄປນໍາໃຊ້ເຂົ້າໃນອາຊີບ, ປະກອບກິດຈະການໃນຕົວຈິງໃນອະນາຄົດ.

ງານຕະຫຼາດນັດນັກສຶກສາ ຄສບ ໃນຄັ້ງນີ້, ຈະດໍາເນີນໄປເປັນ 05 ວັນ ເລີ່ມແຕ່ 18 ຫາ 22 ພະຈິກ 2024 ຈຶ່ງຈະໄດ້ປິດລົງ.

ພາບບັນຍາກາດ

ຄະນະວິທະຍາສາດສັງຄົມ (ຄສຄ) ມະຫາວິທະຍາໄລແຫ່ງຊາດ (ມຊ) ພິທີເປີດນຳໃຊ້ລະບົບຖານຂໍ້ມູນພາບຖ່າຍດາວທຽມ (Lao IDN) ຈາກສູນຂໍ້ມູນສັງເກດການໂລກແຫ່ງຊາດຈີນ ສະຖາບັນນະວັດຕະກຳຂໍ້-ມູນຂ່າວສານ,ສະຖາບັນວິທະຍາສາດແຫ່ງຊາດ ສປ ຈີນ ແລະ ມອບ-ຮັບໃບຢັ້ງຢືນຝຶກອົບຮົມການນຳໃຊ້ ຖານຂໍ້ມູນພາບຖ່າຍດາວທຽມ ທີ່ຫ້ອງປະຊຸມສະຖາບັນຂົງຈື ໂດຍການເປັນປະທານຂອງທ່ານ ຮສ. ປອ. ເດຊານຸລາດ ແສນດວງເດດ ວ່າການອະທິການບໍດີ ມຊ, ທ່ານ ສຈ. ລີ ກົວຈິງ ຜູ້ອຳນວຍການສູນຂໍ້ມູນສັງເກດການໂລກແຫ່ງຊາດຈີນ ສະຖາບັນນະວັດຕະກຳຂໍ້ມູນຂ່າວສານ ວິທະຍາສາດແຫ່ງຊາດຈີນ, ມີບັນດາແຂກຖືກເຊີນ, ພະນັກງານ, ຄູ-ອາຈານ ຈາກພາກສ່ວນທີ່ກ່ຽວຂ້ອງເຂົ້າຮ່ວມ.

          ໃນພິທີໄດ້ມີການລົງນາມບົດບັນຄວາມເຂົ້າໃຈໃນການນຳໃຊ້ ຫ້ອງປະຕິບັດການລະບົບຖານຂໍ້ມູນພາບຖ່າຍດາວທຽມ ຮ່ວມມື ລາວ-ຈີນ ເຊິ່ງລົງນາມຕາງໜ້າຝ່າຍ ມຊ ໂດຍທ່ານ ຮສ. ປອ. ເດຊານຸລາດ ແສນດວງເດດ ວ່າການອະທິການບໍດີ ມຊ (ຝ່າຍລາວ) ແລະ ລົງນາມຝ່າຍຜູ້ອຳນວຍການສູນຂໍ້ມູນສັງເກດການໂລກແຫ່ງຊາດ ສປ ຈີນ, ສະຖາບັນນະວັດຕະກຳຂໍ້-ມູນຂ່າວສານ, ສະຖາບັນວິທະຍາສາດແຫ່ງຊາດ ສປ ຈີນ ໂດຍ ທ່ານ ສຈ. ລີ ກົວຈິງ; ລະບົບຂໍ້ມູນພາບຖ່າຍດາວທຽມທີ່ນຳມາມອບໃຫ້ ມຊ ກໍຄື ຄສຄ ນຳໃຊ້ມີທັງໝົດ 7 ດວງ (ຊື່ວ່າ ກາວເຟີນ) ໂດຍຈະນຳໃຊ້ເຂົ້າໃນການສິດສອນນັກສຶກສາ ແລະວຽກງານຕ່າງໆທີ່ກ່ຽວຂ້ອງກັບການສຳຫຼວດພື້ນທີ່ ພູມສັນຖານຂອງ ສປປ ລາວ ແລະເພື່ອເປັນການຕອບສະໜອງຂໍ້ມູນທີ່ຈຳເປັນໃຫ້ກັບວຽກງານທີ່ກ່ຽວຂ້ອງເຊັ່ນ:  ດ້ານກະສິກຳ, ດ້ານການກໍ່ສ້າງໂຄງລ່າງພື້ນຖານ ເປັນຕົ້ນ.

