ໃນລະຫວ່າງວັນທີ 10 ຫາ ວັນທີ 18 ຕຸລາ 2022 ນີ້, ທີມນັກຮຽນ ມັດທະຍົມປາຍ ເຊິ່ງເປັນຕົວແທນໃຫ້ນັກຮຽນ ມັດທະຍົມປາຍ ຂອງ ສ ປປ ລາວ (ໃນນາມທີມຊາດລາວ) ໄດ້ເດີນທາງໄປເຂົ້າຮ່ວມການແຂ່ງຂັນ ຫຸ່ນຍົນ ລະດັບໂລກ ໃນງານ First Global Challenge 2022 ທີ່ນະຄອນ ເຈນເນວາ ປະເທດສະວິດເວີແລນ, ໂດຍການນໍາພາທີມ ຂອງ ທ່ານ ອຈ. ປອ. ຂັນທະນູ ຫຼວງໄຊຊະນະ ຮອງຫົວໜ້າພະແນກວິຊາການ ຄະນະວິສະວະກໍາສາດ(ຄວສ) ມະຫາວິທະຍາໄລແຫ່ງຊາດ(ມຊ); ທ່ານ ປທ. ກະຕ່າຍ ໄຊຍະສົມບັດ ອາຈານສອນຈາກພາກວິຊາ ວິສະວະກໍາຄອມພິວເຕີ ແລະເຕັກໂນໂລຊີ ຂໍ້ມູນຂ່າວສານ ຄະນະວິສະວະກໍາສາດ ມຊ.

          ການແຂ່ງຂັນຫຸ່ນຍົນ ລະດັບໂລກ First Global Challenge 2022 ທີ່ນະຄອນ ເຈນເນວາ ປະເທດສະວິດເວີແລນ ໃນຄັ້ງນີ້, ທີມຕົວແທນນັກຮຽນມັດທະຍົມປາຍ ຂອງ ສ ປປ ລາວ (ທີມຊາດລາວ) ເຂົ້າຮ່ວມທັງໝົດ ມີ 5 ນ້ອງ ຄື: ນາງ ທິດາພອນ ວາລາກອນ ຈາກໂຮງຮຽນກຽດຕິສັກ ນາໆຊາດ, ທ້າວ ຈ່າຢີລົງທ່າວ ຕົງປາວທໍ່ ຈາກໂຮງຮຽນມັດທະຍົມສຶກສາ ສົມບູນວຽງຈັນ, ທ້າວ ກິດສະນະ ຈັນທະບັນດິດ,  ທ້າວ ສົມບູນ ມິດປະສົງ ແລະທ້າວ ພິພັກໄຊ ອິນຊີຊຽງໄໝ່  ຈາກໂຮງຮຽນພອນສະຫວັນ ແລະຊົນເຜົ່າ ກຽມມະຫາວິທະຍາໄລ ມະຫາວິທະຍາໄລແຫ່ງຊາດ, ເຊິ່ງໃນໄລຍະມື້ການແຂ່ງຂັນ ທີມຊາດລາວ ສາມາດສ້າງຜົນງານໄດ້ດີ ແລະໜ້າພາກພາກພູມໃຈຢ່າງຍິ່ງ, ເພາະໃນການແຂ່ງຂັນ Ranking Match 12 ນັດ ທີມຊາດລາວເຮົາ ຊະນະ 10 ນັດ, ສະເໝີ 1 ນັດ ແລະເສຍ 1 ນັດ.

          ໂຄງການນີ້, ເປັນໂຄງການ First Global Challenge ສະຫະລັດອາເມລິກາ ເຊິ່ງທາງພາກວິຊາ ວິສະວະກໍາຄອມພິວເຕີ ແລະເຕັກໂນໂລຊີ ຂໍ້ມູນຂ່າວສານ ຄະນະວິສະວະກໍາສາດ ມຊ ເປັນຜູ້ດູແລໂຄງການນີ້, ເຊິ່ງໄດ້ໃຫ້ກຸ່ມສະມາຊິກ ຫຸ່ນຍົນ “Champa Maker” ລົງໄປເຜີຍແຜ່ພາກທິດສະດີ ແລະເຝິກອົບຮົມໃຫ້ ນັກຮຽນມັດທະຍົມຕອນປາຍ ກຸ່ມເປົ້າໝາຍ ໃນຂອບເຂດນະຄອນຫຼວງວຽງຈັນ ເພື່ອໃຫ້ຮຽນຮູ້ ໂດຍໃຊ້ STEM (ວິທະຍາສາດ, ເທັກໂນໂລຊີ, ວິສະວະກໍາ ແລະຄະນິດສາດ) ເຂົ້າໃນການຄົ້ນຄິດປະດິດສ້າງ ແລະໄດ້ຈັດການແຂ່ງຂັນໃນ ນະຄອນຫຼວງວຽງຈັນ ເພື່ອຄັດເລືອກເອົາຕົວແທນນັກຮຽນ ໃນນາມທີມຊາດລາວ ເຂົ້າຮ່ວມການແຂ່ງຂັນ; ເຊິ່ງຜົນຂອງການແຂ່ງຂັນໂດຍລວມ ທີມຊາດລາວເຮົາ ຈົບການແຂ່ງຂັນ ໃນອັນດັບທີ 34 ຂອງໂລກ, ຈາກການເຂົ້າຮ່ວມແຂ່ງຂັນທັງໝົດ 160 ປະເທດ ທົ່ວໂລກ; ພ້ອມນັ້ນທີມຊາດລາວຍັງສາມາດ ຄວ້າລາງວັນ Safety Award (ຫຸ່ນຍົນປອດໄພ) ໃນງານການແຂ່ງຂັນ ກັບມາຝາກຊາວລາວເຮົາອີກດ້ວຍ.

The Steering Committee Meeting of the Advancing Strategic Management, Leadership and Fundraising in Higher Education in Asia (ASTRA) project was held on the 10th-11th October 2022 in Phuket, Thailand.

After the successful meeting in Laos in July, all partners had the chance to meet again to discuss the progress of the project and the implementation plan for the next 6 months. Further discussions were made concerning the WP.2 Design and WP.3 Capacity building Phase of the project.

Special focus was given on managerial and financial issues and on project’s progress report, which needs to be submitted on October 2022. Finally, the consortium had further discussions regarding the Leadership Course for ASTRA Hubs’ Managers, which will be carried out in Florence, Italy on 7-11 November 2022 and in Athens, Greece on 12-25 November 2022.

ໃນຕອນບ່າຍ, ວັນທີ 19 ຕຸລາ 2022 ຄະນະວິທະຍາສາດການກີລາ-ກາຍະກຳ​ (ຄວກ), ມະຫາວິທະຍາໄລແຫ່ງຊາດ(ມຊ). ໄດ້ຈັດພິທີ ສະຫຼຸບສົກຮຽນ 2021-2022 ແລະ ຜ່ານແຜນການ 2022-2023 ພ້ອມສະເຫຼີມສະຫຼອງວັນຄູແຫ່ງຊາດ 7 ຕຸລາ ທີ່ຫ້ອງປະຊຸມສະໂມສອນຊັ້ນສອງ ມຊ, ໂດຍການເປັນປະທານຂອງທ່ານ ປອ. ອິນຕອງ ເລີດສິນໄຊ ຄະນະບໍດີ ຄະນະວິທະຍາສາດການກິລາ-ກາຍະກຳ, ມີຮອງຄະນະບໍດີ, ມີບັນດາແຂກຖືກເຊີນ, ພະນັກງານ, ຄູ-ອາຈານ ແລະນັກສຶກສາພາຍໃນຄະນະດັ່ງກ່າວເຂົ້າຮ່ວມ.