ນອກນັ້ນ, ໃນໄລຍະຜ່ານມາ ທັງສອງຝ່າຍກໍໄດ້ມີການຈັດຝຶກອົບຮົມການນຳໃຊ້ ຫ້ອງປະຕິບັດການລະບົບຖານຂໍ້ມູນພາບຖ່າຍດາວທຽມກາວເຟີນ ໂດຍມີພະນັກງານ, ວິຊາການຈາກກະຊວງ ແລະຂະແໜງການຕ່າງໆທີ່ກ່ຽວຂ້ອງເຂົ້າຮ່ວມຈຳນວນ 20 ຄົນ ເພື່ອໃຫ້ຮູ້ຈັກການນຳໃຊ້ລະບົບດັ່ງກ່າວ.

ໃນໂອກາດນີ້, ທ່ານ ຮສ. ປອ. ເດຊານຸລາດ ແສນດວງເດດ ກໍໄດ້ກ່າວມີຄຳເຫັນຕໍ່ທີ່ປະຊຸມໂດຍທ່ານໄດ້ໃຫ້ຮູ້ວ່າ: ປະຈຸບັນນີ້ເປັນຍຸກການຂະຫຍາຍຕົວຂອງເຕັກໂນໂລຊີທີ່ທັນສະໄໝ ສປ ຈີນ ເປັນປະເທດໜຶ່ງທີ່ຢູ່ແຖວໜ້າຂອງໂລກທີ່ມີການພັດທະນາ ໂດຍສະເພາະແມ່ນລະບົບພາບຖ່າຍດາວທຽມ ເຊິ່ງ ສປ ຈີນ ໄດ້ສ້າງເວັບໄຊເພື່ອເກັບຂໍ້ມູນສະເພາະຂອງພາບຖ່າຍດາວທຽມ,  ຂໍ້ມູນດັ່ງກ່າວນັ້ນ ເປັນປະໂຫຍດຫຼາຍໂດຍສະເພາະແມ່ນເພື່ອນຳມາປະກອບເຂົ້າໃນການຮັບມືດ້ານໄພພິບັດ, ດ້ານກະສິກຳ ແລະອື່ນໆ ໂດຍນຳໃຊ້ຕາມຄວາມເໝາະສົມ. ການຮ່ວມຂອງສອງຝ່າຍໃນຄັ້ງນີ້ ຖືເປັນອີກຂີດໝາຍສຳຄັນລະຫວ່າງ ມຊ ແລະ ສະຖາບັນວິທະຍາສາດແຫ່ງຊາດ ສປ ຈີນ ເວົ້າລວມກໍແມ່ນສອງຊາດ ລາວ-ຈີນ ຈີນ-ລາວ ໃຫ້ສືບຕໍ່ໄປ.

ພາບບັນຍາກາດ

ໃນວັນທີ 12 ພະຈິກ 2024 ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ (ສລຍ) ມະຫາວິທະຍາໄລແຫ່ງຊາດ (ມຊ) ໄດ້ຈັດງານພົບປະເພື່ອສົ່ງເສີມການໄປສຶກສາຢູ່ປະເທດຍີ່ປຸ່ນ ທີ່ສະຖາບັນດັ່ງກ່າວ, ໂດຍການເຂົ້າຮ່ວມຂອງທ່ານ ປອ. ພອນແກ້ວ ຈັນທະມາລີ ຜູ້ອຳນວຍການ ສລຍ, ມີທ່ານ Yoshiharu YONEYAMA ຫົວໜ້າທີ່ປຶກສາຍີ່ປຸ່ນ ປະຈຳ ສລຍ, ພ້ອມດ້ວຍແຂກຖືກເຊີນ, ພະນັກງານ, ຄູ-ອາຈານ ແລະຕົວແທນນັກຮຽນ, ນັກສຶກສາ ເຂົ້າຮ່ວມ.