          ໃນພິທີ, ທ່ານ ປອ. ອິນຕອງ ເລີດສິນໄຊ ໄດ້ຂຶ້ນຜ່ານບົດສະຫຼຸບ ປະຈຳສົກສຶກສາ 2021-2022 ເຊິ່ງທ່ານໄດ້ໃຫ້ຮູ້ວ່າ: ຄວກ ມີພາລະບົດບາດໜ້າທີ່ຫຼັກ 5 ປະການຄື: ການຈັດການຮຽນ-ການສອນ, ຄົ້ນຄວ້າວິທະຍາສາດ, ການບໍລິການວິຊາການໃຫ້ແກ່ສັງຄົມ, ການປົກປັກຮັກສາ-ສົ່ງເສີມວັດທະນະທຳອັນດີງາມຂອງຊາດ ແລະ ປະຕິບັດໜ້າທີ່ຕາມການມອບໝາຍ; ມີພະນັກງານ, ຄູ-ອາຈານ ທັງໝົດ 37 ຄົນ (ຍິງ 14 ຄົນ), ມີນັກສຶກສາທັງໝົດ 303 ຄົນ (ຍິງ 83), ໃນສົກສຶກສານີ້ ມີນັກສຶກສາທີ່ສຳເລັດການສຶກສາທັງໝົດ ຈຳນວນ 115 ຄົນ (ຍິງ 34 ຄົນ). ໃນຕະຫຼອດສົກສຶກສາ ທີ່ຜ່ານມາ ຄວກ ໄດ້ຕັ້ງໜ້າປະຕິບັດວຽກງານຕາມການມອບໝາຍຂອງຂັ້ນເທິງ, ເຊິ່ງໄດ້ຈັດຕັ້ງການເຜີຍແຜ່ເຊື່ອມຊຶມເອກະສານ 3 ວາລະແຫ່ງຊາດ, ດ້ານວຽກງານວິຊາການ ຈັດຕັ້ງການຮຽນ-ການສອນ, ນຳສົ່ງ ແລະຕິດຕາມຂະບວນເຝິກຫັດຂອງນັກສຶກສາ ປີທີ 4 ຢູ່ 15 ໂຮງຮຽນມັດທະຍົມສຶກສາ ຢູ່ທີ່ແຂວງບໍລິຄຳໄຊ; ດ້ານວຽກງາການຮ່ວມມື ຄວກ ໄດ້ເຂົ້າຮ່ວມການເຝິກອົບຮົມ ວັດທະນະທຳທາງກີລາ ກັບ ມະຫາວິທະຍາໄລ ລຽວຊູ ປະເທດຍີ່ປຸ່ນ, ລົງນາມການຮ່ວມມືທາງວິຊາການກັບ ມະຫາວິທະຍາໄລສ້າງຄູກີລາ-ກາຍະກຳ ຮ່າໂນ້ຍ ປະເທດຫວຽດນາມ ແລະທົບທວນການຮ່ວມມື ກັບມະຫາວິທະຍາໄລກີລາ ບັກນິງ ປະເທດຫວຽດນາມ, ເດີນທາງໄປສຶກສາການຮ່ວມມືດ້ານວິຊາການ ກັບ ມະຫາວິທະຍາໄລ ຈຸລາລົງກອນ ແລະ ມະຫາວິທະຍາໄລບູລະພາ ປະເທດໄທ.

          ຈາກຜົນງານທີ່ ທາງ ຄວກ ຍາດມາໄດ້, ສົກສຶກສານີ້ ມີພະນັກງານ, ຄູ-ອາຈານ ໄດ້ຮັບການຍ້ອງຍໍຂັ້ນກະຊວງສຶກສາທິການ ແລະກີລາ ຈຳນວນ 28 ທ່ານ, ຍິງ 11 ທ່ານ ແລະ ໄດ້ຮັບການຍ້ອງຍໍຂັ້ນ ມຊ ຈຳນວນ 3 ທ່ານ, ຍິງ 2 ທ່ານ. ໃນພິທີ ຍັງໄດ້ຮັບຟັງ ການອ່ານບົດກອນອວຍພອນຄູ ຈາກຕົວແທນນັກສຶກສາ ແລະມອບພວງມະໄລ ເພື່ອເປັນການສະແດງຄວາມກະຕັນຍູ-ຮູ້ບຸນຄຸນ ແກ່ພະນັກງານ, ຄູ-ອາຈານ ເນື່ອງໃນໂອກາດວັນຄູແຫ່ງຊາດ ວັນທີ 7 ຕຸລາ ຕື່ມອີກ.

ພາບບັນຍາກາດ

ໃນຕອນເຊົ້າວັນທີ 19 ຕຸລາ 2022 ນີ້, ສະຖາບັນຂົງຈື(ສຂຈ) ມະຫາວິທະຍາໄລແຫ່ງຊາດ(ມຊ) ຈັດພິທີສະເຫຼີມສະຫຼອງວັນສະຖາບັນຂົງຈືໂລກ, ສະເຫຼີມສະຫຼອງວັນຄູແຫ່ງຊາດຄົບຮອບ 28 ປີ ແລະ ຈັດພິທີໄຂສົກຮຽນໃໝ່ ຫຼັກສູດປະລິຍາຕີ, ເຂົ້າຮ່ວມໃນພິທີ ມີ  ທ່ານ ປອ.  ສຸລິອຸດົງ ສູນດາລາ  ຮອງລັດຖະມົນຕີ ກະຊວງສືກສາທິການ ແລະກີລາ, ທ່ານ ຈຽງຈ້າຍຕົງ ເອກອັກຄະລັດຖະທູດ ສປ. ຈີນ  ປະຈຳ ລາວ, ທ່ານ ສຈ. ປອ. ຮຸ່ງເພັດ ຈັນທະວົງ ຮອງອະທິການບໍດີ ມຊ, ມີຜູ້ອຳນວຍການສະຖາບັນຂົງຈື ຝ່າຍລາວ, ຝ່າຍຈີນ, ແຂກຖືກເຊີນ ຈາກພາກສ່ວນຕ່າງໆທີ່ກ່ຽວຂ້ອງ ພ້ອມດ້ວຍພະນັກງານ, ຄູ-ອາຈານ ແລະນັກສືກສາເຂົ້າຮ່ວມ.

ໃນໂອກາດນີ້, ທ່ານ ຫຼົວໝິງ ຜູ້ອຳນວຍການສະຖາບັນຂົງຈື ຝ່າຍຈີນ ໄດ້ຂຶ້ນລາຍງານປະຫວັດຄວາມເປັນມາຂອງວັນຂົງຈືໂລກ ຊຶ່ງທ່ານ ໄດ້ໃຫ້ຮູ້ວ່າ: ສະຖາບັນຂົງຈືແມ່ນອົງການຈັດຕັ້ງການສືກສາທີ່ບໍ່ຫວັງຜົນກຳໄລທີ່ສ້າງຕັ້ງຂຶ້ນໃນຮູບແບບຝ່າຍຈີນ ຮ່ວມມືກັບຕ່າງປະເທດ ແນໃສ່ເຜີຍແຜ່ພາສາຈີນ ແລະຊຸກຍູ້ໃຫ້ປະຊາຊົນທົ່ວໂລກ ໄດ້ເຂົ້າເຖິງພາສາ ແລະວັດທະນະທຳຂອງຈີນ ແລະເພື່ອສົ່ງເສີມການແລກປ່ຽນວັນນະຄະດີ ລະຫ່ວາງຈີນ ກັບຕ່າງປະເທດໃຫ້ເຂົ້າໃຈກັນຫຼາຍຂຶ້ນ. ເຊິ່ງໃນແຕ່ລະປີໄດ້ຈັດຫຼາຍກິດຈະກໍາ ເຊັ່ນ: ການແຂ່ງຂັນພາສາຈີນນັກສຶກສາທົ່ວໂລກ, ຂົວພາສາຈີນ, ແຂ່ງຂັນວິດີໂອສັ້ນ, ແຂ່ງຂັນຮ້ອງເພງຈີນ, ແຂ່ງຂັນຂຽນຕົວໜັງສືຈີນ ການອ່ານກະວີຈີນເປັນຕົ້ນ;  ທັງນີ້ກໍເພື່ອ ແນໃສ່ເຮັດໃຫ້ປະຊາຊົນສອງຊາດເຂົ້າໃຈເຊິ່ງກັນ ແລະກັນ.