          ຈຸດປະສົງຂອງ​ການ​ຈັດງານ​ແມ່ນ​ເພື່ອ​ເປັນ​ການ​ແລກປ່ຽນບົດຮຽນ ລະຫວ່າງ​ບັນດາມະຫາວິທະຍາ​ໄລ​ຍີ່ປຸ່ນ ​ແລະ ມະຫາວິທະຍາ​ໄລ​ແຫ່ງ​ຊາດ ພ້ອມ​ດຽວກັນ, ກໍ​ເພື່ອ​​ແຈ້ງ​ຂໍ້​ມູນ​ຂ່າວສານໃຫ້​ແກ່​ພະນັກ​ງານ, ອາຈານ ​ແລະ ນັກ​ສຶກສາລາ​ວ ທີ່​ຕ້ອງການ​ໄປ​ຮຽນຕໍ່ ປະລິນຍາ​ຕີ, ປະລິນຍາ​ໂທ ​ແລະປະລິນຍາ​ເອກ ຢູ່ທີ່ປະ​ເທດ​ຍີ່ປຸ່ນ ​ໃຫ້​ໄດ້ຮັບ​ຮູ້​ຂໍ້​ມູນ​ ​ແລະ ​ເງື່ອນ​ໄຂ​ຕ່າງໆຂອງ​​ມະ​ຫາ​ວິທະຍາ​ໄລຕ່າງໆ​ໃນ​ປະ​ເທດ​ຍີ່ປຸ່ນ ທີ່​ສາມາດ​ຮັບ​ເອົາ​ນັກສຶກສາລາວ​ເຂົ້າຮຽນ​ໄດ້ ນອກຈາກນີ້, ຍັງໄດ້ແນະນຳທຶນການສຶກສາຈາກລັດຖະບານຍີ່ປຸ່ນ ແລະ ທຶນການສຶກສາຂອງມະຫາວິທະຍາໄລຍີ່ປຸ່ນເພື່ອໃຫ້ ຄູ-ອາຈານ ແລະນັກສຶກສາ ກຽມຄວາມພ້ອມໃນການສະໝັກເອົາທຶນ. ໃນປີນີ້ໄດ້ຈັດຜ່ານ 2 ຮູບແບບຄື: ແບບເຊິ່ງໜ້າ ແລະ ອອນລາຍ ເພື່ອໃຫ້ທຸກທ່ານໄດ້ເຂົ້າເຖິງຂໍ້ມູນຂ່າວສານ ແລະ ສາມາດສອບຖາມໄດ້ໃນໄລຍະການດຳເນີນງານ; ງານຄັ້ງ​ນີ້​ ມີບັນດາ​ມະຫາວິທະຍາ​ໄລ​ຍີ່ປຸ່ນ ຈຳນວນ 9 ມະຫາວິທະຍາໄລເຂົ້າຮ່ວມ ແລະ ອົງກອນການສຶກສາຍີ່ປຸ່ນ. ງານພົບປະເພື່ອສົ່ງເສີມການໄປສຶກສາຢູ່ປະເທດຍີ່ປຸ່ນ ໄດ້ຈັດໃນຄັ້ງທຳອິດໃນປີ 2008 ແລະໄດ້ຈັດເປັນເປັນປະຈໍາທຸກປີ ຈົນເຖິງປັດຈຸບັນ, ໂດຍພາຍໃຕ້ການຮ່ວມມື ຂອງສະຖາບັນພັດທະນາຊັບພະຍາກອນມະນຸດລາວ-ຍີ່ປຸ່ນ ມຊ, ສະຖານທູດຍີ່ປຸ່ນປະຈຳລາວ ແລະ ອົງການໄຈກາປະຈໍາລາວປະຈໍາລາວ. ເຊິ່ງງານດັ່ງກ່າວໄດ້ດຳເນີນເປັນເວລາ 1 ວັນເຕັມ.

ພາບບັນຍາກາດ