 ທ່ານ ຄຳຮຸ່ງ ຈັນທະວົງ ຜູ້ອຳນວຍການສະຖາບັນຂົງຈືຝ່າຍລາວ ໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານການສຶກສາປະຈຳສົກຮຽນ 2021-2022 ແລະຜ່ານທິດທາງແຜນການເຄື່ອນໄຫວວຽກງານ ປະຈຳສົກຮຽນ 2022-2023 ເຊິ່ງທ່ານໄດ້ຍົກໃຫ້ເຫັນ ພາລະບົດບາດຂອງສະຖາບັນຂົງຈື ໃນການຮ່ວມມື ແລະແລກປ່ຽນທາງດ້ານການສຶກສາ ການສ້າງຫຼັກສູດເຝິກອົບຮົມລະຫວ່າງປະເທດລາວ ແລະ ສປ.ຈີນ ເວົ້າລວມ; ເວົ້າສະເພາະ ແມ່ນສະຖາບັນຂົງຈື ມຊ ແລະມະຫາວິທະຍາໄລຊົນເຜົ່າກວາງຊີ, ເພື່ອພັດທະນາຊັບພະຍາກອນມະນຸດ ສະຖາບັນຂົງຈື ທີ່ ມຊ, ເຊິ່ງແມ່ນເວທີແລກປ່ຽນວັດທະນະທໍາລະຫວ່າງສອງຊາດລາວ-ຈີນ, ແມ່ນແຫຼ່ງສົ່ງເສີມການຮຽນ-ການສອນພາສາຈີນໃຫ້ແກ່ນັກຮຽນ-ນັກສຶກສາ ແລະຜູ້ສົນໃຈຮຽນພາສາຈີນ, ແມ່ນສະຖາບັນໜຶ່ງ ທີ່ມີກົງຈັກການຈັດຕັ້ງທຽບເທົ່າກັບຄະນະວິຊາ, ໄດ້ຈັດການຮຽນ-ການສອນ ບໍາລຸງພາສາຈີນໃຫ້ແກ່ນັກສຶກສາ ແລະ ຜູ້ທີ່ສົນໃຈຢາກຮຽນພາສາຈີນ. ສິ່ງໜຶ່ງທີ່ເອກອ້າງທະນົງໃຈ ແລະເປັນໃບໜ້າໃບຕາໃຫ້ແກ່ ມຊ ໃນເວທີສາກົນ ກໍແມ່ນສະຖາບັນຂົງຈື ສາມາດເປີດການຮຽນ-ການສອນລະດັບປະລິນຍາຕີ ສາຂາ ຄູພາສາຈີນ ໂດຍຮ່ວມມືກັບ ຄະນະອັກສອນສາດ ແລະຄະນະສຶກສາສາດ ເຊິ່ງເປັນສະຖາບັນແຫ່ງທໍາອິດຂອງໂລກ ທີ່ມີຫຼັກສູດປະລິນຍາຕີເປັນຂອງຕົນເອງ. ນອກຈາກການຮຽນ-ການສອນແລ້ວ, ຍັງຖືໄດ້ວ່າ ສະຖາບັນຂົງຈື ເປັນປະຕູປ່ອງຢ້ຽມໜຶ່ງທີ່ເຮັດວຽກການພົວພັນຮ່ວມມື ກັບ ສປ.ຈີນ ຢ່າງໃກ້ຊິດ, ເຊິ່ງສະແດງໃຫ້ເຫັນຢູ່ບ່ອນວ່າ: ແຂກຈາກ ສປ.ຈີນ ທີ່ມາຢ້ຽມຢາມ ມຊ ແຕ່ລະຄະນະສ່ວນຫຼາຍແມ່ນສະເໜີມາຢ້ຽມຢາມ ສະຖາບັນຂົງຈື. ແຕ່ປີ 2010 ມາຮອດປັດຈຸບັນ ສະຖາບັນຂົງຈື ໄດ້ສໍາເລັດການສິດສອນພາສາຈີນໃຫ້ນັກສຶກສາລາວແລ້ວ 25 ຊຸດ ຈໍານວນ 14.344ຄົນ.

ຈາກນັ້ນ ໄດ້ຮັບຟັງການໂອ້ລົມຈາກ ທ່ານ ສຸລິອຸດົງ ສູນດາລາ ຮອງລັດຖະມົນຕີ ກະຊວງສືກສາທິການ ແລະກີລາ ເພື່ອເປັນເຂັມຊີ້ທິດເຍືອງທາງໃຫ້ສະຖາບັນຂົງຈື ແລະຕອນທ້າຍ ໄດ້ມີພິທີເຊັນສັນຍາສືບຕໍ່ມອບທຶນການສຶກສາຂອງທະນາຄານລາວ-ຈີນໃຫ້ສະຖາບັນຂົງຈືຕື່ມອີກ.

ພາບບັນຍາກາດ